Aristarkus — Wan loyaal kompe

WAN foe den foeroe kompe wrokoman di na apostel Paulus ben kan froetrow, ben de Aristarkus. San joe e prakseri te joe e jere en nen? Notinoti? Joe ben sa man taki san a ben abi foe doe nanga a fasi fa sani ben waka na ini a fositen kresten historia? Ala di a kan, taki Aristarkus no ben de wan foe den sma na ini bijbel di wi sabi boen, tokoe a ben abi foe doe nanga wan toe sani di ben pasa èn di den e froeteri foe dati na ini den kresten Griki Boekoe foe bijbel.

So boen, soema ben de Aristarkus dan? San a ben abi foe doe nanga Paulus? Foe san ede wi kan taki dati Aristarkus ben de wan loyaal kompe? Èn san wi kan leri te wi e ondrosoekoe na eksempre foe en?

A fosi leisi di wi e jere foe Aristarkus, ben de na wan span momenti na ini a tori di skrifi na ini a boekoe Tori foe den Apostel, di a ben de leti na mindri a babari nanga a broeja foe wan groepoe trobiman na ini a foto Efeise di no man hori densrefi moro (Tori foe den Apostel 19:23-41). Demetrius nanga tra solfroesmeti foe Efeise ben kisi foeroe moni foe di den ben meki pikin solfroe tempel foe a falsi gado Artemis. So boen, di Paulus preikiwroko na ini a foto ben abi leki bakapisi, taki boen foeroe sma ben gowe libi na anbegi foe na oemagado disi di no ben krin, dan Demetrius ben soetoe faja gi tra anoe-wrokoman. A ben taigi den taki a preikiwroko foe Paulus no wawan ben de wan kefar gi a seikerfasi di den ben abi na moni sei, ma a ben taigi den toe taki a ben sa kan pasa taki sma no ben o anbegi Artemis moro.

Foe di a faja-ati groepoe trobiman no ben man feni Paulus, meki den ben srepi Aristarkus nanga Gajus, den kompe foe Paulus, nanga tranga go na ini a komedi-oso. Foe di den toe sma dati ben de ini bigi kefar, meki den mati foe Paulus ben begi en foe „no prefoeroe foe go na ini a komedi-oso”.

Proeberi foe si joesrefi na ini a situwâsi dati. So wan toe joeroe langa, a groepoe trobiman di no ben man hori densrefi moro, ben tan bari: „Artemis foe den Efeisesma bigi!” A ben moesoe foe de wan ondrofeni di ben frede Aristarkus nanga Gajus troetroe, di den ben si taki a faja-ati ipi sma disi ben abi den ini den makti sondro taki den ben man opo taki wan sani gi densrefi. Den ben moesoe aksi densrefi efoe den ben o tan na libi. Kolokoe taki dati ben de so. Ija, a libilibi fasi fa Lukas skrifi a tori, meki taki son sabiman prakseri taki a ben jere disi foe sma di ben de drape, kande foe Aristarkus nanga Gajus srefi.

Te foe kaba, a granman foe foto ben saka na oproeroe. A ben moesoe de wan troetroe froelekti gi Aristarkus nanga Gajus foe jere dati sondro taki a granman ben teki partèi, ben erken taki den no ben doe noti èn baka dati a ben sorgoe taki na oproeroe di ben kon foe den ede, ben kon saka.

Fa joe ben o firi baka so wan ondrofeni? Joe ben sa kon na a bosroiti taki joe no ben o wani de wan kompe foe Paulus na ini a zendingwroko, taki a ben de toemoesi kefalek, èn taki a ben o de moro betre efoe joe ben o soekoe wan moro tiri libi? Dati no ben de so nanga Aristarkus! A ben de foe Tesalonika èn kande a ben sabi kaba san ben de den kefar di abi foe doe nanga a wroko foe meki a boen njoensoe bekènti. Di Paulus ben preiki na ini a foto foe en soso wan toe jari na fesi, dan wan oproeroe ben de drape toe (Tori foe den Apostel 17:1-9; 20:4). Aristarkus ben tan loyaal na Paulus.

Go foe Grikikondre na Jerusalem

Wan toe moen baka na oproeroe foe den solfroesmeti, Paulus ben de na Grikikondre, èn a ben de foe teki sipi go na Siria ala di a ben o pasa Jerusalem, di „den djoe ben meki wan ogri-ati plan teige en” (Tori foe den Apostel 20:2, 3). Soema wi e si nanga Paulus na ini a kefalek situwâsi disi? Aristarkus!

A njoen kefar disi ben meki taki Paulus, Aristarkus, nanga den kompe foe den ben moesoe kenki den plan foe den, èn den ben rèis na ini Masedonia fosi, dan den ben waka a pasi pisipisi pasa a sjorosei foe Pikin Asia bifo den ben teki sipi na ini Patara foe go na Fenisia te foe kaba (Tori foe den Apostel 20:4, 5, 13-15; 21:1-3). A sori leki den ben teki a waka disi foe tjari den bijdrage foe den kresten na Masedonia nanga Akaja go na den brada na Jerusalem di ben de na nowtoe (Tori foe den Apostel 24:17; Romesma 15:25, 26). Wan heri ipi sma ben teki a waka makandra nanga den, kande foe di difrenti gemeente ben gi den a frantiwortoe foe tjari den bijdrage disi. Tweifri no de, taki so wan bigi groepoe ben o gi moro seikerfasi toe.

Aristarkus ben abi wan bigi grani foe go nanga Paulus foe Grikikondre na Jerusalem. Ma a tra waka foe den, ben o tjari den foe Judea go te na Rome.

A waka foe go na Rome

A leisi disi a situwâsi ben de heri tra fasi. Paulus ben de na ini strafoe-oso na Cesarea toe jari langa, a ben aksi a jepi foe Caesar, èn now den ben o seni en go na Rome na ini keti (Tori foe den Apostel 24:27; 25:11, 12). Proeberi foe prakseri fa den kompe foe Paulus ben firi. A waka foe Cesarea go na Rome ben o teki langa èn a ben o abi foeroe krakti tapoe den firi foe den, sondro taki den ben sabi fa sani ben o waka te foe kaba. Soema ben kan go nanga Paulus foe horibaka gi en èn foe jepi en? Toe man den ben teki noso den man dati srefi ben bosroiti foe go nanga den. Den ben de Aristarkus nanga Lukas, a skrifiman foe Tori foe den Apostel. — Tori foe den Apostel 27:1, 2.

Fa Lukas nanga Aristarkus ben man go na tapoe a srefi sipi na ini a fosi pisi foe a rèis go na Rome? A historia skrifiman Giuseppe Ricciotti e prakseri foe disi: „Den toe man disi ben go na tapoe sipi leki sma di ben e teki a waka tapoe densrefi . . . noso, moro betre kande, foe a boen-atifasi foe a legre edeman ede meki den ben kisi pasi foe doe neleki den ben de srafoe foe Paulus, foe di a wet ben gi wan borgoe foe Rome pasi foe kisi a jepi foe toe srafoe.” Fa a ben moesoe tranga Paulus, taki den ben de drape èn ben gi en deki-ati!

Lukas nanga Aristarkus ben sori a lobi di den ben lobi Paulus, foe di den ben de klariklari foe tjari den libi kon ini kefar foe en ede. Foe taki en leti, den ben ondrofeni wan situwâsi pe a libi foe den ben kon ini kefar makandra nanga a kompe foe den di ben de wan strafoeman, di a sipi foe den ben broko èn soengoe krosibei foe na èilanti Malta. — Tori foe den Apostel 27:13–28:1.

A „kompe strafoeman” foe Paulus

Di Paulus ben skrifi den brifi foe en gi den Kolosesma èn gi Fileimon na ini 60 nanga 61 G.T., dan Aristarkus nanga Lukas ben de nanga en ete na ini Rome. Den e taki foe Aristarkus nanga Epafras leki den ’kompe strafoeman’ foe Paulus (Kolosesma 4:10, 14; Fileimon 23, 24). Foe dati ede, a sori taki wan pisi ten, Aristarkus ben de na ini strafoe-oso boei toe nanga Paulus.

Ala di Paulus ben de wan strafoeman na ini Rome kande so wan toe jari, tokoe a ben kisi pasi foe libi na ini en eigi joeroe-oso ala di wan sroedati ben hori wakti e loekoe en, pe a ben man meki a boen njoensoe bekènti na sma di ben kon loekoe en (Tori foe den Apostel 28:16, 30). Na a ten dati, Aristarkus, Epafras, Lukas, nanga tra sma ben man dini Paulus, ben jepi en èn ben horibaka gi en.

„Wan jepi di ben tranga” en

Baka di wi loekoe difrenti situwâsi na ini a bijbel tori di skrifi na ondro a krakti foe santa jeje, èn pe den e taki foe Aristarkus, dan sortoe man a ben de? Soleki fa skrifiman W. D. Thomas e taki, dan „wi e si taki [Aristarkus] ben de wan man di ben kan kakafoetoe gi gens èn ben man pasa disi sondro foe lasi a bribi foe en, ala di a ben abi a fasti bosroiti foe dini sondro foe tapoe. Wi e si taki a de wan man di ben lobi Gado no soso na ini boen ten, te ala sani ben waka boen, ma so srefi te a ben kisi foe doe nanga tesi èn nanga moeilek ten”.

Paulus e taki dati Aristarkus nanga tra sma ben de ’wan jepi di ben tranga’ (Grikitongo, pa·re·go·riʹa) en, dati wani taki, dati den ben de wan fonten foe trowstoe (Kolosesma 4:10, 11). So boen, foe di Aristarkus ben trowstoe èn ben tranga Paulus, meki a ben de wan troetroe kompe na ini ten foe nowtoe. A demakandra nanga a matifasi di a ben abi nanga na apostel foeroe jari langa, seiker ben de wan prisiri ondrofeni di ben leri en foeroe na jejefasi.

Kande wi no o kon na ini situwâsi di abi someni span na ini leki san Aristarkus ben ondrofeni. Ma tokoe a de fanowdoe taki ala den sma na ini a kresten gemeente foe a ten disi, de loyaal na a srefi fasi toe na den jeje brada foe Krestes èn na a organisâsi foe Jehovah. (Teki gersi Mateus 25:34-40.) Kande wan ten sa kon, taki kompe anbegiman di wi sabi, sa kisi gens noso banawtoe, foe di den lasi wan sma na ini dede, foe siki noso tra tesi ede. Te wi e tan horibaka gi den èn e jepi den, e trowstoe den, èn e gi den deki-ati, dan wi kan prisiri foe dati èn wi kan sori taki wi de loyaal kompe. — Teki gersi Odo 17:17; Tori foe den Apostel 20:35.