„Frede gi Gado”-distriktkongres 1994
1 Den man di abi bribi ben sori „frede gi Gado” sensi a ten foe Abel nanga Noa te go miti a ten disi (Heb. 11:4, 7). Foe kweki frede gi Gado wani taki foe sori „wan dipi respeki moksi nanga frede gi a Mekiman, nanga wan gosontoe frede foe doe wan sani di no e plisi en” (it-1 bladzijde 818). Ini augustus nanga september wi sa sori a dipi respeki disi, foe di wi sa fisiti a „Frede gi Gado”-distriktkongres. Joe sa de drape foe njanboen foe a heri programa, foe a fosi singi te go miti a lasti begi?
2 Ibri jari wi e loekoe nanga faja froewakti go na a distriktkongres. Ala di kande a e aksi foeroe persoonlijk moeiti nanga kostoe foe wi, tokoe den blesi di wi sa kisi sa de foeroe. Wi e go baka na oso nanga prisiri, wi e firi satisfaksi èn wi bow na jejefasi. (Teki gersi 1 Kownoe 8:66.) A demakandra e gi wi deki-ati, èn a kongres e sorgoe gi wan kenki ini den aladei afersi. Ma prakseri, wi e kon makandra foe anbegi Jehovah. A e gi wi a komando foe doe disi. A e leri wi fa foe kisi wini gi wisrefi. — Deut. 31:12, 13; Ps. 122:1.
3 Wan dri-dei kongres: A programa sa pristeri na 4 kongres ini Sranankondre a jari disi. A sa bigin tapoe freida 10:20 mamanten èn a sa kaba tapoe sonde na wan ten foe 4:15 bakadina. Tapoe satra nanga sonde a programa sa bigin 9:30 mamanten.
4 Dipi respeki gi Jehovah e boeweigi wi foe fisiti a kongres: Paulus ben gi den Hebrew kresten a rai foe „doe santa wroko gi Gado nanga frede gi Gado nanga respeki” (Heb. 12:28). A distriktkongres foe wi, a jari disi, ben sreka foe jepi wi foe doe spesroetoe dati. Kande wi e miti wan toe problema di sa tesi a fasti bosroiti di wi abi foe fisiti a kongres. Den kan sori foe de leki bergi, ma nanga a jepi foe Jehovah wi kan wini den (Mat. 17:20). Efoe joe no man seti a heri kongres, freida mamanten te go miti sonde bakadina, ini joe fakansi, joe ben go dan na joe wrokobasi ondro begi foe aksi en foe kisi fri gi a ten dati? (Jak. 1:6-8) Den skoropikin di sa go na wan foe den kongres di e hori moro froekoe ala di skoro de ete, moesoe taigi den skoromeester foe den na wan respeki fasi taki den no sa de na skoro tapoe freida foe a prenspari pisi disi ede foe a fasi foe anbegi foe den.
5 Feni wini foe na investering: Sortoe investering na dati? A ten nanga a moeiti di joe e gi foe fisiti a kongres. A no sa de wan koni sani foe meki boen plan foe fisiti a distriktkongres èn dan gowe froekoe na oso sonde bakadina, èn misi wan bigi pisi foe a programa. Joe ben o gowe libi wan njanfesa afoe-pasi foe go sorgoe gi tra afersi? Wi ben si na wan toe kongres a jari di pasa, taki son sma gowe baka den mamanten programa. Ma, a lepi di wi lepi na jejefasi nanga a frede gi Gado no moesoe gi wi pasi foe misi wan-enkri sani di Jehovah sreka gi wi. — Teki gersi 1 Korentesma 2:9, 10.
6 Kande moro foeroe foe wi no ben sa prakseri foe gowe froekoe foe a kongres. Ma tokoe, ete wi ben sa kan misi wan bigi pisi foe a programa. Fa disi ben sa kan pasa? Foe di wi no e meki plan na fesi foe de seiker taki wi e kisi a moro bigi wini foe den pisi di sa pristeri. Wi wani bigin a dei froekoe nofo foe abi wan boen mamanten njanjan èn foe sorgoe gi tra afersi di de fanowdoe so taki wi kan de tapoe wi sidonpresi bifo a programa e bigin. A de prenspari toe foe sribi boen na neti, so taki wi sa de na ai èn sa man poti wi prakseri na tapoe a programa a heri dei.
7 Wan fasi di ben boeweisi kaba taki a boen foe kisi moro foeroe wini foe a programa, na foe meki sjatoe notisi. Neleki fa a de prenspari gi bigisma foe meki sjatoe notisi, na so a de prenspari toe gi jongoewan. Wan preikiman di abi 16 jari e taki: „Mi e skrifi den tekst di den e kari na a ten foe wan lezing. Dan mi kan loekoe a lezing baka te mi de na oso.” Wan tra jongoewan di abi 16 jari e taki moro fara: „Mi e skrifi den moro prenspari penti esi-esi. A e jepi mi foe hori mi prakseri na tapoe a programa.” Leki fa a gwenti de, dan ala san joe abi troetroe fanowdoe gi a programa, na joe bijbel, wan singiboekoe, wan no toemoesi bigi notisi-boekoe, nanga wan pen noso wan potlood. A no de foe taki dati papa nanga mama di abi pikin-nengre moesoe sorgoe gi den fanowdoe foe den pikin foe den, ma a moro boen foe no meki a sani moeilek gi wisrefi nanga gi trawan foe di wi abi bigi njanjan tas nanga toemoesi foeroe persoonlijk sani.
8 Wan toe brada e teki a programa tapoe cassette nanga jepi foe wan cassette recorder noso wan video camera, foe plèi en baka na oso. A de wan persoonlijk afersi efoe wan sma wani doe disi, ma sonsma abi na ondrofeni taki, te den e go baka na den aladei afersi foe den, dan pikinso ten nomo de foe plèi baka san den ben teki tapoe cassette. Boiti dati, den kan misi wan toe prenspari penti ini wan lezing a joeroe ten te den e kenki a cassette.
9 Wi moesoe doe opregti moeiti foe de tapoe wi sidonpresi bifo a programa e bigin. Ala di kande wi de ini wan takimakandra ete, e froeteri prisiri ondrofenitori na mati di wi no ben si langa ten, efoe a fesiman e meki bekènti taki a programa o bigin, dan a e sori respeki gi denwan di e teki prati na a programa èn gi ala den brada nanga sisa foe wi, efoe wantewante wi e tapoe a takimakandra foe wi èn e go sidon na wi presi.
10 Ala ten den distriktkongres na prisiri ten, foe den blesi foe Jehovah ede di pasa marki. Wi e kisi wini na jejefasi nanga na skinfasi. Wi moesoe hori na prakseri taki foeroe kostoe de fanowdoe foe joeroe a kongreshal. So srefi njanjan e kon moro diri èn a Genootschap e bai gosontoe njanjan foe prati na ibri kongres. Fa den e pai den sani disi nanga ala den tra kostoe di meki? Nanga jepi foe wi friwani bijdrage, ini moni noso nanga jepi foe check di „Jehovah Kotoigi” kan gebroiki. Disi de ini akroederi nanga Psalm 96:8, di e gi wi a deki-ati foe ’gi glori na Jehovah èn foe tjari wan presenti kon ini den inisei-djari foe en’.
11 A fasi fa joe e tjari joesrefi sa tjari prèise kon? Ibri jari Wi Kownoekondre Dienst e memre wi na wan switifasi, o prenspari a de foe tjari wisrefi na wan boen fasi te wi e fisiti a distriktkongres. A no de foe taki, dati a fasi fa wi e tjari wisrefi moesoe de wan eksempre ala ten, ma te wi e kon makandra ini bigi groepoe, dan moro foeroe a de so taki sma di no de ini a waarheid e ondrosoekoe wi moro fini. A fasi fa wi e tjari wisrefi, boen noso takroe, kan abi moro krakti leki a preiki di wi e preiki. Wi wani dati Jehovah e kisi prèise foe den sani di wi e taki èn e doe. — Odo 27:2; 1 Petr. 2:12.
12 Baka a „Leri foe Gado”-distriktkongres foe a jari di pasa, wan waktiman foe wan foe den motel ben taki: „Disi na a moro boen groepoe jongoesma di mi ben abi foe hori ai na tapoe den ini wan langa ten.” Dan baka di a ben taki foe den takroe fasi fa tra groepoe jongoesma e tjari densrefi èn fa den e broko sani, a ben taki moro fara foe den pikin foe den Kotoigi: „Den abi boen maniri èn a de wan prisiri foe de na den mindri. Mi ben sa wani taki tra konmakandra di ben hori djaso, ben de leki a wan disi.”
13 Wan koranti skrifiman di e skrifi gi wan koranti na a mindri westsei pisi foe den Verenigde Staten foe Amerkankondre, ben taki a sani disi foe a kongres: „Den oemasma nanga den oemapikin ben weri toemoesi moi krosi, èn den mansma nanga den boi ben weri jas nanga das. Den ben meki notisi na wan serjoesoe fasi ala di den ben arki fo dei na den takiman. Èn efoe a sani disi di sma e taki de troe, we, dan Jehovah Kotoigi e sori wan toemoesi hei fasi foe krinfasi di e prenki a fasi foe Gado.” Ma a no ala raport ben de so boen.
14 Na wan tra kongres, wi ben kisi foe jere taki toemoesi foeroe sma ben e wakawaka na a ten foe den konmakandra. Den ben teri moro leki 1000 sma (moro foeroe pikin-nengre), di ben de ini de gadri na a ten foe a satra bakadina programa, di ben sa sori taki den papa nanga mama moesoe gi den pikin foe den moro foeroe leri èn den moesoe hori ai na tapoe den. Te wi e wakawaka ini gadri, dan dati kan meki foeroe babari di e poeroe a prakseri foe denwan di e doe moeiti foe arki. Wan toe foe wi abi foe sorgoe gi wan toe prenspari afersi na a ten foe a programa, ma den trawan foe wi no moesoe de tapoe den sidonpresi foe wi dan, èn e moesoe arki boen?
15 Moro foeroe papa nanga mama no e meki spotoe nanga den pikin ini a tori foe fisiti den gemeente konmakandra ibri wiki. Den no moesoe de na a srefi fasi dan te den abi foe doe nanga a sorgoe di den moesoe sorgoe taki den pikin foe den e sidon krosibei foe den èn taki den no e wakawaka ini den gadri na a ten foe a programa? A kongreshal kenki ini wan bigi Kownoekondrezaal, ma disi na a sistema foe Satan èn a ben sa de makriki gi sma di no abi konsensi, foe kon ini a kongreshal nanga takroe prakseri. JOE MOESOE SABI ALA TEN PE DEN PIKIN FOE JOE DE ÈN SAN DEN E DOE.
16 Krosi nanga a fasi fa wi e sorgoe gi wisrefi: Wi e libi ini wan jarihondro pe a fasi fa sma e weri krosi ini den fri ten, di e sori wan mi-no-ke-fasi, de wan sani di sma e feni boen. Foeroe sma e go na kerki èn pokoeshow noso den e go njan na wan restaurant, ini toemoesi aparti fri-ten krosi. A komentaar di skrifi ini paragraaf 14 e sori taki sma de di e warderi krosi di e sori respeki, spesroetoe te a abi foe doe nanga anbegi. Fri-ten krosi di e sori wan mi-no-ke fasi nanga a fasi fa wi e sorgoe gi wisrefi di no de joisti, e froeteri foeroe foe wi. No frigiti noiti taki a kongreshal no de wan sport stadion. A de wan bigi Kownoekondrezaal. Sonsma e weri krosi na wan respekifasi gi a kongres, ma baka a programa den e go na wan njanpresi nanga na trapresi ini krosi di no e fiti noso di no de bescheiden.
17 Wi moesoe memre den sma di wani teki dopoe, taki wan toe swenkrosi no fiti gi na okasi. Den sani di den o weri moesoe de bescheiden èn boen. Soema moesoe kroetoe disi? Den owroeman abi a frantiwortoe foe si taki ibrisma di o teki dopoe, di de foe a gemeente foe den, no e gi no wan reide foe meki sma naki foetoe fadon (2 Kor. 6:3, 4). Disi wani taki dati swenkrosi di e sori foeroe foe a skin nanga bosroko di abi grontapoe sani skrifi na en tapoe, di wani taki wan sani, noso di abi reklame na tapoe, no joisti foe weri. A ben sa boen gi den owroeman foe taki foe na afersi disi makandra nanga a sma di o teki dopoe te den e loekoe den aksi ini a Bediening-boek (a Diniwroko-boekoe).
18 Wrokosani foe meki opname: So leki fa wi ben taki kaba na fesi, dan foe gebroiki wrokosani foe meki opname, èn spesroetoe wan wrokosani foe meki wan video opname, na wan persoonlijk bosroiti. Efoe joe teki a bosroiti foe meki wan opname, grantangi dan, hori den sma di de ini joe birti na prakseri. A kan poeroe a prakseri foe den, srefi te joe e meki na opname ala di joe de tapoe joe stoeroe. No wan sma di e meki wan video opname, moesoe tapoe a fesi foe den kongres fisitiman. Boiti dati, no wan enkri opname apparaat mag poti na a elektris noso geluid-sistema ini a hal, so srefi den no mag poti wrokosani na a pasi pe sma e waka noso na presi pe foeroe sma e waka.
19 Sidonpresi: Tokoe a de fanowdoe ete, foe poti prakseri tapoe den problema di abi foe doe nanga a hori foe sidonpresi gi trawan. Ete wan tron wi ben sa wani foe memre ala sma: SIDONPRESI MAG HORI GI MEMRE FOE JOE EIGI OSOFAMIRI WAWAN, NANGA SMA DI E RÈIS NANGA JOE INI JOE OTO. Na wan toe kongres, te den doro ben opo froekoe ibri mamanten, dan esi-esi brada nanga sisa ben lon go ini a presi pe den e hori a kongres. Sma ben taki dati „sonsma ben hori pikinmoro heri rèi stoeroe, èn dan den no ben gebroiki foeroe foe den stoeroe di den ben hori”. A gersi taki a fasi disi foe handri, di e sori taki sma no e hori trawan na prakseri, de ete ala di den e memre wi foe disi doronomo. A no de so taki wi moesoe ondrosoekoe wi ati ini a tori disi èn prakseri dipi foe den gronprakseri ini Filipisma 2:3, 4?
20 Wan toe kongres e sreka sani gi denwan di abi spesroetoe fanowdoe, so leki den owroewan nanga den malengriwan. Grantangi, sorgoe taki joe no e teki wan sidonpresi ini wan foe den presi disi efoe joe no abi reti na tapoe dati. So srefi, de na ai foe jepi denwan di abi spesroetoe jepi fanowdoe foe feni wan sidonpresi, efoe den no de nanga wan sma di e sorgoe gi den.
21 Boekoe nanga njanjan dienst: Te wi e kon makandra gi a distriktkongres, dan wi e njanboen foe jeje njanjan nanga njanjan na skinfasi di de pasa marki. Wi moesoe teki ala toe foe den nanga tangi, wi no moesoe froemorsoe noti (2 Kron. 31:10; Odo 3:10; Joh. 6:12).
22 Joe kaba langa ten bifo augustus nanga den sani di joe moesoe sreka, èn joe de klariklari now foe njanboen dri dei foe kolokoe demakandra èn foe den boen sani na jejefasi? A de na opregti begi foe wi, taki Jehovah sa blesi den moeiti foe oenoe foe kon na a kongres disi èn foe njan foe den boen sani na a tafra foe Jehovah tapoe a „Frede gi Gado”-distriktkongres.
[Faki na tapoe bladzijde 6]
Sani foe memre gi a distriktkongres
Dopoe: Den sma di o teki dopoe moesoe sidon tapoe den sidonpresi di poti spesroetoe gi den, fesisei ini a hal, bifo a programa e bigin tapoe satra mamanten. Wi ben kon si taki wan toe sma ben weri krosi di no e sori respeki, èn di no e fiti a okasi sori taki a dopoe no de wan prenspari sani. Ibri sma di abi na prakseri foe teki dopoe, moesoe tjari wan bescheiden swenkrosi nanga wan wasidoekoe nanga en. Baka a dopoelezing nanga begi foe a takiman, dan a fesiman foe a mamanten programa sa gi sjatoe bodoi na den sma di o teki dopoe èn a sa meki wan singi bekènti baka dati. Baka a lasti couplet, dan den friwani bedinari kan waka go nanga denwan di o teki dopoe na a dopoe presi. Foe di a dopoe di de leki wan simbôl foe a gi di wan sma gi ensrefi abra na Jehovah, na wan krosibei èn persoonlijk afersi na mindri a sma nanga Jehovah, dan sani no seti gi wan so-kari patna dopoe, pe toe noso moro sma di o teki dopoe e brasa makandra noso e hori makandra ala di den e teki dopoe.
Lapelkarta: Grantangi weri den lapelkarta foe 1994 na a kongres èn srefi toe te joe e rèis go-kon na a kongres. Disi e gi wi foeroetron na okasi foe gi wan boen kotoigi te wi e rèis. Disi ben troe na wan toemoesi aparti fasi a jari di pasa na den kongres di ben hori ini Rusiakondre na Moskow nanga Kiev. Lapelkarta nanga plastik foe hori a lapelkarta moesoe teki na ini oen gemeente, foe di den no sa de foe kisi na a kongres. Prakseri foe tjari joe njoen broedoe karta. Den memre foe a bethelfamiri nanga den pionier moesoe tjari den ID-karta nanga den.
Friwani wroko: Joe kan poti ten na wan sei na a kongres, foe jepi na wan foe den afdeling? Te wi e dini den brada foe wi, awinsi gi wan toe joeroe nomo, a kan de wan boen jepi èn a kan tjari boen foeroe satisfaksi kon. Efoe joe man jepi, grantangi go na a afdeling foe Friwani wroko na a kongres. Pikin-nengre di jongoe moro leki 16 jari, kan jepi toe foe di den e wroko ondro den papa noso mama noso na ondro wan tra bigisma di abi wan firi foe frantiwortoe.
Wan toe wortoe foe warskow: Wi kan kibri wisrefi gi problema di no de fanowdoe, foe di wi e tan de na ai gi problema di kan kon. Nofotron foefoeroeman nanga sma di no abi konsensi e loeroe tapoe sma di de farawe foe den osopresi. Sorgoe taki ala ten joe wagi sroto, èn noiti no libi wan sani na ini di sma kan si, di sa tesi wan sma foe foefoeroe. Foefoeroeman nanga langafingaman e meki boen gebroiki foe bigi konmakandra. A no sa de wan koni sani foe libi warti sani tapoe joe stoeroe. Joe no kan de seiker taki ala sma di de lontoe joe na wan kresten. Foe san ede joe sa tesi den? Wi ben kisi foe jere taki wan toe doroseisma ben proeberi foe tjari pikin-nengre gowe. SABI ALA TEN PE DEN PIKIN FOE JOE DE.
[Faki na tapoe bladzijde 5]
DISTRIKTKONGRES 1994
SRANANTONGO: 5, 6, 7 augustus Gakaba
BAKRATONGO: 19, 20, 21 augustus Tweede Rijweg
SRANANTONGO: 26, 27, 28 augustus Tweede Rijweg
INGRISITONGO: 2, 3, 4 september Tweede Rijweg