„Gado pasi foe libi”-distriktkongres nanga internationaal kongres foe 1998
1 Odo 10:29 e memre wi taki „a pasi foe Jehovah na wan fortresi”. A jari disi a kongres troetroe abi wan thema di fiti — „Gado pasi foe libi”! Fa den sa gebroiki a thema disi na ini a heri programa foe dri dei? Wi alamala e loekoe na fesi fajafaja foe si san sreka gi wi. Èn prenspari penti sa tjari kon na fesi.
2 Zendeling, internationaal fri-wani wrokoman, noso trawan di abi toewijzing foe dini na ini wan tra kondre, kande sa fisiti joe kongres. Den e froewakti taki doesoendoesoen sma foe tra kondre sa de na ini foto pe den internationaal konmakandra e hori. Kande joe sa miti wan toe foe den fisitiman disi. A kongres programa sa abi so srefi sma di e froeteri fa Jehovah e blesi a wroko na ini den difrenti gebied.
3 A warti a moeiti foe de drape: Foe di feti nanga broeja de na son presi foe Afrika, meki foeroe foe wi brada drape ondrofeni problema drape. Den e si den kongres foe a pipel foe Jehovah leki wan sani di de prenspari gi den foe tan na libi. Son wan foe den moesoe waka langa pasi foe fisiti wan kongres, ma tokoe den no ben sa denki srefi foe misi wan foe den. Wan brada di abi 73 jari na ini a Demokrasia Republiek foe Kongo (fosi a ben de Zaire), ben waka so wan 450 kilometer foe fisiti wan kongres. A ben doro drape 16 dei na baka di a bigin waka, en foetoe ben sweri, ma tokoe a ben de kolokoe taki a ben de drape. Baka a kongres, nanga foeroe prisiri èn nanga foeroe jeje krakti di a ben kisi, a ben waka go na oso baka. A abi a gwenti foe doe disi foeroe jari kaba!
4 Na Mosambik wan distrikt-opziener nanga en wefi ben kren wan hei bergi èn ben waka e koti wan bigi èn drei kontren abra foe fisiti wan kring-konmakandra. Na ini 45 joeroe den ben waka go 90 kilometer. Ala sma di ben de drape ben kisi boen foeroe deki-ati foe a moi eksempre di a trowpaar disi ben gi. Foeroe osofamiri di ben de drape, ben doe den srefi sortoe moeiti dati foe de drape. A distrikt-opziener ben froeteri taki son brada, so srefi wan di abi 60 jari, ben waka go 200 kilometer!
5 Joe meki boen plan kaba foe de na a kongres foe a jari disi? Kande joe no sa abi foe waka wan langa pasi, ma joe ben sa abi foe doe pikinso moeiti èn tjari wan toe òfer so taki joe nanga joe osofamiri kan de drape. Sreka sani foe de na a heri programa, foe a bigin te na a kaba. Foeroe bijbelstudenti e meki go na fesi so taki den kan teki dopoe. Efoe den de na a kongres, dan dati sa jepi den foe teki a joisti bosroiti. Joe gi joe bijbelstudenti nanga tra sma di e sori belangstelling wan kari foe go makandra nanga joe?
6 Wan programa foe dri dei: A jari disi, a programa sa hori na feifi kongres na ini Sranan. Kongres sa hori na ini Bakratongo, ma so srefi na ini Ingrisitongo nanga Sranantongo. A Waktitoren foe 15 februari 1998 e kari den dei foe den kongres disi èn den presi pe den sa hori den. Na a ten disi joe kisi foe jere kaba sortoe kongres a gemeente foe joe moesoe fisiti.
7 Wan spesroetoe sani foe memre: A de toemoesi prenspari taki joe e go na a kongres di a gemeente foe joe kisi a toewijzing foe fisiti dati. Grantangi, no meki plan foe go na wan foe den internationaal kongres, soso te joe kisi a kari foe fisiti a kongres dati. Den presi pe den sa hori den internationaal kongres no ben sa man hori srefi wan nomroe foe ala den sma di ben sa wani fisiti drape. Te joesrefi e sori lespeki gi den seti disi èn e wroko makandra nanga den, dan dati sa meki taki ala sani e feni presi na wan fasi di fiti èn leki fa sani seti. — 1 Kor. 14:33, 40.
8 Na tapoe freida, satra, nanga sonde mamanten, a programa sa bigin 9.30 joeroe mamanten. Na tapoe freida nanga satra, a programa sa kaba 5.00 joeroe bakadina, èn na tapoe sonde 4.00 joeroe bakadina. Ibri dei, den doro sa opo 8.00 joeroe mamanten, èn bifo a ten dati, no wan sma sa kisi pasi foe hori sidonpresi.
9 Ala di wi e rèis go-kon foe a kongres, wi moesoe loekoe efoe okasi de pe wi kan gi informeel kotoigi. Den sma di e wroko na service station, na ini wenkri, na ini hotel, èn na ini restaurant, kande abi belangstelling gi a Kownoekondre boskopoe. De srekasreka gi disi foe di joe abi traktaat, den moro njoen tijdschrift, brochure, noso tra poeblikâsi na joe, so taki joe kan meki boen gebroiki foe den okasi di joe sa kisi foe gi kotoigi na sma, di kande noiti wi sa doro den na wan tra fasi nanga a boen njoensoe. — 2 Tim. 3:17.
10 „Poti prakseri tapoe fa joe e arki: A ben sa de wan koni sani gi sma di e go na a kongres foe poti prakseri tapoe a rai di de foe feni na ini Lukas 8:18. Ala sma e kisi a deki-ati foe tjari wan bijbel, so srefi wan singiboekoe nanga wan pikin boekoe pe joe kan skrifi sani na ini. Arki heri boen na prenspari penti na ini ibri lezing, èn meki sjatoe notisi. Aksi joesrefi fa joe kan gebroiki a materiaal gi joesrefi. Ibri neti foe a kongres, bifo joe e go sribi, foe san ede joe no e go loekoe den notisi di joe meki baka, èn ondrosoekoe o boen joe e hori joesrefi na Jehovah en pasi foe libi. — Odo 4:10-13.
11 Wi si taki ala di den lezing e hori, wan toe sma e gowe libi a kongres hal foe go sidon na ini den wagi foe den, èn na so fasi den e misi a programa. Wi si taki trawan e waka lontoe somarso, ala di den ben sa moesoe sidon na ini a hal èn e arki. Wi si taki groepoe foe jongoe sma gowe foe a kongres, wan sani foe dri joeroe bakadina. Foe di son wan foe den foetoeboi foe Jehovah no ben arki boen na den froemane foe Jehovah, meki na ini a ten di pasa den meki serjoesoe fowtoe na ini den libi. Foe troe wi ben sa wani wai pasi foe no meki a srefi fowtoe dati (2 Kow. 17:13-15). „A getrow èn koni srafoe” sreka rai di wi alamala abi fanowdoe. A de toemoesi prenspari taki wi e „poti moro prakseri leki san wi gwenti, tapoe den sani di wi ben jere” te ibri pisi foe a kongres foe dri dei e hori. Ibri dei, wi sa jere wan sani di de toemoesi prenspari gi wi, so srefi bodoi di seiker sa abi wan boen krakti tapoe a fasi fa wi sa libi na ini a ten di e kon. Te wi e poti ala wi prakseri èn e meki boen gebroiki foe san Jehovah e gi wi na jejefasi, dan a howpoe foe wi sa de fasti troetroe, so taki „noiti wi e drifi gowe” foe Gado en pasi foe libi. — Mat. 24:25; Hebr. 2:1.
12 Krosi di e gi Jehovah grani: Na ini den moeilek ten disi, wi moesoe poti moro prakseri leki san wi gwenti so taki a jeje foe grontapoe no sa abi krakti na wi tapoe (1 Kor. 2:12). Den krosi foe wi èn a fasi fa wi e sorgoe wisrefi moesoe de bescheiden èn den moesoe sori a wartifasi foe a Gado di wi e dini (1 Tim. 2:9, 10). Foe kan de na mindri den wan di „e meki a leri foe wi Froeloesoeman, Gado, kon moi”, a no de fanowdoe foe abi diri krosi (Tit. 2:10). Loekoe a toemoesi boen èn praktis rai foe den boekoe foe bijbel na tapoe bladzijde 17 nanga 18 foe A Waktitoren foe 15 juni 1997, paragraaf 14-18. Noiti no si a krakti kotoigi di wi kan gi foe di wi e weri wi krosi na wan fasi di e gi grani na Jehovah, leki wan soso sani.
13 Wan kotoigi di abi 16 jari ben froeteri taki, di en nanga en brada ben go na wan restaurant wan mofoneti baka den programa, dan den ben si taki son wan foe den brada nanga sisa di ben de drape ben kenki den krosi èn ben weri krosi di no fiti. Ma foeroe sma di ben fisiti a restaurant ben handri boen di den si Kotoigi di ben weri krin krosi èn krosi di fiti èn den ben weri den lapelkarta. Disi ben opo a pasi foe gi kotoigi na wan toe foe den sma di ben fisiti a restaurant.
14 Fasi foe tjari wisrefi di e gi Jehovah prèise: Wi sabi taki a fasi fa wi e tjari wisrefi leki kresten kan abi krakti tapoe a fasi fa trawan e si a troe anbegi. Foe dati ede, ala ten wi wani tjari wisrefi na wan fasi di warti a boen njoensoe èn di e tjari prèise kon gi Jehovah. — Fil. 1:27.
15 A jari di pasa, den ben hori foe a fosi leisi wan distriktkongres na a noordsei foe Angola. Na a di foe toe dei foe a kongres, toe skowtoe ben seni go na a presi pe den ben hori a kongres foe de seiker taki sani ben sa waka boen. Den ben tan a heri dei. Na a kaba foe a dei, den ben taki nanga froewondroe foe den sani di den ben jere èn foe a si di den ben si sma di ben tjari densrefi na wan orde fasi. Wan foe den ben taki: „Foe san ede den ben seni wi kon djaso? Wi sabi taki Jehovah Kotoigi e hori orde na den konmakandra foe den.”
16 Wan memre foe wan politiek partij na ini wan Afrikan kondre ben lowe gowe na Europa di den ben kiri ala den memre foe a partij foe en. A ben ondrofeni foeroe persoonlijk problema èn a ben kon lasi-ati srefisrefi. Te foe kaba, a ben teki wan bijbelstudie. Ala di a ben e fisiti en fosi distriktkongres, a ben naki en ati taki sma foe difrenti background ben kon makandra ini vrede èn ini wanfasi. A ben abi na overtoigi taki a ben feni waarheid, èn na a ten foe a kongres dati a teki a bosroiti foe broko ala den politiek banti di a ben abi. Baka ten a ben teki dopoe, èn now a e dini Jehovah makandra nanga den pikin foe en.
17 Fa a fasi fa wi sa tjari wisrefi na den kongres a jari disi sa abi krakti tapoe den wan di kande sa de drape foe a fosi leisi? Den sa si taki wi wani wroko makandra te wi e wroko makandra leki fri-wani wrokoman? A sa naki den ati te den e si o krin a kontren foe wi de, èn taki bifo wi e libi a kongres presi, wi nanga den pikin foe wi, e piki iniwan dotisani di kande kon tron wan ipi na a sei foe wi sidonpresi? Den sa si a boen fasi fa wi e tjari wisrefi te wi e rèis go-kon foe wi tanpresi na a presi pe a kongres e hori? Den sa si dati leki papa nanga mama, ala ten wi e hori ai heri boen na tapoe den pikin foe wi? Meki wi sorgoe taki wi abi a moro boen krakti na tapoe ala sma di e si wi.
18 Tapoe den kostoe foe a kongres: Na ini a grontapoe foe tide, joe sa moesoe pai foeroe moni gi wan karta foe kisi wan sidonpresi te joe e go loekoe sport noso wan tra sani na ini wan stadion noso na ini wan kongreshal. Na a wan sei, disi de so foe di na ini wan foto, den kostoe foe joeroe wan presi de hei. Ala ten a Genootschap ben abi wan „fri sidonpresi, joe no abi foe pai” fasi foe si sani na a kongres. Fa dan, wi sa pai a joeroe nanga den kostoe foe a kongres? Nanga den bijdrage di den wan di sa de tapoe a kongres, sa gi bogobogo. Wi de seiker taki joe sa sori wan jeje foe lobi foe gi sani, neleki a jeje di den foetoeboi foe Gado foe owroeten ben sori, foe di den ben waka na baka Jehovah Gado nanga Jesus Krestes (2 Kor. 8:7). Wi e loekoe boen taki ala den bijdrage kibri boen, taki den e skrifi den, èn taki den e gebroiki den gi san de fanowdoe troetroe. Iniwan bijdrage di ben doe nanga wan tjèk moesoe skrifi „Watchtower” na tapoe.
19 Sidonpresi: Wi sa gebroiki den srefi rai di gi wan toe jari pasa kaba, èn den de: SIDONPRESI MAG HORI GI MEMRE FOE JOE EIGI OSOFAMIRI WAWAN, ÈN GI INIWAN SMA DI E RÈIS NANGA JOE NA INI JOE OTO. A gi wi deki-ati di wi si fa sma go na fesi na ini na afersi disi, èn disi meki a firi foe lobi di wi e sori na den kongres, kon moro bigi. Na moro foeroe presi, a de moro makriki foe kisi son sidonpresi leki trawan. Grantangi, sori taki joe e hori trawan na prakseri, èn libi den stoeroe di de moro makriki foe sidon na tapoe, gi den wan di abi den troetroe fanowdoe. Memre taki „lobi no e soekoe en eigi belang”. — 1 Kor. 13:4, 5; Phil. 2:4.
20 Fowtow kamera, film nanga cassette banti: Na tapoe den kongres, wi mag gebroiki kamera nanga apparaat foe teki sani na tapoe banti. Ma a gebroiki di wi e gebroiki den, no mag poeroe a prakseri foe trawan di de drape toe. Te wi e waka lontoe e meki fowtow ala di a programa e hori, dan dati ben sa meki trawan di e proeberi foe arki a programa, lasi prakseri. No wan enkri opname apparaat moesoe poti na den elektris sistema noso den geluid sistema na ini a hal, èn den opname apparaat disi no moesoe de tapoe den gang pe den e hendri sma foe waka, noso taki den e tapoe sma foe si boen.
21 E.H.B.O: Na afdeling foe E.H.B.O. de nomo gi geval di de troetroe serjoesoe. Grantangi tjari joe eigi aspirine, dresi gi te joe abi problema nanga a bere, verband, pina, nanga tra srefi sortoe sani, foe di joe no sa man kisi den sani disi na a kongres. Iniwan sma di kan kisi aanval foe siki ede, aanval foe soekroesiki ede, noso problema nanga na ati èn so moro fara, moesoe tjari den dresi di den sa abi fanowdoe kon nanga den. Wan memre foe na osofamiri foe den noso foe a gemeente di sabi a situwâsi foe den, moesoe de nanga den foe gi den jepi, efoe wan sani ben sa pasa. Na den kongres den ben libi sma nanga siki di e go nanga langa, den wawan, èn problema ben kon te den ben kon siki. Efoe son sma di abi spesroetoe sorgoe fanowdoe na gosontoe sei no abi osofamiri memre foe jepi den, dan den owroeman foe den gemeente moesoe kon sabi dati, èn den moesoe sreka sani di de fanowdoe foe kan jepi den sma dati. A no kan foe sreka sani na den kongres foe abi spesroetoe kamra gi sma di abi allergie siki.
22 Njanjan na a kongres: Ibri sma di de drape moesoe tjari en eigi njanjan kon, na presi taki a e libi a kongres presi ini a sjatoe brekten pauze foe go bai wan sani na dorosei. Wan eenvoudig sani foe njan di de gosontoe èn di de makriki foe tjari kande sa de nofo. Na inlegvel foe Wi Kownoekondre Dienst foe juli 1995, paragraaf 25 e gi wi wan toe idea san wi ben kan tjari nanga wi. Joe no moesoe tjari grasi batra èn dringi di abi sopi na ini, kon na a kongres. IJsboksoe noso tas moesoe de pikin nofo foe man fiti na ondro joe stoeroe. Wi si wan toe sma e njan èn e dringi ala di a programa e hori. Disi e sori taki wi no e lespeki na okasi.
23 Wi breiti troetroe taki a „Gado pasi foe libi”-kongres sa bigin heri esi! Joe seti ala sani kaba foe de drape? Meki a de so taki joe abi wan boen waka èn taki joe e drai go baka na oso ala di joe e firi kowroe-ati èn abi a fasti bosroiti foe go doro na ini a wroko foe Jehovah di warti srefisrefi èn foe tan waka na baka Gado fasi foe libi.
[Faki na tapoe bladzijde 5]
Sani foe memre gi a kongres
▪ Dopoe: Den sma di o teki dopoe moesoe sidon na tapoe den sidonpresi na ini a faki di seti gi dati, bifo a programa e bigin tapoe satra mamanten. Ibri sma di abi na prakseri foe teki dopoe moesoe tjari bescheiden swenkrosi nanga wan wasidoekoe. Na ini a ten di pasa, son sma ben weri krosi di no ben fiti èn di ben meki a wartifasi foe na okasi disi lasi gowe. Owroeman di e loekoe den aksi baka foe a Georganiseerd-boekoe (Orga foe doe wi diniwroko-boekoe) nanga den sma di wani teki dopoe, ben sa wani sorgoe taki ibriwan foe den e froestan den penti disi heri boen. A dopoe leki wan simbôl foe a gi di wan sma gi ensrefi abra na Jehovah, na wan persoonlijk afersi na mindri a sma srefi èn Jehovah. So boen, a no e fiti te dopoe kandidaat e brasa makandra noso e hori makandra anoe, ala di den e teki dopoe.
▪ Lapelkarta: Grantangi, ala ten weri a lapelkarta foe 1998 na a presi pe a kongres o hori èn so srefi toe te joe e rèis go-kon na a kongres. Foeroetron disi e gi wi na okasi foe gi boen kotoigi. Lapelkarta nanga a houder foe en, moesoe teki na ini joe gemeente, foe di den no sa de foe kisi na a kongres. No wakti te leki wan toe dei bifo a kongres foe go soekoe karta gi joe nanga joe osofamiri. No frigiti foe tjari joe njoen medische richtlijn/ontheffingskaart di seti na fesi (Broedoekarta).
▪ Huisvesting: Gemeente sekretarsi moesoe sorgoe taki den Spesroetoe aanvraag gi huisvesting-formulier e seni go na den joisti kongres adres wantenwanten. Efoe joe no man go na a tanpresi di ben seti gi joe nanga jepi foe a spesroetoe fanowdoe seti, dan joe moesoe taigi na afdeling Huisvesting foe a kongres wantewante, so taki wan tra sma kan kisi a kamra.
▪ Beibiwagi nanga terras stoeroe: Na moro foeroe presi pe den e hori wan poebliki konmakandra, joe no mag gebroiki beibiwagi. Akroederi brandweer wet, sma no mag poti den beibiwagi disi na ini den gang noso na mindri den rij foe stoeroe foe di den de wan kefar gi a beibi èn gi sma di kan stotoe den foetoe na den. So boen, grantangi, no tjari beibiwagi kon na a presi pe a kongres e hori. Ma joe kan tjari den pikin-nengre stoeroe kon, foe di joe kan poti den krosibei foe a papa nanga a mama. Grantangi, so srefi no tjari terras stoeroe kon. Joe no mag gebroiki den na ini bigi poebliki presi. Wi e warderi en te joe e wroko makandra nanga wi na ini a prenspari afersi disi.
▪ Friwani wroko: Joe kan poti pikinso ten na wan sei foe jepi na wan foe den kongres afdeling? A dini di joe e dini joe brada, awinsi a de soso gi wan toe joeroe nomo, kan jepi foeroe èn e gi foeroe satisfaksi. Efoe joe kan jepi, grantangi go na a afdeling foe friwani wrokoman te joe doro na a kongres. Pikin-nengre di de moro jongoe leki 16 jari kan jepi na wan boen fasi toe, foe di den e wroko makandra nanga den papa noso mama noso ondro wan tra frantiwortoe bigisma.
▪ Wan toe wortoe foe warskow: Sorgoe taki joe e sroto joe wagi ala ten èn no libi no wan sani di sma ai kan si na ini joe wagi di kan kori wan sma foe broko go na ini. Foefoeroeman nanga langa-fingaman e loeroe den bigi konmakandra disi. A no ben sa de wan koni sani foe libi warti sani tapoe joe sidonpresi. Joe no kan de seiker taki ala sma di de lontoe joe na kresten. Foe san ede joe ben sa tesi den? So srefi wi kisi bericht taki son sma di no de kotoigi ben proeberi foe tjari pikin-nengre gowe. ALA TEN JOE MOESOE SABI PE JOE PIKIN DE.