Den kerki e taki foe den sondoe foe den

„A paus e poti a Kerki sidon na kroetoe bangi.” „Kerki kroetoebangi èn a desko di den e desko den djoe — A Kerki e sreka en Mea Culpa.”a „Mea Culpa gi a Holocaust.” „Methodistsma e aksi den Ingi foe a westsei foe Amerkankondre pardon.”

JOE leisi den sortoe edeprakseri disi? A e sori taki moro nanga moro den kerki e agri taki den abi a fowtoe èn den e aksi pardon gi den sani di den doe na ini den jarihondro. Doronomo a media e poti krakti na tapoe den njoen mea culpa foe a paus.

Te a paus e aksi pardon

Na mindri 1980 nanga 1996, Johanes Paulus II ’ben erken den fowtoe di a Kerki ben meki na ini a historia noso ben aksi pardon no moro mendri leki 94 tron, na so a man di e gi komentaar gi a Vaticaan, Luigi Accattoli, e taki na ini en boekoe Quando il papa chiede perdono (Te a paus e aksi pardon). Akroederi Accattoli, „soso a paus kan meki wan mea culpa na ini a Katolik Kerki”. Èn a doe dati èn ben taki foe den sani di ben pasa na ini a historia foe a Katolik kerki di ben tjari moro foeroe haritaki kon — den Kruistochten, orlokoe, a hori di den ben horibaka gi a tiri foe den ogri-ati tiriman, pratifasi na ini den kerki, a desko di den ben desko den djoe, a Kerki kroetoebangi, a Mafia, a desko di den e desko sma foe wan tra ras. Na ini wan sjatoe brifi di ben seni na ini 1994 go na den kardinaal, (di son sma e si leki a moro prenspari document na ini a pisi ten foe wan paus), Johanes Paulus II ben gi leki idea foe „taki foe ala den sondoe di ben doe na ini a di foe toe doesoen-jari foe den kresten”.

Difrenti kerki fesiman waka na baka na eksempre foe a paus. Na ini december 1994 a koranti foe Italia, Il Giornale, ben skrifi: „Foeroe Amerkan beskopoe ben kon na tapoe telefisi èn ben aksi pardon na poebliki.” Gi san? Foe di den no ben froestan o serjoesoe a problema ben de foe den priester di e gebroiki pikin-nengre foe abi seks nanga den, èn na ogri di den ben doe foeroe jongoe sma foe dati ede. Na ini januari 1995 a koranti La Repubblica ben froeteri foe „wan sani di ben doe èn di noiti ben pasa na fesi na ini a historia foe a Katolik kerki foe a ten disi” — a ben taki foe a problema foe a tan di paus Pius XII ben tan pî na ini a tori foe a Holocaust. Na ini januari 1995 a srefi koranti ben froeteri taki a groepoe foe Doisri beskopoe ben aksi pardon gi den „foeroe fowtoe” foe den Lomsoe Katoliksma di ben horibaka gi den ogridoe foe a Nazi. Difrenti Protestant kerki kroetoe densrefi toe.

Foe san ede den e aksi pardon?

Bijbel e gi wi deki-ati foe aksi pardon te wi abi fowtoe, èn foeroe sma e prèise den kerki te den kerki e kroetoe densrefi (Jakobus 5:16). Ma foe san ede den kerki e doe disi? Fa disi moesoe abi krakti na tapoe a fasi fa wi e prakseri foe den?

[Foetoewortoe]