Meki a brada lobi foe oenoe tan!
„Meki a brada lobi foe oenoe tan.” — HEBREWSMA 13:1.
1. San joe ben sa doe foe meki wan faja tan bron na wan kowroe neti, èn san na a srefi sortoe frantiwortoe di wi alamala abi?
A KOWROE kefalek na dorosei, èn wantronso a e kon moro kowroe. A wan-enkri presi na ini joe oso pe joe kan kisi waran, na a faja di e bron na ini a brantimiri. Libi e anga foe a meki di joe e meki a faja tan bron. Joe sa sidon nomo e loekoe fa den flam e dede gowe èn a redi foe den krofaja e kon swaki safrisafri, te leki den kon tron soso asisi? Kwetikweti. Sondro foe weri joe e tan poti moro krofaja foe meki a faja tan bron. Na wán noso tra fasi, ibriwan foe wi abi wan srefi sortoe wroko te joe teki en gersi nanga wan moro prenspari „faja” — a wán di moesoe bron na ini wi ati — lobi.
2. (a) Foe san ede wi ben sa kan taki dati lobi kon kowroe na ini den lasti dei disi? (b) O prenspari lobi de gi troe kresten?
2 Wi e libi na ini wan ten pe, soleki fa Jesus ben taki langaten na fesi kaba, lobi na heri grontapoe e kon kowroe na mindri sma di taki dati den na kresten (Mateus 24:12). Jesus ben sori go na a moro prenspari sortoe lobi, a lobi gi Jehovah Gado èn gi bijbel, a Wortoe foe en. Tra sortoe lobi e go na baka toe. Bijbel ben taki na fesi dati na ini „den lasti dei”, foeroe sma ben o de di no ben o abi „natuurlijk firi foe lobi” (2 Timoteus 3:1-5). Dati troe srefisrefi! Na osofamiri moesoe de wan presi pe natuurlijk firi foe lobi de, ma srefi drape, ogri di e doe nanga tranga nanga meshandri — son leisi na wan kefalek ogri-atifasi — kon tron wan aladei sani. Ma tokoe, na ini a grontapoe disi pe lobi kon kowroe, kresten e kisi a komando taki den no moesoe abi lobi gi makandra wawan, ma den moesoe abi wan lobi foe òfer densrefi, foe di den e poti trawan fosi densrefi. Wi moesoe sori a lobi disi so krin, taki ala sma moesoe man si en, èn na so wan fasi a moesoe tron a marki foe kon sabi a troe kresten gemeente. — Johanes 13:34, 35.
3. San na brada lobi, èn san a wani taki foe meki disi tan?
3 Na ondro a krakti foe Gado en santa jeje, na apostel Paulus ben komanderi: „Meki a brada lobi foe oenoe tan” (Hebrewsma 13:1). Soleki fa wan akademia boekoe e taki, dan a Griki wortoe di vertaal djaso nanga „brada lobi” (fi·la·delʹfi·a) „e sori go na a firi foe lobi, a sori foe switifasi, firi gi trawan, foe gi jepi”. Èn san na apostel Paulus ben abi na prakseri di a ben taki dati wi moesoe meki a sortoe lobi dati tan? „Noiti a moesoe kon kowroe”, na so a srefi boekoe dati e taki. Dati meki a firi di wi e firi lobi gi den brada foe wi a no ala sani; wi moesoe sori en. Moro fara, wi moesoe meki a lobi disi tan, èn noiti wi no moesoe meki a kon kowroe. Dati de wan tjalensi? Ija, ma a jeje foe Jehovah kan jepi wi foe kweki brada firi foe lobi èn foe meki a tan. Kon meki wi loekoe dri fasi foe meki a faja disi foe lobi na ini wi ati, kon moro tranga.
Sori firi gi trawan
4. San na a firi gi trawan?
4 Efoe joe wani abi moro lobi gi den kresten brada nanga sisa foe joe, dan kande joe moesoe abi firi gi den fosi, firi gi den te den e kisi foe doe nanga tesi nanga problema na ini a libi. Na apostel Petrus ben gi disi leki rai di a ben skrifi: „Oen alamala moesoe abi a srefi fasi foe denki, sori firi gi trawan, abi brada lobi, abi safoe sari-atifasi, abi wan jeje foe sakafasi” (1 Petrus 3:8). A Griki wortoe di ben gebroiki dja gi a sori di wi moesoe sori „firi gi trawan” wani taki foe „pina makandra nanga”. Wan boekoe di e taki foe a Grikitongo foe bijbel e taki foe a wortoe disi: „A e taki foe a fasi fa wi e denki te wi sabi san trawan e firi neleki den firi ben sa de wi eigi firi.” Foe dati ede, a de fanowdoe foe abi firi gi trawan. Wan getrow foetoeboi foe Jehovah di owroe kaba, ben taki wan leisi: „Firi gi trawan na a pen foe joe di mi e firi na ini mi ati.”
5. Fa wi doe sabi taki Jehovah abi firi gi trawan?
5 Jehovah abi a firi dati gi trawan? Seiker. Foe eksempre, wi e leisi foe a pina di en pipel Israèl ben pina: „Na ini ala den banawtoe foe den, a ben banawtoe toe” (Jesaja 63:9). Jehovah no ben si soso den problema foe den; a ben firi gi a pipel toe. O tranga Jehovah ben firi gi den, e kon na krin na ini en eigi wortoe di a ben taigi a pipel foe en a sani di skrifi na ini Sakaria 2:8: „A sma di e fasi oenoe, e fasi a popki foe mi ai.”a Wan sabiman di e froeklari sani e taki foe a vers disi: „Na ai na wan foe den moro frekti èn moro finifini stroektoeroe na ini a libisma skin; èn a popki foe na ai — a presi pe a leti foe hemel e kon na inisei so taki wan sma kan si — na a moro prenspari pisi foe na ai, èn a e firi sani moro esi. No wan sani kan sori moro boen san na a prakseri di abi foe doe nanga kefalek dipi firi di Jehovah abi gi sani di a lobi.”
6. Fa Jesus Krestes sori firi gi trawan?
6 Jesus srefi sori dipi firi gi trawan ala ten. Ibritron baka „a ben firi sari” foe a takroe situwâsi foe tra libisma, di ben siki noso di ben abi problema (Markus 1:41; 6:34). A ben sori taki te wan sma no e handri nanga den salfoe bakaman foe en na wan switifasi, dan a de neleki a sma ben handri nanga ensrefi na a fasi dati (Mateus 25:41-46). Èn foe di en na wi hemel „granpriester” na ini a ten disi, meki en de a sma di „kan firi gi den swakifasi foe wi”. — Hebrewsma 4:15.
7. Fa a firi gi trawan ben sa kan jepi wi te wan brada noso wan sisa e meki wi mândi?
7 „Firi gi den swakifasi foe wi” — dati a no wan prakseri di e trowstoe wi? Seiker, èn foe dati ede wi wani doe a srefi gi makandra. A no de foe taki, dati a de moro makriki foe si den swakifasi foe trawan (Mateus 7:3-5). Ma wan tra leisi te wan brada noso wan sisa e meki joe mândi, dan foe san ede joe no e proeberi a sani disi? Prakseri taki joe de na ini a situwâsi dati foe a sma, nanga a srefi background dati, densrefi eigifasi dati, den srefi fowtoe dati di a abi èn di a moesoe feti nanga den. Joe kan de seiker taki joe no ben o meki den srefi fowtoe — noso meki moro ogri fowtoe srefi kande? Na presi taki wi e froewakti toemoesi foeroe foe trawan, wi moesoe sori firi gi trawan, san sa jepi wi foe de reidelek neleki Jehovah, di ’e memre taki wi na doti’ (Psalm 103:14; Jakobus 3:17). A sabi san wi kan doe noso no kan doe. Noiti a e froewakti moro foe wi leki san wi kan doe na wan reidelek fasi. (Teki gersi 1 Kownoe 19:5-7.) Meki wi alamala sori a sortoe firi dati gi trawan.
8. San wi moesoe doe te wan brada noso wan sisa abi wan problema?
8 Paulus ben skrifi taki a gemeente de neleki wan skin di abi difrenti memre di moesoe wroko makandra na ini wánfasi. A ben taki moro fara: „Efoe wan memre e pina, dan ala tra memre e pina nanga en” (1 Korentesma 12:12-26). Wi moesoe pina makandra nanga, noso abi firi gi, den sma di abi a wan noso tra problema. Den owroeman e teki fesi na ini disi. Paulus ben skrifi toe: „Soema swaki, èn mi no swaki? Soema naki foetoe fadon, èn mi no e kisi hebi atibron?” (2 Korentesma 11:29) Na ini disi, owroeman nanga opziener di e rèis e teki na eksempre foe Paulus. Na ini den lezing foe den, na ini a skapoemanwroko foe den, èn srefi na ini a fasi fa den e handri kroetoe afersi, den e doe moeiti foe sori firi gi trawan. Paulus ben rikomanderi: „Krei nanga sma di e krei” (Romesma 12:15). Te den skapoe e si taki den skapoeman abi troetroe firi gi den, taki den e froestan san den skapoe kan doe noso san den no kan doe, èn taki den abi firi gi den te problema e miti den, dan nofotron a de moro makriki gi den skapoe foe teki rai, tiri, nanga tranga leri. Den e go na den konmakandra nanga moro faja, ala di den abi a froetrow taki den sa feni ’kowroe-ati gi den sili foe den’. — Mateus 11:29.
Sori warderi
9. Fa Jehovah e sori taki a e warderi a boen di de na ini wi?
9 Wan di foe toe fasi foe meki brada lobi kon moro tranga, de nanga jepi foe warderi. Efoe wi e warderi trawan, dan wi moesoe poti prakseri na tapoe èn abi warderi gi den boen eigifasi foe den èn den moeiti di den e doe. Te wi e doe dati, dan wi e teki na eksempre foe Jehovah srefi (Efeisesma 5:1). Ala dei a e gi wi pardon foe someni pikinpikin sondoe. A e gi wi pardon srefi foe serjoesoe sondoe so langa wi abi troetroe berow. Èn efoe a e gi wi pardon kaba, dan a no e tan prakseri den (Esekièl 33:14-16). A psalm singiman ben aksi: „Efoe na fowtoe joe ben loekoe, o Jah, o Jehovah, dan soema ben kan tan tanapoe?” (Psalm 130:3) Den sani di Jehovah e poti prakseri na tapoe na den boen sani di wi e doe te wi e dini en. — Hebrewsma 6:10.
10. (a) Foe san ede a de wan kefalek sani gi trowpatna foe lasi a warderi di den abi gi makandra? (b) San wan sma moesoe doe di e lasi a warderi di a abi gi a trowpatna foe en?
10 Spesroetoe na ini na osofamiri a de prenspari foe teki na eksempre disi. Te papa nanga mama e sori taki den e warderi makandra, dan den e gi wan boen eksempre na a osofamiri. Na ini a ten disi pe trowlibi no e hori langa, a de toemoesi makriki foe si wan trowpatna leki somaar èn foe meki fowtoe sori moro bigi èn foe no poti prakseri na tapoe boen eigifasi. A sortoe negatief fasi foe denki dati e pori wan trowlibi, èn e meki a tron wan hebi di no e gi prisiri. Efoe a warderi di joe abi gi joe trowpatna e go na baka, dan aksi joesrefi: ’A patna foe mi troetroe de sondro boen eigifasi?’ Prakseri baka foe san ede joe ben bigin lobi en èn ben trow nanga en. Ala den reide disi foe lobi na aparti sma disi, gowe troetroe? Kwetikweti; so boen, doe ala moeiti foe warderi a boen di de na ini joe patna, èn taki foe a warderi di joe abi. — Odo 31:28.
11. Sortoe sani wan sma no moesoe doe, te a wani taki a lobi na ini a trowlibi moesoe de sondro hoigrifasi?
11 Warderi e jepi trowpatna toe foe abi wan lobi di no e hoigri. (Teki gersi 2 Korentesma 6:6; 1 Petrus 1:22.) Efoe sma abi so wan lobi, di e kon moro tranga te troetroe warderi de, dan presi no sa de gi a fasi fa sma handri makandra na wan ogri-ati fasi te trawan no e si, presi no sa de gi wortoe di e hati sma èn di e broko sma saka, presi no sa de gi a teki di patna no e teki notisi foe makandra, ala di foeroe dei e pasa kande sondro wan switi wortoe e taki, èn presi no sa de kwetikweti gi a meshandri na skin sei (Efeisesma 5:28, 29). Wan masra nanga wan wefi di e warderi makandra troetroe, e gi makandra grani. Den e doe dati no wawan te den de nanga tra sma, ma na awansi sortoe ten Jehovah man si den — nanga tra wortoe, ala ten. — Odo 5:21.
12. Foe san ede papa nanga mama moesoe sori taki den e warderi a boen di de na ini den pikin foe den?
12 Pikin moesoe abi a firi toe taki sma e warderi den. No taki papa nanga mama moesoe prèise den pasa marki nanga wortoe di no wani taki noti, ma papa nanga mama moesoe prèise den boen eigifasi foe den pikin foe den èn den troetroe boen di den e doe. Memre na eksempre foe Jehovah di a ben sori taki a ben feni Jesus boen (Markus 1:11). Memre na eksempre foe Jesus toe, leki a „meester” na ini wan agersitori. A ben prèise toe ’boen èn getrow srafoe’ na a srefi fasi, ala di wan difrenti ben de na ini san ibriwan foe den ben gi èn wan difrenti ben de toe na ini den bakapisi di ibriwan foe den ben abi. (Mateus 25:20-23; teki gersi Mateus 13:23.) Na a srefi fasi, koni papa nanga mama e feni fasi foe sori taki den e warderi den aparti eigifasi, bekwaamfasi, nanga sani di ibri pikin e doe. Na a srefi ten, den no e proeberi foe poti someni prakseri na tapoe den sani di den pikin e doe, so taki den pikin foe den e kisi a firi taki den moesoe de moro betre leki tra sma. Den no wani, taki den pikin foe den e gro kon bigi leki sma di trawan tanteri noso di lasi-ati. — Efeisesma 6:4; Kolosesma 3:21.
13. Soema e teki fesi na ini a sori di wi moesoe sori warderi gi ibri gemeente memre?
13 Na ini a kresten gemeente, owroeman nanga opziener di e rèis e teki fesi ini a sori di den e sori taki den e warderi ibri memre foe na ipi foe Gado. A posisi foe den na wan moeilek wan, foe di den e tjari a hebi frantiwortoe toe foe gi tranga leri na ini regtfardikifasi, foe meki den sma di sondoe kon boen baka ini wan jeje foe safri-atifasi, èn foe gi krakti rai na den sma di abi disi fanowdoe. Fa den e hori den difrenti frantiwortoe disi ini balansi? — Galasiasma 6:1; 2 Timoteus 3:16.
14, 15. (a) Fa Paulus ben sori taki a ben abi balansi fasi te a ben gi krakti rai? (b) Fa kresten owroeman kan hori a de di a de fanowdoe foe sori sma tapoe den fowtoe èn a de di a de fanowdoe foe prèise wan sma, na ini balansi? Gi wan eksempre.
14 Na eksempre foe Paulus na wan bigi jepi. A ben de wan toemoesi aparti leriman, owroeman, nanga skapoeman. A ben kisi foe doe nanga gemeente di ben abi serjoesoe problema, èn a no ben frede foe gi krakti rai te disi ben de fanowdoe (2 Korentesma 7:8-11). Te wi e loekoe a diniwroko foe Paulus sjatoe, dan wi e si taki a no ben gi piri-ai someni — soso te a situwâsi ben meki taki disi ben de fanowdoe noso te disi ben fiti. Na ini disi a ben sori taki a ben abi a koni foe Gado.
15 Efoe joe ben teki a diniwroko foe wan owroeman na ini a gemeente gersi nanga wan pokoe, dan piri-ai nanga strafoe ben o de leki wan wan-enkri noot di e fiti na ini a heri pokoe. A noot dati e fiti pe a de (Lukas 17:3; 2 Timoteus 4:2). Prakseri foe wan pokoe di abi soso a wan noot dati, di e plèi ibritron baka. Fosi joe denki, a ben o hati wi jesi. Na so, kresten owroeman e proeberi foe meki a leri di den e gi kon moro boen èn e meki disi go na fesi foe di den e gebroiki na difrenti fasi. Den no e meki taki a leri foe den abi foe doe nanga a loesoe foe problema nomo. Na presi foe dati, a heri fasi fa den e gi leri de positief. Neleki Jesus Krestes, na so lobi-ati owroeman, e soekoe a boen sani fosi na ini sma foe prèise den, èn den no e soekoe fowtoe foe kroetoe na den tapoe. Den e warderi a tranga wroko di den kompe kresten foe den e doe. Den e froetrow taki moro foeroe, ibriwan foe den e doe ala moeiti foe dini Jehovah. Èn owroeman de klariklari foe taki dati de so. — Teki gersi 2 Tesalonikasma 3:4.
16. Sortoe bakapisi a ben abi na tapoe den kompe kresten foe Paulus foe di a ben warderi den èn ben abi firi gi den?
16 Tweifri no de taki, moro foeroe foe den kresten di Paulus ben dini, ben si taki a ben warderi den èn taki a ben abi firi gi den. Fa wi doe sabi disi? Loekoe fa den ben denki foe Paulus. Den no ben frede en, ala di a ben abi foeroe makti. Nôno, den ben lobi en èn den ben man taki nanga en makriki. Ija, di a ben gowe libi wan kontren, dan den owroeman ’ben brasa en èn ben bosi en nanga switifasi’! (Tori foe den Apostel 20:17, 37) Den owroeman — èn wi alamala — moesoe de nanga tangi srefisrefi taki wi abi na eksempre foe Paulus di wi kan waka na baka! Ija, meki wi sori taki wi e warderi makandra.
Doe sani foe boen-atifasi ede
17. San na wan toe boen bakapisi di e kon te sma e doe sani foe switifasi ede na ini a gemeente?
17 Wan foe den moro krakti fasi foe meki brada lobi kon moro tranga, de wan sempel sani di wi e doe foe switifasi ede. Soleki fa Jesus ben taki, dan „moro kolokoe de ini a gi foe sani, leki ini a kisi foe sani” (Tori foe den Apostel 20:35). Awansi wi e gi na jejefasi, na materia sei, noso a ten nanga a krakti foe wi, tokoe wi no e meki tra sma de kolokoe nomo, ma wi e meki wisrefi de kolokoe toe. Na ini a gemeente, switifasi na wan sani di sma e teki abra makriki. Wán sani di wan sma e doe foe switifasi ede, e meki taki tra sma doe den srefi sani dati toe. Fosi joe denki, joe kan si a brada firi foe lobi na ini a heri gemeente! — Lukas 6:38.
18. San „switifasi” wani taki na ini Mika 6:8?
18 Jehovah ben gi en pipel Israèl tranga foe sori switifasi. Na Mika 6:8 wi e leisi: „A froeteri joe, o sma foe grontapoe, san boen. Èn san Jehovah e aksi foe joe baka, leki foe doe retidoe èn foe lobi switifasi èn foe waka bescheide nanga joe Gado”? San a wani taki foe „lobi switifasi”? A Hebrew wortoe di gebroiki dja gi „switifasi” (cheʹsedh) vertaal toe na ini Sranantongo nanga „sari-ati”. Soleki fa The Soncino Books of the Bible e taki, dan a wortoe disi „e sori tapoe wan sani di de moro aktief leki na abstract Sranantongo wortoe sari-ati. A wani taki ’sari-ati di poti kon abra na ini sani di e doe’, a doe di wan sma srefi e doe sani foe lobi boen-atifasi ede, no soso gi den pôti sma nanga den sma di de na nowtoe, ma gi ala sma na en sei”. Dati meki wan tra sabiman e taki dati cheʹsedh wani taki „lobi di e kon na krin na ini sani di sma e doe”.
19. (a) Na sortoe fasi wi fosi ben sa kan sori switifasi na trawan na ini a gemeente? (b) Gi wan eksempre di e sori fa wan sma sori brada lobi gi joe.
19 A brada lobi foe wi no de wan sani di skrifi nomo na ini boekoe. A de troetroe so. Foe dati ede, soekoe fasi foe doe boen sani gi den brada nanga sisa foe joe. De leki Jesus, di no ben wakti ala ten foe sma kon na en foe aksi jepi, ma nofotron en ben teki fesi na ini a doe di a ben doe wan sani (Lukas 7:12-16). Prakseri spesroetoe foe den sma di de na ini tranga nowtoe. A de fanowdoe taki wan sma e go loekoe wan grani noso siki sma noso kande a de fanowdoe foe jepi en nanga wan toe boskopoe? A de fanowdoe foe gi ten na wan ’pikin di no abi papa’ noso teki notisi foe en? Wan sma di lasi-ati abi wan sma fanowdoe di kan arki en noso di abi wan toe wortoe fanowdoe di e trowstoe en? Efoe wi man, dan meki wi poti ten na wan sei foe doe den sortoe sani dati di e doe foe switifasi ede (Job 29:12; 1 Tesalonikasma 5:14; Jakobus 1:27). Noiti no frigiti taki na ini wan gemeente nanga soso onvolmaakti sma, wan foe den moro prenspari sani di kan doe foe sori switifasi na foe gi sma pardon — foe no tan mândi, srefi te wi abi reti foe kragi (Kolosesma 3:13). Te wi de klariklari foe gi trawan pardon, dan dati de wan fasi foe hori pratifasi, bita-atifasi, nanga kesekese dorosei foe a gemeente, sani di de leki nati bedikrosi di e kiri a faja foe brada lobi.
20. Fa wi alamala moesoe tan ondrosoekoe wisrefi?
20 Meki wi alamala abi a fasti bosroiti foe meki a prenspari faja disi foe lobi, bron na ini wi ati. Meki wi tan ondrosoekoe wisrefi. Wi e sori taki wi abi firi gi trawan? Wi e sori taki wi e warderi trawan? Wi e doe sani gi trawan di e sori taki wi abi switifasi gi den? So langa wi e doe dati, a faja foe lobi sa waran a bradafasi foe wi awansi omeni a grontapoe disi, di de sondro firi, e kon owroe. Ija seiker, dan „meki a brada lobi foe oenoe tan” — now èn foe têgo! — Hebrewsma 13:1.
[Foetoewortoe]
a Wan toe vertaling e sori dja taki a sma di e fasi a pipel foe Gado no e fasi na ai foe Gado, ma na ai foe Israèl noso srefi en eigi ai. A fowtoe disi ben kon foe di wan toe mindri jarihondro skrifiman, ben doe moeiti foe kenki pisi na ini a tekst di den ben si na wan fowtoe fasi leki sani di no ben sori lespeki, èn ben kenki a vers disi foe dati ede. Nanga dati den ben tapoe sma foe si a dipi firi di Jehovah srefi abi gi trawan.
San joe e prakseri?
◻ San na brada lobi, èn foe san ede wi moesoe meki a tan?
◻ Fa a firi di wi abi gi trawan e jepi wi foe meki a brada lobi foe wi tan?
◻ Sortoe ròl warderi e plèi na ini brada lobi?
◻ Fa sani di doe foe switifasi ede e meki moro brada lobi kon na ini a kresten gemeente?
[Faki na tapoe bladzijde 16]
A fasi fa lobi e wroko
Wan toe jari pasa kaba, wan man di ben studeri bijbel wan pisi ten kaba nanga Jehovah Kotoigi no ben bribi troetroe ete na ini brada lobi. A ben sabi taki Jesus ben taki: „Nanga disi ala sma sa sabi taki oenoe na mi disipel, efoe oenoe abi lobi na oen mindri” (Johanes 13:35). Ma a ben feni en wan moeilek sani foe bribi. Wan dei a ben man si fa kresten lobi e wroko.
Ala di a ben de na ini wan ròlstoeroe, tokoe a man disi ben e rèis farawe foe en oso. Na ini Bethlehem, Israèl, a ben go na wan gemeente konmakandra. Drape, wan Arabiri Kotoigi ben wani nomonomo taki wan tra Kotoigi fisitiman, tan nanga en osofamiri a neti dati, èn a bijbelstudenti disi ben kisi wan kari toe. Bifo a studenti ben go sribi, a ben aksi a sma di ben teki en na ini en oso primisi foe kan go na dorosei na tapoe a balkon na mamanten joeroe foe loekoe te son e opo. A sma di ben teki en na ini en oso ben warskow en serjoesoe taki a no ben moesoe doe dati. A tra dei na Arabiri brada disi ben froeklari foe san ede. Nanga jepi foe wan tolkoe, a ben taki dati efoe den birtisma foe en ben sabi taki a ben abi fisitiman nanga wan djoe background na en — soleki fa dati ben de nanga a bijbelstudenti disi — dan den ben o bron en oso te na gron makandra nanga en nanga en osofamiri na ini. A bijbelstudenti di ben broeja, ben aksi en: „Dan foe san ede joe ben teki a tjans disi?” Sondro wan tolkoe, na Arabiri brada ben loekoe en langalanga èn ben taki nomo: „Johanes 13:35.”
A troefasi foe brada lobi ben naki na ati foe a bijbelstudenti troetroe. Sjatoe baka dati a ben teki dopoe.
[Prenki na tapoe bladzijde 18]
A switifasi nanga a warderi di na apostel Paulus ben abi gi sma, ben meki taki a ben de makriki gi sma foe go taki nanga en