„Boskopoeman foe a vrede foe Gado”-distriktkongres foe 1996
1 A programa foe a distriktkongres a jari disi, seiker sa jepi wi foe tan hori wi vrede foe Gado, èn a programa sa tjari kon na krin sortoe ròl wi abi foe jepi trawan feni so wan sortoe vrede. Soleki fa ben meki bekènti na ini Wi Kownoekondre Dienst foe januari 1996, dan a thema na „Boskopoeman foe a vrede foe Gado”. Joe meki joe plan kaba foe no misi no wan pisi foe a programa?
2 Wan dri-dei-programa: Wi sabi taki joe sa prisiri troetroe foe a kongres a jari disi toe èn joe sa drai go baka na oso nanga krakti di kon njoen baka (2 Kron. 7:10). A jari disi wi sa abi wan dri-dei-programa baka. Joe seti joe afersi kaba foe kisi fri foe joe wroko so taki joe kan fisiti a heri programa?
3 Ala den dri dei a programa sa bigin 9:30 na mamanten èn a sa kaba tapoe sonde so wan 4:00 bakadina. Den doro sa opo 8:00 na mamanten. Den wan-enkri sma di mag kon inisei bifo a ten dati, na den sma di abi wroko toewijzing, èn den sma disi no sa mag hori sidonpresi gi trawan, te leki den doro opo gi ala sma. Wi sa sori switifasi gi den brada foe wi di de moro owroe èn di siki, foe di wi e libi den sindonpresi di moro switi gi den? Memre taki „lobi . . . no e soekoe en eigi afersi.” — 1 Kor. 13:4, 5; Fil. 2:4.
4 Joe sa kon srapoe? Baka di a Wachttoren foe 15 augustus 1993 ben kari Odo 27:17: „Nanga isri, isri srefi e kon srapoe”, dan a srefi Wachttoren ben taki: „Wi de leki wrokosani di moesoe kon srapoe dorodoro. Foe di a sori di wi e sori lobi gi Jehovah èn a teki di wi e teki bosroiti di abi en gron tapoe wi bribi, wani taki dati wi de difrenti foe grontapoe, dati meki dorodoro wi moesoe waka wan tra pasi leki san moro foeroe sma e waka.” Fa wi kan gebroiki a rai dati na ini wi libi?
5 Wi de èn wi moesoe tan difrenti foe grontapoe. Wi moesoe tan meki moeiti dorodoro foe doe disi, efoe wi wani tan abi wan faja gi boen wroko (Titus 2:14). Foe dati ede a Wachttoren artikel di wi kari na tapoesei ben go doro foe taki: „Te wi de nanga tra sma di lobi Jehovah, wi e srapoe makandra — wi e gi makandra deki-ati foe sori lobi èn doe boen wroko.” A distriktkongres na wan foe den sani di Jehovah seti foe wi tan srapoe na jejefasi. Wi no kan meki a fowtoe foe misi wan pisi foe a programa.
6 Wan koni sma sa arki: Arki, na wan sani di wan sma moesoe kweki. Trawan taki dati wan sma e memre soso afoe foe ala sani di a jere — a no abi trobi omeni a e denki taki a e arki. Foe di wi e libi na ini wan jarihondro pe foeroe sani de di kan meki wi lasi prakseri, meki son ten wi kan abi en tranga foe poti prakseri gi wan langa ten tapoe sani di e taki. A de so, taki wi kan meki a ten di wi e poti prakseri troetroe, kon moro langa, spesroetoe te wi e sidon arki nanga foeroe arkiman, te wan sma e taki? Efoe wan sma ben aksi joe foe taki sjatoe foe a programa foe ibri dei baka di joe doro oso foe a kongres, dan joe ben sa man doe dati? Fa wi alamala kan meki a man di wi man arki, kon moro boen? Èn fa wi alamala kan poti moro boen prakseri na tapoe ibri pisi foe a kongres programa?
7 A de prenspari foe abi wan fajafaja belangstelling, foe di a moi presenti foe memre sani, di Gado gi, no kan wroko sondro a belangstelling disi. Foe eksempre, o moro wan sma abi belangstelling gi wan tori, o moro makriki a de gi en foe memre den moro prenspari penti foe wan lezing noso wan pisi foe a programa. Tokoe, foeroe e anga foe a poti di wi e poti moro prakseri leki fa wi gwenti, na tapoe den sani di wi abi a grani foe jere tapoe den distriktkongres. Na abi di wi abi wan fajafaja belangstelling gi ibri pisi foe a kongresprograma abi krakti na tapoe wi jejefasi nownowde èn so srefi na tapoe den sani di wi kan froewakti na ini a ten di e kon. Na den kongres wi e kisi leri foe den pasi foe Jehovah èn wi e kisi bodoi foe doe a wroko di e kibri libi foe sma (1 Tim. 4:16). Prakseri taki joe ben de wan boto di de na ini wan tranga winti na tapoe se. Den pramisi foe Jehovah na a steifi ankra foe bribi. Efoe wan sma no e poti prakseri na tapoe den programa foe a kongres èn e meki den prakseri foe en drifi gowe, dan a kan misi prenspari penti foe rai nanga bodoi di ben kan jepi en foe no gowe go naki nanga en boto na jejefasi. — Hebr. 2:1; 6:19.
8 Na foeroe presi na grontapoe, wi brada e doe foeroe moeiti foe kon na den konmakandra. A de toemoesi moi foe si fa den e poti prakseri srefisrefi na tapoe den kongres. Tokoe, na son presi son sma meki trawan lasi den prakseri foe di den e wakawaka lontoe na a presi foe a kongres, ala di a programa ben e hori. Trawan e kon lati. Na son kongres di pasa, a ben moeilek foe jere den fosi miniti foe a programa, foe di someni sma ben wakawaka na tapoe den gang èn baka den sidonpresi. Foeroe tron den sma disi a no brada di e doe a toewijzing foe den, noso mama di e loekoe den pikin-nengre foe den. Foeroe foe a froeferi sani disi, e kon foe sma di e fisiti nomo. A jari disi na afdeling di e loekoe soema e kon, sa poti moro prakseri na tapoe a problema disi, èn wi howpoe taki ala sma sa sidon kaba te a fesiman e gi wi a kari foe doe so. Trawan sa warderi en foeroe efoe joe e wroko makandra nanga a seti disi.
9 Sortoe praktis rai kan jepi wi foe poti moro prakseri na tapoe a kongres programa èn foe tan memre moro san taki na a kongres? San taki na ini den jari di pasa, fiti foe taki baka: (a) Poti prakseri na tapoe a moro prenspari reide foe san ede joe e go na a kongres. A no de foe teki ontspanning, ma foe arki èn foe leri (Deut. 31:12). Proeberi foe sribi nofo ibri neti. Efoe joe e kon na a kongres èn joe weri srefisrefi, dan a sa tranga foe joe foe poti prakseri na tapoe a programa. (b) Gi joesrefi nofo ten foe poti joe wagi na a presi pe wagi moesoe poti, èn foe feni wan sidonpresi fosi a programa bigin. Efoe joe e lon go na joe sidonpresi sjatoe bifo a programa bigin, dan foeroe tron disi e meki joe misi wan toe sani foe a bigin foe a programa. (c) Meki sjatoe notisi foe den moro prenspari penti. Efoe joe e meki toemoesi foeroe notisi, dan dati kan tapoe joe foe arki boen. Te joe e skrifi, dan sorgoe taki joe no e misi tra penti foe di joe e poti prakseri nomo na tapoe san joe e skrifi. (d) Te wan tra pisi foe a kongresprograma o bigin, dan fajafaja joe moesoe wani foe abi wan prati na en. Aksi joesrefi: ’San mi kan leri foe a pisi disi di sa meki taki a warderi nanga lobi foe mi gi Jehovah kon moro bigi? Fa a bodoi kan jepi foe sori a njoen sma di mi moesoe de, moro boen? Fa disi sa jepi mi foe doe mi diniwroko moro boen?’
10 A fasi foe tjari wisrefi di e meki wi diniwroko kon tron wan moi sani: Paulus ben gi Titus deki-ati foe sori ensrefi „wan eksempre foe boen wroko”. Foe di a ben o sori taki a ben de sondro flaka, meki Titus ben sa jepi trawan foe „meki a leri foe wi Froeloesoeman, Gado, kon moi na ini ala sani” (Titus 2:7, 10). Ibri jari, den brada e memre wi na wan switifasi o prenspari a de foe tjari wisrefi na wan gadofasi te wi e rèis go na a kongres èn te wi e komoto foe drape, so srefi te wi de na den hotel nanga den restaurant èn na a kongres srefi. A jari di pasa wi jere wan toe sani di e waran na ati agen, èn di wi ben sa wani froeteri oenoe toe.
11 Wan man di e drai wan hotel ben taki: „Alaten a de wan prisiri sani foe gi den Kotoigi tanpresi, foe di den abi pasensi, e jepi foe wroko makandra nanga oenoe, èn den e hori den pikin foe den boen na ai.” Wán receptieman na wan hotel ben taki dati a e meki en wroko „moro makriki te den Kotoigi e kon ini a hotel èn e gowe foe a hotel, bika ala di den abi foe wakti ini wan langa rij, alaten den abi boen maniri, den abi pasensi, èn den e froestan tra sma”. A fasi fa den jongoewan foe Kotoigi ben tjari densrefi, ben naki na ati foe wan oemasma na New England di ben de ini a srefi hotel leki den Kotoigi, taki na oema ben aksi wan toe boekoe di e froeteri foe wi organisâsi.
12 Na a tra sei, sani kan go moro boen na tapoe wan toe tra kontren. Wi moesoe leri wi pikin foe froestan taki a fasi fa wan kresten e tjari ensrefi, no abi ten. A no e kaba te wi e komoto na a kongres djari. A moesoe tan 24 joeroe wan dei. A fasi fa wi e tjari wisrefi na a presi pe wi e tan, na oso, èn tapoe strati, moesoe de a srefi krin fasi neleki fa wi e tjari wisrefi te wi e sidon nanga wi brada nanga sisa na a programa, èn e kisi leri foe Jehovah. — Jes. 54:13; 1 Petr. 2:12.
13 Ala di a kongres no e seti sani moro gi njanjan, tokoe wan lo tra kostoe de ete foe di wi moesoe pai foe joeroe a presi, foe faja nanga watra èn sorgoe gi wan lo tra sani. Den friwani bijdrage foe wi e pai den kostoe disi. Wan sisa nanga tini pikin ben kon na a kongres nanga pikinso moni. Ma tokoe, en nanga den pikin ben jepi nanga wan pikin bijdrage. San ibriwan sma bosroiti foe doe ini a tori disi, na wan sani di ensrefi moesoe sabi, ma wi sabi taki joe e warderi en, taki wi e memre oenoe na den sani disi. — Tori. 20:35; 2 Kor. 9:7.
14 Sma e kon sabi wi na a fasi fa wi e weri krosi: A fasi fa wi e weri krosi, e sori foeroe fa wi de èn fa wi e firi gi trawan. Moro foeroe tini nanga foeroe bigisma e libi lontoe sma di e weri krosi di kon tron wan modo foe wan pisi ten, di boen foeroe sma e waka na baka, noso krosi di e sori taki den no e broko den ede nanga trawan, èn den sma disi e weri den sortoe krosi disi na skoro noso na a presi pe den e wroko. Ibri jari a fasi fa sma e weri krosi e kon moro kefalek. Efoe wi no e loekoe boen, dan mati foe grontapoe ben kan abi krakti na tapoe wi foe wi go weri neleki fa den e weri. Foeroe foe den fasi disi fa sma e weri krosi, no fiti foe weri na den konmakandra foe anbegi. Baka wán foe den kongres, a jari di pasa, dan wi ben kisi wan brifi di ben sori a warderi foe a programa, ma a brifi disi ben taki moro fara: „Mi ben aksi misrefi, foe san ede someni jongoe oemasma ben de di ben weri so kefalek sjatoe japon, tapoesei foe den krosi de so lagi na a neki, èn langa koti na ini den japon noso koto.” Seiker wi alamala wani foe weri krosi di fiti gi wi kresten diniwroko, na tapoe a kongres èn te wi abi demakandra baka a programa. Alaten a boen gi wi foe loekoe a rai foe na apostel Paulus di e sori taki kresten moi densrefi nanga „krin krosi, nanga bescheidenfasi èn gosontoe foe froestan”. — 1 Tim. 2:9.
15 Soema moesoe taki san na bescheiden, „krin” krosi? Foe de bescheiden wani taki foe „no de asranti èn so srefi na a tra sei foe de toemoesi seiker foe joesrefi”. A wortoeboekoe e taki dati bescheiden wani taki „eenvoudig” toe. No a Genootschap èn so srefi no den owroeman wani poti tirilin foe a fasi fa wan sma moesoe weri krosi. Boiti dati, a no moesoe de krin gi wan kresten sortoe fasi foe weri krosi no de bescheiden èn no fiti? (Teki gersi Filipisma 1:10.) Den krosi foe wi no moesoe hari prakseri di no fiti. Wi moesoe plisi trawan nanga wi krosi, a no moesoe de a fasi fa grontapoe e weri krosi noso foe sori taki joe wani feti. Leki dinari foe a boen njoensoe, a fasi fa wi e weri krosi èn fa wi e tjari wisrefi na wan fasi di fiti, e gi grani na Jehovah èn a e gi na organisâsi foe en wan boen nen. Foe dati ede, papa nanga mama sa gi na eksempre èn sorgoe taki den pikin foe den weri krosi di fiti gi na okasi. Owroeman sa wani gi wan boen eksempre èn wani de klariklari foe gi switi rai efoe a de fanowdoe.
16 Fowtow Kamera nanga film èn aparaat foe teki sani na tapoe banti: Wi mag gebroiki camera nanga tra aparaat foe teki sani na tapoe banti, efoe wi e sorgoe taki wi e hori den trawan na prakseri di de drape toe. Efoe wi e waka lontoe e meki fowtow ala di a programa e hori, dan no wawan wi kan meki trawan di e proeberi foe arki a programa lasi prakseri, ma wisrefi sa misi wan pisi foe a programa srefi. Foeroe tron wi e njan moro boen foe a kongres efoe wi e arki a takiman heri boen èn e skrifi wan toe sjatoe sani. A kan taki wi e meki opname gi wan brada noso sisa di moesoe tan na oso, ma efoe wi e doe dati gi wisrefi, dan wi kan si taki baka di wi doro oso, dan baka someni joeroe di wi teki sani na tapoe banti, ten no de foe loekoe ala den sani disi baka di wi teki na tapoe banti. No wan enkri opname apparaat moesoe poti na a elektris sistema noso geluid sistema na ini a hal, so srefi wi no moesoe poti sani na ini den gang noso na presi pe foeroe sma e waka.
17 Sidonpresi: Wi e si taki sani e go na fesi nomonomo ini a tori foe kibri sidonpresi gi trawan. A jari di pasa, foeroe foe oenoe ben waka baka a rai: SIDONPRESI MAG HORI GI MEMRE FOE JOE EIGI OSOFAMIRI WAWAN, NANGA DEN WAN DI E RÈIS NANGA JOE NA INI JOE OTO. Kande joe ben feni taki sani no ben de so hebi moro, foe di foeroe sma ben waka baka den krin rai disi. Moro prenspari srefi, a gi di joe ben wani gi jesi sondro foe kroetoe, na wan sani di ben plisi Jehovah nanga a ’getrow srafoe’, di e gi a jeje njanjan. — Mat. 24:45.
18 Moro nanga moro brada foe wi, abi spesroetoe sorgoe fanowdoe gi a gosontoe foe den. Sonwan e kon na a kongres ini ati-oso stoeroe èn den moesoe kisi jepi foe den memre foe den osofamiri. Trawan e gebroiki difrenti sortoe dresi foe di den abi siki di e go nanga langa, soleki problema nanga den ati noso tra siki pe den kan kisi problema ini wanten. Troetroe a e waran na ati foe wi foe si taki den lobi brada nanga sisa disi de na a kongres, nanga a fasti bosroiti foe no misi no wan pisi foe a jeje njanjan. Ma, son ten, wi kisi problema foe di wan toe sma ben kon siki ala di a kongres e hori, èn no wan famiri foe a sma noso memre foe a gemeente ben drape foe jepi. Na ini wan toe kefal na administrâsi foe a kongres ben moesoe kari E.H.B.O. foe tjari wan brada noso sisa go na ati-oso. A frantiwortoe foe sorgoe gi den sma di abi wan siki di e go nanga langa, de na a fosi presi na den osofamiri memre nanga tra krosibei famiri. Na E.H.B.O foe a kongres no de foe sorgoe gi den wan di abi wan siki di e go nanga langa. Efoe wan memre foe joe osofamiri abi spesroetoe sorgoe fanowdoe, dan de seiker taki wan sma de drape foe jepi en efoe dati moesoe pasa wantewante. Moro fara, na den kongres den brada no sa seti spesroetoe kamra gi sma di skin no man froedrage sani, san e meki taki den no kan sidon na den normaal sidonpresi foe a kongres. Owroeman sa wani de na ai foe loekoe ibri sma ini a gemeente foe den di abi spesroetoe jepi fanowdoe èn den wani sorgoe taki sani seti foe jepi den sma disi, langa bifo a kongres bigin.
19 Sorgoe gi njanjan na a kongres: Foeroe positief komentaar ben gi foe a tjari di wi ben tjari wi eigi njanjan. Wan brada ben skrifi: „Mi kan si krinkrin wan bigi winimarki na jejefasi foe a sani disi. Ala ten nanga krakti kan go now na jeje afersi. Mi no jere no wan sma taki wan negatief sani foe a seti disi.” Wan sisa ben skrifi: „Nanga jepi foe oen eksempre, oenoe lobi brada gi wi leki kresten, deki-ati foe ondrosoekoe wisrefi èn foe meki wi libi moro eenvoudig èn foe meki wi doe moro foeroe na theokrasia sei.” Wan opziener di e rèis ben skrifi foe a fosi seti ini a tori foe gi njanjan na a kongres: „Na owroe seti ben meki taki wan lo brada misi a heri programa foe a kongres.” Ini a tori foe a tjari di den brada ben tjari den eigi njanjan, wan owroeman ben skrifi: „Den ben abi joisti san den ben abi fanowdoe, èn den no ben abi foe wakti na ini rij foe kisi en.” Leki lasti, wan tra sisa ben skrifi: „Baka a programa den sma ben de na wan vredefasi èn babari no ben de èn foeroe sma ben breiti.” Ija, ibri sma ben kan tjari nofo foe jepi ensrefi pasa a bakadina programa. Foeroe sma ben taki prèise wortoe foe di den ben abi moro ten foe fisiti den mati foe den.
20 Agen njanjan no sa de foe kisi na a kongres foe a jari disi. Kande joe kan teki wan toe miniti foe loekoe sjatoe baka san na inlegvel foe Wi Kownoekondre Dienst foe juli 1995, paragraaf 25, ben gi leki rai foe boen njanjan sani di kan teki kon na a kongres. Grantangi, memre taki joe no moesoe tjari grasi batra nanga dringi di abi sopi na ini, na a kongres. Efoe joe moesoe tjari pikin ijsboksoe, dan den moesoe fiti ondro joe stoeroe. Hori na prakseri taki joe abi nofo ten ini a pauze foe njan nanga dringi san joe tjari. Neleki fa a de na wi Kownoekondre zaal te wi abi konmakandra, dan noiti wi no sa njan te a programa foe a kongres e hori. Na so wan fasi wi e sori lespeki gi den sani di seti foe anbegi èn gi a jeje njanjan di wi kisi.
21 Heri esi a fosi „Boskopoeman foe a vrede foe Gado”-distriktkongres sa bigin. Joe sreka joesrefi kaba foe kon, èn joe de klariklari foe njan boen foe dri dei foe kolokoe demakandra èn boen sani na jeje sei? Wi e begi oprègti taki Jehovah sa blesi den moeiti di joe e meki foe kon na a kongres disi.
[Faki na tapoe bladzijde 6]
Sani foe memre foe a distriktkongres
Dopoe: Den sma di o teki dopoe moesoe sidon na tapoe den sidonpresi na ini a faki di seti foe dati, bifo a programa bigin tapoe satra mamanten. A kon na fesi taki son sma e weri krosi di e meki taki a wartifasi foe na okasi disi e lasi gowe. Ala sma di abi na prakseri foe teki dopoe moesoe tjari wan bescheiden swenkrosi nanga wasidoekoe. Gemeente owroeman di e loekoe den aksi baka foe a Georganiseerd-boekoe (Orga-boekoe) nanga den sma di wani teki dopoe, sa wani sorgoe taki ibriwan foe den e froestan den penti disi heri boen. Baka a dopoe lezing èn a begi foe a takiman, dan a fesiman foe a programa sa gi sjatoe bodoi na den dopoe kandidaat èn baka dati a sa meki a singi di sa singi bekènti. Baka a lasti couplet, den dienstverlener sa tjari den sma di o teki dopoe go na a dopoe presi. Foe di a dopoe leki wan simbôl foe a gi di wan sma e gi ensrefi abra na Jehovah, de wan persoonlijk afersi na mindri a sma srefi nanga Jehovah, dan sani no seti gi wan so kari patna dopoe, pe toe noso moro dopoe kandidaat e brasa makandra noso den e hori makandra anoe, ala di den e teki dopoe.
Lapelkarta: Grantangi weri a lapelkarta foe 1996 na a kongres èn so srefi toe te joe e rèis go na, noso komoto foe a kongres. Foeroe tron disi e gi wi na okasi foe gi boen kotoigi te wi e rèis. Lapelkarta nanga a dosoe foe en, moesoe teki na ini oen gemeente, foe di den no sa de foe kisi na a kongres. No wakti teleki wan toe dei bifo a kongres foe go soekoe karta gi joe nanga joe osofamiri. No frigiti foe tjari joe njoen Broedoe-karta.
Beibi wagi nanga terras stoeroe: Na moro foeroe presi joe no man gebroiki beibiwagi na ini poebliki konmakandra presi. Akroederi brandweer wet, sma no mag foe poti den beibiwagi disi na ini den gang noso na mindri den rij foe stoeroe. Foe di, te ipi-ipi sma lai toemoesi na wan presi, dan disi e meki a presi spanspan nanga sma, èn dati e meki taki den beibiwagi kan de kefalek, no soso gi a beibi, ma so srefi gi den wan di kan stotoe den foetoe na den. So boen grantangi, no tjari den kon na a presi pe a kongres e hori. Ma joe kan tjari den pikin-nengre stoeroe kon, foe di joe kan poti den disi tapoe wan stoeroe, krosibei foe den papa nanga mama. So srefi, grantangi no tjari terras stoeroe kon. Den kan de kefalek èn no mag foe de na ini bigi poebliki presi. Wi sa warderi a wrokomakandra foe joe ini den tori disi.
Friwani wroko: Foe di a kongres no e sorgoe gi njan nanga dringi moro, dan foeroe sma di ben wroko na a afdeling dati e si taki den kan doe friwani wroko na tra afdeling. Joe kan poti pikinso ten na wan sei foe jepi na wan foe den kongres afdeling? A dini di wi e dini wi brada awinsi a de soso gi wan toe joeroe nomo, kan jepi foeroe èn e gi foeroe satisfaksi. Efoe joe kan jepi, grantangi go na a afdeling foe friwani wrokoman te joe doro na a kongres. Pikin-nengre di de moro jongoe leki 16 jari kan jepi boen toe, ma den moesoe wroko makandra nanga den papa nanga mama noso ondro wan tra frantiwortoe bigisma.
Wan toe wortoe foe warskow: De na ai foe den problema di kan kon, so taki joe kan kibri joesrefi foe problema di no de fanowdoe. Foeroe tron foefoeroeman nanga sma di no abi boen ati, sa soekoe foe foefoeroe sma di de farawe foe a presi pe den e tan. Sorgoe taki joe sroto joe wagi alaten èn no libi no wan sani di sma ai kan si na ini joe wagi foe kori wan sma foe broko go na ini. Foefoeroeman nanga langa finga man, e loeroe den bigi konmakandra disi. A ben sa de boen foe no libi no wan warti sani sondro foe sma fringi wan ai na tapoe joe sidonpresi na a kongres. Joe no kan de seiker taki ala sma di de lontoe joe na wan kresten. Foe san ede joe sa tesi den? So srefi wi kisi bericht taki dorosei sma ben proeberi foe tjari pikin-nengre gowe. ALATEN JOE MOESOE SABI PE JOE PIKIN DE.