Kownoekondre preikiman e froeteri

Satisferi na angri na jeje fasi — na skoro

„KOLOKOE den sma di sabi a jeje nowtoe foe den”, Jesus ben taki ini en bergi preiki (Mateus 5:3). Foeroe skoropikin e drei watra foe a sabi foe Gado èn den wondroe prakseri foe en. Den wani piki tapoe aksi di abi foe doe nanga libi èn fa den moesoe libi foe Gado feni den boen èn foe de kolokoe. A jeje drei watra disi ben de foe si na a skoro na den Ingrisi Virgin Eilanti. Wán Kotoigi foe Jehovah drape e froeteri:

◻ „Mi ben go na wan konmakandra foe papa nanga mama èn skoro meistri na a skoro ini mi birti èn den ben taki foeroe sani foe drug, dringi sopi, meki mofo foe hori nanga meisje, loekoe tv, den penti di den skoro meistri e gi èn tra afersi, dati meki mi ben bosroiti foe teki a boekoe Jongoe sma e aksi — Piki di e wroko èn pristeri en na a ede jufrow foe a skoro. Baka di a ben ondrosoekoe a boekoe, a ben taki dati disi ben de soifri a sani di den ben abi fanowdoe èn a ben aksi efoe a skoro ben kan kisi tra eksemplaar gi ibriwan foe den 120 studenti. Den ben taki foe na afersi disi nanga den gemeente owroeman èn den teki a bosroiti foe gi a skoro den boekoe. Di wi taigi den disi, den meistri ben aksi dati wi pristeri den boekoe na a organisâsi foe den studenti. Toe Kotoigi ben go èn a kamra ben foeroe nanga studenti di ben e wakti den. Den brada ben taki wan afoe joeroe langa èn ondrofenitori di ben e sori fa a boekoe ben jepi jongoesma nanga owroesma den ben leisi foe den tijdschrift foe a Waktitoren Genootschap. Baka disi den pristeri den boekoe na den studenti di ben de fajafaja.”

A de wan prisiri foe sabi taki a skoro ben teki a bosroiti foe gebroiki a boekoe ini a di foe fo nanga feifi klas foe lagi skoro. A sa gi piki troetroe tapoe foeroe aksi di den studenti disi abi foe a libi èn a tamara.

Satisferi na angri na jeje fasi — Ini Papua Njoen Guinea

Na ondrofenitori di e kon now ben kon foe wan opziener di e rèis. A e froeteri fa den sma ini a kondre dati e angri na jeje fasi èn fa wi poeblikâsi, di abi bijbel leki gron, ben jepi den nanga boen bakapisi èn ben satisferi na angri foe den.

◻ „Di mi no ben man fisiti a dorpoe foe Kamberatoro”, na opziener ben taki, „mi ben pasa mi ten foe wroko nanga a pikin gemeente ini Vanimo. Drape foeroe sma abi belangstelling. Wan toe sma foe Bewani ben teki boekoe. Wán man ben aksi mi foe tjari wan fisiti na a dorpoe disi èn a ben sa sorgoe taki mi feni tanpresi. Foeroe sma de bekènti nanga den boekoe foe wi. Ibritron di wi ben go na a foto Vanimo, ala wi boekoe ben kaba ala di wi ben tjari dri dosoe nanga boekoe go. Den sma e si Mi boekoe nanga bijbel tori net so warti leki gowtoe. Sma e soekoe a boekoe disi. Den boekoe di mi ben teki go nanga mi den sma ben teki esi-esi. Te wi ben sori sma den boekoe foe wi, sonwan ben e aksi: ’Pe a geri boekoe de?’ Wán man ben bisteri siksi. A ben gi mi en nen nanga en tanpresi èn ben aksi mi efoe mi ben kan meki en bekènti na radio te mi ben kisi den boekoe. Dan a ben sa komoto na en foto kon teki den.” Na opziener di ben e rèis e froeteri moro fara: „Mi ben si taki foeroe sma ini Vanimo ben teki den boekoe A soekoe di libisma e soekoe Gado nanga Jongoe sma e aksi — Piki di e wroko.”

Disi e sori fa reti-ati sma e angri foe njanjan na jeje fasi di wi kan feni ini bijbel nanga den poeblikâsi di Jehovah gi nanga jepi foe „a getrow èn koni srafoe” (Mateus 24:45-47). O kolokoe Jehovah Kotoigi de di den man jepi den sma disi di e angri foe a waarheid!

[Prenki na tapoe bladzijde 30]

Kotoigiwroko na ini Papua Njoen Guinea