Gebroiki den publikâsi fu wi bun
1. Fa wi kan teki na eksempre fu Yesus, di ben sori warderi gi den sani di Yehovah gi?
1 Baka di Yesus gi wan heri ipi sma nyanyan na wan wondru fasi, dan a sorgu taki sma piki den pisi brede di ben tan abra (Mat. 14:19-21). Yesus no ben frumorsu den sani di Yehovah gi, èn wi kan teki na eksempre fu en. Wi kan ’sori taki wi de nanga tangi’, te wi e gebroiki ala den sani di Yehovah e gi wi nanga yepi fu „a getrow futuboi”, na wan bun fasi.—Kol. 3:15; Luk. 12:42; Mat. 24:45-47.
2. Fa wi kan sorgu taki wi no e kon abi tumusi furu tijdschrift?
2 Den tijdschrift: Efu wi no e prati den tijdschrift, dan te fu kaba wi o abi wan lo fu den na oso. Efu wi si taki nofo tron den tijdschrift fu wi e tan abra, dan wi no musu teki so furu. Fa a de nanga den owru tijdschrift? Aladi den tijdschrift owru, toku den artikel na ini bun ete fu sma leisi den. Efu wi abi wan lo owru tijdschrift na oso, dan kande a dienst-opziener noso wan tra owruman kan yepi wi fu feni wan fasi fu prati den.
3, 4. San wi musu hori na prakseri te wi e teki publikâsi na a Kownukondre zaal?
3 Tra publikâsi: Te wi o pristeri wan tra publikâsi, dan luku fosi efu yu abi wan tu na oso kaba, fosi yu go teki moro na a Kownukondre zaal. Sorgu taki yu teki soso san yu abi fanowdu na ini a wiki dati, èn te den kaba yu kan go teki moro.
4 Te yu o teki publikâsi gi yusrefi, dan teki soso san yu abi fanowdu trutru. Skrifi yu nen na ini a buku, so taki efu yu lasi en, yu kan feni en baka. Efu yu e gebroiki a Watchtower Library di de tapu CD-ROM, èn yu kibri den tijdschrift di yu ben gebroiki gi yusrefi, dan kande yu no abi fu seni aksi a jaargang fu A Waktitoren nanga Ontwaakt!
5. San wi musu hori na prakseri te wi e prati den publikâsi fu wi?
5 Fa fu prati den publikâsi: Wi e pruberi fu prati den publikâsi fu wi soso gi den sma di e sori trutru taki den wani sabi moro. Hori na prakseri taki na a fosi presi, wi abi a frantwortu fu gi moni gi den tumusi warti publikâsi disi di wi e gebroiki na ini a preikiwroko. Te wi gi wan sma di wani sabi moro wan publikâsi, dan no draidrai fu taigi en taki a abi na okasi fu gi moni fu horibaka gi a preikiwroko di e du na heri grontapu.
6. Fu san ede wi abi someni warderi gi den publikâsi fu wi, èn fa wi sa gebroiki den?
6 Yesus ben gi sma nyanyan na wan wondru fasi, ma moro furu a ben gi den leri. Yesus ben taki: „Sma no musu libi fu brede wawan, ma fu ibri wortu di Yehovah mofo taki” (Mat. 4:4). Den publikâsi fu wi e leri sma den tru tori fu Bijbel, di den musu sabi fu man kisi têgo libi (Yoh. 17:3). Den warti srefisrefi, èn dati meki wi no musu frumorsu den!