Bijbel — Wan toemoesi aparti boekoe

Sma kari en a boekoe di e seri moro foeroe na grontapoe leki iniwan tra boekoe, èn a abi reti na tapoe dati. Sma e leisi bijbel moro foeroe leki ini wan tra boekoe èn sma e warderi en moro leki iniwan tra boekoe. Te na a dei disi, a nomroe di prati (a heri bijbel noso na ini pisi), sma bereken taki a de pikinmoro fo miljard eksemplaar na ini moro leki 2000 tongo.

A sani di e wiki a belangstelling foe sma moro foeroe, leki a gemiddeld nomroe foe den bijbel di prati, na a froeklari di a e froeklari taki na Gado skrifi en. „Na Gado ben meki sma skrifi ala den Boekoe foe bijbel nanga jepi foe en santa jeje”, na so a kresten apostel Paulus ben skrifi (2 Timoteus 3:16). San disi wani taki? Den wortoe ’Na Gado ben meki sma skrifi nanga jepi foe en santa jeje’ (Grikitongo, the·oʹpneu·stos) wani taki troetroe „na Gado bro”. Wan Griki wortoe di abi foe doe nanga dati, pneuʹma, wani taki „jeje”. So boen, a froeklari wani taki dati a santa jeje foe Gado ben boeweigi den libisma skrifiman, ben e bro na den tapoe, foe taki en so, so taki te foe kaba, sma ben kan taki troetroe taki den sani di den ben skrifi, na a Wortoe foe Gado, no a wortoe foe libisma. Ija, foeroe sma di studeri bijbel e froewondroe foe a wánfasi di de na ini a heri bijbel, a de di a de soifri akroederi a sabidensi, na eerlijkfasi foe den skrifiman èn a kibri di den no ben kibri no wan sani, èn moro prenspari, den profeititori foe en di kon troe — ala den sani disi overtoigi miljoenmiljoen leisiman di e denki foe sani, taki a boekoe disi kon foe wan fonten di de moro hei leki libisma.a

Ma o soifri Gado ben tiri a skrifi di sma ben e skrifi bijbel? Son sma e taki dati Gado ben kari ibri wortoe foe bijbel di sma ben moesoe skrifi. Tra sma e taki dati a ben gebroiki en santa jeje soso gi den prakseri di de na ini bijbel, no gi den wortoe. Ma troetroe, no na tapoe wán fasi nomo Gado ben gebroiki en santa jeje, bika Gado ben taki ’na difrenti fasi nanga den afo foe wi nanga jepi foe den profeiti’ (Hebrewsma 1:1; teki gersi 1 Korentesma 12:6). Na ini na artikel di e kon now, wi sa ondrosoekoe den fasi fa Gado ben taki nanga den pikinmoro 40 libisma skrifiman di ben skrifi bijbel.

[Foetoewortoe]