„Prisiri prèiseman”—distriktkongres 1995
1 Omeni reide wi abi foe de nanga prisiri? Kande soso wan toe foe wi proeberi foe kari ala den reide disi. Ala di wi e libi na ini wan grontapoe di broeja èn di no abi seikerfasi, tokoe wi abi so foeroe reide foe de nanga prisiri. Leki fa wi ben meki bekènti na ini Wi Kownoekondre Dienst foe januari 1995, dan a thema foe den distriktkongres foe 1995 di e gi deki-ati, na „Prisiri prèiseman”.
2 Wi e prèise Jehovah foe di a ben leri wi waarheid (Jes. 54:13; Joh. 8:32). Foe wi sei, wi e prati waarheid na wan prisirifasi nanga ala den sma di e soekoe seikerfasi nanga kolokoe (Esek. 9:4; Tori. 20:35). So srefi a kresten bradafasi foe wi e gi wi prisiri toe. Wan famiri na jejefasi di abi lobi, e tjari tevredefasi nanga kolokoe kon. Disi na soso wan toe foe den reide foe a prisiri di wi abi, di e boeweigi wi foe prèise Jehovah. Den kongres lezing nanga demonstrâsi sa poti wi prakseri na tapoe moro bijbel tekst di e sori wi den reide foe a prisiri di wi abi na ini den moeilek lasti dei disi.
3 Wan dri-dei kongres: Joe ben sreka sani nanga joe basi foe kan kisi fri foe man fisiti ala den dri dei foe a kongres? Papa nanga mama foe skoro pikin di sa de na wan foe den kongres, ala di den skoro no kisi fakansi ete, moesoe taigi den skoromisi noso skoromeester na wan lespekifasi taki den pikin no sa de na skoro tapoe freida foe a prenspari pisi disi ede foe na anbegi foe den. Den kongres sa hori na ini Bakratongo, Ingrisitongo nanga Sranantongo.
4 A programa sa bigin tapoe freida 9:40 mamanten èn a sa kaba tapoe sonde wan sani foe 3:50 bakadina. Tapoe satra nanga sonde, a programa sa bigin 9:30 mamanten. A ben sa boen foe sreka sani na fesi foe de drape biten foe no lasi no wan pisi foe a programa èn foe njan boen foe a demakandra nanga wi brada nanga sisa.
5 Joe sa de drape?: Wi e kisi a tranga foe fisiti ala den dri dei foe a kongres. Foe san ede? Bikasi Jehovah wani, taki wi de drape. Na ini a ten disi wi bribi nanga wi gosontoe na jejefasi de ondro toemoesi hebi druk. Paulus ben gi rai foe „no libi den konmakandra foe wi nanga makandra” na ini wan ten di den kresten na Judea ben ondrofeni hebi druk (Hebr. 3:12, 13; 10:25). Den Filipisma ben e libi na ini wan „kroektoe èn kron geslakti”. Ma tokoe, den ben e „skèin leki sma di e gi leti na ini grontapoe” (Fil. 2:15). Foe san ede meki den kresten disi foe a fosi jarihondro ben difrenti? Bikasi den ben gi jesi èn den ben waka soleki fa a santa jeje ben tiri den foe kon makandra foe „gi makandra deki-ati foe sori lobi èn foe doe toemoesi boen wroko”.—Hebr. 10:24.
6 Noso grontapoe ben sa abi krakti na wi tapoe èn a ben sa swaki na angri foe wi foe kon makandra nanga wi brada foe prèise Jehovah. Na a kongres disi wi e kisi a kari foe saka wisrefi na ondro a jeje foe Jehovah èn foe njan boen foe ala den dri dei foe a kongres. Wi abi a fasti bosroiti foe de nanga wi heri osofamiri tapoe a kongres? A de fanowdoe foe tranga wi bribi nanga wi lobi doronomo. Ala jari Jehovah sreka kongres gi wi foe jepi wi na ini a tori disi.
7 Tjari goedoe go na oso: Fa joe kan kisi a moro boen winimarki foe a kongres? Foe taki en sjatoe, dan a piki de „foe poti prakseri”. Disi no makriki na ini a libimakandra foe disi ten pe sma e doe sani gawgaw sondro foe abi ten, noso hasti-hasti. Jongoesma di lai krakti, kan feni en wan moeilek sani foe poti prakseri doronomo, ma a de wan tjalensi gi wi alamala foe poti prakseri te wi e fisiti wan distriktkongres. Wi sa si taki wi sa man poti prakseri moro boen, te wi sreka sani na fesi. Aksi joesrefi: ’San na a kongres thema?’ Prakseri dipi foe dati! ’Foe san ede mi e go drape èn san mi sa doe na ini den dri dei? Den mofoneti foe mi sa lai nanga ontspanning, noso mi sreka nofo ten foe kan rostoe èn foe loekoe den prenspari penti di den ben tjari kon na fesi baka?’
8 A Wachttoren foe 15 oktober 1984, nanga na artikel „Mediteert u of dagdroomt u alleen maar?” ben gi difrenti rai fa foe kisi a moro boen winimarki foe wan konmakandra èn baka dati den ben bosroiti so: „Kande tranga leri gi a froestan de a moro prenspari sani.” Foeroetron te wan takiman e bigin taki, dan wi e poti prakseri, ma kande bakaten te wi arki wan pisi foe a lezing kaba, dan wi e meki wi prakseri lasi pasi. Fa wi kan meki taki disi no e pasa?
9 Den rai di ben gi na ini a ten di pasa kaba, de warti foe taki baka, foe di den abi boen bakapisi. Efoe a kan, proeberi foe teki nofo ten foe rostoe ibri neti. Disi no makriki alaten, bikasi kande joe moesoe rèis èn efoe joe e tan na ini wan hotel, dan kande joe no sa man rostoe so boen leki te joe de na oso. Foeroetron a sreka di joe sreka sani boen, sa meki joe man kisi a rostoe di joe abi fanowdoe.
10 Wan jepi foe poti prakseri na foe skrifi wan toe prenspari penti. Efoe joe e proeberi foe skrifi toemoesi foeroe sani, dan kande joe ben sa misi wan toe prenspari penti krinkrin. Leki rai, skrifi wan toe prenspari penti nanga a marki foe pristeri wan sjatoe loekoe foe a programa na wan bijbelstudenti noso wan sma di no man komoto na oso, foe di a siki. Ala di joe no abi wan spesroetoe sma na prakseri, tokoe joe sa abi wan reide foe skrifi wan toe prenspari penti èn baka a kongres kande joe feni okasi foe pristeri den ede prakseri di ben tjari kon na fesi foe a programa. Te joe e soekoe okasi foe gi kotoigi na sma na ini na osofamiri di no de na ini bribi, dan foe di joe skrifi wan toe prenspari penti èn foe di joe prati san joe ben jere nanga trawan, dan dati sa meki taki joe no sa frigiti den bodoi gawgaw. Joe no e frigiti sani makriki te joe skrifi den èn taki foe den nanga trawan.
11 Ala di njanjan no sa de foe kisi moro, tokoe foeroe kostoe de ete, foe di wi joeroe a kongreshal, pe foeroetron den kostoe foe a geluidsinstallatie, lectuur, nanga tra sani de na ini toe. Fa wi e pai den kostoe disi? Nanga jepi foe den friwani bijdrage foe wi di joe kan gi cash noso joe kan skrifi wan check tapoe a nen foe a Watch Tower Bible and Tract Society. Disi e kroederi nanga Psalm 96:8 èn 2 Kroniki 31:12.
12 Prisiri prèiseman e gi Jehovah grani, foe di den e tjari densrefi soleki fa Gado wani: A jari di pasa, sma di e wroko na ini motel èn wrokoman foe den kongres presi ben gi komentaar di e gi boen deki-ati foe a fasi fa wi ben tjari wisrefi. Wan basi foe wan hotel ben taki: „Alaten a de wan prisiri foe gi den Kotoigi sribi presi, bikasi den abi pasensi, den de klariklari foe doe san joe taigi den, èn e loekoe den pikin foe den boen.” Wan tra hotel driktoro ben taki dati den Kotoigi ben sori leki den de moro kolokoe èn taki den orga moro boen leki tra groepoe. Ala di a kongres foe wi ben de a moro bigiwan di ben hori na ini a kontren, tokoe a ben taki: „Wi no ben abi so foeroe problema nanga den leki nanga groepoe di ben moro pikin moro den.”
13 Wan tra hotel wrokoman ben froeteri taki wan kongres di ben hori fosi di foe wi, ben abi leki bakapisi taki den ben broko foeroe sani èn so srefi den ben foefoeroe, ala di ala den hotel wrokoman ben de na wroko. Ma foe a kongres foe wi a ben taki moro fara: „Wi no abi foe broko-ede nanga den Kotoigi. . . . Te den de djaso, wi kan abi soso wan noso toe foe den sma djaso, di e ondrow a hotel èn dati de nomo foe loekoe den problema di kande kan pasa nanga den masjin.”
14 Wi winsi taki ala den njoensoe di wi ben kisi, ben de a srefi, ma a de wan sari foe froeteri taki dati no de so. Wan kongres fesiman ben taki: „Baka den konmakandra, foeroe jongoewan e kon makandra na ini bigi groepoe na ini a hotel lobby te lati na neti, ala di den e bari lafoe èn e meki foeroe babari. Disi e hendri den tra fisitiman, . . . di e sori taki den mândi. Wan toe jongoewan e lon na ini den gang, e naki doro tapoe, ala di den e fisiti den sribikamra foe trawan, èn e taki boen tranga na ini den sribikamra.”
15 Wan tra problema di tan ala den jari di pasa, na den bigi groepoe foe brada di de na ini a gang noso dorosei foe a kongreshal na a ten di den konmakandra e hori. Na wan kongres a jari di pasa, den ben feni wan brifi foe wan bijbelstudenti na ini a bijdrage-bus. A ben skrifi taki: „Noiti ete mi ben skreki so èn ben mândi foe a babari, a wakawaka, a takitaki èn a tjari di sma ben tjari densrefi na wan fasi di no fiti srefisrefi na tapoe a gang, ala di den lezing ben hori. . . . Mi no de wan Kotoigi ete, nomo wan sma di e studeri èn e leri foe abi frede nanga lespeki gi Gado.” Foe troe, no wan foe wi ben sa wani foe tra sma denki foe wi taki wi no abi warderi gi den sani di Jehovah sreka gi wi.
16 Alaten wi ben sa moesoe aksi wisrefi: ’Soema mi e teki presi gi, èn foe san ede mi e fisiti a kongres disi?’ Wi jejefasi èn a gi di wi e gi wisrefi na a dini foe Gado e kon na fesi na ini wi fasi foe taki, èn a fasi fa wi e tjari wisrefi, nanga a warderi foe wi gi den sani di seti na jejefasi? (Jak. 3:13; 1 Petr. 2:2, 3, 12) Nofotron wi e si taki den brada di horidoro foeroe jari na ondro a skotoe di den skotoe a kotoigiwroko èn pe den ben tapoe a kotoigiwroko, e poti moro foeroe prakseri èn abi moro foeroe lespeki gi den kongres, foe di den e tan sidon na ini den stoeroe èn e njan toemoesi boen foe den lezing nanga den demonstrâsi.
17 Joe krosi nanga fasi fa joe e sorgoe joesrefi, e froeteri soema na joe: Fosi Samuèl 16:7, e memre wi taki „wan libisma e si san na ai e si, ma Jehovah foe en sei, e loekoe fa na ati de”. So boen, foeroetron libisma lobi foe kroetoe wi tapoe a gron foe san den e si. Sma e loekoe wi krosi finifini nanga a fasi fa wi e sorgoe wisrefi, spesroetoe te wi de na wan kongres pe wi e anbegi èn pe wi e kisi leri foe a kresten fasi foe libi. Efoe joe de wan jongoewan di e go na skoro ete noso efoe joe wroko e meki joe de ini krosibei kontakti nanga sma di e waka baka grontapoe fasi foe weri krosi, dan a kan de wan tjalensi gi joe foe tan hori joesrefi na den kresten markitiki foe weri krosi na wan bescheide fasi.
18 Den markitiki foe weri krosi nanga a fasi fa joe moesoe sorgoe joesrefi e difrenti na heri grontapoe. Sma e froewakti foe kresten taki den e weri bescheide nanga boen krosi. Soema ben sa moesoe teki a bosroiti na ini a tori disi? Papa nanga mama moesoe sorgoe taki den tini foe den no e weri krosi leki grontapoe jongoewan na skoro. Den boen nanga positief rai di wi ben kisi, na foe jepi wi foe teki gosontoe bosroiti na ini a moeilek afersi disi. Wi e gi joe deki-ati foe loekoe na Ontwaakt! foe 8 februari 1987 baka, di abi na artikel „Wat betekenen kleren voor u?” San ben de den sani di den ben si na wan toe foe wi kongres a jari di pasa?
19 Baka wan foe den „Frede gi Gado”-distriktkongres, wi ben kisi a boskopoe disi: „Den brada nanga sisa go moi na fesi na ini a tori foe krosi, a fasi foe sorgoe densrefi, nanga a fasi fa den ben tjari densrefi na a kongres a jari disi. . . . Ma tokoe, wan toe fasi nanga gwenti de ete, di abi foe kon moro betre.” Baka wan tra kongres den ben taki dati krosi di no de bescheide, ben de krinkrin foe si. A raport ben taki dati a krosi foe son wan ben afrontoe trawan. Srefi wan toe sma di no de na ini waarheid ben si den krosi disi di no de bescheide. A krosi foe son wan ben e sori toemoesi foeroe foe den skin èn ben de toemoesi strak.
20 A moro bigi pisi foe den brada nanga sisa e weri krosi di e sori taki den abi lespeki, èn de bescheide te den de na a kongres. Ma tokoe baka dati, na den hotel noso restaurant, wan toe brada nanga sisa, ala di den ben weri den lapel karta ete, ben weri „koti mow bosroko, owroe jeans broekoe, sjatoe pisi short èn krosi di no e fiti srefisrefi gi sma di e kari densrefi a pipel foe Gado”. Efoe den owroeman si taki wan toe sma abi a gwenti foe weri a fasi disi na ini den fri ten, dan a ben sa fiti foe gi rai na wan switi ma krakti fasi bifo a kongres bigin, taki a fasi foe weri krosi dati no e fiti na sma di e kon foe fisiti wan kresten kongres. Grantangi, loekoe nanga den bijbelstudenti foe joe di sa fisiti a kongres den markitiki baka fa foe tjari densrefi èn weri krosi leki fa a ben skrifi na tapoesei.
21 Camera nanga opname apparaat: A fiti foe gi wan toe froemane na wan switifasi na ini a tori foe camera nanga opname apparaat. Efoe joe sa gebroiki camera, cassette recorder noso opname apparaat, grantangi hori den sma na prakseri di de lontoe joe. Tra sma kan lasi den prakseri efoe joe e wakawaka, ala di a programa e hori noso srefi te joe e meki opname foe pe joe sidon. No wan enkri opname apparaat moesoe poti na a elektris sistema noso geluid sistema na ini a hal, so srefi wi no moesoe poti sani na ini den gang noso na presi pe foeroe sma e waka. Efoe joe bosroiti foe meki fowtow noso meki opname foe wan toe pisi foe a programa nanga wan camera recorder noso wan audiocassette recorder, dan dati na wan persoonlijk sani. Fowtow nanga opname di joe meki kan gi joe sani foe memre di prisiri te joe ben sa loekoe noso jere den baka ten. Ala den sortoe aparaat disi wi ben sa moesoe gebroiki na wan fasi di no e poeroe a prakseri foe tra sma noso e hendri joe foe kisi foeroe wini foe a programa. Te joe drai go baka na oso, joe sa abi ten foe arki den opname di joe ben meki baka? Kande joe si taki foe skrifi wan toe prenspari penti sa de nofo.
22 Sidonpresi: Joe ben si wan kenki na a „Frede gi Gado”-distiktkongres 1994 na ini a tori foe hori stoeroe? Ala di wi ben go na fesi pikinso, tokoe a boen foe hori a froemane disi na prakseri: SIDONPRESI MAG HORI GI MEMRE FOE JOE EIGI OSOFAMIRI WAWAN, NANGA DENWAN DI E RÈIS NANGA JOE NA INI JOE OTO. Wi de drape leki fisitiman foe a Genootschap. A joeroe di wi e joeroe a kongres hal, e pasa nanga jepi foe den friwani-bijdrage. A ben sa de wan fasi foe sori lobi èn foe hori trawan na prakseri, efoe wi e hori stoeroe di wi no sabi efoe wi sa gebroiki den?
23 Ibri kongres e sreka sani gi den wan nanga spesroetoe fanowdoe, soleki den owroewan èn den wan di siki. Grantangi no sidon na tapoe wan foe den stoeroe dati efoe joe no abi reti foe sidon na tapoe. So srefi, loekoe foe jepi den sma nanga spesroetoe fanowdoe foe feni wan presi foe sidon efoe no wan sma de nanga den di de frantiwortoe foe sorgoe gi den.
24 Sorgoe gi joe njanjan na a kongres: Soleki fa joe sabi, dan a december 1994 Wi Kownoekondre Dienst ben meki bekènti: „Bigin nanga den distriktkongres foe 1995 èn den kringkonmakandra nanga den spesroetoe deikonmakandra foe september 1995, sani foe njan noso dringi no sa de foe kisi moro. Ibriwan sma moesoe tjari en eigi njanjan nanga dringi.” Baka dati, na inlegvel foe Wi Kownoekondre Dienst foe februari 1995 ben tjari kon na krin foe san ede den ben tjari so wan kenki kon, èn den ben gi boen rai fa ala sma kan sorgoe gi en eigi sani foe njan nanga dringi na a kongres. A ben sa boen gi ala sma foe no loekoe na inlegvel gi densrefi nomo, ma so srefi foe taki foe en nanga den bijbelstudenti te den e sreka foe de na a kongres. A de prenspari taki den bijbelstudenti kon sabi taki ala sma di e kon na a kongres moesoe tjari den eigi njanjan nanga dringi kon.
25 Foe poti krakti nomo tapoe wan toe penti, joe sa wani foe memre den rai disi foe sani di joe kan tjari gi a brekten pauze: lekti, makriki, èn gosontoe sani, drei froktoe, noto, sani di baka, lepi froktoe. Sani foe dringi kan de: kofi, soft, sap, watra na ini batra di no kan broko noso thermos. Efoe joe abi wan pikin ijsboksoe fanowdoe, dan joe kan tjari en efoe a fiti na ondro joe stoeroe. Ma bigi picknick ijsboksoe, sopi noso grasi batra no moesoe tjari kon na a kongres. Wi no moesoe njan no wan sani, te a konmakandra e hori. Disi ben sa sori taki joe no abi lespeki gi a njanjan na jejefasi di den e pristeri.
26 Wan warskow ete na, dati joe no moesoe bori na ini den hotel kamra, boiti efoe den abi wan pikin koekroe foe doe dati. A boen foe prakseri serjoesoe taki dati a reide foe san ede wi abi a brekten pauze, na foe teki wan lekti sani foe njan èn foe njan boen foe a theokrasia demakandra nanga wi brada nanga sisa. Leki a pipel foe Jehovah wi e erken taki njanjan na jejefasi na den kongres de a moro prenspari sani te wi agersi dati nanga materia sani, èn te wi e teki sreka, wi e doe dati akroederi a sabi disi.
27 Tapoe 4 augustus 1995, a fosi wan foe den „Prisiri prèiseman”-distriktkongres sa bigin. Joe sreka den sani foe joe kaba èn joe de klariklari foe njan boen foe den dri dei foe kolokoe matifasi èn boen sani na jejefasi? Na wi opregti begi taki Jehovah sa blesi den moeiti foe joe foe de na a kongres disi nanga joe brada nanga sisa te wi e taki fa foe de „Prisiri prèiseman” foe Jehovah.
[Bladzijde 6]
Sani foe memre foe a distriktkongres
Dopoe: Den dopoe kandidaat moesoe proeberi foe sidon na tapoe den sidonpresi na ini a faki di seti foe dati, bifo a programa bigin tapoe satra mamanten. A ben kon na fesi taki son sma e weri krosi di no e sori lespeki èn di e poeroe a prakseri foe na okasi. Ala sma di abi na prakseri foe teki dopoe moesoe tjari wan bescheide swenkrosi nanga wasidoekoe. Baka a dopoe lezing èn a begi foe a takiman, dan a fesiman foe a konmakandra sa gi sjatoe bodoi na den dopoe kandidaat èn sa meki a singi di wi sa singi bekènti baka dati. Baka a lasti couplet, den dienstverlener sa tjari den dopoe kandidaat go na a dopoe presi. Foe di a dopoe leki wan simbôl foe a gi di wan sma e gi ensrefi abra na Jehovah, de wan persoonlijk afersi na mindri a sma srefi nanga Jehovah, dan sani no seti gi wan so kari patna dopoe, pe toe noso moro dopoe kandidaat e brasa makandra noso den e hori makandra ala di den e teki dopoe.
Lapelkarta: Grantangi weri den lapelkarta foe 1995 na a kongres èn so srefi toe te joe e rèis go na a kongres. Foeroetron disi e gi wi na okasi foe gi boen kotoigi te wi e rèis. Lapelkarta nanga houders moesoe teki na ini oen gemeente foe di den no sa de foe kisi na a kongres. No frigiti foe tjari joe njoen broedoe-karta. Memre foe a Bethelfamiri nanga pionier moesoe abi den Wachttoren Identificatie karta na den.
Beibi wagi nanga terras stoeroe: Na foeroe presi joe no man gebroiki beibiwagi na ini poebliki konmakandra presi. Akroederi brandweer wet, sma no mag foe poti den beibiwagi disi na ini den gang noso na mindri den rij foe stoeroe. Foe di te ipi-ipi sma lai toemoesi na wan presi, a e meki a presi spanspan nanga sma, dan den beibiwagi kan de kefalek no soso gi a beibi, ma so srefi gi den wan di kan stotoe den foetoe na den. So boen grantangi, no tjari den kon na a presi pe a kongres e hori. Ma joe kan tjari den pikin-nengre stoeroe kon, foe di joe kan poti den disi krosibei foe den papa nanga mama. So srefi, grantangi no tjari terras stoeroe kon. Den kan de kefalek èn no mag foe de na ini bigi poebliki presi. Wi sa warderi a wroko makandra foe joe tapoe a kontren disi.
Friwani wroko: Joe kan poti pikinso ten na wan sei foe jepi na wan foe den kongres afdeling? A dini di wi e dini wi brada awinsi a de soso gi wan toe joeroe nomo, kan jepi foeroe èn e gi foeroe satisfaksi. Efoe joe kan jepi, grantangi go na a afdeling foe friwani-wrokoman te joe doro na a kongres. Pikin-nengre di de moro jongoe leki 16 jari kan jepi boen toe, ma den moesoe wroko makandra nanga den papa nanga mama noso ondro wan tra frantiwortoe bigisma.
Wan toe wortoe foe warskow: Te wi de na ai foe den problema di kan kon, dan wi kan kibri wisrefi foe problema di no abi foe pasa. Foeroetron foefoeroeman nanga sma di no abi boen ati, sa soekoe foe foefoeroe sma di de farawe foe den oso presi. Sorgoe taki joe sroto joe wagi alaten èn no libi noti na ini joe wagi foe kori wan sma foe broko go na ini. Foefoeroeman nanga langa finga man, e loeroe den bigi konmakandra disi. A ben sa de boen foe no libi warti sani sondro foe sma loekoe en na tapoe joe sidonpresi na a kongres. Joe no kan de seiker taki ala sma di de lontoe joe na kresten. Foe san ede joe sa tesi den? So srefi wi ben kisi bericht foe sma di ben proeberi foe tjari pikin-nengre gowe. JOE MOESOE SABI PE JOE PIKIN DE ALATEN.
[Faki na tapoe bladzijde 6]
DISTRIKTKONGRES 1995
SRANANTONGO: Augustus 4, 5, 6, Gakaba
BAKRATONGO: Augustus 18, 19, 20, Tweede Rijweg
SRANANTONGO: Augustus 25, 26, 27, Tweede Rijweg
INGRISITONGO: September 1, 2, 3, Tweede Rijweg