Jehovah e tjari foeroe manpikin go na ini glori
„A ben fiti taki [Gado], ben meki a Moro Prenspari Fesiman foe a froeloesoe foe den kon volmaakti nanga foeroe pina, foe tjari foeroe manpikin go na ini glori.” — HEBREWSMA 2:10.
1. Foe san ede wi kan de seiker taki a prakseri di Jehovah abi nanga a libisma famiri sa kon troe?
JEHOVAH ben kria grontapoe foe de a têgo oso foe wan volmaakti libisma famiri di e njanboen foe wan libi di no abi kaba (Preikiman 1:4; Jesaja 45:12, 18). A troe taki wi fositen papa, Adam, ben sondoe èn na so fasi a ben tjari sondoe nanga dede kon na tapoe den bakapikin foe en. Ma a prakseri di Gado abi nanga a libisma famiri sa kon troe nanga jepi foe en Pramisi Siri, Jesus Krestes (Genesis 3:15; 22:18; Romesma 5:12-21; Galasiasma 3:16). Lobi gi a libisma famiri na heri grontapoe ben boeweigi Jehovah foe gi „en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Johanes 3:16). Èn lobi ben boeweigi Jesus „foe gi en sili leki wan loesoe-paiman ini a presi foe foeroe sma” (Mateus 20:28). A „srefi sortoe loesoe-paiman” disi e bai den reti èn den howpoe baka, di Adam ben lasi èn a e meki taki wi sa man libi foe têgo. — 1 Timoteus 2:5, 6; Johanes 17:3.
2. Fa a fasi fa a loesoe-ofrandi foe Jesus ben o wroko ben sori na wan simbôlis fasi na tapoe na alajari Verzoen-dei foe Israèl?
2 A fasi fa Jesus en loesoe-paiman ben o wroko ben sori simbôlis na tapoe na alajari Verzoen-dei. Na tapoe a dei dati, a gran-priester foe Israèl ben òfer wan mankaw fosi leki wan sondoe-ofrandi èn ben poti a broedoe foe a mankaw na a santa Ark na ini a Moro Santapresi foe a tabernakel, èn baka ten na ini a tempel. Disi a ben doe gi a boen foe ensrefi, en osofamiri, èn foe a lo foe Leifi. Na a srefi fasi, Jesus Krestes ben gi Gado a waarde foe en broedoe na a fosi presi foe tapoe den sondoe foe den jeje „brada” foe en (Hebrewsma 2:12; 10:19-22; Lefitikus 16:6, 11-14). Na tapoe a Verzoen-dei, a gran-priester ben òfer so srefi wan bokoboko leki wan sondoe-ofrandi èn ben poti a broedoe foe a bokoboko na ini a Moro Santapresi, èn na so fasi a ben verzoen den sondoe foe den 12 lo foe Israèl di no ben de foe den priester lo. Na a srefi fasi, a Gran-priester Jesus Krestes sa gebroiki en libibroedoe gi a boen foe den wan na ini a libisma famiri di e sori bribi, èn na so wan fasi a e poeroe den sondoe foe den. — Lefitikus 16:15.
Tjari go na ini glori
3. San Gado ben doe 1900 jari langa, soleki fa Hebrewsma 2:9, 10 e sori?
3 Wán doesoen nanga neigihondro jari kaba Gado ben e doe wan kefalek aparti sani di abi foe doe nanga „den brada” foe Jesus. Foe a tori disi, na apostel Paulus ben skrifi: „Wi e si Jesus, di meki pikinso moro lagi leki den engel, kisi glori nanga grani foe di a ondrofeni dede, so taki en, nanga a no-froedini boen-atifasi foe Gado, ben sa kan tesi dede gi ibri sma. Bika a ben fiti taki a sma [Jehovah Gado] di foe en ede meki ala sani de èn di nanga en meki ala sani de, ben meki a Moro Prenspari Fesiman foe a froeloesoe foe den kon volmaakti nanga foeroe pina, foe tjari foeroe manpikin go na ini glori” (Hebrewsma 2:9, 10). A Moro Prenspari Fesiman foe froeloesoe na Jesus Krestes, di ben leri foe gi jesi na wan volmaaktifasi nanga jepi foe den pina di a ben ondrofeni di a ben libi leki wan libisma na grontapoe (Hebrewsma 5:7-10). Jesus ben de a fosiwan di ben gebore leki wan jeje manpikin foe Gado.
4. O ten èn fa Jesus ben gebore leki a jeje Manpikin foe Gado?
4 Jehovah ben gebroiki en santa jeje, noso wroko krakti, foe meki Jesus gebore leki en jeje Manpikin so taki a kan tjari en go na ini hemel glori. Di a ben de en wawan nanga Johanes a Dopoeman, dan Johanes ben doekroen en krinkrin go na ondro watra leki simbôl foe a gi di a gi ensrefi na Gado. Na evangelie tori foe Lukas e taki: „Di ala den sma ben teki dopoe, dan Jesus toe ben teki dopoe, èn ala di a ben e begi, a hemel ben opo èn a santa jeje ben kon na en tapoe na ini a skin leki foe wan doifi, èn wan sten ben komoto na hemel: ’Joe na mi Manpikin, a lobiwan; mi feni joe boen’ ” (Lukas 3:21, 22). Johanes ben si di a santa jeje ben kon tapoe Jesus èn ben jere di Jehovah ben taki na poebliki taki a feni en boen leki En lobi Manpikin. Na a ten dati èn nanga jepi foe santa jeje, Jehovah ben meki Jesus gebore leki a fosiwan foe den ’foeroe manpikin di moesoe tjari go na ini glori’.
5. Soema ben de den fosiwan di e kisi wini foe na ofrandi foe Jesus, èn omeni den de?
5 „Den brada” foe Jesus na den fosiwan di e kisi wini foe en ofrandi (Hebrewsma 2:12-18). Na ini wan fisjoen, na apostel Johanes ben si den kaba na ini glori na tapoe a hemel Bergi Sion makandra nanga a Pikin Skapoe, Masra Jesus Krestes di kisi wan opobaka. Johanes ben tjari so srefi a nomroe foe den kon na krin, di a ben e taki: „Mi ben si, èn loekoe! a Pikin Skapoe ben tanapoe na tapoe a bergi Sion, èn nanga en wán hondro fotenti na fo doesoen, di ben tjari en nen nanga a nen foe en Tata skrifi na tapoe den fesi-ede. . . . Den disi den ben bai poeroe na mindri libisma leki fosi froktoe gi Gado èn gi a Pikin Skapoe, èn no wan lei ben feni na ini den mofo foe den; den de sondro flaka” (Openbaring 14:1-5). So boen, den ’foeroe manpikin di tjari go na ini glori’ na ini hemel de 144.001 ala nanga ala — Jesus nanga den jeje brada foe en.
„Gebore komoto na Gado”
6, 7. Soema „gebore komoto na Gado”, èn san disi wani taki gi den?
6 Den wan di Jehovah ben meki na sma di „gebore komoto na Gado”. Di na apostel Johanes ben taki nanga den sortoe sma disi, a ben skrifi: „Ibriwan sma di gebore komoto na Gado, no e doe sondoe leki wan gwenti, bika En [foe Jehovah] siri di man meki siri baka e tan na ini so wan sma, èn a no man doe sondoe leki wan gwenti, bika a gebore komoto na Gado” (1 Johanes 3:9). A „siri [disi] di man meki siri baka” na a santa jeje foe Gado. A santa jeje makandra nanga a wortoe foe Gado ben gi ibriwan foe den 144.000 sma „wan njoen geborte” gi wan hemel howpoe. — 1 Petrus 1:3-5, 23.
7 Jesus ben de a Manpikin foe Gado foe sensi di a gebore leki libisma, neleki fa a volmaakti man Adam ben de a „manpikin foe Gado” (Lukas 1:35; 3:38). Ma baka a dopoe foe Jesus, a ben de prenspari di Jehovah ben froeklari: „Joe na mi Manpikin, a lobiwan; mi feni joe boen” (Markus 1:11). Nanga a froeklari disi makandra nanga a santa jeje di ben saka kon, a ben de krin taki na a ten dati Gado ben meki Jesus leki En jeje Manpikin. Na wan agersifasi, na a ten dati Jesus ben kisi „wan njoen geborte” nanga a reti foe kisi libi ete wan leisi leki wan jeje Manpikin foe Gado na ini hemel. Neleki en, den 144.000 jeje brada foe en „gebore ete wan tron” (Johanes 3:1-8; loekoe A Waktitoren foe 1 november 1992, bladzijde 3-6.). So srefi leki Jesus, Gado ben salfoe den èn ben gi den a komando foe meki a boen njoensoe bekènti. — Jesaja 61:1, 2; Lukas 4:16-21; 1 Johanes 2:20.
Boeweisi taki Gado ben meki den
8. Sortoe boeweisi ben de taki den ben gebore nanga jeje na ini a kefal foe (a) Jesus (b) den fosi disipel foe en?
8 Boeweisi ben de taki Jesus ben gebore nanga jeje. Johanes a Dopoeman ben si a jeje saka kon na tapoe Jesus èn ben jere a froeklari foe Gado taki a Mesias, di djonsro ben kisi salfoe, de en jeje manpikin. Ma fa den disipel foe Jesus ben sa sabi taki den ben gebore nanga jeje? We, na tapoe a dei di Jesus ben opo go na hemel, a ben taki: „A troe taki Johanes ben dopoe sma nanga watra, ma no foeroe dei na baka, oenoe sa teki dopoe ini santa jeje” (Tori foe den Apostel 1:5). Den disipel foe Jesus ben „teki dopoe ini santa jeje” na tapoe a dei foe a Pinksterfesa foe 33. G.T. A kanti di jeje ben kanti na den tapoe ben pasa, makandra nanga ’wan babari di kon foe hemel neleki di foe wan tranga winti di ben e wai’ èn „tongo neleki di foe faja” na tapoe ibriwan foe den disipel. A moro aparti sani ben de a man di den disipel ben man „taki na ini difrenti tongo, soleki fa a jeje ben meki den taki”. So boen, boeweisi ben de foe si èn ben de foe jere taki a pasi foe kisi hemel glori leki manpikin foe Gado ben opo gi den bakaman foe Krestes. — Tori foe den Apostel 2:1-4, 14-21; Joèl 2:28, 29.
9. Sortoe boeweisi ben de taki den Samariasma, Cornelius, nanga tra sma foe a fosi jarihondro ben gebore nanga jeje?
9 Wan pisi ten baka dati, Filipus, na evangelie preikiman, ben preiki na ini Samaria. Ala di den Samariasma ben erken en boskopoe èn ben dopoe, tokoe den ben mankeri boeweisi taki Gado ben meki den gebore leki manpikin foe en. Di den apostel Petrus nanga Johanes ben begi èn ben poti anoe na tapoe den wan di ben bribi, dan „den ben bigin kisi santa jeje” na wan fasi di ben de krin foe si gi den sma di ben e loekoe (Tori foe den Apostel 8:4-25). Disi ben de boeweisi taki den Samariasma di ben e bribi ben gebore nanga jeje leki manpikin foe Gado. Na a srefi fasi, na ini 36 G.T. Cornelius nanga tra heiden ben erken a waarheid foe Gado. Petrus nanga den djoe bribiman di ben de nanga en „ben froewondroe, bika a fri presenti foe a santa jeje ben kanti kon na tapoe sma foe den nâsi toe. Bika den ben jere den e taki na ini tongo èn ben e gi Gado glori” (Tori foe den Apostel 10:44-48). Foeroe fosi-jarihondro kresten ben kisi „presenti foe a jeje”, soleki a taki di den ben taki na ini tongo (1 Korentesma 14:12, 32). Den sma disi ben abi krin boeweisi foe dati ede, taki den ben gebore nanga jeje. Ma fa den kresten foe a ten di ben o kon ben sa sabi efoe den ben gebore nanga jeje noso efoe den no ben gebore nanga jeje?
A kotoigi foe a santa jeje
10, 11. Na tapoe gron foe Romesma 8:15-17, fa joe ben sa froeklari taki a jeje e gi kotoigi nanga den sma di de kompe erfgenaam foe Krestes?
10 Ala den 144.000 salfoe kresten ben kisi krin boeweisi taki den abi a jeje foe Gado. Foe a tori disi, Paulus ben skrifi: „Oenoe ben kisi wan jeje foe a teki di den teki oenoe leki manpikin, èn nanga a jeje dati wi e bari: ’Abba, Tata!’ A jeje srefi e gi kotoigi nanga a jeje foe wi taki wi na pikin foe Gado. Foe dati ede, efoe wi na pikin, dan wi na erfgenaam toe, troetroe erfgenaam foe Gado, ma kompe erfgenaam nanga Krestes, ma soso te wi e pina makandra, so taki makandra wi toe kan kisi glori” (Romesma 8:15-17). Den salfoe kresten abi a firi taki den na manpikin foe den hemel Tata, wan tranga firi leki manpikin (Galasiasma 4:6, 7). Den sabi seiker troetroe taki Gado meki den gebore foe tron jeje manpikin foe en èn leki kompe erfgenaam nanga Krestes na ini a hemel Kownoekondre. A santa jeje foe Jehovah e plèi wan krinkrin ròl na ini a tori disi.
11 Na ondro a krakti foe a santa jeje foe Gado, a jeje, noso a tranga firi foe den salfoewan, e boeweigi den foe handri na wan positief fasi na tapoe den sani di Gado Wortoe e taki foe a hemel howpoe. Foe eksempre, te den e leisi san den Boekoe foe bijbel e taki foe den jeje pikin foe Jehovah, dan wantewante den e froestan taki den sortoe wortoe dati abi foe doe nanga den (1 Johanes 3:2). Den sabi taki den „dopoe na ini Krestes Jesus” èn na ini a dede foe en (Romesma 6:3). A tranga overtoigi foe den na taki den na den jeje manpikin foe Gado, di sa dede èn di sa kisi wan opobaka go na ini hemel glori, neleki fa a ben de nanga Jesus.
12. San a jeje foe Gado ben wiki na ini den salfoe kresten?
12 Foe gebore leki jeje manpikin a no wan tranga firi di sma e kweki. Den wan di gebore nanga jeje no wani go na hemel foe di den e firi a pina foe den disiten problema na grontapoe (Job 14:1). Na presi foe dati, a jeje foe Jehovah wiki wan howpoe nanga wan tranga firi na ini opregti salfoewan, di gewoon libisma no sabi. Den wan disi di gebore leki manpikin sabi taki, têgo libi foe libisma na ini volmaaktifasi na tapoe wan paradijs grontapoe makandra nanga kolokoe osofamiri nanga mati, ben sa de kefalek moi. Ma so wan libi a no a moro prenspari tranga firi na ini den ati. Den salfoewan abi so wan tranga hemel howpoe taki den de klariklari foe òfer ala howpoe èn tranga banti di den abi na grontapoe. — 2 Petrus 1:13, 14.
13. Soleki fa 2 Korentesma 5:1-5 e sori, san ben de na ’serjoesoe angri’ foe Paulus, èn san disi e sori foe den wan di gebore nanga jeje?
13 A howpoe di Gado gi foe libi na hemel de so tranga na ini den sortoe sma disi taki den firi foe den de leki di foe Paulus, di ben skrifi: „Wi sabi taki efoe na oso foe wi na grontapoe, a tenti disi, moesoe broko, dan wi sa abi wan oso foe Gado, wan oso di no meki nanga anoe, foe têgo na ini hemel. Bika na ini na oso disi pe wi e tan, wi e geme foe troe, èn e angri serjoesoe foe weri a wan foe wi di de foe hemel, so taki, te wi weri en troetroe, den no sa feni wi nanga soso-skin. Foe taki en leti, wi di de na ini a tenti disi, e geme, foe di wi kon hebi; bika wi no wani poeroe en, ma wi wani weri a trawan, so taki a libi kan swari a wan di man dede. We, en di ben meki wi gi a sani disi, na Gado, di ben gi wi a panti gi a sani di moesoe kon, namkoe a jeje” (2 Korentesma 5:1-5). A moro ’serjoesoe angri’ foe Paulus ben de foe kisi wan opobaka foe go na hemel leki wan jeje kriatoeroe di no man dede. Di a ben taki foe a libisma skin, a ben gebroiki na agersi foe wan tenti di man fow, wan swaki tanpresi di de gi wan sjatoe pisi ten nomo te joe teki en gersi wan oso. Ala di den e libi na grontapoe na ini wan libisma skin di man dede, tokoe kresten di abi a santa jeje leki wan panti gi hemel libi di den moesoe kisi ete, e froewakti „wan oso foe Gado”, wan jeje skin di no man dede èn di no man pori (1 Korentesma 15:50-53). Neleki Paulus, den kan taki opregti: „Wi abi boen deki-ati èn wani moro foeroe, foe no de na ini a [libisma] skin èn foe meki wi oso [na ini hemel] na Masra.” — 2 Korentesma 5:8.
Poti na ini spesroetoe froebontoe
14. Di Jesus ben seti a Memrefesa, sortoe froebontoe a ben kari fosi, èn sortoe ròl a froebontoe disi e plèi gi den jeje Israèlsma?
14 Den kresten di gebore nanga jeje de seiker taki den poti na ini toe spesroetoe froebontoe. Jesus ben kari wán foe den di a ben gebroiki brede sondro sroedeki nanga win foe seti a Memrefesa foe a dede foe en di ben moesoe kon ete, èn a ben taki foe a beker win: „A beker disi wani taki a njoen froebontoe akroederi mi broedoe di sa trowe foe a boen foe oenoe” (Lukas 22:20; 1 Korentesma 11:25). Soema na den partèi na ini a njoen froebontoe? Jehovah Gado nanga memre foe a jeje Israèl — den wan di Jehovah wani tjari go na ini a hemel glori (Jeremia 31:31-34; Galasiasma 6:15, 16; Hebrewsma 12:22-24). A njoen froebontoe di ben bigin wroko di Jesus broedoe ben trowe, e teki wan pipel gi a nen foe Jehovah komoto na den nâsi èn e meki den kresten disi di gebore nanga jeje kon tron wan pisi foe a „siri” foe Abraham (Galasiasma 3:26-29; Tori foe den Apostel 15:14). A njoen froebontoe e sorgoe taki ala den jeje Israèlsma e tjari go na ini glori foe di den e kisi wan opobaka foe kisi libi na ini hemel sondro foe man dede. Foe di a de „wan têgo froebontoe” meki den winimarki foe en sa tan foe têgo. A ten di e kon sa sori efoe a froebontoe disi sa plèi wan ròl toe na tapoe tra fasi na ini a Doesoen Jari Tiri èn baka dati. — Hebrewsma 13:20.
15. Soleki fa Lukas 22:28-30 e sori, na ini sortoe tra froebontoe den salfoe bakaman foe Jesus ben bigin poti, èn o ten?
15 Den „foeroe manpikin” di Jehovah wani foe „tjari go na ini glori”, poti so srefi ibriwan foe den na ini a froebontoe gi wan hemel Kownoekondre. Foe a froebontoe disi na mindri en nanga den bakaman foe en di ben waka na en baka, Jesus ben taki: „Oenoe na den wan di tan nanga mi di mi kisi tesi; èn mi e meki wan froebontoe nanga oenoe, soleki fa mi Tata meki wan froebontoe nanga mi, foe wan kownoekondre, so taki oenoe kan njan èn dringi na mi tafra na ini mi kownoekondre, èn sidon na tapoe kownoestoeroe foe kroetoe den twarfoe lo foe Israèl” (Lukas 22:28-30). A Kownoekondre froebontoe ben bigin wroko di den disipel foe Jesus ben salfoe nanga santa jeje na tapoe Pinksterfesa 33 G.T. A froebontoe dati e tan wroko foe têgo na mindri Krestes nanga den kompe kownoe foe en (Openbaring 22:5). So boen, den kresten di gebore nanga jeje de seiker taki den de na ini a njoen froebontoe èn na ini a froebontoe gi a Kownoekondre. Foe dati ede, te wi e hori na Avondmaal foe Masra, dan soso wan toe salfoewan di tan abra èn di de na grontapoe ete e njan foe a brede, di e prenki a skin foe Jesus di no abi sondoe, èn e dringi a win, di wani taki en volmaakti broedoe di trowe na ini dede èn di ben meki a njoen froebontoe abi krakti. — 1 Korentesma 11:23-26; loekoe A Waktitoren foe 1 februari 1989, bladzijde 17-27.
Den kari den, froekisi den, èn den de getrow
16, 17. (a) Foe tjari go na ini glori, san moesoe de troe dan foe ala den 144.000 sma? (b) Soema na den „tin kownoe”, èn fa den e handri nanga a fikapisi foe „den brada” foe Krestes na grontapoe?
16 A fosi fasi fa a loesoe-ofrandi foe Jesus ben gebroiki e meki a kan taki den 144.000 kisi kari gi hemel libi èn taki Gado froekisi den foe gebore nanga jeje. A no de foe taki dati foe tjari go na ini glori, dan den moesoe ’doe moro moeiti foe meki a kari èn a froekisi foe den kon de seiker’, èn den moesoe sori taki den de getrow te na dede (2 Petrus 1:10; Efeisesma 1:3-7; Openbaring 2:10). A pikin fikapisi foe den salfoewan di de na grontapoe ete e tan hori den soifri-retifasi ala di den „tin kownoe”, di e prenki ala den politiek makti, e gens den. „Den disi sa feti nanga a Pikin Skapoe”, na so wan engel ben taki, „ma bika a de Masra foe den masra èn Kownoe foe den kownoe, meki a Pikin Skapoe sa wini den. So srefi den wan di a kari èn di a froekisi èn di de getrow nanga en sa doe dati.” — Openbaring 17:12-14.
17 Libisma tiriman no man doe noti teige Jesus, a „Kownoe foe den kownoe”, bika a de na hemel. Ma den e sori feantifasi nanga a fikapisi foe „den brada” foe en di de na grontapoe ete (Openbaring 12:17). A feantifasi dati sa kaba na a orlokoe foe Gado na Armagedon, te wini sa de seiker gi a „Kownoe foe den kownoe” èn „den brada” foe en — „den wan di den kari èn di den froekisi èn di de getrow” (Openbaring 16:14, 16). Ma bifo dati, den kresten di gebore nanga jeje abi foeroe foe doe. San den e doe now, bifo Jehovah e tjari den go na ini glori?
San joe e piki?
◻ Soema Gado e ’tjari go na ini hemel glori’?
◻ San a wani taki foe „gebore komoto na Gado”?
◻ Fa ’a jeje e gi kotoigi’ na son kresten?
◻ Na ini sortoe froebontoe den wan di gebore nanga jeje poti go?
[Prenki na tapoe bladzijde 15]
Na tapoe Pinksterfesa 33 G.T., boeweisi ben gi taki a pasi ben opo foe go na ini hemel glori