Heri esi glori fri gi den pikin foe Gado

„Den mekisani ben kon na ondro soso sani . . . tapoe a fondamenti foe howpoe so taki a mekisani srefi sa kon fri toe foe a katibo foe pori èn sa abi a glori fri foe den pikin foe Gado.” — ROMESMA 8:20, 21.

1. Fa na ofrandi foe Jesus ben abi wan prenki na tapoe a Verzoen-dei?

JEHOVAH ben gi en wan-enkri gebore Manpikin leki wan loesoe-ofrandi di ben opo a pasi gi den 144.000 libisma foe kisi hemel libi nanga têgo howpoe na grontapoe gi a tra pisi foe a libisma famiri (1 Johanes 2:1, 2). Soleki fa wi ben taki na ini na artikel na fesi, a gran-priester foe Israèl ben òfer wan mankaw leki wan sondoe-ofrandi gi ensrefi, gi en osofamiri, èn gi a lo foe Leifi na tapoe na alajari Verzoen-dei èn dati ben prenki na ofrandi foe Jesus gi den kresten di gebore nanga jeje. Na tapoe a srefi dei a ben òfer wan bokoboko leki wan sondoe-ofrandi gi ala den tra Israèlsma, neleki fa na ofrandi foe Krestes sa abi wini gi a heri libisma famiri. Na wan simbôlis fasi wan libilibi bokoboko ben tjari ala den sondoe foe a pipel di den ben doe na ini a jari di pasa, go lasi na ini a gran sabana.a — Lefitikus 16:7-15, 20-22, 26.

2, 3. San a froeklari foe Paulus di skrifi na ini Romesma 8:20, 21 wani taki?

² Baka di na apostel Paulus ben taki san na a howpoe foe libisma di ben sa tron hemel „manpikin foe Gado”, a ben taki: „A tranga froewakti foe den mekisani e wakti taki den manpikin foe Gado tjari kon na krin. Bika den mekisani ben kon na ondro soso sani, no foe di densrefi ben wani, ma foe Gado ede di ben poti dati na en ondro, tapoe a fondamenti foe howpoe so taki a mekisani srefi sa kon fri toe foe a katibo foe pori èn sa abi a glori fri foe den pikin foe Gado” (Romesma 8:14, 17, 19-21). San a froeklari disi wani taki?

³ Di Gado ben kria wi fositata Adam leki wan volmaakti libisma, a ben de wan „manpikin [noso, pikin] foe Gado” (Lukas 3:38). Bika a ben sondoe a ben kon na ini „katibo foe pori” èn ben abra a kondisi disi go na tapoe a libisma ras (Romesma 5:12). Gado ben gi pasi meki libisma gebore nanga „soso sani” leki froewakti, bika den kisi onvolmaaktifasi di den gebore, ma a ben gi howpoe nanga jepi foe a „siri”, Jesus Krestes (Genesis 3:15; 22:18; Galasiasma 3:16). Openbaring 21:1-4 e sori go na a ten te ’dede, sari, babari, nanga pen no sa de moro’. Foe di disi na wan pramisi gi a „libisma famiri”, meki a e gi wi a djaranti taki wan njoen libimakandra foe libisma na grontapoe di sa libi na ondro a Kownoekondre tiri, sa kon boen baka na froestan sei nanga na skin sei dorodoro èn den sa kisi têgo libi leki „pikin foe Gado” na grontapoe. Na ini a Doesoen Jari Tiri foe Krestes, a libisma famiri di gi jesi „sa kon fri foe a katibo na pori”. Baka te den e sori taki den de loyaal na Jehovah na ini a lasti tesi, dan den sa fri foe têgo foe sondoe nanga dede di den ben kisi di den ben gebore (Openbaring 20:7-10). Den sma di de na grontapoe sa „abi a glori fri foe den pikin foe Gado”.

Den e taki „kon!”

4. San a wani taki foe „teki a watra foe libi foe soso”?

⁴ Wan toemoesi moi howpoe de gi a libisma famiri! A no e froewondroe taki den kresten di gebore nanga jeje èn di de na grontapoe ete de so fajafaja ini a teki di den e teki fesi foe froeteri tra sma foe a howpoe! Leki den sma di sa tron wan pisi foe a „trow-oema” foe a Pikin Skapoe di kisi glori, Jesus Krestes, a salfoe fikapisi abi foe doe nanga a kontroe foe den profeiti wortoe disi: „Èn a jeje nanga a trow-oema ben tan taki: ’Kon!’ Èn meki ibriwan sma di e jere, taki: ’Kon!’ Èn meki ibriwan sma di e drei watra, kon; meki ibriwan sma di wani so, teki a watra foe libi foe soso” (Openbaring 21:2, 9; 22:1, 2, 17). Nôno, den wini foe Jesus en loesoe-ofrandi no de soso gi den 144.000 salfoewan. A jeje foe Gado e tan wroko nanga jepi foe a fikapisi foe a trow-oema groepoe na grontapoe foe taki: „Kon.” Ibriwan sma di e jere èn wani dringi regtfardikifasi e kisi a kari foe taki „Kon”, èn e gi ensrefi na okasi foe kisi den bogobogo sani di Jehovah seti foe kisi froeloesoe.

5. Jehovah Kotoigi breiti foe abi soema na den mindri?

⁵ Jehovah Kotoigi e bribi na ini a sani di Gado seti foe kisi libi nanga jepi foe Jesus Krestes (Tori foe den Apostel 4:12). Den breiti foe abi na den mindri den reti-atisma di abi na angri foe leri foe den prakseri foe Gado èn foe doe a wani foe en. Den Kownoekondre zaal foe den opo gi ala sma di wani ’kon èn teki a watra foe libi foe soso’ na ini a „ten [disi] foe a kaba”. — Danièl 12:4.

Kenki di ben kon na baka wan pisi ten

6. Fa a jeje foe Gado ben wroko na tapoe den foetoeboi foe Jehovah na ini den difrenti pisi ten?

⁶ Gado abi wan ten te a sa doe san a abi na prakseri, èn disi abi krakti na tapoe a fasi fa a e handri nanga libisma (Preikiman 3:1; Tori foe den Apostel 1:7). Ala di a jeje foe Gado ben kon na tapoe en foetoeboi di ben de bifo a pisi ten foe den kresten, tokoe den no ben gebore leki jeje manpikin foe en. Ma nanga Jesus, a ten foe Jehovah ben kon foe gebroiki a santa jeje foe meki mansma nanga oemasma di e gi densrefi, gebore foe kisi wan hemel erfenis. Èn fa a de nanga a ten foe wi? A srefi jeje e wroko na tapoe den „tra skapoe” foe Jesus, ma a no e wiki a howpoe èn na angri gi wan hemel libi na ini den (Johanes 10:16). Nanga têgo libi na wan paradijs grontapoe di de a howpoe di Gado gi den, den e horibaka nanga prisiri gi a salfoe fikapisi foe gi kotoigi na ini a pisi ten disi pe na owroe grontapoe disi e kenki go na ini a njoen regtfardiki grontapoe foe Gado. — 2 Petrus 3:5-13.

7. Nanga sortoe kotiwroko den Bijbel Studenti ben broko den ede, ma san den ben sabi foe a paradijs?

⁷ Gado ben bigin ’tjari den foeroe manpikin go na ini glori’ di a ben kanti santa jeje tapoe a Pinksterfesa foe 33 G.T., èn soleki fa a sori, a ben poti wan ten foe meki a jeje „Israèl foe Gado” foe kon tron 144.000 ala nanga ala (Hebrewsma 2:10; Galasiasma 6:16; Openbaring 7:1-8). Bigin na ini 1879, den ben taki foeroetron na ini a tijdschrift disi foe wan kotiwroko di abi foe doe nanga den salfoe kresten. Ma den Bijbel Studenti (di nen Jehovah Kotoigi now) ben sabi toe taki den Boekoe foe bijbel ben gi a howpoe foe têgo libi na ini wan paradijs grontapoe. Foe eksempre, a Watch Tower foe juli 1883 ben taki: „Te Jesus seti en kownoekondre, pori ogridoe, èn go so moro fara, dan a grontapoe disi sa tron wan paradijs, . . . èn ala sma di de na ini den grebi sa kon na ini a paradijs. Èn te den e gi jesi na den wet foe en dan den man libi foe têgo na ini en.” Baka wan pisi ten, a kotiwroko foe den salfoewan ben kon moro mendri, èn safrisafri den sma di no ben abi a hemel howpoe ben koti tjari kon na ini na organisâsi foe Jehovah. Na a srefi ten Gado ben gi den salfoe kresten foe en, den kresten di ben gebore baka, aparti inzicht. — Danièl 12:3; Filipisma 2:15; Openbaring 14:15, 16.

8. Fa a fasi fa den ben froestan a howpoe foe libi na grontapoe ben gro na ini a bigin foe 1930?

⁸ Spesroetoe foe sensi 1931 den wan di ben abi a howpoe foe libi djaso na grontapoe, abi demakandra nanga a kresten gemeente. Na ini a jari dati, Jehovah ben opo a froestan foe a fikapisi foe kresten di ben gebore nanga jeje, foe si taki Esekièl kapitel 9 e taki foe a groepoe disi na grontapoe, di e kisi wan marki foe pasa libilibi go na ini a njoen grontapoe foe Gado. Na ini 1932 den ben kon na a bosroiti taki den sortoe sma disi di wi kan teki gersi nanga skapoe foe a ten disi, ben de a prenki foe a kompe foe Jehu, Jonadab (2 Kownoe 10:15-17). Na ini 1934 den ben tjari kon na krin taki „den Jonadab” ben moesoe „poti na wroko” noso „gi densrefi abra” na Gado. Na ini 1935 den ben kon sabi a „bigi groepoe sma”, noso „bigi ipi” — di fosi wi ben denki taki a de a di foe toe jeje groepoe di ben sa de „kompe” foe a trow-oema foe Krestes na ini hemel — leki den tra skapoe di abi wan howpoe foe libi na grontapoe (Openbaring 7:4-15; 21:2, 9; Psalm 45:14, 15). Èn spesroetoe foe sensi 1935 den salfoewan teki fesi foe soekoe opregti sma di abi na angri foe libi foe têgo na ini wan paradijs na grontapoe.

9. Baka 1935, foe san ede son kresten no ben gebroiki den simbôl na a Avondmaal foe Masra moro?

⁹ Baka 1935 wan toe kresten di ben gebroiki a brede nanga a win na a Avondmaal foe Masra, no ben gebroiki den moro. Foe san ede? Bika den ben kon froestan taki a howpoe foe den ben de foe libi na grontapoe, no na ini hemel. Wan oema di ben teki dopoe na ini 1930 ben taki: „Ala di mi ben si [a gebroiki di wi ben gebroiki den simbôl] leki wan joisti sani, spesroetoe gi fajafaja foeroeten dinari, tokoe noiti mi ben abi na overtoigi taki mi ben abi wan hemel howpoe. Baka dati, na ini 1935, a ben kon de krin gi wi taki wan bigi ipi ben e tjari kon makandra nanga a howpoe foe libi foe têgo na grontapoe. Foeroe foe wi ben prisiri foe froestan taki wi ben de wan pisi foe a bigi ipi dati, èn wi no ben gebroiki foe den simbôl moro.” Srefi den kresten poeblikâsi ben kenki a fasi fa den ben skrifi foe a tori. Ala di den poeblikâsi foe fosi ben meki na a fosi presi gi den bakaman foe Jesus di ben gebore nanga jeje, foe sensi 1935 te nanga now A Waktitoren nanga tra poeblikâsi foe a ’getrow srafoe’ ben gi jeje njanjan di ben fiti a fanowdoe foe den salfoewan èn foe den kompe foe den di abi a howpoe foe libi na grontapoe. — Mateus 24:45-47.

10. Fa wan tra sma ben sa kan kon na ini a presi foe wan salfoewan di no de getrow?

¹⁰ Ma kon meki wi taki dati wan salfoewan no de getrow moro. Wan sma ben sa teki en presi dan? Paulus ben sori dati di a ben taki foe a simbôlis olijf bon (Romesma 11:11-32). Efoe wan tra sma moesoe kon na ini a presi foe wan sma di gebore nanga jeje, dan soleki fa a sori, Gado ben sa gi a hemel kari na wan sma di ben de wan eksempre na ini bribi ala di a doe santa diniwroko gi En foeroe jari langa. — Teki gersi Lukas 22:28, 29; 1 Petrus 1:6, 7.

Foeroe reide foe abi tangi

11. Sortoe djaranti Jakobus 1:17 e gi wi awansi sortoe howpoe wi abi?

¹¹ Awansi pe wi e dini Jehovah na ini getrowfasi, a sa sorgoe gi den sani di wi abi fanowdoe èn den opregti firi foe wi (Psalm 145:16; Lukas 1:67-74). Awansi wi abi wan troetroe hemel howpoe noso wi abi wan howpoe foe libi na grontapoe, tokoe wi abi foeroe boen reide foe de Gado tangi. Ala ten a e doe sani di boen gi den sma di lobi en. A disipel Jakobus ben taki dati „ibri boen presenti nanga ibri volmaakti kado e kon foe tapoesei, bika a e saka kon foe a Tata foe den hemel leti”, Jehovah Gado (Jakobus 1:17). Meki wi poti prakseri na tapoe wan toe foe den presenti èn blesi disi.

12. Foe san ede wi kan taki dati Jehovah gi ibriwan foe den getrow foetoeboi foe en wan kefalek moi howpoe?

¹² Jehovah gi ibriwan foe den getrow foetoeboi foe en wan kefalek moi howpoe. A kari wan toe gi wan hemel libi. Jehovah gi den kotoigi foe en foe a ten bifo den kresten a toemoesi moi howpoe foe wan opobaka foe kisi têgo libi na grontapoe. Foe eksempre, Abraham ben bribi na ini na opobaka èn ben wakti „a foto di abi troetroe fondamenti” — a hemel Kownoekondre na ondro san a sa kisi wan opobaka foe libi na grontapoe (Hebrewsma 11:10, 17-19). So srefi, na ini a ten disi foe a kaba, Gado e gi miljoenmiljoen sma a howpoe foe têgo libi na ini wan paradijs na grontapoe (Lukas 23:43; Johanes 17:3). Foe troe, iniwan sma di Gado gi so wan bigi howpoe moesoe abi tangi srefisrefi gi dati.

13. Fa a santa jeje foe Gado ben wroko na tapoe en pipel?

¹³ Jehovah e gi en pipel a santa jeje foe en leki wan presenti. Den kresten di kisi wan hemel howpoe, kisi salfoe nanga santa jeje (1 Johanes 2:20; 5:1-4, 18). Ma den foetoeboi foe Gado di abi howpoe na grontapoe, abi a jepi èn a tiri foe a santa jeje. Wán foe den disi ben de Moses di ben abi a jeje foe Jehovah, èn so srefi den 70 man di a ben poti na wroko foe jepi en (Numeri 11:24, 25). Na ondro a krakti foe a santa jeje, Bezaleèl ben wroko leki wan anoe-wrokoman di ben sabi en wroko srefisrefi, na ini a tabernakel foe Israèl (Exodus 31:1-11). A jeje foe Gado ben kon na tapoe Gideon, Jefta, Simson, David, Elia, Elisa, èn na tapoe tra sma. Ala di den sma disi foe owroeten noiti sa tjari go na ini hemel glori, tokoe a santa jeje ben tiri èn ben jepi den, soleki fa a e doe nanga den tra skapoe foe Jesus na ini a ten disi. So boen, foe abi a jeje foe Gado no wani taki dati wi moesoe abi a kari gi hemel. Ma a jeje foe Jehovah e gi tiri èn a e jepi wi foe preiki èn foe doe a toewijzing di wi kisi foe Gado, èn a e gi wi krakti di pasa san de normaal, èn a e meki froktoe na ini wi, foe lobi, prisiri, vrede, langa-pasensi, switifasi, boen-ati, bribi, safri-atifasi, èn a dwengi di wan sma e dwengi ensrefi (Johanes 16:13; Tori foe den Apostel 1:8; 2 Korentesma 4:7-10; Galasiasma 5:22, 23). Wi no moesoe abi tangi gi a warti presenti disi foe Gado?

14. Fa wi e kisi wini foe a sabi nanga koni di Gado gi wi leki presenti?

¹⁴ Sabi nanga koni na presenti foe Gado di wi moesoe abi tangi gi, awansi wi abi wan howpoe na hemel noso na grontapoe. Soifri sabi foe Jehovah e jepi wi foe „sabi seiker san na den moro prenspari sani” èn foe „waka na wan fasi di warti gi Jehovah, foe plisi en dorodoro” (Filipisma 1:9-11; Kolosesma 1:9, 10). A koni foe Gado de leki wan sani di e gi wi kibri èn tiri na ini a libi (Odo 4:5-7; Preikiman 7:12). Troetroe sabi nanga koni abi den gron tapoe a Wortoe foe Gado, èn den salfoewan di fika ete èn di no foeroe moro, abi spesroetoe belangstelling gi den sani di bijbel e taki foe a hemel howpoe foe den. Ma lobi gi a Wortoe foe Gado èn a froestan di wi froestan en boen, a no a fasi fa Gado e sori taki wi kisi wan kari gi hemel libi. Man leki Moses nanga Danièl ben skrifi pisi foe bijbel srefi, ma den sa kisi wan opobaka foe libi na grontapoe. Awansi a howpoe foe wi de foe libi na hemel noso foe libi na grontapoe, wi alamala e kisi jeje njanjan nanga jepi foe a „getrow èn koni srafoe” di Jehovah feni boen (Mateus 24:45-47). Wi alamala abi tangi srefisrefi gi a sabi di wi ben kisi na so wan fasi!

15. San na wan foe den moro bigi presenti di Gado gi, èn fa joe e prakseri foe dati?

¹⁵ Wan foe den moro bigi presenti foe Gado, na a lobi-ati seti foe a loesoe-ofrandi foe Jesus, di abi wini gi wi awansi wi abi wan howpoe foe libi na hemel noso foe libi na grontapoe. Gado ben lobi libisma „sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Johanes 3:16). Èn a lobi di Jesus ben abi ben boeweigi en „foe gi en sili leki wan loesoe-paiman ini a presi foe foeroe sma” (Mateus 20:28). Soleki fa na apostel Johanes ben froeklari, Jesus Krestes „de wan zoen-ofrandi gi den sondoe foe wi [den wan di kisi salfoe], ma no wawan gi di foe wi, ma so srefi toe gi di foe a heri grontapoe” (1 Johanes 2:1, 2). Foe dati ede, wi alamala moesoe abi dipi tangi gi a lobi-ati seti disi foe kisi froeloesoe gi wan têgo libi.b

Joe sa de drape?

16. Sortoe toemoesi aparti sani wi sa memre na tapoe 11 april 1998 na baka te son dongo, èn soema moesoe de drape?

¹⁶ A tangi di wi abi gi a loesoe-paiman di Gado gi nanga jepi foe en Manpikin moesoe boeweigi wi foe de na den Kownoekondre zaal noso na den tra presi pe Jehovah Kotoigi sa kon makandra na tapoe 11 april 1998, na baka te son dongo, foe memre a dede foe Krestes. Di a ben seti a fesa disi nanga den getrow apostel foe en na tapoe a lasti neti foe en libi na grontapoe, Jesus ben taki: „Tan doe disi foe memre mi” (Lukas 22:19, 20; Mateus 26:26-30). Den wan toe salfoewan di fika sa gebroiki foe a brede sondro sroedeki, di e prenki a libisma skin foe Jesus di no abi sondoe, èn a redi win di no moksi nanga tra sani, di wani taki en broedoe di a ben trowe leki òfer. Soso den kresten di gebore nanga jeje moesoe gebroiki den bika na den wawan de na ini a njoen froebontoe nanga a Kownoekondre froebontoe èn den abi a krin boeweisi foe a santa jeje foe Gado taki den abi wan hemel howpoe. Foeroe miljoen tra sma sa de drape foe lespeki ede èn den abi tangi gi a lobi di Gado nanga Krestes sori nanga na ofrandi foe Jesus di e meki a kan taki libisma man libi foe têgo. — Romesma 6:23.

17. San wi moesoe hori na prakseri foe a kisi di sma e kisi salfoe nanga jeje?

¹⁷ Den fositen bribi foe relisi, tranga firi di e kon foe di wan lobiwan dede, problema di wan sma e kisi now na ini a libi na grontapoe, noso a firi taki a kisi wan spesroetoe blesi foe Jehovah, ben sa kan meki wan toe sma denki na wan fowtoe fasi taki den kisi wan kari gi hemel libi. Ma wi alamala moesoe hori na prakseri taki den Boekoe foe bijbel no e komanderi wi foe njan foe den simbôl foe a Memrefesa so taki wi kan sori a tangi foe wi gi a loesoe-ofrandi foe Krestes. Boiti dati, a salfoe di wan sma kisi salfoe nanga jeje „no e anga foe a sma di e winsi noso foe a sma di e lon, ma foe Gado”, a Sma di meki Jesus gebore leki wan jeje Manpikin èn di e tjari soso 144.000 tra manpikin go na ini glori. — Romesma 9:16; Jesaja 64:8.

18. Sortoe blesi de na ini a ten di e kon gi a moro bigi pisi foe den sma di e dini Jehovah na ini a ten disi?

¹⁸ Têgo libi na ini wan paradijs na grontapoe na a howpoe di Gado gi a moro bigi pisi foe den libisma di e dini Jehovah na ini den lasti dei disi (2 Timoteus 3:1-5). Heri esi, den sa njanboen foe a kefalek moi paradijs disi. Dan granman sa tiri den grontapoe afersi na ondro a hemel tiri (Psalm 45:16). Vrede sa de ala di den sma di e libi na grontapoe e fiti densrefi na den wet foe Gado èn e leri moro foe den pasi foe Jehovah (Jesaja 9:6, 7; Openbaring 20:12). Foeroe wroko sa de foe doe, foe bow oso èn foe abi grontapoe na den ondro (Jesaja 65:17-25). Èn prakseri foe a prisiri di sa de te den osofamiri e kon na makandra baka te den dedewan e kon na libi baka! (Johanes 5:28, 29) Baka wan lasti tesi, ala ogridoe sa gowe (Openbaring 20:7-10). Baka dati, gi ala ten a grontapoe sa foeroe nanga volmaakti libisma di ’kon fri foe a katibo foe pori èn di abi a glori fri foe den pikin foe Gado’.

[Foetoewortoe]

San joe ben sa piki?

◻ San a wani taki foe „teki a watra foe libi foe soso”?

◻ Awansi a howpoe foe wi de foe go libi na hemel noso foe libi na grontapoe, sortoe reide wi abi foe de Gado tangi?

◻ Sortoe alajari fesa wi alamala moesoe fisiti?

◻ Fa a ten di e kon sa de gi a moro bigi pisi foe a pipel foe Jehovah?

[Prenki na tapoe bladzijde 18]

Foeroe miljoen sma bigin ’teki a watra foe libi foe soso’. Joe na wan foe den?