Gebroiki den Bijbel publikâsi fu wi na wan koni fasi
1, 2. Fa furu sma e denki fu den publikâsi fu wi, èn sortu aksi e opo kon fu dati ede?
1 „Mi e leisi den publikâsi fu unu sensi 1965. Te mi e leisi den, dan mi e luku sosrefi san Bijbel e taki, èn mi kon si taki ala sani di skrifi na ini den publikâsi fu unu e kruderi nanga Bijbel. Ala ten mi wani sabi tru tori fu Gado nanga Yesus, èn mi kan taki trutru dati nanga yepi fu den publikâsi fu unu èn nanga yepi fu Bijbel, mi e feni soifri piki tapu den aksi fu mi.” Disi na san wan man ben skrifi na ini wan brifi di a seni go na a edekantoro fu Yehovah Kotoigi. Na ini a srefi brifi dati, a ben aksi wan bijbelstudie sosrefi.
2 Neleki a man disi di ben de nanga tangi srefisrefi, na so milyunmilyun sma na heri grontapu e warderi den Bijbel publikâsi di „a getrow èn koni srafu” e tyari kon na doro (Mat. 24:45). Ibri yari, bun furu publikâsi e kon na doro fu yepi opregtisma fu „kon sabi a waarheid soifri” (1 Tim. 2:4). Fa wi kan gebroiki den Bijbel publikâsi fu wi na wan koni fasi?
3. San wi kan du fu no frumorsu den publikâsi fu wi?
3 No frumorsu den: Baka wan pisi ten, a kan de so taki wi e kon abi moro publikâsi leki san wi e gebroiki trutru. San wi kan du fu no frumorsu den warti publikâsi fu wi? Wi musu luku omeni wi o teki fu gebroiki na ini wi diniwroko. Na presi fu teki wan lo publikâsi ibri tron fu prati na ini a preikiwroko, dan wi kan teki wán noso tu nomo, èn baka te wi prati den wi kan go teki moro. Disi o meki taki wi no e hori wan lo fu den publikâsi na ini wi oso. Na so a de tu, taki efu wi abi furu tijdschrift di wi no prati ete, dan a moro bun fu no teki so furu moro.
4. San den brada kan du te a gemeente abi tumusi furu publikâsi?
4 Te tumusi furu publikâsi de: Efu a gemeente abi tumusi furu fu sonwan fu den publikâsi, dan a brada di e luku den afersi disi kan aksi den tra gemeente na ini a birti efu den abi wan tu fu den publikâsi disi fanowdu. Den preikiman kan gi den owru publikâsi na famiriman fu den di no de na bribi, na Bijbel studenti, èn na tra sma. A kan taki den sma di no de so langa na ini a gemeente sa wani den owru publikâsi disi fu poti na ini den bukukasi.
5. Fa wi kan sori taki wi abi warderi gi den publikâsi fu wi?
5 Wi wani taki den publikâsi fu wi doro a marki fu san ede den meki, namku fu yepi opregtisma fu kon sabi moro fu den kefalek moi sani di Yehovah abi na prakseri. Neleki fa Yesus no ben frumorsu a nyanyan di ben tan abra baka di a gi wan lo sma nyanyan na wan wondru fasi, na so wi musu hori na prakseri taki wi no musu frumorsu den prenspari Bijbel publikâsi di wi e kisi (Yoh. 6:11-13). A boskopu na ini den publikâsi fu wi e kibri sma libi, ma a no kan doro na ati fu regtfardikisma efu den e tan na ini wi bukukasi, noso na ini wi tas. Fu dati ede, wi musu luku taki wi no e teki tumusi furu publikâsi fu prati na ini a preikiwroko, èn wi musu gebroiki den na wan koni fasi so taki trawan kan kisi wini fu dati.—Fil. 4:5.