Abi a fasti bosroiti foe waka Gado pasi foe libi

Den „Gado pasi foe libi” kongres ben abi so foeroe sani gi den sma di wani dini Gado! Wan fisitiman foe wan tra kondre ben kari a kongres „wan kefalek moi pisi ten foe kisi leri, deki-ati, èn foe kon froestan sani moro boen”.

WAN tra sma foe wan tra kondre ben taki dati „so foeroe sani ben de foe njan boen foe den, foe prakseri foe den, èn foe teki na ini wi”. Meki wi go loekoe a programa srefi now.

Jesus Krestes — A pasi, a waarheid, nanga a libi

Disi ben de a thema foe a fosi dei foe a kongres (Johanes 14:6). A fosi lezing ben taki foe a reide foe san ede wi kon makandra na a kongres: foe kisi moro leri foe a moro boen fasi foe libi, Gado pasi foe libi. Jehovah e leri en pipel fa den moesoe waka na tapoe den pasi foe en. A e doe dati nanga jepi foe bijbel, „a getrow èn koni srafoe”, èn en santa jeje (Mateus 24:45-47; Lukas 4:1; 2 Timoteus 3:16). Dati na troetroe wan bigi grani foe kisi leri foe a Soeverein foe na universum!

Akroederi a thema foe a dei, a thema taki ben de: „A loesoe-paiman foe Krestes — Gado pasi foe froeloesoe.” Foe libi akroederi Gado pasi foe libi, a de prenspari foe erken a ròl di Jesus Krestes e plèi na ini a prakseri foe Jehovah. A takiman ben taki: „Sondro a froeloesoe-ofrandi foe Jesus Krestes, no wan man, awansi san a e bribi noso san a e doe, ben kan kisi têgo libi foe Gado.” Dan a ben leisi Johanes 3:16 di e taki: „Gado ben lobi grontapoe sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.” Efoe wi wani sori bribi na ini a froeloesoe-ofrandi foe Krestes, dan a de fanowdoe foe abi wan soifri sabi foe waarheid. A wani taki toe foe gi wi libi abra na Jehovah, teki dopoe na ini watra leki wan simbôl foe disi, èn foe libi akroederi na eksempre di Jesus Krestes ben gi. — 1 Petrus 2:21.

A bakadina programa ben bigin nanga wan lezing di nen „A pasi foe lobi no e misi noiti”. Disi ben abi so srefi wan takimakandra foe ibri vers foe a fasi fa Paulus ben taki foe lobi, di skrifi na 1 Korentesma 13:4-8. A poebliki ben kisi a froemane taki a lobi di sma abi foe òfer densrefi, na wan marki foe krestendom, èn taki lobi gi Gado èn gi den sma na wi sei na prenspari pisi foe na anbegi di Jehovah e feni boen.

Baka dati wan symposium foe dri pisi ben de, di nen: „Papa nanga mama — Poti a pasi foe Gado go dipi na ini oen pikin.” Papa nanga mama kan jepi den pikin foe den foe dini Gado te densrefi e gi wan boen eksempre foe leisi en Wortoe èn studeri en. Den kan poti a waarheid go dipi na ini den pikin foe den nanga jepi foe doronomo osofamiri studie, èn kenki en akroederi a fanowdoe foe na osofamiri. A de prenspari toe foe jepi den pikin foe abi prati na den wroko di e doe na ini a gemeente èn na ini a velddienst. Ala di a de wan tjalensi foe kweki pikin di abi frede gi Gado na ini a godelowsoe grontapoe disi, tokoe a e gi bigi pai te wi e doe dati.

Na baka a symposium disi a lezing ben de „Meki Jehovah wroko na joe tapoe èn gebroiki joe na wan warti fasi”. Neleki fa wan patoe-bakriman e wroko a klei patoe foe meki en fa a wani, na so Gado e wroko na den wan tapoe di wani dini en (Romesma 9:20, 21). A e doe disi te a e gi rai na ini en Wortoe èn nanga jepi foe en organisâsi. Jehovah sa jepi wi foe gebroiki wi bekwaamfasi dorodoro efoe wi e gi wisrefi, e gebroiki den okasi di de, èn te wi de klariklari foe meki En sori wi fa wi moesoe waka.

Wan moi pisi foe a programa ben kon now — „Diniwroko tapoe a kontren foe zendeling-wroko”. Nownowde na heri grontapoe na ini 148 kondre, 2390 kresten bedinari e dini leki zendeling. Den e gi wan kefalek boen eksempre foe de loyaal èn foe abi faja èn den e warderi a grani di den abi foe dini na ini dorosei kondre srefisrefi. Na ini a pisi disi foe a programa na den internationaal kongres, den zendeling ben taki foe den tjalensi nanga den prisiri foe a zendeling libi.

A lasti lezing na tapoe a fosi dei ben abi a titel: „Libi de, baka te wan sma dede?” Na aksi disi broeja libisma doesoendoesoen jari kaba. Sma na ini ibri libimakandra abi moeiti foe froestan a tori disi. So-kari piki no e mankeri. Den e difrenti so kefalek leki den gwenti nanga den relisi foe den sma di e gi piki na tapoe den aksi. Ma sma moesoe leri a waarheid.

Foe dati ede, a takiman ben meki bekènti taki wan njoen brochure di abi foeroe kloroe ben kon na doro, San e pasa nanga wi te wi dede? A brochure disi e sori fa a leri taki a sili no man dede ben bigin èn e sori fa na idea ben kon tron prenspari srefisrefi na ini pikinmoro ala relisi na grontapoe na ini a ten disi. Na wan krin fasi èn na wan fasi di e hari sma prakseri a e ondrosoekoe san bijbel e taki foe a sili, foe san ede wi e dede, èn san e pasa nanga wi te wi dede. A brochure e tjari kon na krin toe sortoe howpoe de gi den dedesma èn gi den sma di de na libi. A poeblikâsi disi sa de wan troetroe blesi gi sma na ala presi di e soekoe waarheid!

Loekoe boen fa oenoe e waka

Disi ben de wan joisti thema srefisrefi gi a di foe toe dei foe a kongres! (Efeisesma 5:15) A mamanten programa ben poti prakseri na tapoe a preikiwroko èn a wroko foe meki disipel. Na baka a takimakandra foe a deitekst, a programa ben go doro nanga a lezing „Jepi sma foe kon na tapoe a pasi foe libi”. Te wi e doe a toemoesi prenspari wroko disi, a de prenspari foe abi wan positief denki, èn erken taki a de wan grani èn so srefi wan plekti foe prati a waarheid nanga tra sma. Na ini a fosi jarihondro G.T., moro foeroe sma no ben erken a Wortoe foe Gado. Ma ala di gens ben de, tokoe sma ben de ’di abi a joisti jeje gi a têgo libi èn den ben tron bribiman’ (Tori foe den Apostel 13:48, 50; 14:1-5). A situwâsi de a srefi na ini a ten disi. Ala di foeroe sma no e erken a bijbel waarheid, tokoe wi e go doro foe soekoe den wan di sa handri boen na tapoe en. — Mateus 10:11-13.

A tra lezing ben taki foe a tjalensi di de foe miti tra sma nanga a boskopoe foe libi. Foe di a moro moeilek now foe miti sma na oso, dan wi moesoe wroko finifini èn gebroiki tra fasi efoe wi wani miti so foeroe sma leki wi man nanga a Kownoekondre boskopoe. Na ini foeroe kondre den preikiman foe a boen njoensoe e kisi moi bakapisi nanga telefon kotoigi èn te den e preiki na ini bisnis kontren, èn na so fasi den e miti sma di moeilek foe miti na tra fasi.

A lezing di abi a titel „Leri disipel ala san Krestes ben komanderi” ben poti prakseri na tapoe a prenspari di a de prenspari foe kon tron bekwaam na ini wi diniwroko. Den bekwaamfasi foe wi foe gi leri e kon moro boen te wi e leri foe tra sma èn e gebroiki a toemoesi boen leri di wi e kisi na den gemeente konmakandra. Te wi e kon bekwaam foe gi leri, dan wi e feni moro prisiri nanga satisfaksi na ini wi wroko foe jepi sma kon sabi a bijbel waarheid.

A mamanten programa ben tapoe nanga wan lezing di ben taki san a gi di wan sma e gi ensrefi abra na Gado èn e teki dopoe, wani taki. Wan foe den penti di a takiman ben tjari kon na krin ben de taki efoe wi e froetrow tapoe Gado dorodoro èn wi e doe serjoesoe moeiti foe doe a wani foe en, dan a sa blesi wi èn jepi wi. A koni man ben skrifi: „Poti prakseri na tapoe [Gado] na ini ala joe pasi, èn ensrefi sa meki joe pasi kon reti” (Odo 3:6). A prisiri foe a dopoe srefi ben de wan heimarki foe a kongres di e sori taki foeroe sma ben bigin foe tjari den libi akroederi Gado pasi foe libi.

Na baka wan pauze na brekten, a bakadina programa ben bigin nanga a lezing „Dini nanga a froewakti foe têgo libi na prakseri”. A prakseri di Gado abi taki libisma di e gi jesi moesoe dini en foe têgo na grontapoe, sa kon troe. A e fiti srefisrefi foe dati ede taki wi e poti ala wi prakseri, den plan foe wi, nanga den howpoe foe wi tapoe a dini di wi sa dini Jehovah nanga a froewakti foe têgo libi na prakseri! Ala di wi wani hori „a dei foe Jehovah” boen na prakseri, a de toemoesi prenspari foe hori na prakseri taki a marki foe wi na foe dini foe têgo (2 Petrus 3:12). Foe di wi no sabi a joisti ten te Jesus sa teki refensi gi Jehovah, meki dati moesoe meki wi de na ai èn dati e gi wi na okasi ibri dei foe boeweisi taki wi no e dini Jehovah nanga wi eigi wini nomo na prakseri.

Den toe lezing di ben kon baka dati ben ondrosoekoe a di foe fo kapitel foe a brifi foe Paulus gi den Efeisesma. Wan foe den sani di den ben taki ben de a blesi di wi abi foe „den presenti na ini libisma”, man di abi bekwaamfasi na jejefasi èn di santa jeje poti na wroko. Den owroeman disi e gi rai nanga tiri gi a boen foe wi na jejefasi. A brifi foe Paulus di skrifi nanga jepi foe santa jeje e gi kresten a deki-ati toe foe weri „a njoen fasi fa wan sma de” (Efeisesma 4:8, 24). Den eigifasi foe Gado de so srefi sari-ati, switifasi, sakafasi foe jeje, safri-atifasi, langa pasensi, nanga lobi. — Kolosesma 3:12-14.

Foe loekoe boen fa wi e waka, wani taki toe foe no meki grontapoe flaka wi — disi ben de a thema foe a tra lezing. Balansifasi de fanowdoe te wi e teki ontspanning, te wi abi sociaal demakandra, èn te wi e feti na baka materia sani. Te wi e gebroiki a rai na Jakobus 1:27 foe no meki grontapoe flaka wi, dan wi sa abi wan boen nen na Gado èn wan boen konsensi. Wi kan libi so srefi wan libi di abi wan marki èn wi sa blesi nanga vrede, gro na jejefasi, èn nanga heri boen kompe.

Dan wan symposium foe dri pisi ben kon nanga a titel „Jongoewan — Waka Gado pasi foe libi”. Foe di den jongoewan sabi taki Gado lobi den èn e warderi den moeiti di den e doe foe horibaka gi a troe anbegi, meki den moesoe oefen a koni di den abi foe si sani krin so taki den kan dini En na wan getrow fasi. Wan fasi foe kisi a koni foe si sani krin na foe leisi Gado Wortoe ibri dei èn prakseri dipi foe en. Te wi e doe dati dan wi kan kon sabi den pasi foe Jehovah (Psalm 119:9-11). A koni foe si sani krin e gro toe te wi e teki lepi rai foe papa nanga mama, den owroeman, èn foe den poeblikâsi foe a Genootschap. Te den jongoewan e gebroiki a koni di den abi foe si sani krin na wan joisti fasi, dan den kan kakafoetoe gi a broko di sma e broko den ede toemoesi gi materia goedoe, e taki dotitaki, èn abi toemoesi foeroe ontspanning, di de wan marki foe a grontapoe disi di no sabi Gado. Te jongoewan nanga owroewan e waka Gado pasi foe libi, dan den libi kan waka boen na ini den libi troetroe.

A lasti lezing foe a dei ben de „A Kriaman — A fasi fa a de èn den pasi foe en”. Baka di a ben taki dati miljardmiljard sma no sabi a Kriaman, a takiman ben taki: „Foe abi wan troetroe marki na ini a libi, abi foe doe nanga a sabi di wi sabi a Kriaman, a Gado foe wi di abi eigifasi; sabi fa a de; èn wroko makandra nanga den fasi foe en. . . . Troetori de di abi foe doe nanga a grontapoe foe wi èn nanga wi, di joe kan gebroiki foe jepi sma foe erken a Kriaman èn foe feni wan troetroe marki na ini a libi di abi foe doe nanga En.” Dan a takiman ben taki foe boeweisi di e sori taki wan koni èn lobi-ati Kriaman de. A lezing ben doro en heimarki di a njoen boekoe Is er een Schepper die om u geeft? (Wan Kriaman de di e broko en ede nanga joe?), tjari kon na doro.

„Disi na a pasi. Waka na tapoe”

Disi ben de a thema foe a di foe dri dei foe a kongres (Jesaja 30:21). A programa ben bigin nanga wan span symposium foe dri lezing, di ben e poti prakseri na tapoe a tempel fisjoen foe Esekièl. A fisjoen disi wani taki foeroe gi a pipel foe Jehovah na ini a ten disi, foe di a e taki foe a soifri anbegi na ini a ten foe wi. Wan sroto foe froestan a fisjoen disi, na disi: A bigi jeje tempel foe Jehovah na a seti foe en gi a soifri anbegi. Di den ben taki foe den pisi foe a fisjoen, dan den arkiman ben e prakseri foe a wroko di den e doe foe horibaka gi a wroko di lobi-ati opziener foe a salfoe fikapisi e doe èn den wan di kan tron memre foe na edeman groepoe.

Moro lati na mamanten, wan moi bijbel drama ben de nanga wan groepoe preiman di weri fositen krosi. A drama ben abi a titel: „Osofamiri — Meki a leisi di oenoe e leisi bijbel ibri dei de wan fasi foe libi!” A ben sori a bribi nanga a deki-ati foe den dri Hebrewsma di ben weigri foe boigi gi a gowtoe popki di kownoe Nebukadnesar foe Babilon ben meki. A marki foe a drama ben de foe sori taki bijbel a no wan boekoe di e taki foe owroeten historia nomo, ma taki a rai foe en abi troetroe wini gi jongoewan nanga gi bigisma na ini a ten disi.

A bakadina programa ben de a ten gi a poeblikitaki „A wan-enkri pasi foe kisi têgo libi”. Baka di a ben taki fa a doe kon taki libisma ben sondoe èn dede, a takiman ben tapoe nanga den wortoe disi di e meki sma e prakseri: „A bijbeltekst di de a thema gi a dei disi foe a kongres, na Jesaja kapitel 30, vers 21, di e taki: „Oen eigi jesi sa jere wan wortoe na oen baka di e taki: ’Disi na a pasi. Waka na tapoe, oen pipel’, efoe oenoe moesoe go na oen reti-anoesei noso efoe oenoe moesoe go na oen kroektoe-anoesei.” Fa wi e jere a sten disi? Dati na te wi e arki a Wortoe foe Gado, a Santa Bijbel, èn te wi e waka na baka a tiri di wi Gran Leriman, Jehovah Gado, e gi nanga jepi foe en Wortoe èn nanga jepi foe en disiten kresten organisâsi. Ija, foe doe disi na a wan-enkri pasi foe kisi têgo libi.

Na baka na overzicht foe a Waktitoren-studie artikel gi a wiki, dan a lasti lezing ben kon di ben abi a titel „Tan waka na tapoe a pasi foe Jehovah”. Wan pisi foe a lezing ben taki sjatoe foe den edepenti foe a programa. Dan a takiman ben pristeri wan resolutie di e taki foe a fasti bosroiti di wi abi foe tan waka na tapoe a pasi foe Gado.

A resolutie ben tapoe nanga den wortoe disi di ben gi deki-ati: „Wi abi na overtoigi taki, te wi e libi akroederi den gronprakseri, den rai nanga den froemane foe bijbel, taki dati na a moro boen fasi foe libi na ini a ten disi èn a e poti wan boen fondamenti gi a tamara, so taki wi kan hori a troetroe libi steifi. Ma a moro prenspari sani foe san ede wi e teki a bosroiti disi, na foe di wi lobi Jehovah Gado nanga wi heri ati, sili, froestan nanga krakti!” Ala sma di ben de drape ben taki dati den ben agri di den ben taki tranga Ija!

[Faki/​Prenki na tapoe bladzijde 8]

Is er een Schepper die om u geeft? (Wan Kriaman de di e broko en ede nanga joe?)

A njoen boekoe di abi a titel disi, e gi tranga boeweisi taki a Kriaman, Jehovah, e bèsta, èn a e taki foe den eigifasi foe en. A meki spesroetoe gi den sma di abi boen grontapoe leri, ma di no e bribi na ini Gado. A boekoe disi di abi 192 bladzijde sa tranga a bribi toe foe den sma di e bribi kaba na ini Gado, foe di a e tranga a warderi di den abi gi den fasi foe en èn den pasi foe en.

Is er een Schepper die om u geeft? no e taki na fesi kaba taki a leisiman moesoe bribi na ini Gado. Na presi foe dati, a e taki fa disiten sani di sabidensiman ben kon feni èn den idea foe den, e boeweisi taki a Kriaman e bèsta. Wan toe foe den kapitel abi leki titel „San kan meki joe libi abi moro warti?”, „Fa na universum foe wi doe kon de? — A streipenti”, èn „Joe aparti srefisrefi!” Tra kapitel e taki foe san ede wi kan de seiker taki bijbel skrifi nanga jepi foe Gado en santa jeje. A njoen boekoe e sori so srefi na wan sjatoe fasi fa bijbel tan, èn e tjari a fasi fa a Kriaman de èn den pasi foe en, kon na krin. A boekoe no e taki wawan foe san ede Gado gi pasi meki so foeroe pina de, ma a e froeklari toe fa a sa tjari wan kaba kon na dati, foe têgo.

[Prenki na tapoe bladzijde 7]

Foeroe sma ben teki dopoe

[Prenki na tapoe bladzijde 7]

A. D. Schroeder, wan memre foe a Tiri Skin foe Jehovah Kotoigi, ben tjari a njoen brochure kon na doro

[Prenki na tapoe bladzijde 8, 9]

Wan span drama ben gi deki-ati foe leisi bijbel ibri dei