Foe san ede den e aksi pardon?

NA IDEA taki den kerki moesoe abi berow foe den fowtoe foe den èn taki den moesoe kenki densrefi kon boen, no de wan njoen sani. Religioni e miti (Relisi nanga falsi tori), wan wortoeboekoe foe relisi, e taki dati a so-kari soifri retifasi foe a fositen kerki ben hari sma na ini den Mindri Jarihondro èn ben meki taki foeroe sma ben aksi foe kenki sani na ini a relisi.

Na ini 1523, baka di Martin Luther ben broko nanga Rome, dan paus Adrianus VI ben proeberi foe tjari wánfasi kon, di a ben seni a boskopoe disi go na a Rijksdag foe Nuremberg: „Wi sabi heri boen taki foeroe jari langa tegoe sani ben de lontoe a Santa Stoeroe . . . Wi sa gebroiki ala faja di wi abi foe kenki fosi a Curie foe Rome bifo ala tra sani, bika kande na drape ala den ogri ben bigin.” Ma na erken di a ben erken dati, no ben man tapoe a prati di ben de na ini a Curie foe a paus noso no ben man tapoe a kroektoedoe na ini a Curie foe a paus.

No so langa pasa, den kerki kisi kroetoe foe sma foe a tan di den kerki ben tan pî na ini a tori foe a Holocaust. Den ben kisi kroetoe toe bika den no ben gi den memre foe den a deki-ati foe no abi wan prati na ini den orlokoe. Na ini 1941, ala di a di foe Toe Grontapoefeti ben e feti, wan priester di nen Primo Mazzolari ben aksi: „Foe san ede Rome no handri tranga na tapoe a broko di den Lomsoe leri ben e broko soleki fa a kerki ben gwenti foe doe, èn soleki fa a gwenti foe doe na ini afersi di abi foe doe nanga kerkileri di no de so prenspari?” Den kerkileri di no de so prenspari leki sortoe sani? A priester ben e taki foe a nationalisme di e meki orlokoe de, di ben e pori a libimakandra na a ten dati.

Ma a tori na taki no so langa pasa, na erken di den relisi ben e erken a fowtoe foe den no ben de wan gewoon sani. Na ini 1832, leki piki gi den sma di ben gi a Katolik Kerki a tranga foe ’kisi a krakti baka di den ben abi na ini a bigin’, Gregorius XVI ben taki: „A de krin taki a de wan law sani èn wan takroe sani foe gi leki rai taki a kerki moesoe ’meki kon boen baka èn moesoe kisi a krakti di a ben abi na ini a bigin baka, gi a kibri èn a gro foe [a kerki], neleki taki a Kerki ben kan meki fowtoe.” Fa a de nanga den fowtoe di ben de toemoesi serjoesoe taki den no man weigri foe erken den? Den ben gebroiki difrenti taktik foe soekoe boen reide gi den fowtoe di den meki. Foe eksempre, son theoloogman bribi taki a kerki de santa èn a abi sondoe. Den e taki dati na organisâsi srefi de santa — taki Gado kibri en foe no doe sondoe. Tokoe den memre foe en e sondoe. Foe dati ede, te kefalek takroe ogridoe e doe na ini a nen foe a kerki, dan na organisâsi srefi no moesoe kisi a fowtoe, ma den sma na ini a kerki moesoe kisi a fowtoe. Dati na wan logis sani? A Lomsoe Katolik theoloogman Hans Küng, no ben agri nanga dati, bika a ben skrifi: „Wan volmaakti kerki no de di de aparti foe a libisma na grontapoe.” A ben froeklari: „A Kerki di no abi sondoe di a moesoe erken, no e bèsta.”

A bondroe di den kerki bondroe kon na wán èn a nen di den abi na ini moreel afersi

Joe ben sa kan aksi joesrefi san ben meki taki den kerki e aksi pardon now. Na ini a bigin, den Protestantsma nanga den Orthodox sma ben erken taki den ben de frantiwortoe gi „den prati foe fosi” na mindri den difrenti kerki. Den ben doe disi na a „Geloof en Kerkorde” (Bribi nanga Orde) konmakandra foe difrenti kerki di bondroe kon na wán èn di ben hori na ini Lausanne, Switserland, na ini 1927. Te foe kaba, a Lomsoe Katolik Kerki ben waka na baka na eksempre foe den Protestantsma nanga den Orthodox sma. Spesroetoe foe sensi a Vaticaan II,a heihei kerki tiriman, so srefi den paus, tan aksi pardon moro nanga moro gi a pratifasi di de na ini a krestenhèit. Foe san ede? Soleki fa a sori, den wani moro wánfasi na ini a krestenhèit. A Katolik historiaman Nicolino Sarale, ben taki dati wan taktik de na ini den ’mea culpa’ foe Johannes Paulus II, èn dati na a bondroe di den kerki bondroe kon na wán.”

Ma moro de na ini a tori leki nomo a bondroe di den kerki bondroe kon na wán. Na ini a ten disi, a krestenhèit di no ben de wan boen eksempre ini historia, de bekènti na ala presi. „A Katolik kerki no man frigiti nomo a heri historia disi”, na so a theoloogman Hans Urs von Balthasar e taki. „A Kerki srefi di a paus de wan pisi foe en, ben doe noso ben gi pasi foe sani doe di wi no kan feni boen srefisrefi na ini a ten disi.” Foe dati ede, a paus poti wan commissie na wroko foe „froeklari den takroe sani di ben feni presi na ini a kerki so taki . . . den kan aksi pardon”. So boen, wan tra reide foe san ede den kerki wani kroetoe densrefi na taki den wani foe kisi wan boen nen baka na ini moreel afersi.

Na a srefi fasi, a historiaman Alberto Melloni, di a ben taki wan sani foe na aksi di a kerki e aksi pardon, e skrifi: „Te joe loekoe en boen, dan a de so, taki a sani di den kerki e aksi sontron na taki den e aksi foe no kisi a frantiwortoe gi den fowtoe di den ben meki.” Ija, a gersi taki Katolik Kerki e proeberi foe lekti a hebi foe den fositen sondoe, so taki den kan kisi wartifasi baka na ini na ai foe a poebliki. Ma foe taki troetroe, wi moesoe taki dati a gersi taki den e broko den ede moro foe meki vrede nanga grontapoe na presi foe meki vrede nanga Gado.

So wan fasi fa den e tjari densrefi e meki wi prakseri Saul, a fosi kownoe foe Israèl (1 Samuèl 15:1-12). A ben doe wan serjoesoe sondoe, èn di disi ben tjari kon na krin, a ben proeberi fosi foe poeroe fowtoe na en tapoe — foe soekoe wan reide gi a fowtoe foe en — na Samuèl, wan getrow profeiti foe Gado (1 Samuèl 15:13-21). Te foe kaba, a kownoe ben moesoe erken gi Samuèl: „Mi sondoe; bika mi pasa a wet foe Jehovah” (1 Samuèl 15:24, 25). Ija, a ben erken taki a fowtoe. Ma den wortoe di a ben taigi Samuèl baka dati ben sori san ben de a moro prenspari sani na ini en prakseri: „Mi sondoe. Grantangi, gi mi grani baka na fesi den owroe man foe mi pipel èn na fesi foe Israèl” (1 Samuèl 15:30). Soleki fa a de krin foe si, Saul ben broko en ede moro nanga en posisi na ini Israèl, moro leki a kon di a ben moesoe kon boen baka nanga Gado. A fasi disi foe en no ben abi leki bakapisi taki Gado ben gi Saul pardon. Joe e denki taki a srefi fasi disi sa meki taki Gado e gi den kerki pardon?

A no den alamala e agri

A no ala sma e agri taki den kerki moesoe aksi pardon na poebliki. Foe eksempre, foeroe Lomsoe Katoliksma no e firi switi te a paus foe den e aksi pardon gi a de di sma ben de na ini katibo noso a e krin den nen foe „den ketter” soleki Hus nanga Calvijn. Soleki fa bodoi di e kon foe a Vaticaan e sori, dan a brifi di ben seni go na den kardinaal di ben gi leki rai foe „ondrosoekoe a konsensi” na ini a doesoen jari historia foe a Lomsoe Kerki, ben kisi kroetoe foe den kardinaal di ben fisiti wan konmakandra gi den kardinaal, di ben hori na ini juni 1994. Di tokoe a paus ben wani foe poti a prenspari pisi foe na idea dati na ini wan brifi foe a paus gi ala den beskopoe, dan a kardinaal foe Italia, Giacomo Biffi, ben tjari wan herder brifi kon na doro, pe a ben gi leti: „A Kerki no abi sondoe.” Ma tokoe, a ben erken: „Foe aksi pardon gi den sondoe di a kerki ben doe na ini den jarihondro di pasa . . . kan meki den sma abi wan moro boen denki foe a kerki.”

„Na erken di den e erken den sondoe na wan foe den moro bigi streipenti na ini a Katolik Kerki”, na so a man di e gi komentaar na ini a Vaticaan, Luigi Accattoli, e taki. „Efoe a paus e erken den fowtoe foe den zendeling, dan zendeling sa de di na wan opregti fasi e atibron foe dati.” Moro fara, wan njoensoeman foe a Lomsoe Katolik Kerki ben skrifi: „Efoe troetroe a paus abi so wan kefarlek takroe denki foe a historia foe a Kerki, dan a de moeilek foe froestan fa a kan kari a srefi Kerki disi a moro prenspari seti di e horibaka gi ’den reti foe libisma’, a ’mama nanga leriman’ di wawan kan tjari libisma go na a di foe dri doesoen jari di e gi troetroe howpoe.”

Bijbel e warskow teige a sori di wan sma e sori berow soso bika foe a sjen di a sa kisi te sma kisi en e doe wan ogri. A sortoe berow dati pikinmoro noiti e meki a sma di abi berow kenki ensrefi gi ala ten. (Teki gersi 2 Korentesma 7:8-11.) Berow di abi waarde na Gado ai, e go makandra nanga „froktoe di e fiti berow” — dati wani taki, boeweisi di e sori na opregtifasi foe a berow. — Lukas 3:8.

Bijbel e taki dati a sma di abi berow èn di e erken en sondoe moesoe libi den ogri di a e doe, a no moesoe doe den moro (Odo 28:13). Den doe disi? We, na baka di a Lomsoe Katolik Kerki nanga tra kerki ben erken ala den sondoe, san ben pasa dan na ini borgoe feti foe no so langa pasa na ini centraal Afrika nanga Owstoe-Europa, pe bigi groepoe „kresten” ben de na ini den feti? Den kerki ben handri leki wan krakti gi vrede? Ala den fesiman foe den ben taki na ini wánfasi teige den kefarlek takroe ogridoe di den memre foe den ben doe? Nôno. Ija, wan toe kerki dinari ben abi wan prati srefi na ini a kiri di sma ben kiri trawan!

Kroetoe di e kon foe Gado

Di Kardinaal Biffi ben taki foe den foeroe mea culpa foe a paus, a ben aksi nanga a marki foe taki wan heri tra sani: „Gi den sondoe di ben doe na ini a ten di pasa, a no ben sa moro boen gi wi alamala efoe wi e wakti na tapoe a kroetoe gi a heri universum?” We, a kroetoe gi a heri libisma famiri de krosibei. Jehovah Gado sabi heri boen ala den takroe sani di ben doe na ini a historia foe relisi. Heri esi, a sa aksi frantiwortoe foe den wan di abi fowtoe (Openbaring 18:4-8). Ma bifo dati, a kan taki wi man feni wan anbegi di no flaka nanga broedoe paiman, a takroe fasi fa sma no e froedrage makandra èn di e meki sma kiri trawan, èn den tra ogridoe di den kerki foe krestenhèit e aksi pardon gi? Ija.

Fa wi kan feni dati? Te wi e gebroiki a lin di Jesus Krestes ben kari: „Na den froktoe foe den oenoe sa kon sabi den.” Den sani di pasa na ini a historia, di wan toe relisi ben sa wani foe sma frigiti, e jepi wi foe no sabi wawan den sma di Jesus ben kari „falsi profeiti” ma so srefi den wan di meki „boen froktoe” (Mateus 7:15-20). Soema na den sma disi? Wi e gi joe a kari foe kon sabi dati gi joesrefi foe di joe e studeri bijbel nanga Jehovah Kotoigi. Loekoe soema na ini a ten disi e proeberi troetroe foe waka na baka a Wortoe foe Gado na presi foe proeberi foe tan hori wan posisi foe makti na ini a grontapoe. — Tori foe den Apostel 17:11.

[Foetoewortoe]

[Prenki na tapoe bladzijde 5]

Den kerki e aksi pardon gi den kefalek takroe ogridoe disi

[Sma di abi a reti foe a prenki]

The Complete Encyclopedia of Illustration/J. G. Heck