Foe san ede den e doe en?

IBRI jari Jehovah Kotoigi na heri grontapoe e kon makandra nanga doesoendoesoen sma na den kongres. Drape den e njan boen foe demakandra èn e jere wan toemoesi moi programa foe bijbel leri. Son wan foe den e doe kefalek foeroe moeiti foe fisiti den kongres disi. Foe eksempre, a jari di pasa, na ini Malawi wan trowpaar di abi wan sani foe 65 jari, makandra nanga a manpikin foe den èn en wefi nanga beibi, ben rèis 80 kilometer nanga baisigri foe fisiti wan kongres. Den ben libi a dorpoe foe den siksi joeroe mamanten èn ben doro na a kongres presi 15 joeroe na baka.

Na ini Mosambik, wan groepoe ben rèis dri dei nanga baisigri foe go na wan kongres. Wan neti, di den ben de na ini wan kampoe na dorosei, den ben e jere lew ben e bari krosibei. Ala di den ben trowe bron-oedoe go na den meti foe jagi den, tokoe den lew ben tan teleki deibroko. Wan tra Kotoigi di ben e rèis go na a srefi kongres ben tanapoe leti na fesi wan lew na tapoe a pasi. A ben tanapoe pî sondro foe boeweigi teleki a lew ben gowe. Na a kongres den Kotoigi disi ben froeteri nanga prisiri fa den ben „kisi froeloesoe foe a lew mofo”. — 2 Timoteus 4:17.

Foeroe Jehovah Kotoigi e meki kefalek foeroe moeiti foe fisiti den kongres noso den alawiki gemeente konmakandra foe anbegi. Foe san ede? Den artikel di e kon now sa jepi joe foe froestan foe san ede a de so prenspari foe kon makandra.