Kresten kotoigi di de borgoe na hemel
„Foe wi sei, wi de borgoe na hemel.” — FILIPISMA 3:20.
1. Sortoe toemoesi moi prakseri Jehovah abi gi wan toe libisma?
LIBISMA di gebore na grontapoe, sa tiri leki kownoe èn leki priester na hemel, srefi na tapoe engel (1 Korentesma 6:2, 3; Openbaring 20:6). O fa dati na wan troetori di e froewondroe wi srefisrefi! Tokoe dati na a prakseri foe Jehovah, èn a sa doe dati nanga jepi foe en wan-enkri gebore Manpikin Jesus Krestes. Foe san ede a Mekiman foe wi e doe so wan sani? Èn fa a sabi di wi sabi disi, moesoe abi krakti na tapoe wan kresten na ini a ten disi? Meki wi go loekoe fa bijbel e gi piki na tapoe den aksi disi.
2. Sortoe njoen sani Johanes a Dopoeman ben meki bekènti taki Jesus ben sa doe, èn nanga san a njoen sani disi ben abi foe doe?
2 Di Johanes a Dopoeman ben sreka a pasi gi Jesus, dan a ben meki bekènti taki Jesus ben o doe wan njoen sani. A verslag e taki: „[Johanes] ben sa preiki taki: ’Baka mi, wan sma di tranga moro mi e kon; Mi no warti foe boekoendoen èn foe loesoe den leriboeba foe den sandaal foe en. Mi ben dopoe oenoe nanga watra, ma en sa dopoe oenoe nanga santa jeje’” (Markus 1:7, 8). Bifo a ten dati, no wan sma ben dopoe nanga santa jeje. Disi ben de wan njoen seti di abi foe doe nanga a santa jeje, èn a ben abi foe doe nanga a prakseri foe Jehovah di ben de foe kon na krin heri-esi, foe sreka libisma foe tiri na hemel.
„Gebore ete wan tron”
3. Sortoe njoen sani di abi foe doe nanga a Kownoekondre foe hemel, Jesus ben froeklari gi Nikodeimus?
3 Na ini wan kibri konmakandra di Jesus ben abi nanga wan prenspari Fariseiman, a ben tjari moro kon na krin foe a prakseri disi foe Gado. A Fariseiman, Nikodeimus, ben kon na Jesus na neti, èn Jesus ben taigi en: „Boiti efoe wan sma gebore ete wan tron, a no sa man si a kownoekondre foe Gado” (Johanes 3:3). Nikodeimus, di ben de wan Fariseiman di moesoe studeri den Hebrew Boekoe foe bijbel, ben sabi wan sani foe a bigi waarheid foe a Kownoekondre foe Gado. A boekoe Danièl ben taki na fesi, taki a Kownoekondre ben sa gi na „wan sma leki wan manpikin foe libisma” èn so srefi na „sma di de den santawan foe a Moro Heiwan” (Danièl 7:13, 14, 27). A Kownoekondre ben sa „masi èn tjari wan kaba” na ala tra kownoekondre èn a ben sa tanapoe foe têgo (Danièl 2:44). A ben kan de so troetroe taki Nikodeimus ben prakseri taki den profeititori disi ben sa kon troe na ini a djoe nâsi; ma Jesus ben taki dati efoe wan sma wani si a Kownoekondre, dan a sma ben moesoe gebore ete wan tron. Nikodeimus no ben froestan disi, so boen Jesus ben taki moro fara: „Boiti efoe wan sma gebore foe watra nanga jeje, a no man go na ini a kownoekondre foe Gado.” — Johanes 3:5.
4. Fa a matifasi di den wan di gebore foe santa jeje abi nanga Jehovah, sa kenki?
4 Johanes a Dopoeman ben taki foe a dopoe di e dopoe nanga santa jeje. Now Jesus e taki moro fara taki wan sma moesoe gebore foe santa jeje efoe a wani foe go na ini a Kownoekondre foe Gado. Nanga jepi foe a toemoesi aparti geborte disi, onvolmaakti mansma nanga oemasma e kon na ini wan toemoesi spesroetoe matifasi nanga Jehovah Gado. Den e tron den kweki-pikin foe en. Wi e leisi: „Na den alamala di ben teki [Jesus], a ben gi makti foe tron pikin foe Gado, bikasi den ben sori bribi na ini a nen foe en; èn den no ben gebore foe broedoe, noso foe di wan skin ben wani, noso foe di sma ben wani, ma foe Gado.” — Johanes 1:12, 13; Romesma 8:15.
Pikin foe Gado
5. O ten den getrow disipel ben dopoe nanga santa jeje, èn sortoe wroko di a santa jeje ben doe èn di ben abi foe doe nanga dati, ben feni presi na a srefi ten?
5 Di Jesus ben taki nanga Nikodeimus, dan Jesus ben salfoe kaba nanga santa jeje di ben salfoe en foe tron kownoe na ini a Kownoekondre foe Gado na ini a ten di ben de na en fesi, èn na poebliki Gado ben erken Jesus leki En Manpikin (Mateus 3:16, 17). Jehovah ben meki moro pikin na jejefasi na a Pinksterfesa foe 33 Gewoon Teri. Getrow disipel ben kon makandra na wan sodro kamra na Jerusalem pe den ben dopoe nanga santa jeje. Na a srefi ten, den ben gebore ete wan tron foe santa jeje, foe tron manpikin na jejefasi foe Gado (Tori foe den Apostel 2:2-4, 38; Romesma 8:15). Moro fara, den ben salfoe nanga santa jeje nanga a prakseri foe kisi wan erfenis na hemel na ini a ten di ben de na den fesi, èn na ini a bigin den ben kisi wan lakstampoe nanga santa jeje, di de leki wan marki taki den kan de seiker foe a hemel howpoe dati. — 2 Korentesma 1:21, 22.
6. San Jehovah abi na prakseri nanga a hemel Kownoekondre, èn foe san ede a e fiti taki libisma moesoe abi wan prati na ini disi?
6 Den ben de den fosi onvolmaakti libisma di Gado ben froekisi foe go na ini a Kownoekondre. Dati wani taki, baka te den dede èn te den kisi wan opobaka, dan den ben sa tron wan pisi foe a hemel Kownoekondre organisâsi di ben sa tiri na tapoe libisma èn na tapoe engel. Jehovah abi a prakseri taki, nanga jepi foe a Kownoekondre disi, a bigi nen foe en sa santa èn en soevereinfasi sa kon regtfardiki na fesi foe ala mekisani (Mateus 6:9, 10; Johanes 12:28). A e fiti srefisrefi taki libisma abi wan prati na ini a Kownoekondre dati! Satan ben gebroiki libisma foe bigin en fosi tjalensi teige a soevereinfasi foe Jehovah na ini a djari foe Eden, èn now a prakseri foe Jehovah de taki libisma sa abi foe gi piki toe na tapoe a tjalensi dati (Genesis 3:1-6; Johanes 8:44). Na apostel Petrus ben skrifi gi ibri sma di Gado ben froekisi foe tiri na ini a Kownoekondre dati: „Blesi foe a Gado nanga Tata foe wi Masra Jesus Krestes, bikasi akroederi en bigi sari-ati a ben gi wi wan njoen geborte gi wan libilibi howpoe nanga jepi foe na opobaka foe Jesus Krestes, foe kisi wan erfenis di no e pori, di no abi flaka èn di no e flaw. Den ben poti en aparti gi oenoe na hemel.” — 1 Petrus 1:3, 4.
7. Foe sortoe toemoesi aparti matifasi nanga Jesus, den wan di dopoe nanga santa jeje e njan boen?
7 Leki kweki-manpikin foe Gado, den kresten disi di Gado froekisi, ben tron brada foe Jesus Krestes (Romesma 8:16, 17; 9:4, 26; Hebrewsma 2:11). Foe di Jesus ben sori taki en na a Siri di Jehovah ben pramisi Abraham, meki den kresten disi di salfoe nanga santa jeje, de a di foe toe pisi foe a Siri dati di ben sa tjari blesi na tapoe a libisma famiri di ben sa abi bribi (Genesis 22:17, 18; Galasiasma 3:16, 26, 29). Sortoe blesi? Na okasi foe kisi loesoe foe sondoe èn foe kisi wan boen matifasi baka nanga Gado èn foe dini en now èn foe têgo (Mateus 4:23; 20:28; Johanes 3:16, 36; 1 Johanes 2:1, 2). Den salfoe kresten na grontapoe e tjari opregti sma go na den blesi disi, foe di den e gi kotoigi foe a jeje brada foe den, Jesus Krestes, èn foe a Tata foe den di kweki den, Jehovah Gado. — Tori foe den Apostel 1:8; Hebrewsma 13:15.
8. San na a „kon na krin” di den manpikin foe Gado di meki nanga santa jeje, sa kon na krin?
8 Bijbel e taki foe „a tjari kon na krin” foe den manpikin disi foe Gado di meki nanga santa jeje (Romesma 8:19). Foe di den e go na ini a Kownoekondre leki kompe kownoe nanga Jesus, meki den abi wan prati foe pori a grontapoe seti foe sani foe Satan. Baka dati, gi doesoen jari, den e jepi foe tjari den winimarki foe a loesoe ofrandi gi a libisma famiri, èn na so fasi den sa hei a libisma ras go na a volmaaktifasi di Adam ben lasi (2 Tesalonikasma 1:8-10; Openbaring 2:26, 27; 20:6; 22:1, 2). Ala den sani disi abi foe doe nanga a kon di den o kon na krin. Disi na wan sani di a libisma famiri di e bribi, e froewakti nanga faja.
9. Fa bijbel e kari a skin foe salfoe kresten foe heri grontapoe?
9 A groepoe foe salfoe kresten na heri grontapoe na „a gemeente foe den fosi geborewan di den nen skrifi na ini hemel” (Hebrewsma 12:23). Den na den fosiwan di sa kisi wini foe a loesoe ofrandi foe Jesus. Den na so srefi a „skin foe Krestes”, di e sori taki den abi wan krosibei matifasi nanga makandra èn nanga Jesus (1 Korentesma 12:27). Paulus ben skrifi: „Neleki fa a skin de wan, ma a abi foeroe memre, èn ala den memre foe a skin dati de wán skin ala di a abi foeroe memre, na so a de toe nanga Krestes. Bikasi troetroe, foe wán jeje wi alamala ben dopoe foe kon de wán skin, awinsi wi de Djoe noso Griki, awinsi wi de srafoe noso fri sma, èn den ben meki wi alamala dringi wán jeje.” — 1 Korentesma 12:12, 13; Romesma 12:5; Efeisesma 1:22, 23; 3:6.
„Na Israèl foe Gado”
10, 11. Foe san ede wan njoen Israèl ben de fanowdoe na ini a fosi jarihondro, èn soema ben de na ini a njoen nâsi disi?
10 Gi moro leki 1500 jari, bifo Jesus ben kon leki a pramisi Mesias, a nâsi Israèl na skinfasi ben de a spesroetoe pipel foe Jehovah. Ala di a nâsi ben kisi froemane ibri tron baka, tokoe a nâsi leki wan groepoe no ben de getrow. Di Jesus ben kon, dan a nâsi ben weigri foe erken en (Johanes 1:11). Foe dati ede Jesus ben taigi den djoe relisi fesiman: „Den sa poeroe a kownoekondre foe Gado foe oenoe èn den sa gi en na wan tra nâsi di e gi en froktoe” (Mateus 21:43). A de prenspari foe erken a „nâsi di e gi [den] froktoe [foe a Kownoekondre]” efoe sma wani pasa libilibi.
11 A njoen nâsi na a salfoe kresten gemeente di gebore na a Pinksterfesa foe 33 Gewoon Teri. Den fosi memre foe en ben de den djoe disipel foe Jesus di ben teki en leki den hemel Kownoe (Tori foe den Apostel 2:5, 32-36). Ma den ben de memre foe a njoen nâsi foe Gado, no foe di den ben de djoe bakapikin, ma tapoe gron foe a bribi na ini Jesus. So boen, a njoen Israèl foe Gado ben de wan aparti sani — wan nâsi na jejefasi. Di a moro bigi pisi foe den djoe ben weigri foe erken Jesus, dan den Samariasma nanga den Heidensma kisi wan kari toe foe de wan pisi foe a njoen nâsi. Den ben kari a njoen nâsi „na Israèl foe Gado”. — Galasiasma 6:16.
12, 13. Fa a ben kon de krin foe si taki a njoen Israèl disi no ben de soso wan sekte foe a djoe bribi?
12 Te sma di no ben de djoe ben tron proseliet na ini Israèl, dan den ben moesoe saka densrefi na ondro a Wet foe Moses, èn den mansma ben moesoe simbôliseer disi nanga jepi foe a besnijdenis (Exodus 12:48, 49). Wan toe djoe kresten ben denki taki disi ben moesoe de so toe gi den sma di no ben de djoe na ini na Israèl foe Gado. Ma Jehovah ben abi wan tra sani na prakseri. Santa jeje ben tjari na apostel Petrus go na a oso foe a heiden Cornelius. Di Cornelius nanga en osofamiri ben handri na tapoe a preiki di Petrus ben preiki gi den, dan den ben kisi santa jeje — srefi bifo den ben dopoe na ini watra. Disi ben sori krinkrin taki Jehovah ben erken den heiden disi leki memre foe na Israèl foe Gado sondro foe aksi foe den taki den moesoe saka densrefi na ondro a Wet foe Moses. — Tori foe den Apostel 10:21-48.
13 Wan toe sma di ben bribi, ben feni en moeilek foe erken a sani disi, èn heri-esi den apostel nanga den owroeman na Jerusalem ben moesoe taki makandra foe a tori disi. A tiri skin dati ben arki den froeklari di ben taki finifini fa santa jeje ben kon na tapoe den sma di no ben de djoe, ma di ben bribi. Na ondrosoekoe di den ben ondrosoekoe sani na ini bijbel, ben sori taki disi ben de wan kontroe foe profeititori di skrifi nanga jepi foe Gado en santa jeje (Jesaja 55:5; Amos 9:11, 12). Den ben teki wan joisti bosroiti: Kresten di no ben de djoe, no ben abi foe saka densrefi na ondro a Wet foe Moses (Tori foe den Apostel 15:1, 6-29). So boen, na Israèl na jejefasi ben de troetroe wan njoen nâsi èn no soso wan sekte foe wan djoe bribi.
14. San a wani taki dati Jakobus e kari a kresten gemeente „den twarfoe lo di panja na ala sei”?
14 Na ini akroederi nanga disi, a disipel Jakobus ben seni a brifi foe en go na „den twarfoe lo di panja na ala sei”, di a ben skrifi den salfoe kresten foe a fosi jarihondro (Jakobus 1:1; Openbaring 7:3-8). A no de foe taki, dati a no ben de so taki den ben poti den borgoe foe a njoen Israèl na ini spesroetoe lo. Na Israèl na jejefasi no ben prati na ini 12 difrenti lo, soleki fa a ben de na ini na Israèl na skinfasi. Ma tokoe den sani di Jakobus ben taki nanga jepi foe Gado en santa jeje, e sori a fasi fa Jehovah ben si a sani, taki na Israèl foe Gado ben teki a presi krinkrin foe den twarfoe lo foe na Israèl na skinfasi. Efoe wan sma di ben gebore leki wan djoe ben tron wan pisi foe a njoen nâsi, dan a lo foe en no ben wani taki no wan sani — srefi efoe a ben de foe a lo foe Juda noso foe Leifi. — Galasiasma 3:28; Filipisma 3:5, 6.
Wan njoen froebontoe
15, 16. (a) Fa Jehovah e prakseri foe den memre foe na Israèl foe Gado di no de djoe? (b) Tapoe sortoe reti gron a njoen Israèl ben seti?
15 Na a fasi fa Jehovah e si sani, den memre foe a njoen nâsi disi di no ben de djoe, ben kisi a nen krinkrin foe de djoe na jejefasi! Na apostel Paulus ben froeklari: „Wan sma no de wan djoe foe di a de djoe na dorosei, èn besnijdenis no e pasa na dorosei, na a skin. Ma en na wan djoe di de disi na inisei, èn a besnij na a ati nanga jepi foe a jeje, èn no nanga jepi foe reglementi di skrifi. A glori foe a sma dati no e kon foe sma, ma foe Gado” (Romesma 2:28, 29). Foeroe heiden ben doe wan sani na tapoe a kari foe de wan pisi foe na Israèl foe Gado, èn a sani disi di ben feni presi, ben meki bijbel profeititori kon troe. Foe eksempre, a profeiti Hosea ben skrifi: „Mi sa sori sari-ati gi a sma gi soema den no ben sori sari-ati, èn mi sa taigi den wan di no de mi pipel: ’Oenoe na mi pipel’; èn den foe den sei sa taki: ’Joe na mi Gado.’” — Hosea 2:23; Romesma 11:25, 26.
16 Efoe den Israèlsma na jejefasi no ben de na ondro a Wet froebontoe foe Moses, dan tapoe sortoe gron den ben de wan pisi foe a njoen nâsi dati? Jehovah ben meki wan njoen froebontoe nanga a jeje nâsi disi nanga jepi foe Jesus (Hebrewsma 9:15). Di Jesus ben meki wan bigin nanga a Memrefesa foe en dede tapoe 14 Nisan 33 Gewoon Teri, dan a ben seni brede nanga win pasa na den erfoe getrow apostel èn a ben taki dati a win ben prenki a „broedoe foe a froebontoe” (Mateus 26:28; Jeremia 31:31-34). Soleki fa a froeteri na ini na evangelietori foe Lukas, dan Jesus ben taki dati a beker nanga win ben prenki „a njoen froebontoe” (Lukas 22:20). Leki wan kontroe foe den wortoe foe Jesus, di den ben kisi santa jeje tapoe a Pinksterfesa di na Israèl foe Gado ben gebore, dan a Kownoekondre ben teki poeroe foe na Israèl na skinfasi, èn den ben gi en na a njoen nâsi na jejefasi. Na presi foe na Israèl na skinfasi, a njoen nâsi disi ben de now a foetoeboi foe Jehovah, di de den kotoigi foe en. — Jesaja 43:10, 11.
„Njoen Jerusalem”
17, 18. Fa den e taki na ini a boekoe Openbaring, foe a glori di den salfoe kresten e froewakti?
17 O fa dati de wan bigi glori di e wakti den wan di kisi a grani foe abi wan kari foe go na hemel! Èn o fa a de wan prisiri foe kon sabi den froewondroe sani di den e froewakti! A boekoe Openbaring e meki wi si pisi foe den sani foe a hemel erfenis di den sa kisi, di e naki wi ati. Foe eksempre, na Openbaring 4:4, wi e leisi: „Lontoe a kownoestoeroe [foe Jehovah] toetenti na fo kownoestoeroe de, èn na tapoe den kownoestoeroe disi mi ben si toetenti na fo owroeman e sidon, di weri weti dorosei krosi, èn nanga gowtoe kownoe-ati na tapoe den ede.” Den 24 owroeman disi na salfoe kresten di kisi wan opobaka èn di abi a hemel posisi now di Jehovah ben pramisi den. Den kownoe-ati nanga den kownoestoeroe foe den e memre wi taki den na kownoe. Prakseri so srefi foe a toemoesi moi hei grani di den abi foe dini lontoe a kownoestoeroe foe Jehovah!
18 Na Openbaring 14:1 wi kan fringi wan ai foe si wan tra pisi foe den: „Mi ben si, èn loekoe! a Pikin Skapoe ben tanapoe na tapoe a bergi Sion, èn nanga en wán hondro fotenti na fo doesoen di abi en nen nanga a nen foe en Tata skrifi na den fesi-ede.” Djaso wi e si a fasti nomroe foe den salfoewan disi — 144.000. Wi kan si taki den abi wan kownoe posisi, foe di den e tanapoe nanga a Kownoe di Jehovah poti, „a Pikin Skapoe”, Jesus. Èn den de na tapoe a hemel Bergi Sion. A Bergi Sion na grontapoe, ben de na Jerusalem, a kownoe foto foe Israèl. A Bergi Sion na hemel e prenki a hei posisi foe Jesus nanga den kompe erfgenaam foe en, di de a Jerusalem na hemel. — 2 Kroniki 5:2; Psalm 2:6.
19, 20. (a) Foe sortoe hemel organisâsi den salfoe kresten sa de wan pisi? (b) Na ini sortoe pisi ten Jehovah ben froekisi den wan di ben sa de borgoe na hemel?
19 Akroederi den sani disi, den e taki toe foe den salfoewan na ini den hemel glori, leki a „Njoen Jerusalem” (Openbaring 21:2). Jerusalem na grontapoe ben de „a foto foe a bigi Kownoe” èn so srefi a presi pe a tempel ben de (Mateus 5:35). A Njoen Jerusalem na hemel, na a organisâsi foe a Kownoekondre na ini san a bigi Soeverein Jehovah, nanga a Kownoe di a poti, Jesus, e tiri now, èn na ini san a priester diniwroko e doe, ala di bigi blesi e lon foe a kownoestoeroe foe Jehovah foe dresi a libisma famiri (Openbaring 21:10, 11; 22:1-5). Na ini wan tra fisjoen Johanes e jere taki den e kari den getrow salfoe kresten di opo baka, ’a wefi foe a Pikin Skapoe’. O fa dati na wan agersi fasi di e naki sma ati, di e sori a krosibei matifasi di den sa abi nanga Jesus èn a wani di den wani saka densrefi na ondro en! Prakseri foe a prisiri na hemel, te, te foe kaba, den lastiwan foe den e kisi en hemel pai. Te foe kaba, dan „a trow foe a Pikin Skapoe” kan feni presi now! Dan a kownoekondre organisâsi na hemel sa seti krinkrin. — Openbaring 19:6-8.
20 Ija, toemoesi moi blesi e wakti den wan foe soema na apostel Paulus ben taki: „Foe wi sei, wi de borgoe na hemel” (Filipisma 3:20). Gi pikinmoro toe doesoen jari, Jehovah ben froekisi den pikin na jejefasi foe en, èn a ben e sreka den foe kisi wan hemel erfenis. Soleki fa ala den boeweisi e sori, dan a wroko disi foe froekisi sma èn foe sreka den, pikinmoro doro en kaba. Ma moro ben moesoe feni presi ete, soleki fa Johanes ben tjari kon na krin na ini a fisjoen di skrifi na Openbaring kapitel 7. So boen, now wan tra groepoe foe kresten e aksi taki wi e poti prakseri na den tapoe, èn wi sa loekoe a groepoe disi na ini a tra artikel.
Joe e memre disi?
◻ San na den difrenti fasi fa a santa jeje e wroko na tapoe den wan di abi wan erfenis na hemel?
◻ Sortoe krosibei matifasi den salfoewan abi nanga Jehovah? èn nanga Jesus?
◻ Fa den e kari a gemeente foe den salfoe kresten na ini bijbel?
◻ Na tapoe sortoe reti gron na Israèl foe Gado ben seti?
◻ Sortoe grani na hemel, den salfoe kresten e froewakti?
[Prenki na tapoe bladzijde 8]
Na ini wan pisi ten foe pikinmoro toe doesoen jari, Jehovah ben froekisi den wan di ben sa tiri na ini a hemel Kownoekondre