Fa fu pristeri buku na presi pe sma e taki difrenti tongo
1. Fu san ede furu gemeente abi buku na ini tra tongo fanowdu?
1 Na furu presi na grontapu furu sma fu tra kondre e libi now na kontren pe wi e preiki. Furu fu den sma disi e teki waarheid moro esi èn den e frustan en moro bun te den e kisi leri na ini a tongo di den e taki. Sortu sani seti so taki den sma di wani sabi moro fu Bijbel, e kisi buku na ini a tongo di den e frustan moro bun?
2. Sortu wrokomakandra de fanowdu te tu noso moro gemeente fu difrenti tongo e wroko na ini a srefi birti?
2 O ten wi kan pristeri buku: Son tron, tu noso moro gemeente fu difrenti tongo e wroko na ini a srefi birti. Te disi de so, dan den skin fu owruman fu den gemeente disi, musu wroko makandra nanga den dienstopziener fu seti sani na so wan fasi taki ibri grupu di e taki wan tra tongo kan kisi wan finifini kotoigi. Te den preikiman fu a wan gemeente e go oso fu oso, dan nofo tron den no o pristeri buku na sma di e taki a tongo fu tra gemeente di e wroko na ini a birti dati. Ma te den preikiman e du okasi preikiwroko noso te den e preiki na presi pe furu sma de, dan den kan pristeri den sma buku na ini a tongo di den e taki.
3. O ten wan gemeente kan kibri buku na ini wan tra tongo?
3 O ten unu kan kibri buku: Fa a de te furu sma na ini a birti e taki wan tra tongo, ma nowan gemeente e hori konmakandra na ini a tongo dati? Te disi de so, dan den gemeente na ini a birti dati kan kibri wan tu prenspari buku na ini a tongo dati, soleki traktaat, na San Gado e aksi-brochure, a Gado Mati-brochure, nanga a Sabi-buku. Preikiman kan pristeri den buku disi te den e miti sma di e leisi a tongo dati.
4. Fa wan preikiman kan kisi buku na ini wan tra tongo te a gemeente no abi den buku dati?
4 Fa fu seni aksi buku: Efu wan gemeente no abi buku na ini a tongo fu wan sma di wani sabi moro, dan fa wan preikiman kan kisi buku na ini a tongo dati? A preikiman musu aksi a dinari na a bukutafra sortu buku de fu kisi na ini a tongo dati, so taki a dinari kan seni aksi den buku dati makandra nanga den tra buku di a gemeente abi fanowdu.
5. San wan preikiman kan du efu a abi buku fanowdu bifo a gemeente kisi den buku di den seni aksi?
5 Efu a preikiman abi den buku fanowdu moro esi, dan a kan aksi wan fu den brada fu a Gemeente Diniwroko Komte efu a kan kisi den buku di a wani bifo a gemeente kisi den tra buku di den ben seni aksi. Efu a brada feni disi bun, dan a brada di e seni aksi buku gi a gemeente noso wan tra sma di kisi a wroko disi, kan skrifi a bijkantoro wan brifi fu aksi efu den kan kisi den buku disi moro esi, noso a kan bel aksi tu. A bijkantoro o seni den buku disi go na a presi pe a gemeente gwenti fu go teki den buku. Te a de fanowdu, dan a bijkantoro kan seni den buku go na wan tra presi pe unu ben sa wani kisi den.
6. San musu de a marki fu wi te wi e prati Kresten buku?
6 Meki wi gebroiki den Kresten buku na wan bun fasi so taki wi kan yepi „ala sortu sma” fu ’kon kisi wan soifri sabi fu waarheid’, awinsi sortu tongo den e taki—1 Tim. 2:3, 4.