Kownoekondre preikiman e froeteri

Wini den tjalensi ini „a kondre foe sani di sma no e froewakti”

NA APOSTEL Paulus ben aksi den fosi jarihondro kresten na Korente: „Efoe a trompeti e gi wan babari di no krin, dan soema sa sreka ensrefi gi a feti? Na a srefi fasi a de so toe: efoe nanga a tongo oenoe no e taki wortoe di makriki foe froestan, dan fa sma sa sabi san oenoe e taki?” — 1 Korentesma 14:8, 9.

Na Papoewa Njoen Ginea, di sma e kari son tron a kondre foe sani di sma no e froewakti, Jehovah Kotoigi e miti kefalek bigi problema te den e preiki a krin boskopoe foe bijbel. Den e preiki gi sma di e taki moro leki 700 difrenti tongo èn di abi foeroe difrenti gwenti. Den Kotoigi e kisi foe doe toe nanga bergi kontren, pasi di no de, èn ogridoe di e kon moro foeroe. Boiti ala den problema disi, den e kisi gens foe son relisi groepoe èn, wanwan leisi, srefi foe edeman foe skoro.

Ma tokoe, boen leri na jejefasi èn wan bibliotheek foe bijbelstudie jepisani di e kon bigi nomonomo, ini den tongo foe a kondre, e gi den Kotoigi san den abi fanowdoe foe froeteri a boen njoensoe leki wan krin babari foe wan trompeti. Foeroetron a fasi fa sma e doe wan sani na tapoe de positief, soleki fa den verslag di e kon now e sori:

• Na a bigin foe wan njoen skorojari, wan skoromeester ben wani sabi foe san ede den pikin foe Jehovah Kotoigi no e taki a fraga odi noso no e singi a kondresingi. A ben poti en aksi gi Maiola, wan studenti di abi 13 jari èn di de wan dopoe Kotoigi. Maiola ben gi wan krin froeklari di ben abi en gron tapoe bijbel. A skoromeester ben feni a fasi fa a ben taki-go-taki-kon, boen, foe di a ben komoto na bijbel. Den ben froeteri a froeklari foe en na den tra skoromeester toe.

Baka ten, di den studenti ben kisi toewijzing foe skrifi wan tori, Maiola ben froekisi a tori foe a Dri-wánfasi. En tori ben kisi a moro hei cijfer foe a klas, èn a skoromeester ben aksi en pe a ben feni a bodoi. A ben sori en a boekoe Joe kan libi foe têgo na ini wan paradijs na grontapoe na ini na Ingrisi tongo. A skoromeester ben sori a boekoe na a heri klas, èn foeroe foe den ben wani wan eksemplaar gi densrefi. A tra dei, Maiola ben prati 14 boekoe nanga 7 tijdschrift na en skoro kompe, èn a ben bigin wan bijbelstudie nanga dri foe den. A marki di Maiola abi na en fesi na foe tron wan foeroeten bedinari.

• Wan groepoe Jehovah Kotoigi di de fara ini wan dorpoe di de na wan sjoro krosibei foe Port Moresby, kisi foe doe nanga gens sensi den jari pikinso baka 1970. Ma no so langa pasa, den ben kisi jepi foe wan fonten di den no ben froewakti. A biskopoe foe a United Church drape, wan sma di gebore na Papoewa Njoen Ginea èn di ben kisi leri na tra kondre, ben aksi den arkiman foe poti aksi na ini kerki wan dei. Wan man ben aksi: „Toe relisi de ini wi dorpoe — a United Church nanga Jehovah Kotoigi. San wi moesoe doe te den kotoigi kon na wi oso?” Baka di a biskopoe tantiri wan langa pisi ten, a ben piki: „We, mi no sabi troetroe san mi moesoe taigi joe. No so langa pasa, toe jongoe Kotoigi ben kon na mi oso. Den ben poti wan aksi gi mi, èn nanga ala universiteit leri di mi ben kisi, mi no ben sabi a piki. Ma den ben gi mi a piki komoto na bijbel na wan makriki fasi. Foe dati ede mi no e go taigi joe san joe moesoe doe — joesrefi moesoe teki a bosroiti. Joe no abi foe arki efoe joe no wani, ma no doe den ogri.”

Wan sma di e rèis èn e teki presi gi a Waktitoren Genootschap èn di ben fisiti a groepoe Kotoigi disi baka ten, ben froeteri: „Pikinmoro ala sma na ini a dorpoe ben arki den Kotoigi te den ben go preiki. Son sma kari den srefi foe kon na ini den oso. A de wan paradijs foe preiki now.”