Nyun kring konmakandra programa
1 A Masra fu wi, Yesus, ben taki na fesi dati den disipel fu en ben o kisi banawtu (Mat. 24:9). Fa wi musu si den banawtu disi? San sa yepi wi fu horidoro te wi e kisi fu du nanga banawtu? A kring konmakandra programa fu a dienstyari 2004 sa gi piki tapu den aksi disi. A nen fu a kring konmakandra disi na: „Prisiri ini a howpu. Tan frudrage banawtu.”—Rom. 12:12.
2 Tu symposium: A fosi symposium di abi leki nen, „Meki froktu fu di wi e horidoro”, sa taki fu fasi fa wi kan meki froktu. Den sa aksi difrenti preikiman fu fruteri fa den e preiki èn e gi leri na wan fasi di e sori taki den e fruwakti a kaba ibri momenti. Spesrutu papa nanga mama sa wani poti yesi arki a pisi di nen, „Te wi kisi trangaleri fu Yehovah”, di sa taki fu a fasi fa papa nanga mama kan rideneri nanga den pikin fu den. A lasti takiman fu a symposium sa poti krakti na tapu san wi musu du fu no meki taki grontapu abi krakti na wi tapu, so taki wi no man meki froktu.—Mark. 4:19.
3 A nen fu a di fu tu symposium na: „Horidoro fu lon a streilon”. A sa sori fa a libi fu wi de leki wan streilon. Fu san ede wi musu lon akruderi den markitiki? Fa wi kan puru ala hebi di de na wi tapu èn san wi musu du fu no kon weri na ini a streilon fu libi? Rai di fiti èn di komoto fu Bijbel sa yepi wi fu horidoro te wi e lon a streilon.
4 Te wi e horidoro, dan wi e kisi a bun-ati fu Gado: Den lezing di den kringopziener sa hori, sa tranga a bribi fu den wan di e poti yesi arki èn di e libi akruderi a rai dati. Wan fu den lezing di a distriktopziener sa hori abi leki nen: „Horidoro e meki taki wi e feni a bun fu Gado”. A publikitaki sa gi piki tapu den aksi: Na ini suma nen den nâsi e poti den howpu èn san dati wani taki? A lasti lezing di abi leki nen, „Te unu e horidoro, dan unu o kisi un libi baka”, sa sori fa Yesus ben kan horidoro na ini kruktudu sondro fu kisi atibron.
5 No frigiti fu tyari yu Diniwroko-skoro buku nanga yu Waktitoren di wi sa luku a wiki dati. Skrifi den edepenti fu den lezing bika dati sa yepi yu fu poti prakseri na den sani di yu e yere èn dati sa yepi yu sosrefi fu ondrosuku den sani disi bakaten. Wan takimakandra pe wi o taki syatu baka fu a programa sa hori baka ten na ini a gemeente.
6 Yehovah srefi sreka a fesa nanga yeye nyanyan disi. Kon! Nyan! Wi sa de nanga prisiri efu wi de drape fu kisi winimarki fu a heri programa.—Yes. 65:14.