Den Kompe-wrokoman fu Paulus—Suma Den Ben De?

NA INI a Bijbel buku Tori fu den Apostel èn na ini den brifi fu Paulus, den e kari so wan wán hondro sma, di de memre fu a fosi yarihondro Kresten gemeente èn di ben abi persoonlijk kontakti nanga na „apostel fu den nâsi” (Romesma 11:13). Wi sabi furu fu wan lo fu den. Kande yu sabi den sani di Apolos, Barnabas, nanga Silas ben du. Na a tra sei, kande yu ben sa feni taki a moro muilek fu taki furu fu Arkipus, Klaudia, Damaris, Linus, Persis, Pudens nanga Sopater.

Na ini difrenti pisi ten èn na difrenti situwâsi, furu sma ben abi wan fayafaya ròl fu horibaka gi a diniwroko fu Paulus. Wan tu fu den soleki Aristarkus, Lukas, nanga Timoteus ben wroko krosibei nanga na apostel furu yari langa. Wan tu ben de nanga en di a ben de na strafu-oso noso te a ben e go fu a wan presi go na a trawan, kande leki kompe fu en te a ben e rèis noso leki man noso uma di ben ontfanga en na den oso. A de wan sari taki trawan, soleki Aleksander, Deimas, Hermogenes, nanga Figelus, no ben horidoro na ini a Kresten bribi.

Fu difrenti fu den tra mati fu Paulus, leki Asynkritus, Hermas, Julia, noso Filologus, fu kari wan tu nomo, wi no sabi furu moro fu den leki den nen fu den nomo. Na ini a kefal fu a sisa fu Nereus noso a mama fu Rufus noso den wan fu na oso fu Kluwe, wi no sabi den nen srefi (Romesma 16:13-15; 1 Korentesma 1:11). Ma toku te wi e ondrosuku den pikinso sani di wi sabi fu den so wan hondro sma disi, dan dati e yepi wi fu frustan a fasi fa na apostel Paulus ben e wroko. A e leri wi wan sani tu fu den winimarki di de te wi abi furu kompe-bribiman lontu wi èn te wi e wroko krosibei nanga den.

Kompe Di Ben E Reis Nanga En, èn Man Nanga Uma Di Ben Ontfanga En na Oso

Na apostel Paulus ben musu reis furu na ini a diniwroko fu en. Wan skrifiman e bereken taki a pasi di a ben reis na gron èn na tapu se di skrifi na ini Tori fu den Apostel wawan, ben doro so wan 16.000 kilometer. A no ben weri a skin wawan fu reis na a ten dati, ma a ben kefarlek tu. Wan tu fu den kefarlek situwâsi di a ben miti ben de a sungu di a sipi fu en ben sungu, kefar na tapu liba èn fu fufuruman na tapu strati, kefar na ini a sabana, èn kefar na tapu se (2 Korentesma 11:25, 26). A ben bun taki pikinmoro noiti Paulus ben de en wawan te a ben e rèis fu a wan presi go na a trawan.

Den sma di ben e waka nanga Paulus ben musu de leki kompe gi en di ben e gi en deki-ati nanga praktisch yepi na ini a diniwroko. Son leisi Paulus ben libi den na baka so taki den ben kan sorgu gi den sani di den nyun bribiman ben abi fanowdu na yeye fasi (Tori fu den Apostel 17:14; Titus 1:5). Ma a abi di a ben abi kompe ben de prenspari tu fu kisi kibri èn fu kisi yepi na ini den muilek situwâsi te a ben e rèis. Fu dati ede den sma soleki Sopater, Sekundus, Gayus, nanga Trofimus, di soleki fa wi sabi, ben de na mindri den kompe di ben reis nanga Paulus, ben plèi wan prenspari rol di ben meki taki Paulus ben abi bun bakapisi na ini en diniwroko.—Tori fu den Apostel 20:4.

Wan bun sani ben de so srefi a yepi fu den man nanga uma di ben ontfanga en na den oso. Te Paulus ben doro na ini wan foto pe a ben abi na prakseri fu du wan preikiwroko noso fu tan sribi wán neti nomo drape, dan wan prenspari sani ben o de taki a ben musu feni wan tanpresi. Iniwan sma di ben e reis so fara leki Paulus, ben sa abi fu sribi na tapu furu difrenti bedi. A ben kan tan na ini wan herberg, ma den historia skrifiman e taki dati den herberg ben „kefarlek èn no ben de bun presi”, èn fu dati ede, efu a ben kan, dan Paulus ben e tan na den kompe-bribiman fu en.

Wi sabi den nen fu wan tu fu den man nanga uma di ben ontfanga Paulus na oso — Akwila nanga Priska, Gayus, Yason, Lydia, Mnason, Fileimon, nanga Filipus (Tori fu den Apostel 16:14, 15; 17:7; 18:2, 3; 21:8, 16; Romesma 16:23; Fileimon 1, 22). Na ini Filipi, Tesalonika, nanga Korente, den sortu tanpresi disi ben gi Paulus wan presi fu pe a ben kan orga den zendingwroko fu en. Na ini Korente, Titius Yustus ben opo en oso tu fu gi na apostel wan presi fu pe na apostel ben kan du en preikiwroko.—Tori fu den Apostel 18:7.

Wan Bigi Grupu Mati

Soleki fa wi ben kan fruwakti, Paulus ben memre difrenti sani fu den mati fu en bika a ben miti den na difrenti situwâsi. Fu eksempre, Maria, Persis, Fube, Trifena, nanga Trifosa, ben de umasma di a ben prèise fu den tranga muiti nanga wroko (Romesma 16:1, 2, 6, 12). Paulus ben dopu Krispus, Gayus, nanga na osofamiri fu Stefanus. Dionysius nanga Damaris ben teki a boskopu fu waarheid fu en na ini Ateine (Tori fu den Apostel 17:34; 1 Korentesma 1:14, 16). Andronikus nanga Yunias, „prenspari man na mindri den apostel”, di ben de moro langa na bribi leki Paulus, Paulus ben kari „kompe-strafuman”. Kande den ben de na strafu-oso nanga en na wan tu okasi. Den tu man disi, leki Herodion, Yason, Lusius, nanga Sosipater, Paulus ben kari so srefi en „famiri” (Romesma 16:7, 11, 21). Ala di a Griki wortu di gebroiki dyaso kan wani taki „kompe-kondreman”, toku a moro prenspari sani di a wani taki na „trutru famiri fu a srefi geslakti”.

Furu fu den mati fu Paulus ben reis gi a bun nyunsu. Boiti den kompe fu en di wi sabi moro bun, dan so srefi Akaikus, Fortunatus, nanga Stefanus ben de, di ben reis komoto fu Korente go na Efeise fu kenki prakseri nanga Paulus fu a situwâsi na yeye fasi na ini a gemeente fu den. Artemas nanga Tigikus ben de klariklari fu rèis go miti Titus di ben dini na tapu na èilanti Kreta, èn Senas ben musu go nanga Apolos.—1 Korentesma 16:17; Titus 3:12, 13.

Paulus ben gi wan tu pikin èn moi bodoi tori fu wan tu fu den. Fu eksempre, wi sabi taki Epeinetus ben de „wan fosi froktu fu Asia”, taki Erastus ben de „a beheerder fu a foto” na ini Korente, taki Lukas ben de wan datra, taki Lydia ben e seri purper krosi, èn dati Tertius ben de a man di Paulus ben gebroiki fu skrifi en brifi gi den Romesma (Romesma 16:5, 22, 23; Tori fu den Apostel 16:14; Kolosesma 4:14). Gi iniwan sma di ben sa wani sabi moro fu den sortu sma disi, den pikinso bodoi disi e wiki lostu fu sabi moro.

Tra kompe fu Paulus ben kisi persoonlijk boskopu fu en, di skrifi now na ini Bijbel. Fu eksempre, na ini en brifi gi den Kolosesma, Paulus ben frumane Arkipus: „Tan sorgu taki yu e du a diniwroko di yu teki fu a Masra” (Kolosesma 4:17). Soleki fa a sori, Euódia nanga Sýntyche ben abi wan trobi nanga makandra di den ben musu lusu. Fu dati ede na apostel Paulus ben frumane den nanga yepi fu wan „man di ben abi a srefi tyatyari” na ini Filipi èn di a no kari na nen, fu den „abi a srefi denki na ini Masra” (Filipisma 4:2, 3). Fu tru, disi na bun rai gi wi alamala.

Getrow Yepi ala di A Ben De na ini Strafu-oso

Paulus ben de difrenti leisi na ini strafu-oso (2 Korentesma 11:23). Na ini den situwâsi dati, den Kresten drape, efu den ben de, seiker ben pruberi fu du ala san den kan fu meki a moro makriki gi en fu frudrage a situwâsi. Di Paulus ben de a fosi leisi na strafu-oso na ini Rome, a ben kisi primisi fu yuru en eigi oso tu yari langa èn den mati fu en ben kan fisiti en (Tori fu den Apostel 28:30). Na ini a pisi ten dati, a ben skrifi brifi gi den gemeente na ini Efeise, Filipi, nanga Kolose, èn so srefi gi Fileimon. Den brifi disi e fruteri wi furu fu den wan di ben de krosibei na Paulus na ini a pisi ten di a ben de na ini strafu-oso.

Fu eksempre, wi e leri taki Onesimus, Fileimon en srafu di ben lowe, ben miti Paulus na ini Rome, leki Tigikus, di ben musu go nanga Oneisimus baka na en masra (Kolosesma 4:7-9). Epafroditus ben de drape tu, di ben teki wan langa waka komoto na Filipi nanga wan presenti fu en gemeente, èn di ben kon siki baka dati (Filipisma 2:25; 4:18). Den man di ben wroko krosibei nanga Paulus na ini Rome, ben de Aristarkus, Markus, nanga Yesus di den ben e kari Yustus, di Paulus ben taki fu den: „Soso den sma disi na mi kompe-wrokoman gi a kownukondre fu Gado, èn na den wan disi kon de wan yepi gi mi di e tranga mi” (Kolosesma 4:10, 11). Makandra nanga ala den loyaal man disi, so srefi Timoteus nanga Lukas ben de tu di wi sabi moro bun, èn so srefi Demas di baka ten, bika a ben lobi grontapu, ben gowe libi Paulus.—Kolosesma 1:1; 4:14; 2 Timoteus 4:10; Fileimon 24.

Soleki fa a sori, no wan fu den man disi ben de fu Rome, ma toku den ben de nanga Paulus. Kande wan tu fu den ben go spesrutu na en fu yepi en di a ben de na strafu-oso. Seiker son wan fu den ben e du boskopu gi en, èn ala di a ben seni trawan go na farawe presi fu dini, èn trawan Paulus ben e taigi san den musu skrifi na ini brifi. ¡Dati na wan libilibi buweisi fu a tranga banti èn a loyaalfasi di ala den man disi ben abi gi Paulus èn gi a wroko fu Gado!

Na a kaba fu wan tu fu den brifi fu Paulus, wi e frustan taki wan bigi grupu Kresten brada nanga sisa ben de nanga en, moro leki den wan tu nen di wi sabi. Na difrenti okasi a ben skrifi: „Ala den santa wan e seni un odi”, nanga „den alamala di de nanga mi e seni odi gi unu”.—2 Korentesma 13:13; Titus 3:15; Filipisma 4:22.

Na a kefalek muilek ten fu a di fu tu strafuten fu Paulus na ini Rome, di a dede fu en leki Kresten ben de krosibei, dan Paulus ben prakseri den kompe-wrokoman fu en furu. A ben e du furu ete fu teki fesi èn orga den wroko fu seiker wan tu fu den kompe fu en. A ben seni Titus nanga Tigikus go fu du spesrutu diniwroko, Kresens ben go na Galasia, Erastus ben tan na ini Korente, Trofimus ben tan sikisiki na ini Miletus, ma Markus nanga Timoteus ben musu kon nanga en. Ma Lukas ben de nanga Paulus, èn di na apostel ben skrifi en di fu tu brifi gi Timoteus, dan tra bribiman, soleki Eubulus, Pudens, Linus, nanga Klaudia, ben de drape tu fu seni den odi fu den. Seiker den ben du san den man fu yepi Paulus. Na a srefi ten, Paulus srefi ben seni odi gi Priska nanga Aquila nanga na osofamiri fu Oneisiforus. Ma a de wan sari taki na ini a muilek ten dati, Demas ben gowe libi en, èn Aleksander ben du en wan lo ogri.—2 Timoteus 4:9-21.

„Wi Na Kompe-wrokoman fu Gado”

Pikinmoro noiti Paulus ben de en wawan na ini en preikiwroko. „Na idea di e gi”, na so a fruklariman E. Earle Ellis e taki, „na fu wan zendeling di ben abi furu kompe. Iya, pikinmoro noiti Paulus de sondro kompe.” Na ondro a tiri fu a santa yeye fu Gado, Paulus ben man gi furu sma deki-ati èn a ben man orga zendingwroko nanga bun bakapisi. A ben abi furu krosibei patna, yepiman gi wan syatu ten, wan tu sma di ben abi tranga persoonlijkheid, nanga furu tra futuboi di ben abi sakafasi. Ma den no ben de soso kompe-wrokoman. Awansi o furu den ben wroko nanga Paulus noso ben abi demakandra nanga en, a de krin taki a banti fu a Kresten lobi nanga a persoonlijk matifasi ben de krin fu si.

Na apostel Paulus ben de san sma e kari wan „sma di sabi heri bun fa fu meki mati”. A ben du furu fu tyari a bun nyunsu go na den nâsi, ma a no ben pruberi fu du dati en wawan. A ben wroko makandra nanga a Kresten gemeente di ben orga èn ben gebroiki en bun. Paulus no ben meki bigi fu den sani di a ben man du, ma nanga sakafasi a ben erken taki a ben de wan srafu èn taki ala grani musu go na Gado leki a sma di e meki sani gro.—1 Korentesma 3:5-7; 9:16; Filipisma 1:1.

A ten fu Paulus ben difrenti nanga di fu wi, ma toku no wan sma na ini a Kresten gemeente na ini a ten disi musu prakseri taki a no abi tra sma fanowdu noso taki a musu du sani sondro tra sma. Na presi fu dati, ala ten wi musu wroko nanga na organisâsi fu Gado, nanga wi eigi gemeente, èn nanga wi kompe-bribiman. Wi abi den yepi nanga trowstu fanowdu na ini bun ten èn na ini muilek ten. Wi abi a moi grani fu de wan pisi fu wan ’heri libimakandra fu brada na grontapu’ (1 Petrus 5:9). Efu na wan getrow fasi èn na ini lobi wi e wroko nanga makandra, dan leki Paulus, wi tu kan taki dati „wi na kompe-wrokoman fu Gado”.—1 Korentesma 3:9.

[Prenki na tapu bladzijde 31]

APOLOS

ARISTARKUS

BARNABAS

LYDIA

ONEISIFORUS

TERTIUS

TIGIKUS