Soema sa pasa „a dei foe Jehovah” libilibi?

„Sortoe sma oenoe moesoe de foe tjari oensrefi na wan santa fasi èn foe doe sani di e sori taki oenoe gi oensrefi na ini a dini foe Gado, e froewakti èn e hori a denoja foe a dei foe Jehovah boen na prakseri!” — 2 PETRUS 3:11, 12.

1. Soema wroko nanga a jeje èn nanga a krakti foe Elia?

JEHOVAH GADO teki sma poeroe na mindri a libisma famiri di sa tron kompe erfgenaam nanga en Manpikin, Jesus Krestes, na ini a hemel Kownoekondre (Romesma 8:16, 17). Ala di den salfoe kresten de na grontapoe ete, den wroko nanga a srefi jeje nanga krakti leki di foe Elia (Lukas 1:17). Na ini na artikel na fesi a wan disi, wi ben si taki wan toe sani di den e doe èn sani di a profeiti Elia ben doe, ben kroederi nanga makandra. Ma fa a de nanga a wroko foe a sma di ben kon baka Elia, a profeiti Elisa? — 1 Kownoe 19:15, 16.

2. (a) San ben de a lasti wondroe foe Elia, èn a fosiwan foe Elisa? (b) Sortoe boeweisi de taki Elia no ben go na hemel?

² A lasti wondroe di Elia ben doe, ben de di a ben prati a watra foe a Jordan liba na toe foe di a ben naki nanga en officieel djakti na tapoe a watra. Disi ben meki taki Elia nanga Elisa ben kan abra na tapoe drei gron. Di den ben waka na a owstoesei foe a liba, wan bigi winti ben tjari Elia gowe na wan tra presi na grontapoe. (Loekoe a boksoe na tapoe bladzijde 15 di nen „Na sortoe hemel Elia ben opo go?”) Na officieel djakti foe Elia ben tan na baka. Di Elisa ben gebroiki en foe naki na tapoe a Jordan liba, dan den watra ben prati na toe agen, èn a ben man drai go baka na tapoe drei gron. A wondroe disi ben sori krin taki Elisa ben tron a sma di ben moesoe kon baka Elia foe a meki a troe anbegi go na fesi na ini Israèl. — 2 Kownoe 2:6-15.

A de toemoesi prenspari foe abi den eigifasi foe Gado

3. San Paulus nanga Petrus ben taki foe Jesus denoja èn „a dei foe Jehovah”?

³ Someni jarihondro baka den dei foe Elia nanga Elisa, na apostel Paulus nanga Petrus ben kroederi wan „dei foe Jehovah” di e kon, nanga a denoja foe Jesus Krestes èn den „njoen hemel nanga wan njoen grontapoe” di ben moesoe kon ete na a ten dati (2 Tesalonikasma 2:1, 2; 2 Petrus 3:10-13). Foe kan pasa a bigi dei foe Jehovah libilibi — te Gado e gi den feanti foe en pori èn e kibri a pipel foe en — dan wi moesoe soekoe Jehovah èn sori safri-atifasi nanga regtfardikifasi (Sefanja 2:1-3). Ma te wi e loekoe den sani di ben pasa nanga a profeiti Elisa, dan wi e si ete wan toe eigifasi.

4. San a wani taki na ini a diniwroko foe Jehovah te wan sma de nanga faja?

⁴ Faja gi a diniwroko foe Gado de prenspari te wi wani pasa „a dei foe Jehovah” libilibi. Elia nanga Elisa ben de fajafaja na ini a diniwroko foe Jehovah. Nanga a srefi sortoe faja, a fikapisi foe salfoe kresten na ini a ten disi e doe santa diniwroko gi Jehovah èn e teki fesi na ini a wroko foe preiki a boen njoensoe.a Sensi 1935, den gi ala den sma di e teki a Kownoekondre boskopoe èn di e howpoe foe libi foe têgo na grontapoe, deki-ati foe gi densrefi abra na Jehovah èn teki dopoe (Markus 8:34; 1 Petrus 3:21). Miljoenmiljoen sma gi jesi na a deki-ati disi di gi. Wan ten ben de, di den ben de na doengroe na jejefasi èn den ben dede na ini sondoe, ma now den leri a waarheid foe Gado, den teki a howpoe foe têgo libi na ini wan paradijs grontapoe, èn den de fajafaja na ini a diniwroko foe Jehovah (Psalm 37:29; Openbaring 21:3-5). Foe di den de nanga faja, den e wroko nanga makandra, den e ontfanga sma boen, èn den e doe tra boen wroko, meki den e gi den jeje brada foe Krestes di de na grontapoe ete, foeroe kowroe-ati. — Mateus 25:31-46.

5. Foe san ede a de so prenspari foe doe boen sani gi „den brada” foe Jesus, èn sortoe eksempre wi abi foe a ten foe Elisa?

⁵ Den sma di e doe boen sani gi den „brada” foe Jesus foe di den salfoewan disi na den bakaman foe en, abi a howpoe foe pasa „a dei foe Jehovah” libilibi. Wan trowpaar na ini a pikin foto Sunem ben kisi foeroe blesi foe di den sori switifasi na Elisa nanga en jepiman èn ben ontfanga den boen. A trowpaar disi no ben abi wan manpikin, èn a masra ben owroe. Ma Elisa ben pramisi a Sunem oema taki a ben o meki wan manpikin, èn disi ben pasa troetroe. Di a wan-enkri manpikin disi dede wan toe jari baka dati, dan Elisa ben go na Sunem èn ben gi en wan opobaka (2 Kownoe 4:8-17, 32-37). Fa den ben kisi wan bigi pai foe di den ben ontfanga Elisa boen!

6, 7. Sortoe eksempre Na-âman ben gi, èn san disi abi foe doe nanga a pasa di wan sma kan pasa „a dei foe Jehovah” libilibi?

⁶ Sakafasi de fanowdoe foe teki a bijbel tiri di e kon foe Krestes „brada” nanga a howpoe foe pasa a dei foe Jehovah libilibi. A Siria legre edeman Na-âman di ben abi gwasi siki, ben moesoe sori sakafasi foe kan waka na baka a rai foe wan Israèl oemapikin di den ben hori na katibo, foe go na Israèl foe feni Elisa pe a ben soekoe wan fasi foe kon betre. Na presi taki Elisa komoto na ini en oso foe miti Na-âman, a ben seni en a boskopoe disi: „Joe moesoe wasi joesrefi seibi tron na ini a Jordan so taki joe skin kan kon baka na joe; èn kon krin” (2 Kownoe 5:10). A sani disi ben hati a bigimemre foe Na-âman, èn a ben kisi atibron, ma baka di a ben abi a sakafasi foe go èn doekroen go na ini a Jordan seibi tron, „en skin ben tron baka leki a skin foe wan pikin boi, èn a ben kon krin” (2 Kownoe 5:14). Bifo Na-âman ben go na oso baka, a ben go te na Samaria baka foe taigi a profeiti foe Jehovah tangi. Elisa, di ben abi a fasti bosroiti foe no kisi winimarki na materia sei foe a krakti di Gado ben gi, ben kon na doro foe miti Na-âman, ma a no ben wani teki no wan presenti. Nanga sakafasi Na-âman ben taigi Elisa: „A foetoeboi foe joe no sa tjari wan bron-ofrandi noso wan srakti-ofrandi moro gi no wan enkri tra gado, boiti Jehovah.” — 2 Kownoe 5:17.

⁷ Foe di miljoenmiljoen sma e waka nanga sakafasi baka a rai foe bijbel di den salfoewan e gi, meki den sma dati e kisi foeroe blesi na ini a ten disi. Boiti dati, foe di den opregtiwan disi e sori bribi na ini Jesus froeloesoe ofrandi, meki den kon krin na jejefasi. Now den abi a grani foe de mati foe Jehovah Gado nanga Jesus Krestes (Psalm 15:1, 2; Lukas 16:9). Èn a gi di den gi densrefi fajafaja na Gado èn na a diniwroko foe en sa pai, foe di den no sa kisi a têgo pori di den bigimemre sondari di no abi berow de foe kisi tapoe a „dei foe Jehovah”, di e kon krosibei esi-esi. — Lukas 13:24; 1 Johanes 1:7.

„Soema de nanga mi? Soema?”

8. (a) Fa den wan di sa pasa „a dei foe Jehovah” libilibi, moesoe si a doe di den moesoe doe a wani foe Gado? (b) Sortoe wroko Jehu ben kisi foe doe? (c) San ben moesoe pasa nanga Iseibèl?

⁸ Den sma di e howpoe foe pasa a „dei foe Jehovah” libilibi moesoe abi a fasti bosroiti toe foe doe a wani foe Gado. Na wan deki-ati fasi, Elia ben taki na fesi dati kownoe Akab en osofamiri di ben lobi foe kiri sma, èn di ben anbegi Ba-âl, ben o kisi pori (1 Kownoe 21:17-26). Ma bifo den ben o kiri den, Elisa, a sma di ben kon baka Elia, ben moesoe doe wan wroko ete di no ben kaba (1 Kownoe 19:15-17). Di a reti ten foe Jehovah ben doro, dan Elisa ben taigi wan jepiman foe go salfoe a legre edeman Jehu leki a njoen kownoe foe Israèl. Baka di a boskopoeman ben kanti oli go na tapoe na ede foe Jehu, dan a ben taigi Jehu: „Disi na san Jehovah, a Gado foe Israèl, taki: ’Mi e salfoe joe leki kownoe foe a pipel foe Jehovah, dati wani taki, foe Israèl. Èn joe moesoe naki na oso foe Akab, joe masra, trowe, èn mi moesoe teki refensi gi a broedoe foe den foetoeboi foe mi, den profeiti, nanga a broedoe foe ala den foetoeboi foe Jehovah di dede na a anoe foe Iseibèl. Èn a heri oso foe Akab moesoe dede.’” Den ben o trowe a godelowsoe oemakownoe Iseibèl go gi den dagoe èn a no ben o kisi wan boen beri. — 2 Kownoe 9:1-10.

9, 10. Fa a wortoe foe Elia ben kon troe ini a kefal foe Iseibèl?

⁹ Den man foe Jehu ben erken a waarde foe a salfoe di Jehu ben kisi èn den ben meki bekènti taki en ben de a njoen kownoe foe Israèl. Jehu, di ben abi a fasti bosroiti foe doe wan sani, ben rèi boen tranga go na Jisre-èl foe bigin nanga en wroko foe kiri den moro prenspari fesiman na ini a Ba-âl anbegi, di ben fadon komoto na bribi. A fosi sma di Jehu ben kiri nanga en peiri, ben de a manpikin foe Akab, kownoe Joram. A ben rèi kon foe a foto foe aksi Jehu efoe a ben kon foe soekoe vrede. „Sortoe vrede ben kan de so langa a hoeroedoe foe joe mama Iseibèl nanga den foeroe towfroewroko foe en de ete?”, Jehu ben piki. Ne a peiri foe Jehu ben boro na ati foe Joram. — 2 Kownoe 9:22-24.

¹⁰ Oemasma di e dini Gado moesoe loekoe boen taki den no de leki Iseibèl noso wan sma di gersi en (Openbaring 2:18-23). Di Jehu ben doro Jisre-èl, dan Iseibèl ben proeberi foe meki ensrefi moi. A ben de na wan fensre e loekoe go na gron, ala di a ben gi en odi na wan triki fasi. Jehu ben aksi den jepiman foe Iseibèl: „Soema de nanga mi? Soema?” Wantewante, toe noso dri sma di ben wroko na ini kownoe-oso ben loekoe go na gron. Den ben de na Jehu sei? „Trowe en kon na gron!” a ben gi den tranga. Ne den ben handri nanga wan fasti bosroiti, èn ben trowe na ogri Iseibèl komoto na ini a fensre. Sma denki taki asi trapoe en kiri na ondro den foetoe. Di sma ben kon beri en, ’den no ben feni noti moro leki na edekrabasi nanga den foetoe nanga den inisei foe den anoe foe en.’ Ai, dati ben de wan span fasi foe meki den wortoe foe Elia kon troe: „Den dagoe sa njan a skin foe Iseibèl”! — 2 Kownoe 9:30-37.

Den horibaka gi a troe anbegi nanga den heri ati

11. Soema ben de Jonadab, èn fa a ben sori taki a ben horibaka gi a troe anbegi?

¹¹ Den sma di e howpoe foe pasa „a dei foe Jehovah” libilibi èn foe libi foe têgo na grontapoe, moesoe horibaka gi a troe anbegi nanga den heri ati. Den moesoe de leki Jonadab, wan anbegiman foe Jehovah di no ben de wan Israèlsma. Di Jehu ben go doro nanga faja foe doe a wroko di a ben kisi foe doe, dan Jonadab ben wani sori taki a ben feni disi boen èn taki a ben horibaka gi Jehu. Dati meki a ben go miti a njoen kownoe foe Israèl, di ben e go na Samaria foe kiri den sma di ben tan abra foe Akab oso. Di Jehu ben si Jonadab, dan a ben aksi: „Joe ati de opregti na mi, neleki fa mi eigi ati de nanga joe ati?” A boen piki di Jonadab ben gi, ben meki taki Jehu langa en anoe go èn ben aksi Jonadab foe kon na ini en fetiwagi, ala di a ben taki: „Kon nanga mi èn kon loekoe fa mi no e froedrage no wan strei teige Jehovah.” Sondro draidrai, Jonadab ben teki a grani foe sori taki a ben horibaka gi Jehovah en salfoewan di e tjari strafoe kon. — 2 Kownoe 10:15-17.

12. Foe san ede Jehovah abi a reti foe aksi foe sma taki den moesoe gi densrefi na ini na anbegi foe en wawan?

¹² Seiker a de wan joisti sani foe horibaka gi a troe anbegi nanga wi heri ati, bika Jehovah na a Kriaman nanga Universeel Soeverein, di abi a reti foe aksi èn froewakti foe wi taki wi e dini en wawan. A ben gi den Israèlsma a komando: „Joe no moesoe meki wan popki gi joesrefi, di joe temre, noso wan skin di gersi iniwan sani di de na hemel na tapoe noso di de na grontapoe na ondro noso di de na ini den watra na ondro grontapoe. Joe no moesoe boigi gi den, noso meki sma kori joe foe dini den, bika mi, Jehovah, joe Gado, na wan Gado di e aksi foe sma e dini en wawan” (Exodus 20:4, 5). Den sma di e howpoe foe pasa „a dei foe Jehovah” libilibi moesoe anbegi en wawan, èn den moesoe doe dati „nanga jeje èn nanga waarheid” (Johanes 4:23, 24). Den moesoe tanapoe kánkan gi a troe anbegi, neleki Elia, Elisa nanga Jonadab.

13. Soema na den sma di, neleki fa na ati foe Jonadab ben de nanga Jehu, e erken a Mesias Kownoe, èn fa den e sori disi?

¹³ Baka di kownoe Jehu ben kiri na oso foe Akab, a ben doe tra sani toe foe kon sabi soema ben de den anbegiman foe Ba-âl èn foe poeroe a falsi relisi disi na ini Israèl krinkrin (2 Kownoe 10:18-28). Na ini a ten disi, a hemel kownoe Jesus Krestes poti na wroko foe kiri den feanti foe Jehovah èn foe regtfardiki En soevereiniteit. Neleki fa na ati foe Jonadab ben de nanga Jehu, na so „a bigi ipi” foe Jesus en „tra skapoe” na ini a ten disi e erken nanga den heri ati taki Krestes na a Mesias Kownoe èn den e wroko makandra nanga den jeje brada foe en na grontapoe (Openbaring 7:9, 10; Johanes 10:16). Nanga a libi di den e libi akroederi a troe relisi èn a fajafaja prati di den abi na a kresten diniwroko, meki den e boeweisi disi, ala di den e warskow den feanti foe Gado gi a „dei foe Jehovah” di e kon esi-esi. — Mateus 10:32, 33; Romesma 10:9, 10.

Toemoesi span sani e wakti wi!

14. San e wakti falsi relisi?

¹⁴ Jehu ben doe wan sani foe tjari wan kaba kon na a Ba-âl anbegi na ini Israèl. Na ini a ten foe wi, Gado sa tjari pori kon na tapoe Babilon a Bigiwan, a grontapoe makti foe falsi relisi, foe di a sa gebroiki a Moro Bigi Jehu, Jesus Krestes. Djonsro wi sa si a kontroe foe den wortoe di na engel ben taigi na apostel Johanes: „Den tin toetoe di joe ben si nanga a werdri meti, den disi no sa wani si a hoeroe [Babilon a Bigiwan] na ai èn den sa gi en pori èn meki a de nanga sososkin, èn den sa njan den pisi foe en skin èn sa bron en nanga faja krinkrin. Bika Gado poti en na ini den ati foe doe san en abi na prakseri, ija, foe doe a wan-enkri prakseri foe den foe di a e gi a kownoekondre foe den abra na a werdri meti, te leki den wortoe foe Gado sa doe” (Openbaring 17:16, 17; 18:2-5). „Den tin toetoe” e prenki den politiek makti di moksi nanga sroedati makti èn di e tiri grontapoe. Ala di na jejefasi den e libi nanga Babilon a Bigiwan na ini hoeroedoe now, tokoe a ten foe en kon sjatoe. A politiek elementi disi foe grontapoe sa pori falsi relisi, èn „a werdri meti” — den Verenigde Nâsi — makandra nanga „den tin toetoe”, sa plèi wan prenspari ròl ini a pori di Babilon a Bigiwan sa kisi.b Fa dati sa de wan moi okasi foe prèise Jehovah! — Openbaring 19:1-6.

15. San sa pasa te den sa proeberi foe poeroe Gado en organisâsi na grontapoe, na pasi?

¹⁵ Baka di kownoe Jehu ben doe wan sani teige a Ba-âl anbegi, dan a kownoe-oso foe en ben poti prakseri na tapoe den politiek feanti foe Israèl. A Kownoe Jesus Krestes sa doe wan srefi sortoe sani. Den politiek makti sa tan abra baka te falsi relisi di gersi a Ba-âl relisi, kisi pori. Na ondro a makti foe Satan Didibri, den feanti disi foe Jehovah en soevereiniteit sa proeberi doe wan sani foe kan poeroe Gado en organisâsi na grontapoe, na pasi (Esekièl 38:14-16). Ma Jehovah sa meki a Kownoe Jesus Krestes naki den trowe, foe di a sa kiri den na ini Armagedon, „na orlokoe foe a bigi dei foe Gado na Almaktiwan”, èn sa tjari a wroko foe regtfardiki a soevereiniteit foe Jehovah, kon na wan kaba. — Openbaring 16:14, 16; 19:11-21; Esekièl 38:18-23.

Dini nanga wan faja leki di foe Elisa

16, 17. (a) Fa wi doe sabi taki Elisa ben de nanga faja te na a kaba foe en libi? (b) San wi moesoe doe nanga den peiri foe waarheid?

¹⁶ Den foetoeboi foe Gado sa de nanga deki-ati èn nanga faja neleki Elisa, te leki „a dei foe Jehovah” o tjari wan kaba kon na Satan en heri godelowsoe seti foe sani. Boiti a wroko di Elisa ben doe leki jepiman foe Elia, en wawan ben dini moro leki 50 jari leki a profeiti foe Jehovah! Èn Elisa ben de nanga faja te na a kaba foe en langa libi. Leti bifo a dede, Jehu granpikin, kownoe Joas, ben kon loekoe en. Elisa ben taigi en foe soetoe wan peiri komoto na ini a fensre. A peiri ben doro pe a ben moesoe go, èn Elisa ben bari: „Jehovah en peiri foe froeloesoe, ija, a peiri foe froeloesoe teige Siria! Èn foe troe, joe sa naki Siria trowe krinkrin na Afèk.” Di Elisa ben aksi en, dan Joas ben naki a gron nanga den peiri foe en. Ma a no ben doe disi nanga toemoesi faja, èn a ben naki soso dri tron. Dan Elisa ben taki dati na foe disi ede, meki Joas ben o wini Siria dri tron nomo, èn dati na san ben pasa (2 Kownoe 13:14-19, 25). Kownoe Joas no ben naki den Siriasma trowe dorodoro, noso „krinkrin”.

¹⁷ Ma a salfoe fikapisi, di abi a faja leki di foe Elisa, e tan feti teige falsi anbegi. Den kompe foe den di abi a howpoe foe libi na grontapoe, e doe a srefi sani. Boiti dati, a ben sa boen te ala den sma di e howpoe foe pasa „a dei foe Jehovah” libilibi, e hori na prakseri sortoe fajafaja wortoe Elisa ben taki foe a pori di ben o kon na grontapoe. Meki wi teki den peiri foe waarheid èn naki den nanga faja — ibri leisi baka — ija, te leki Jehovah e taki dati a wroko di wi moesoe wroko nanga den, kon na wan kaba.

18. Fa wi moesoe handri na tapoe den wortoe foe 2 Petrus 3:11, 12?

¹⁸ Djonsro „a dei foe Jehovah” sa tjari wan kaba kon na a disiten godelowsoe seti foe sani. Foe dati ede, meki den wortoe foe na apostel Petrus di e gi sma deki-ati, boeweigi wi foe go doro. „Now di ala den sani disi sa smèlter,” na so Petrus e froeklari, „sortoe sma oenoe moesoe de foe tjari oensrefi na wan santa fasi èn foe doe sani di e sori taki oenoe gi oensrefi na ini a dini foe Gado, e froewakti èn e hori a denoja foe a dei foe Jehovah boen na prakseri!” (2 Petrus 3:11, 12) Te a faja foe Gado en atibron di a sa sori nanga jepi foe Jesus Krestes, kon smèlter ibri pisi foe a sistema disi, dan soso den sma di ben libi na wan opregti fasi èn di ben gi densrefi na ini a dini foe Gado, sa kisi kibri. A de toemoesi prenspari foe de krin na moreel sei èn na jejefasi. Èn dati de so toe nanga a lobi gi tra libisma, di de foe si te wi e jepi den nanga den sani di den abi fanowdoe, spesroetoe te wi e doe disi na wan jeje fasi nanga jepi foe wi kresten diniwroko.

19. San wi moesoe doe foe pasa „a dei foe Jehovah” libilibi?

¹⁹ Den sani di joe e taki èn e doe, e sori taki joe na wan getrow èn fajafaja foetoeboi foe Gado? Efoe dati de so, dan joe kan abi a howpoe foe pasa „a dei foe Jehovah” libilibi èn go na ini a njoen grontapoe di Gado pramisi. Ija, joe ben sa kan tan na libi efoe joe e doe boen na den jeje brada foe Krestes bika den na den bakaman foe en, neleki fa a trowpaar na Sunem ben ontfanga Elisa boen. Efoe joe wani tan na libi, dan joe moesoe de leki Na-âman toe, di ben teki a leri foe Gado nanga sakafasi, èn ben tron wan anbegiman foe Jehovah. Efoe joe e angri foe libi foe têgo na ini wan paradijs na grontapoe, dan joe moesoe sori taki joe e horibaka gi a troe anbegi nanga joe heri ati, neleki san Jonadab ben doe. Dan joe kan de wan foe den getrow foetoeboi foe Jehovah, di sa ondrofeni djonsro a kontroe foe Jesus wortoe: „Oen kon, oenoe di mi Tata blesi, teki a kownoekondre di sreka gi oenoe sensi di grontapoe seti.” — Mateus 25:34.

[Foetoewortoe]

San joe ben sa piki?

◻ San na wan toe eigifasi di de fanowdoe foe pasa „a dei foe Jehovah” libilibi?

◻ Sortoe eksempre a trowpaar foe Sunem na ini den dei foe Elisa ben gi?

◻ Sortoe sani wi kan leri foe Na-âman?

◻ Fa wi kan waka na baka na eksempre foe Jonadab?

◻ Sortoe krakti 2 Petrus 3:11, 12 moesoe abi na wi tapoe?