Meki boen gebroiki foe A Waktoren nanga Ontwaakt!
1 Ini a ten disi A Waktitoren nanga Ontwaakt! na den moro warti nanga den moro boen tijdschrift di sma kan leisi. Foe san ede? Bikasi den waarheid na jejefasi di den abi na ini, kan abi wan boen krakti tapoe a libi foe sma, foe têgo. Ma, foeroe sma no sabi den nowtoe na jejefasi dorodoro, noso den no sabi pe foe loekoe foe kan satisferi a nowtoe disi na jejefasi. A de wan grani gi wi foe waka na baka na apostel Paulus foe jepi sma foe opo den ai na jejefasi.—Mat. 5:3; Tori. 26:18.
2 De positief èn sreka boen: A kan taki sma di gersi skapoe de ini a gebied foe oenoe di sa gi jesi na a waarheid. Sonwan abi kande soso deki-ati fanowdoe, di e gi nanga switifasi, foe leisi den tijdschrift. Foe dati ede, de positief èn taki na so wan fasi foe kan boeweigi a sma te joe e pristeri A Waktitoren nanga Ontwaakt! Hori wan toe tijdschrift na joe èn meki boen gebroiki foe ibri okasi foe pristeri den, srefi te joe e pristeri tra poeblikâsi.
3 Fa wi kan pristeri tijdschrift nanga moro boen bakapisi? Na a fosi presi wisrefi moesoe sabi troetroe a waarde foe den. Wi moesoe sabi den artikel foe den tijdschrift di wi e pristeri boen èn disi sa meki a froetrow nanga a faja foe wi foe pristeri den kon moro bigi. Hori disi ini prakseri te joe e leisi den foe a fositron. De na ai foe soekoe den penti di joe wani poti krakti na tapoe ini a diniwroko. Aksi joesrefi: „A prakseri foe soema na artikel disi spesroetoe sa hari? Wan oso-oema, wan jongoesma noso kande wan bisnisman sa warderi en? A penti disi sa wiki na angri foe wani sabi moro na wan studenti, wan sma di trow, wan sma di e broko-ede nanga a kontren pe a e libi?” Foe abi troetroe boen bakapisi, wi moesoe man foe rekomanderi den tijdschrift foe di wi sabi sortoe artikel skrifi na ini èn fa wi ben prisiri foe leisi den.
4 Meki boen gebroiki foe den moro owroe nomroe: Hori na prakseri, taki A Waktitoren nanga Ontwaakt! no e lasi den waarde, srefi efoe ala no kaba pristeri na ini wan moen noso toe foe sensi a datum di den kon a doro. A boskopoe di den abi no e kon moro mendri prenspari nanga a pasa foe a ten, èn wi no moesoe draidrai foe pristeri moro owroe tijdschrift efoe den loekoe boen. Efoe joe meki den owroe tijdschrift e kon tron wan ipi èn noite e gebroiki den, dan dati e sori taki wi no abi warderi gi den wrokosani disi. Ibri tijdschrift abi waarheid na ini di man foe wiki èn satisferi a lostoe foe njan na jejefasi. Na presi foe poti den moro owroe nomroe a wan sei, èn frigiti den, a no ben sa de moro betre foe doe spesroetoe moeiti foe pristeri den na sma di abi belangstelling noso foe libi den na wan presi, di no de foe si wantron, te sma no de na oso?
5 A tijdschrift Ontwaakt! ben jepi foeroe sma di no ben abi firi gi jeje afersi, foe kon sabi den nowtoe na jejefasi. A Waktitoren de a moro prenspari wrokosani ini a gi foe jeje njanjan gi a pipel foe Jehovah. Den tijdschrift disi e horibaka gi makandra na wan boen èn moi fasi, èn den e prei wan prenspari ròl ini a preiki foe a boen njoensoe.
6 Ala di wi e meki gebroiki foe ibri okasi foe pristeri tijdschrift, wi kan abi dorodoro froetrow ini den boen bakapisi foe den ini a sorgoe di den e sorgoe gi den fanowdoe na jejefasi foe den sma di gersi skapoe. Wi wani tan hori wan positief fasi foe si sani, sreka wi srefi boen, èn de doronomo ini a diniwroko. Meki wi alamala leki preikiman foe a boen njoensoe, doronomo meki boen gebroiki foe den tijdschrift A Waktitoren nanga Ontwaakt!