„Gi Jehovah grani nanga den warti sani foe joe” — Fa?

„GI JEHOVAH grani nanga den warti sani foe joe èn nanga den fosiwan foe ala den gron-njan foe joe.” A sroto foe kisi foeroe blesi foe Jehovah de na ini den koni wortoe disi di ben skrifi nanga jepi foe a santa jeje so wan 2600 jari pasa kaba, bika a skrifiman e go doro foe tjari kon na krin: „Dan den maksin foe joe sa kon foeroe pasa marki; èn nanga njoen win joe eigi persbaki sa kon foeroe te leki a lon abra.” — Odo 3:9, 10.

Ma san a wani taki foe gi Gado grani? San na den warti sani nanga san wi moesoe gi Jehovah grani? Èn fa wi kan doe dati?

„Gi Jehovah grani”

Na ini den Boekoe foe bijbel, a prenspari Hebrew wortoe di vertaal nanga grani, ka·vohdhʹ, wani taki troetroe „hebi”. So boen, foe gi wan sma grani wani taki foe si en leki wan sma di prenspari, di bigi srefisrefi, noso di abi bigi waarde. Wan tra Hebrew wortoe di vertaal nanga grani, yeqarʹ, vertaal toe nanga „diri” èn „diri sani”. Na a srefi fasi a Griki wortoe ti·meʹ, di vertaal nanga „grani” na ini bijbel, e tjari a prakseri abra foe wartifasi, waarde, dirifasi. So boen, wan sma e gi wan trawan grani foe di a e sori dipi lespeki èn wartifasi gi a sma dati.

Foe gi grani abi wan tra sani na ini toe. Loekoe a tori di e taki foe a getrow djoe Mordekai, di na wán okasi ben poeroe wan takroe plan di ben de teige a libi foe kownoe Ahasveros foe Persia foe owroeten, kon na doro. Baka ten, di a kownoe ben kon sabi taki den no ben doe noti foe gi Mordekai grani foe a sani dati di a ben doe, dan a ben aksi en fosi minister, Haman, san ben de a moro boen fasi foe gi a sma grani ini soema a kownoe ben feni prisiri. Haman ben prakseri taki a grani dati ben sa de gi en, ma a ben kori en kraboejasi! Awansi fa a no fa, Haman ben taki dati den moesoe weri a „kownoe krosi” gi a sma dati èn meki a rèi na tapoe „wan asi di a kownoe e rèi na tapoe”. A ben bosroiti: „Den moesoe meki a rèi na tapoe na asi na a poebliki pren foe a foto, èn na fesi foe en den moesoe bari tranga taki: ’Na so den e doe nanga a man di na ini a grani foe en a kownoe srefi feni prisiri’” (Ester 6:1-9). Ini a kefal disi, foe gi wan sma grani wani taki toe foe hei a sma na poebliki, so taki ala sma ben sa abi dipi warderi gi en.

Na a srefi fasi a de so, taki foe gi Jehovah grani abi toe pisi: sori persoonlijk dipi lespeki gi en èn hei en na poebliki foe di wi e teki prati na ini a wroko foe meki en nen bekènti na poebliki èn e horibaka gi dati.

„Den warti sani foe joe” — San na den?

Den warti sani foe wi seiker wani taki toe a libi foe wi, a ten foe wi, den bekwaamfasi foe wi, èn a krakti foe wi. Fa a de nanga den materia goedoe foe wi? Loekoe den wortoe foe Jesus di a ben si taki wan pôti weduwe ben poti toe pikin pisi moni di no abi foeroe waarde, na ini a monikisi foe a tempel. A ben taki: „A weduwe disi, ala di a pôti, tokoe a ben poti moro na ini moro leki ala den sma disi. Bika den alamala [tra sma di poti bijdrage] ben poti presenti na ini foe san ben tan abra, ma na oema disi, foe a pina foe en, ben poti na ini ala san a ben abi fanowdoe foe tan na libi” (Lukas 21:1-4). Jesus ben prèise a weduwe disi foe di a ben gebroiki den materia goedoe foe en foe horibaka gi na anbegi foe Jehovah.

Dan a de krin, taki den warti sani di Salomo ben taki foe den, wani taki so srefi iniwan materia goedoe di wi kan abi. Èn den wortoe „den fosiwan foe ala den gron-njan foe joe” e tjari a prakseri abra foe gi Jehovah a moro boen sani foe den warti sani foe wi.

Ma fa wi kan gi Gado grani te wi e gi materia sani? A no ala sani de foe en kaba? (Psalm 50:10; 95:3-5) „Ala sani e kon foe joe”, na so kownoe David ben erken na ini wan opregti begi na Jehovah. Èn foe wan bigi bijdrage di en nanga en pipel ben gi foe a bow foe a tempel, David ben taki: „Foe joe eigi anoe srefi wi gi joe disi” (1 Kroniki 29:14). So boen, te wi e gi Jehovah presenti, dan wi e gi en baka nomo san en, foe a boenfasi foe en ati ede, gi wi (1 Korentesma 4:7). Ma, soleki fa wi ben taki na fesi kaba, dan a gi di wi e gi Jehovah grani wani taki toe foe hei en ini den ai foe tra sma. Èn den presenti na materia sei di e gebroiki foe meki a troe anbegi go na fesi, e gi Gado grani. Bijbel abi kefalek moi eksempre foe a fasi disi foe gi Jehovah grani.

Eksempre foe owroeten

So wan 3500 jari pasa kaba, di a ten foe Jehovah ben doro foe gi a tabernakel na ini a gran sabana leki wan presi foe anbegi gi den Israèlsma, dan a fanowdoe ben opo foe difrenti diri sani di ben de fanowdoe gi a fasi foe bow di Gado ben gi. Jehovah ben gi Moses a komando foe ’meki ibri sma di de klari na ini en ati, tjari wan bijdrage kon gi Jehovah’ (Exodus 35:5). A tori e go doro foe taki: „Den ben kon, ibriwan sma di en ati ben boeweigi en foe doe so, èn den ben tjari kon, ibriwan sma di en jeje ben poesoe en foe doe so, den bijdrage gi Jehovah foe a wroko foe a tenti foe konmakandra èn gi ala a wroko di a e doe gi den, èn gi den santa krosi” (Exodus 35:21). Te joe loekoe en boen, dan a friwani presenti foe den ben sori foe de moro foeroe leki san ben de fanowdoe gi a wroko, taki den ben moesoe „tapoe a pipel foe tjari sani kon”! — Exodus 36:5, 6.

Loekoe wan tra eksempre. Di a tabernakel ben doro en marki kaba èn sani ben e sreka gi a bow foe a tempel, dan David ben gi wan bigi bijdrage foe ensrefi gi a tempel di en manpikin Salomo ben o bow. A ben gi so srefi trawan wan kari foe doe dati toe, èn den sma ben kon nanga presenti foe warti sani gi Jehovah. A solfroe nanga gowtoe wawan ben sa abi a waarde foe so wan 50 miljard Amerkan dala foe a disiten waarde. „Èn a pipel ben sori taki den ben prisiri foe di den ben gi friwani presenti.” — 1 Kroniki 29:3-9; 2 Kroniki 5:1.

„Friwani presenti” na ini a ten foe wi

Fa wi kan abi wan prati na ini a prisiri foe gi friwani presenti na ini a ten foe wi? A moro prenspari wroko di doe na grontapoe nownow, na a Kownoekondre preikiwroko èn a wroko foe meki disipel (Mateus 24:14; 28:19, 20; Tori foe den Apostel 1:8). Èn Jehovah si taki a fiti foe froetrow den afersi foe a Kownoekondre na grontapoe na den Kotoigi foe en. — Jesaja 43:10.

A de krin taki moni de fanowdoe foe pai den kostoe foe a wroko di Jehovah Kotoigi e doe na ini a ten disi. Foe man bow èn ondrow Kownoekondre zaal, kongreshal, bijkantoro, drukkerij gebow, nanga Bethel-oso, dan moni de fanowdoe. Foe man tjari bijbel nanga poeblikâsi di gron na tapoe bijbel na ini difrenti tongo, kon na doro èn prati den, abi kostoe toe. Fa wi e pai den kostoe dati di abi foe doe nanga na organisâsi? Nanga bijdrage di sma gi soifri nanga den friwani!

Moro foeroe foe den bijdrage na foe sma di — neleki a weduwe di Jesus ben loekoe — abi soso pikinso moni. Foe di den no wani misi na okasi foe gi Jehovah grani na a fasi disi, meki den e gi bescheiden bijdrage „leki fa den man”, èn sontron, srefi „moro leki san den man”. — 2 Korentesma 8:3, 4.

„Meki ibriwan sma doe soleki fa a bosroiti na ini en ati, no nanga a firi foe no wani doe en noso na ondro dwengi, bika Gado lobi wan sma di e gi nanga prisiri”, na so na apostel Paulus ben taigi den kresten na ini Korente (2 Korentesma 9:7). Te wi wani gi nanga prisiri, dan dati e aksi taki wi meki boen plan na fesi. Paulus ben taigi den Korentesma: „Ibri fosi dei foe a wiki, meki ibriwan foe oenoe poti wan sani na wan sei na ini en eigi oso èn kibri en, akroederi a fasi fa sani go boen gi en, so taki te mi doro, a piki foe moni no abi foe feni presi na a ten dati” (1 Korentesma 16:2). Na a srefi fasi a de so, taki, na wan friwani fasi èn sondro taki tra sma sabi, den wan di wani gi bijdrage foe meki a Kownoekondrewroko go na fesi na ini a ten disi, kan poti pikinso foe a moni di den wroko na wan sei gi a marki dati.

Jehovah e blesi den wan di e gi en grani

Ala di tanboen na materia sei foe ensrefi no e tjari wi go na tanboen na jejefasi, tokoe te wi e gebroiki den warti sani foe wi foeroe — a ten foe wi, a krakti foe wi èn den materia sani di wi abi — foe gi Jehovah grani, dan dati e tjari foeroe blesi kon. Dati de so, bika Gado, foe soema ala sani de, e gi wi a djaranti: „A sili di lobi foe gi sani, ensrefi sa meki kon fatoe, èn a sma di e kowroe na ati foe [trawan] pasa marki, den sa kowroe en ati pasa marki toe.” — Odo 11:25.

Baka di kownoe David dede, dan en manpikin Salomo ben gebroiki den friwani bijdrage di en papa ben tjari kon makandra, foe bow wan kefalek moi tempel, soleki fa Jehovah ben sori. Èn so langa Salomo ben tan getrow na ini na anbegi di a e anbegi Gado, „Juda nanga Israèl ben tan libi na ini seikerfasi . . . foe Dan te go miti Berseiba, ala den dei foe Salomo” (1 Kownoe 4:25). Den maksin ben kon foeroe, den win-bari ben kon foeroe te leki den lon abra — so langa Israèl ’ben gi Jehovah grani nanga den warti sani foe den’.

Baka ten Jehovah ben taki nanga jepi foe a profeiti Maleaki: „’Tesi mi nanga dati’, Jehovah foe den legre taki, ’efoe mi no sa opo den sroisi foe hemel gi oenoe èn troetroe kanti wan blesi kon na oenoe tapoe te leki no wan sani e mankeri moro’” (Maleaki 3:10). A tanboen na jejefasi di den foetoeboi foe Jehovah e njan boen foe en na ini a ten disi, na boeweisi taki Gado hori ensrefi na en pramisi.

Te wi e doe a pisi foe wi foe meki Kownoekondre afersi go na fesi, dan dati seiker e plisi Jehovah (Hebrewsma 13:15, 16). Èn a e pramisi taki a sa horibaka gi wi, efoe wi ’tan soekoe a kownoekondre nanga en regtfardikifasi fosi’ (Mateus 6:33). Meki a de so taki, nanga foeroe prisiri na ati, wi e ’gi Jehovah grani nanga den warti sani foe wi’.

[Faki na tapoe bladzijde 28, 29]

Fasi fa son wan e gi friwani bijdrage gi a wroko na heri grontapoe

Foeroe sma e poti moni na wan sei di den e poti na ini den bijdrageboksoe di skrifi na tapoe: „Bijdrage gi a wroko foe a Genootschap di e doe na heri grontapoe — Mateus 24:14.” Ibri moen den gemeente e seni den bijdrage disi go na a edekantoro na Brooklyn, New York, noso na a bijkantoro foe a kondre.

Friwani bijdrage foe moni kan seni langalanga go toe na a bijkantoro foe a Watch Tower Bible and Tract Society of Pennsylvania, Garnizoenspad 239, Distrikt Wanica. Joe kan gi so srefi gowtoe sani noso tra sani di abi waarde. Den bijdrage disi moesoe seni go nanga wan sjatoe brifi pe skrifi taki den sani disi na bijdrage.

Leni moni ondro spesroetoe kondisi

Moni kan gi na a Waktitoren Genootschap toe ondro wan spesroetoe seti pe a bijdrage kan seni go baka na a sma di ben gi en, efoe a de so taki a sma srefi abi a moni fanowdoe. Efoe joe wani moro bodoi, grantangi meki kontakt nanga a bijkantoro na a adres di skrifi na fesi kaba.

Meki plan na fesi foe gi

Boiti moni di kan gi langalanga èn moni di kan gi ondro spesroetoe kondisi, tra fasi de foe gi sani so taki a Kownoekondrewroko na heri grontapoe kan abi winimarki foe dati. Disi abi na ini toe:

Verzekering: Joe kan poti a nen foe a Waktitoren Genootschap foe kisi a moni foe wan levensverzekeringspolis noso foe wan pensjoenregeling. Den moesoe taigi a Genootschap foe so wan sani di seti.

Deposito: Bankrekening, depositobewijs, noso a pensjoenrekening foe wan sma kan poti tapoe a nen foe a Waktitoren Genootschap foe hori a moni foe wan pisi ten noso foe gi a Genootschap te a sma dede, akroederi den markitiki foe a bangi foe a presi. Den moesoe taigi a Genootschap foe so wan sani di seti.

Aandelen nanga obligatie: Aandelen nanga obligatie kan gi na a Waktitoren Genootschap leki wan sani di wan sma e gi langalanga noso na ondro wan seti pe den e tan pai a sma di gi den aandelen nanga obligatie.

Gron nanga oso: Gron nanga oso di kan seri, kan gi na a Waktitoren Genootschap langalanga noso kan poti na ondro vruchtgebruik gi a sma di gi, so taki so langa a de na libi a kan libi na ini. Kontakt moesoe meki nanga a Genootschap bifo wan sma poti iniwan gron nanga oso tapoe a nen foe a Genootschap.

Testamenti nanga machtiging tapoe goedoe nanga moni: Sani di wan sma abi noso moni kan gi na a Waktitoren Genootschap te a sma dede, nanga jepi foe wan testamenti di meki akroederi wet, noso den kan poti a nen foe a Genootschap leki begunstigde foe wan machtiging. Wan machtiging di de gi wan relisi organisâsi, kan gi bepaalde belasting winimarki. Wan kopi foe a testamenti noso a machtiging moesoe seni go na a Genootschap.

Soleki fa den wortoe „meki plan na fesi foe gi” e sori, dan den sortoe fasi disi foe gi e aksi foe a sei foe a sma di e gi, taki a e meki plan na fesi. Foe jepi sma di wani gi a Genootschap winimarki nanga jepi foe wan toe fasi foe meki plan na fesi foe gi, meki a Genootschap sreka wan brochure di nen Planned Giving to Benefit Kingdom Service Worldwide (Meki plan na fesi foe gi, foe gi winimarki na a Kownoekondrewroko na heri grontapoe). A brochure ben skrifi leki wan piki tapoe den foeroe aksi di a Genootschap kisi ini a tori foe presenti, testamenti nanga machtiging. A brochure abi moro bodoi na ini di sma kan gebroiki foe meki plan na fesi ini a tori foe goedoe nanga oso, moni nanga belasting, èn meki foe jepi sma na Amerkankondre di wani gi winimarki na Kownoekondre afersi na heri grontapoe, so taki den kan teki den moro boen fasi di e gi moro foeroe winimarki, nanga a situwâsi foe na osofamiri foe den nanga densrefi na prakseri. Foe di den e leisi a brochure èn e poti aksi gi den wan di e wroko na a Planned Giving Desk, meki foeroe sma man jepi a Genootschap èn na a srefi ten meki den winimarki foe den na belasting sei kon moro bigi foe di den doe dati. Joe kan kisi a brochure te joe aksi foe en, foe di joe e skrifi wan brifi noso foe di joe e bèl.

Den wan di abi belangstelling gi iniwan seti disi foe meki plan na fesi foe gi, moesoe meki kontakt nanga a bijkantoro foe a Watch Tower Bible and Tract Society of Pennsylvania na Garnizoenspad 239, Distrikt Wanica, telefon 0328054.