Kon de wán na ini a moro boen pasi foe libi
Efoe den sma di e libi na grontapoe e tan kon moro foeroe, dan heri esi siksi miljard sma sa de na grontapoe. Ala di den alamala e kon foe a srefi fositen tata, tokoe moro foeroe foe den no e erken taki den na memre foe wan famiri na heri grontapoe di moesoe gi frantiwortoe na wan koni èn lobi-ati Kriaman. A pratifasi di de na mindri nâsi èn a strei di de na den mindri, na mindri ras, èn na mindri koeltoeroe, e gi takroe boeweisi foe a sari situwâsi disi.
TE WI e prakseri a disiten situwâsi na grontapoe, a kan gersi wan marki di sma no man doro foe tjari wánfasi kon na heri grontapoe. The Columbia History of the World e taki: „Na tapoe a toemoesi prenspari aksi fa wi moesoe libi nanga makandra, a disiten grontapoe no abi no wan njoen idea srefisrefi, no wán.”
Ma wan njoen idea no de fanowdoe foe tjari wánfasi kon na mindri ala sma di e libi na grontapoe. A fasi foe kisi wánfasi skrifi poti na ini den Santa Boekoe foe bijbel. A e poti prakseri na tapoe na anbegi foe a Sma di ben kria grontapoe èn ala libi na tapoe grontapoe. Troetroe wánfasi na ini prakseri, marki, nanga fasi foe libi de kaba na mindri a pipel foe Gado. Den moro leki feifi nanga afoe miljoen sma di de na ini 233 kondre, kon de wán na ini a bribi foe den taki Gado pasi foe libi na a moro boen pasi. Leki a psalm singiman den e begi: „Leri mi, o Jehovah, foe den pasi foe joe. Mi sa waka na ini joe waarheid. Meki mi ati kon de wán foe kan frede joe nen.” — Psalm 86:11.
A tjari di sma ben o tjari kon na ini wánfasi na ini a soifri anbegi, ben taki langa ten na fesi kaba nanga jepi foe a profeiti Jesaja. A ben skrifi: „A moesoe pasa na ini den kaba pisi foe den dei taki a bergi foe na oso foe Jehovah sa poti kon steifi moro hei leki na ede foe den bergi, èn foe troe den sa opo En kon moro hei leki den pikin bergi; èn na en ala den nâsi moesoe go. Èn foe troe, foeroe pipel sa go èn taki: „Kon, meki wi opo go na a bergi foe Jehovah, na a oso foe a Gado foe Jakob; èn a sa leri wi foe den pasi foe en, èn wi sa waka na tapoe den foetoepasi foe en.” — Jesaja 2:2, 3.
A wánfasi foe Jehovah Kotoigi de aparti. Na ini moro leki 87.000 gemeente na heri grontapoe, den e gebroiki a srefi jeje njanjan na den konmakandra foe den, ibri wiki (Mateus 24:45-47). Ma bigin na mindri foe a jari 1998 te go miti a bigin foe a jari 1999, den Kotoigi ben sori a wánfasi foe den na wan tra fasi — di den ben kon makandra na den dri dei „Gado pasi foe libi” kongres na heri grontapoe. Na ini 13 kondre den konmakandra disi ben abi so srefi groepoe sma foe difrenti kondre èn den kongres disi ben nen internationaal kongres. Den tra kongres ben kari distriktkongres. Ma ala den kongres disi ben gi a srefi programa foe boen sani na jejefasi.
O switi a ben de foe si prisiri sma di ben weri boen krosi, e waka na ipi-ipi go na den zaal nanga den stadion foe kisi leri foe Jehovah! Wan moi eksempre ben de den wortoe foe wan foe den sma disi foe tra kondre gi na internationaal kongres di ben hori na ini Michigan, Amerkankondre. A ben taki: „A ben gi foeroe prisiri foe si wi brada di komoto na ala presi foe grontapoe — Tjekia Republiek, Barbados, Nigeria, Hongaria, Ingrisikondre, Bakrakondre, Etiopia, Kenia, nanga foeroe tra kondre — ben e brasa makandra! A ben de kefalek moi foe si brada e libi nanga makandra na ini wánfasi, di den ben e krei foe prisiri ede, bika foe a lobi di den abi gi makandra èn gi a bigi Gado foe den, Jehovah.” A tra artikel sa ondrosoekoe a kongres programa di miljoenmiljoen sma na heri grontapoe ben njan boen foe en.
[Sma di abi a reti foe a prenki na tapoe bladzijde 3]
Mountain High Maps® Copyright © 1997 Digital Wisdom, Inc.