„Gado pasi foe libi” 1998-1999 kongres sa kon heri esi!
NA Amerkankondre wawan, 198 kongres de na tapoe schema foe hori foe mei te nanga september. Na ini Fransi Gajana wán Sranantongo kongres sa hori èn na ini Sranan, toe Sranantongo kongres sa hori. Kande, wan foe den dri dei konmakandra disi sa hori na ini wan foto di no de farawe foe a presi pe joe e tan. Na moro foeroe presi, ibri dei a programa — freida te leki sonde — sa bigin nanga pokoe 9.30 mamanten.
A freida mamanten programa sa tjari bericht kon na fesi foe a go di a Kownoekondre preikiwroko go na fesi na difrenti presi na grontapoe. Èn a themataki „Krestes loesoe-paiman — Gado fasi foe froeloesoe”, sa poti krakti tapoe a thema foe a kongres.
Na bakadina a symposium „Papa nanga mama — Poti a fasi foe Gado dipi go na ini joe pikin”, sa gi rai fa foe boeweigi jongoewan foe lobi èn dini Jehovah. A bakadina programa sa tapoe nanga a lezing „Libi de, baka te wan sma dede?”
Na ini dri pisi di sa kon a wan baka a trawan, a programa foe satra mamanten e poti spesroetoe prakseri tapoe a wroko foe Jehovah Kotoigi foe meki disipel. „Jepi sma foe kon tapoe a pasi foe libi,” „A tjalensi foe doro den sma”, èn „Leri den disipel ala sani di Krestes ben komanderi”. Na a kaba foe a mamanten programa, sani sa sreka gi njoen disipel foe teki dopoe.
A fosi lezing na tapoe satra bakadina, „Dini nanga têgo libi na prakseri,” e gi wi deki-ati foe tan prakseri na ondro begi san na wi eigi reide foe dini Gado. Den taki „Warderi den ’presenti na ini man’, di e leri sma a pasi foe Gado” nanga „A persoonlijkheid — Poeroe na owroewan èn weri a njoenwan” e pristeri wan moro krin vers-foe-vers ondrosoekoe foe Efeisesma kapitel 4. Baka dati, heri moi bijbel froemane sa gi ini a lezing „Hori joesrefi sondro flaka foe grontapoe” èn ini a symposium foe dri pisi „Jongoewan — Teki a pasi foe Gado”. A bakadina programa e tapoe nanga a lezing „A Kriaman — A sma di a de èn den pasi foe en”.
A programa foe sonde mamanten e poti spesroetoe prakseri tapoe wan symposium foe dri pisi di sa taki foe den lasti kapitel foe a bijbelboekoe Esekièl èn so srefi foe a profeitis kontroe foe den. A mamanten programa sa tapoe nanga a drama, di o plèi nanga krosi soleki fa sma ben weri fositen, di gron tapoe a getrowfasi foe den dri Hebrew jonkoeman. A heimarki foe a kongres na bakadina na a poeblikitaki „A wan enkri pasi foe kisi têgo libi”.
Foe troe joe sa kon goedoe na jeje sei efoe joe de drape ala den dri dei. Na wan waran fasi joe e kisi wan switi kari foe de na tapoe ibri programa èn, a no de foe taki dati den sa hori sondro foe meki joe pai. Meki kontakti nanga a Kownoekondre zaal foe Jehovah Kotoigi na ini joe birti noso joe kan skrifi go na den sma di tjari a tijdschrift disi kon na doro foe kon sabi sortoe presi de moro krosibei foe a presi pe joe e tan.