Den ben doe a wani foe Jehovah

Wan eksempre foe na òfer di sma e òfer densrefi èn foe loyaalfasi

SAN ben bigin gi wan jongoe gronman di nen Elisa leki wan aladei sani foe ploegoe, ben tron a moro prenspari dei na ini en libi. Di Elisa ben e wroko na ini a gron, dan Elia, a moro prenspari profeiti foe Israèl, ben kon na en sondro foe Elisa ben froewakti en. ’Foe san ede Elia ben sa kon na mi?’, kande na so Elisa aksi ensrefi. A no ben abi foe wakti langa foe kisi wan piki. Elia ben trowe en profeiti krosi na tapoe Elisa, èn ben sori nanga dati taki wan dei Elisa ben o teki en presi. Elisa ben teki a kari disi leki wan serjoesoe sani. Wantewante a ben libi en gron foe tron a dinari foe Elia. — 1 Kownoe 19:19-21.

So wan siksi jari baka dati, a ten ben doro gi Elia foe gowe. Sma kari a tori foe a gowe di a ben gowe „wan foe den moro moi tori” na ini den Hebrew Boekoe foe bijbel.

Elia e sreka ensrefi foe gowe

Elia ben wani go na Bethel, Jeriko nanga a Jordan foe wan lasti leisi. Disi ben sa wani taki dati a ben moesoe waka foeroe kilometer èn son tron tapoe moeilek bergi kontren. Na ibri presi pe den ben stòp na pasi, Elia ben gi Elisa a deki-ati foe tan na baka. Ma Elisa ben wani nomonomo foe tan nanga en masra te na a kaba. — 2 Kownoe 2:1, 2, 4, 6.

Di Elisa ben de na ini Bethel èn na ini Jerikow, dan „den manpikin foe den profeiti” ben kon na en.a „Joe sabi troetroe taki tide Jehovah e teki joe masra poeroe leki edeman foe joe?”, na so den ben aksi en. „Mi toe sabi dati heri boen”, a ben piki. „Oenoe tan pî.” — 2 Kownoe 2:3, 5.

Baka dati Elia nanga Elisa ben bigin go na a Jordan Liba. Di den ben doro na a Jordan, dan Elia ben doe wan wondroe ala di so wan 50 manpikin foe den profeiti ben tanapoe fara e loekoe. „Elia ben teki en profeiti krosi èn ben domroe en èn ben naki a watra, èn safrisafri a [watra] ben prati go na disi sei èn na dati sei, so taki den ala toe ben go na abrasei na tapoe a drei gron.” — 2 Kownoe 2:8.

Di den ben abra kaba, Elia ben taigi Elisa: „Aksi san mi moesoe doe gi joe bifo den teki mi poeroe foe joe.” Elisa ben aksi „toe pisi” foe a jeje foe Elia — dati wani taki, a dobroe pisi di wan fosi gebore manpikin ben gwenti foe kisi. Ija, Elisa ben gi Elia grani neleki fa wan fosi gebore manpikin ben sa gi en papa grani. Moro fara, a ben kisi salfoe foe teki a presi foe Elia leki a profeiti foe Jehovah na ini Israèl. Dati meki a sani di a ben aksi, no ben de foe di a ben prakseri ensrefi nomo noso no ben de wan sani di no ben fiti. Ma tokoe, foe di Elia sabi taki Jehovah wawan ben kan gi san Elisa ben aksi, meki Elia ben piki na wan bescheiden fasi: „Joe aksi wan moeilek sani.” Dan a ben taki toe: „Efoe joe e si mi te den teki mi poeroe foe joe, dan a sa pasa na a fasi dati nanga joe; ma efoe joe no e si mi, dan a no sa pasa.” — 2 Kownoe 2:9, 10; Deuteronomium 21:17.

Elisa seiker ben teki wan moro fasti bosroiti leki oiti foe tan krosibei foe en masra. Baka dati „wan faja fetiwagi èn faja asi” ben de foe si. Leti na fesi Elisa di ben froewondroe, Elia ben hari go na ini wan bigi winti — na wan wondroe fasi a ben tjari go na wan tra presi.b Elisa ben piki a profeiti krosi foe Elia èn ben waka go baka na a sjoro foe a Jordan Liba. A ben naki a watra èn ben taki: „Pe Jehovah, a Gado foe Elia, de, ija En?” A watra ben prati èn dati ben sori krin taki Gado ben horibaka gi Elisa leki a sma di ben teki a presi foe Elia. — 2 Kownoe 2:11-14.

Den sani di wi kan leri foe dati

Di Elisa ben kisi a kari foe doe wan spesroetoe diniwroko nanga Elia, dan wantewante a ben libi en gron foe go dini a moro prenspari profeiti foe Israèl. Soleki fa a sori, dan son wroko foe en ben de eenvoudig wroko, bika sma ben kon sabi en leki a sma di „ben kanti watra na tapoe den anoe foe Elia”c (2 Kownoe 3:11). Ma tokoe Elisa ben si en wroko leki wan grani, èn a ben tan na wan loyaal fasi na a sei foe Elia.

Foeroe foe den foetoeboi foe Gado na ini a ten disi e sori wan srefi jeje foe òfer densrefi. Son wan libi den „gron” foe den, a wroko foe den, foe man preiki a boen njoensoe na fara kontren noso foe go dini leki memre foe wan Bethelfamiri. Trawan rèis go na tra kondre foe go wroko na den bowprojekt foe a Genootschap. Foeroe foe den teki san sma ben sa kan si leki lagi wroko. Ma no wan sma di e wroko leki wan srafoe gi Jehovah e doe wan diniwroko di no de prenspari. Jehovah e warderi ala sma di de klariklari foe dini en, èn a sa blesi a jeje foe den foe òfer densrefi. — Markus 10:29, 30.

Elisa ben tan na Elia te na a kaba. A ben weigri foe gowe libi a moro owroe profeiti, srefi di a ben kisi na okasi foe doe dati. Sondro tweifri a krosibei matifasi di a ben kweki nanga Elia ben meki taki so wan loyaal lobi na wan prisiri sani. Na ini a ten disi, den foetoeboi foe Gado e meki moeiti foe meki a matifasi di den abi nanga Gado kon moro tranga èn foe kon moro krosibei na den kompe bribiman foe den. Wan krosibei banti foe wánfasi sa kisi blesi, bika bijbel e taki foe Jehovah: „Nanga wan sma di de loyaal, joe sa handri na wan loyaal fasi.” — 2 Samuèl 22:26.

[Foetoewortoe]