No draidrai fu preiki
1. Gi san yu abi deki-ati fanowdu, èn fu san ede?
1 A pasa nanga yu taki yu ben draidrai fu preiki na skoro fu di yu ben frede taki sma ben o dreigi yu? A tru taki yu musu abi deki-ati, spesrutu efu yu e syensyen. San kan yepi yu?
2. Fa wi kan handri na wan koni fasi te wi e preiki na skoro?
2 Gebroiki koni: Aladi a bun te yu e si skoro leki wan bun presi pe yu kan preiki, toku yu musu hori na prakseri taki yu no kan bigin taki fu Gado nanga ibri sma drape, leki te yu e preiki oso fu oso. Gebroiki koni fu sabi o ten yu musu taki (Preik. 3:1, 7). Te yu musu taki fu wan tori na ini klas, dan dati kan gi yu na okasi fu taki fu den sani di yu e bribi. Noso kande wan pikin na skoro aksi yu fu san ede yu no e du son sani na skoro. Son Kresten taigi den leriman na skoro na a bigin kaba fu a skoro yari, taki den na Kotoigi fu Yehovah èn den gi den leriman publikâsi di e taki fu a bribi fu wi. Trawan ben poti publikâsi na tapu den tafra, so taki tra skoropikin kan aksi den wan sani fu den publikâsi.
3. Fa yu kan sreka yusrefi fu preiki na skoro?
3 Sreka yusrefi: Te yu sreka yusrefi, dan yu o abi moro deki-ati (1 Petr. 3:15). Sobun, pruberi fu sabi kaba sortu aksi sma kan poti gi yu, èn denki fa yu o piki den aksi dati (Odo 15:28). Efu yu man, tyari yu Bijbel nanga wan tu tra publikâsi soleki a Redeneren-buku (Taki-go-taki-kon nanga yepi fu Bijbel), den Jonge mensen vragen-buku, nanga buku di e taki fu a Mekiman, so taki yu kan gebroiki den na skoro te a de fanowdu. Aksi yu papa nanga mama fu oefen nanga yu te unu abi na Osofamiri Anbegi.
4. Fu san ede yu musu tan preiki na skoro?
4 No frede fu preiki: No denki taki ala ten den pikin na skoro o dreigi yu te yu e preiki gi den. Sonwan fu den o warderi yu fu di yu abi a deki-ati fu taki, èn den kan arki yu. Ma no lasi-ati te nowan sma e arki. Yehovah o breiti taki yu ben pruberi (Hebr. 13:15, 16). Tan aksi en meki a yepi yu fu ’tan taki sondro fu frede’ (Tori 4:29; 2 Tim. 1:7, 8). Prakseri fa yu o breiti te wan sma arki yu! Kande a sma dati o tron wan futuboi fu Yehovah tu!