Kon na a „Soyfri tongo”-distriktkongres 1990
1 Den distriktkongres gi 1990 sa abi na nen „Soyfri tongo”, èn yu kisi a kari fu de drape. Ala nanga ala yu sa abi fo kongres na ini Sranankondre, fu san wan sa de ini Bakratongo èn wan ini Ingrisitongo èn tu ini Sranantongo.
2 A profeyti wortu fu Yehovah na ini Sefanya 3:9 e taki: „Dan mi sa meki furu pipri go abra fu taki wan soyfri tongo, so taki alamala kari a nen fu Yehovah, fu dini en skowru na skowru.” A kongres fu a yari disi no sa sori wwan san a „Soyfri tongo” de, ma a sa yepi wi so srefi fu frustan fu san-ede a leri fu a tongo disi èn a taki grati fu en de so prenspari srefisrefi èn fa wi bekwaamfasi ini a kobroyki fu en e tranga a wanfasi fu a bradafasi di de na a heri grontapu.
3 DE BITEN DRAPE: Yehovah organisâsi e kari wi fu sidon na wan yeye nnyan tafra. A e kotoygi fu respeki èn warderi efu wi de biten. Te yu luku en bun dan disi wani taki taki ibri dey wi musu doro biten drape èn sidon tapu wi presi bifo a programa bigin. Disi e meki a de fanowdu taki wi poti nofo ten gi sani di e aksi wi prakseri, so leki a parkeer fu wi oto, a feni fu wan presi di fiti gi wi osofamiri èn a bay fu kongresbon gi nnyansani. — 1 Kor. 14:40.
4 Fisitiman fu na kongres fu a yari di psa na ini Polen ben tanapu nanga opomofo fu a gi di den brada fu den ben gi den srefi na ini a dini fu Gado, èn fu a lobi nanga wanfasi fu den. A dipi warderi gi san a kongres ben sa sorgu na yeyefasi, ben de krin fu si. Ibri mmanten den brada nanga sisa ben de biten tapu a kongres-prasi èn ben sidon tapu den presi te a programa ben bigin nanga a fosi singi nanga begi. Den ben tan sidon tê nanga a lasti singi nanga begi, èn baka di a konmakandra kba den no ben gwe wantron, so taki den ben kan taki ete nanga makandra.
5 A ordefasi fu den brada nanga sisa ben de wan eksenpre. Den ben kon fu arki èn fu leri. Srefi a alen di ben kon na a ten di den kongres ben hori na ini den opo stadion na ini Poznań nanga Chorzow no ben man puru den prakseri fu a programa. Den yonguwan di ben de drape, pe yu abi den pikin-nengre na ini, ben gi yesi, ben sidon pî èn ben arki di a programa ben hori. Osofamiri ben sidon na makandra. A dipi respeki fu den gi Yehovah tafra ben de wan eksenpre. Fa wi kan nyanbun fu a eksenpre fu den?
6 Fu waka baka a bun eksenpre fu trawan e kruderi nanga a beybri (2 Tes. 3:7). Ala di wi eygi omstandigheid kan de trafasi, toku wi wani nyanbun so srefi so meni leki a kan fu den kongres fu wi. Fu kibri den srefi gi broko-ede nanga fruferi sani di e kon fu di lati-lati den e lusu komoto fu oso fu go na a kongres, meki son osofamiri e feni en heri bun fu poti wan reydelek ten fu go sribi. Fu di den hori den srefi tranga na wan fasti ten, meki na okasi de moro bigi taki den kisi wan bun neti rostu èn taki dan a tra dey den kan lusu biten fu oso. Na a fasi disi den e sorgu taki den no e kon te a programa bigin kba èn e puru a prakseri èn e stoor den wan di sidon kba na den presi. Te wi e poti prakseri tapu a penti disi dan wi e sori wi grani nanga respeki gi Yehovah èn wi lobi gi wi brada nanga sisa nanga a hori di wi e hori den na prakseri.
7 WAN FO-DEY KONGRES: „A soyfri tongo”-distriktkongres sa teki fo dey. Tapu fodewroko a sa bigin 1.30 bakadiana èn tapu fodewroko, freyda nanga satra a sa kba wan sani fu 5.10 bakadina. èn tapu sonde wan sani fu 4.00 bakadina. Tapu freyda, satra nanga sonde a programa sa bigin 9.30 mmanten Ibri dey wi sa kisi prenspari bodoy fu yere di abi fu du nanga a taki fu a soyfri tongo. A programa sa abi lezing, demonstrâsi, ondrofenitori, symposium nanga tu beybri drama.
8 Abi a fasti bosroyti fu no misi nowan pisi fu a konmakandra. Yu sa musu du kande persoonlijk òfer èn fiti yu schema na dati. Son wan sa musu seti spesrutu sani nanga den basi. Furu sma e òfer srefi winimarki na monisey soso fu fisiti ibri pisi fu a konmakandra. Ma prakseri pikinso sortu òfer furu fu unu brada e du èn san den ben musu psa fu ben kan fisiti den kongres a yari di psa na ini Polen. Disi no e gi yu moro deki-ati fu de na ibri pisi fu yu kongres? Yehovah seyker sa blesi den wan di e meki a afersi disi leki wan tori fu opregti begi èn di e du muyti fu de drape. — Hebrew sma 10:24, 25.
9 ARKI BUN: Na ini Psalm 50:7 Yehovah e taki: Arki, o mi pipri, èn mi wani taki.” Fu dati-ede te a kongres programa e hori, yu no musu lasi prakseri nanga yepi fu sani di de fu si èn de fu yere, ma di no abi noti fu du nanga a materiaal di den e taki fu en komoto fu na podium. Na angri fu wi fu taki a soyfri tongo grati, musu buweygi unu ati fu gi yesi dorodoro na a aksi fu Yehovah na ini Yesaya 55:2: „Arki bun na mi.”
10 Ala a materiaal di den sa taki fu en na a kongres disi de gi wi yeye tanbun èn a sa tranga wi ini wi fasti bosroyti fu tan kánkán ini wi diniwroko gi Yehovah èn ini wanfasi nanga unu brada. A kongres sa sorgu gi unu fanowdu fu a ten disi èn a sa yepi wi fu hori skin skin nanga Yehovah organisâsi. A bakapisi te yu no e poti prakseri, sa de taki yu e tan a baka. Ala wi prakseri musu de krinkrin na a programa fu nyanbun so meni leki a kan fu en èn baka dati fu du san wi e leri. — Yak. 1:25.
11 Wi kan du wan sani fu arki a programa moro bun èn fu memre unu srefi den sani di ben taki? Iya, seyker. Furu kongres-fisitiman kweki a bun gwenti fu skrifi san a takiman e taki te a programa e hori. Te wi e fisiti wan kongres, dan bun materiaal fu skrifi sani èn so srefi wan beybri nanga wan singibuku musu de wan pisi fu den fanowdu sani fu wi. Efu yu no ben lobi skrifi san a takiman e taki, fu san-ede dan yu no ben sa pruberi en wan leysi na a „Soyfri tongo” — distriktkongres? Yu sa kon si taki a de wan bun fasi fu hori yu prakseri na den sani di den e taki èn taki a sa kibri yu fu no lasi prakseri.
12 A skrifi fu den sani di a takiman e taki no abi fu de bun furu. Akruderi a gwenti dan wan ofu tu prakserilin nofo kba gi wan edeprakseri. Owruman e feni taki a abi winimarki fu abi aantekening di orga netjes, te den e luku syatu, na wan wartifasi na kongresprograma tapu a diniwroko konmakandra. Den kan kobroyki so srefi furu fu den penti di kon na fesi tapu a kongres, te den e gi leri èn na a herder wroko fu den.
13 SINGI NANGA BEGI: Wi e gi Yehovah grani te wi e singi preysesingi. Dati na wan pisi fu wi anbegi. A e plisi Yehovah tu te en pipri e kon na en na ini opregti begi (Odo 15:8b). Distriktkongres e gi wi wan spesrutu okasi fu preyse Yehovah makandra nanga dusundusun brada èn sisa nanga yepi fu singi èn begi. Ma son wan sori wan mankeri fu respeki gi den prenspari pisi disi fu unu anbegi. Fa? Fu di sondro taki a de fanowdu den e kon na ini a zaal te a fosi singi e singi ofu baka a begi. Son wan e gwe libi den sidon presi na a kba fu a programa te a singi e singi èn bifo a begi. Fu san-ede den e du dati? Wawan leysi wan bun reyde kan de fu disi. Ma respeki nanga warderi di fiti, e sori gi Yehovah tafra, te son wan e gwe libi a grani fu singi èn fu kon na wan ini begi soso fu de pikinso moro esi na den oto ofu na a cafetaria? — Mat. 6:33.
14 Wi musu luku bun taki te wi e suku fu wi srefi abi en makriki, taki wi no skotu wi yeye go-na-fesi nanga yepi fu na grontapu fasi fu denki fu „mi fosi” ofu gadolowsu gwenti so leki bigi-ay nanga gridifasi. Meki wi sori a srefi yeye fu warderi gi santa sani, leki den brada fu wi na tapu den kongres fu a yari di psa na ini Polen, èn meki wi waka skowru na skowru nanga den, fu di wi e sori respeki di fiti gi so sortu prenspari sani fu unu anbegi so leki a begi èn a singi fu preysesingi gi Yehovah. — Ps. 69:30.
15 WI KRESTEN MANIRI: Wi kresten maniri nanga a fasi fu weri krosi tapu den kongres, gi unu leki Yehovah Kotoygi wan bun nen. Disi e kon fu di wi e teki wi anbegi fu Yehovah seryusu èn no e si a fisiti fu wan kongres leki soso wan prisiri waka. Te wi e kon na makandra gi so sortu spesrutu okasi, dan wi musu tan hori wi kresten wartifasi èn wan yeye fasi fu denki nanga firi èn wi musu tyari unu srefi ala ten leki bedinari — 1 Kor. 10:31-33.
16 Ma a de wan sari sani fu si taki wantu sma di e fisiti a kongres no e poti bun prakseri tapu den fasi fu denki, fu weri krosi, fu taki èn fu tyari den srefi. San wi kan du te so sortu sani e psa ini yu gemeente ofu na a kongres? Den di abi yeye eygifasi, musu gi ray na wan lobifasi, nanga a prakseri fu tyari kenki kon (Gal. 6:1; Ef. 4:11, 12). A taki fu a soyfri tongo musu buweygi wi fu hori wi nen hey èn kibri hey markitiki fu a fasi fu tyari wi srefi.
17 Wan fisitiman fu wan fu den kongres ben libi a baka na ini na bijdrage boksu a pikin brifi di e kon now: „Mi nyanbun srefisrefi fu unu programa. Now mi e go studeri a beybri nanga wan fu [den] brada. Disi ben de a fosi leysi di mi ben fisiti wan fu den konmakandra fu unu. Mi ben denki fu kon soso satra, fu di sonde mi e go na mi eygi kerki. Ma a ben fruwondru mi so meni taki tide mi ben de baka èn ben tyari mi heri osofamiri kon nanga mi. Mi ben firi brokosaka fu di bigisma ben taki tranga nanga makandra ala di a takiman ben taki.”
18 A kon so srefi na krin taki tapu son kongres wantu tini di sidon pikinso moro go a loktu ofu e sidon ini den uku fu a zaal, e seni brifi gi makandra, e syusyu èn moro furu no e poti prakseri na a programa. A fasi disi fu tyari den srefi e sori taki a de ala ten ete fanowdu taki ppa nanga mma hori ay a den tapu èn taki den musu sidon na den ppa nanga mma. Ppa nanga mma di sabi den frantiwortu sa poti prakseri tapu disi èn sa sorgu gi a fanowdu tiri gi den pikin (Ef. 6:4). Brada, sisa nanga yonguwan musu frustan taki te a programa e bigin, a de a ten fu arki, no fu taki. — Deut. 31:12.
19 GI PPA NANGA MMA: Yongu pikin nanga tini kisi wan kari tu gi a „Soyfri tongo” — distriktkongres. Den tu musu taki a soyfri tongo grati. Fa a de wan moy sani fu si yonguwan di kisi leri fu arki bun tapu ala kresten konmakandra, èn di abi ala belangstelling gi a kongres programa! (Ps. 148:12, 13) Ma furu e anga fu a eksenpre nanga a ay di ppa nanga mma e hori a den tapu. Furu yonguwan kisi bun opleiding fu skrifi san a takiman e taki. Efu yu leki ppa ofu mma no leri yu pikin ete fu skrifi san a takiman e taki, fu san-ede yu no ben sa kobroyki a ten di tan abra fu du dati te go miti unu kongres? Srefi heri yongu pikin kan kisi deki-ati fu skrifi beybri tekst nanga sroto wortu di abi fu du nanga a tekst, di den e yere fu na takiman. Son ppa nanga mma e meki mofo taki den sa luku den moro prenspari penti fu a programa fu a dey dati baka te den doro den tanpresi ofu te den e reis go na oso.
20 A de so taki a moro bigi pisi fu den ppa nanga mma e frustan taki ala pikin abi a firi fu go prey. Den no abi ondrofeni ini a libi ete èn den no de bigisma ete. Fu dati-ede wi musu leri den oten den musu arki èn fa den musu tyari den srefi tapu den konmakandra. Disi e aksi fu na sey fu ppa nanga mma fu hori wan bun ay a den tapu. Wantu ppa nanga mma ben de slak ini disi. Son tron a e psa taki, ala di ppa nanga mma e sori respeki di fiti gi Yehovah te den e begi, den pikin fu den e prey èn e puru trawan prakseri. Ppa nanga mma musu sabi san den pikin fu den e du, srefi na a ten fu a begi. Èn san den e du te den opo gwe ala di a programa e hori? Efu a programa e hori ofu te a kba, yu e libi den pikin fu yu sondro fu hori ay na den tapu? — Odo 29:15.
21 Son pikin tyari den srefi na wan onborsu nanga opruru fasi èn den no sori respeki srefi gi moro owru brada nanga sisa, di nanga switifasi ben wani poti den reti. A fasi disi taki yu no man taki nanga den èn so wan sortu fasi fu tyari den srefi, di no fiti gi wan kresten, de furutron a bakapisi fu a gi di ppa nanga mma e gi pasi fu sani du èn a mankeri fu tranga leri na oso. Wan sani musu fu du na a sani disi. Ala kresten ppa nanga mma musu hori ay ala ten bun tapu den pikin, ala di „den e kweki den ini a tranga leri èn a seryusu frumane fu Yehovah.” — Ef. 6:4.
22 WI E WARDERI NA WROKO DI UNU E WROKO DORODORO MAKANDRA NANGA WI: Wan heri ipi plan nanga wroko du fu sorgu taki nofo sidon presi, buku, nnyan nanga tra seti de gi iniwan sma di e fisiti a kongres.
23 Wi e aksi ala unu fasi fu wroko makandra ini a tori fu a hori fu sidon presi. Hori grantangi na prakseri taki SIDON PRESI MAG HORI SOSO GI MEMRE FU YU EYGI OSOFAMIRI ÈN SMA DI E WAKA NANGA YU INI A SREFI OTO. Grantangi, no hori sidon presi gi trawan. Son tron ekstra sidon presi e hori gi trawan fu soso, sondro taki a de spesrutu gi wan sma. Disi a no wan fasi fu lobi èn a e kori den wan di e sori sma pe den musu sidon èn den wan di e suku wan sidon presi. Wi musu du, ini akruderi a beybri ray, muyti fu sori lobi firi gi wi brada èn wroko makandra krinkrin nanga a bun seti fu a hori fu sidon presi. — 2 Petr. 1:5-8.
24 A ray e gi fu yu sabi sortu sani fu yu, yu e tyari go na a kongres dyari. Den yari di psa, dan furu sma ben tyari bigi ijs-boksu ofu tra bun bigi sani di no ben man go ondro a sturu fu den. Den ben poti den na a pasi pe sma musu waka ofu tapu den sturu. Disi ben abi leki bakapisi taki trawan no ben abi sidonpresi èn sontron a ben de kontrari den weti fu brandweer èn fu a veiligheid. Ini so sortu afersi wi musu hori trawan na prakseri.
25 Yu mag kobroyki videocamera nanga sani fu poti lezing tapu banti na a kongres. Den wan di e kobroyki so sortu apparaat, musu sorgu fu no stoor trawan ofu puru den prakseri. Yu no mag poti so sortu apparaat na a pasi pe sma e waka ofu a sey pe sma e waka go na dorosey ofu sutu en na a geluid sistema ofu na den stopkontakt fu a zaal. Yu no mag kobroyki fowtow lanpu. Den wan di e puru sma prakseri ofu no e poti prakseri tapu wan fu den ray san skrifi a tapusey, no musu draydray fu poti afersi reti te trawan e poti disi na ondro den prakseri. Brada di e sori sma pe den musu sidon èn tra frantiwortu brada musu de na ay fu poti ibri sma, di e psa den ray disi reti, èn den musu kisi ala a wroko makandra fu den wan di e kobroyki den sortu apparaat dati.
26 NNYAN DIENST: Neleki tapu den kongres ini den ten di psa, na so a yari disi wi sa meki kobroyki soso fu kongresbon. A prijs fu den difrenti sani sa poti akruderi den bon di de fu di a no skrifi tapu den bon omeni moni den de. Na ibri uku den fanowdu sani sa de fu feni baka. Fa a meki di den sani ben meki kon moro eenvoudig tapu a kontren fu nnyansani, ben sori taki den de tumusi bun seti gi ibriwan sma, fu lekti a wroko èn fu kan du en moro esi!
27 Yehovah pipri seyker e warderi en trutru fu kan konmakandra ala yari na ini tumusi moy zaal fu nyanbun fu a kofarlek moy yeye programa di sreka na fesi. Wi e warderi so srefi den furu wroko di e du fu yepi unu èn den furu sani, di e meki sani makriki gi wi, di wi e kisi na den sortu konmakandra disi. Nanga furu sorgu makandra nanga bun bigi onkostu, a Genootschap seti sani gi nofo sidon presi, a poti fu diri-diri apparaat gi a geluid èn a sorgu gi wan tumusi bun nnyan seti èn dan ete wantu tra sani e seti èn wroko e du di e meki a fisiti fu a kongres de wan switi èn yeye kowru-ati.
28 A meki kobroyki fu den nnyan seti tapu den kongres de wan fasi fu yepi fu tapu wan pisi fu den onkostu. Moro fara den onkostu e tapu nanga yepi fu den friwani gi fu unu di e horibaka gi a wroko fu a Genootschap di e du na a heri grontapu. Fu a makrikifasi meki ala pe na ini a zaal bijdrage-dosu poti di yu kan kon sabi makriki. Ala bijdrage wi e warderi srefisrefi èn a Genootschap wani fu bigin taki unu tangi na fesi fu a bun-ati fasi nanga wánfasi ini a hori di unu e hori baka gi den Kownukondre afersi. — Lukas 6:38.
29 KON NA A „SOYFRI TONGO” — DISTRIKTKONGRES: Te yu e fisiti a „Soyfri tongo” — distriktkongres èn e poti bun prakseri na a programa, dan unu sa frustan moro krin fu san-ede Yehovah gi unu a soyfri tongo èn fu san-ede wi musu de ala ten na ay gi awinsi sortu firi fu gridifasi tu, di kan broko a wanfasi di de a mindri wi leki brada. Meki plan now fu de drape te a fosi bigin e singi èn fu fisiti ala konmakandra te nanga a lasti begi tapu sonde bakadina.
[Faki na tapu bladzijde 9]
Yepisani fu memre sani baka fu a kongres
DOPU: Sma di o teki dopu musu pruberi fu sidon tapu den presi na ini a faki di poti spesrutu gi den, bifo a konmakandra e bigin tapu satra mamanten. Ibriwan sma di poti na en ede fu teki dopu, musu tyari bescheiden swen krosi nanga wan wasiduku kon. Baka a dopu lezing nanga a begi fu a takiman, dan a fesiman fu a konmakandra sa gi syatu ray na den sma di o teki dopu èn baka dati a sa kari wan singi. Te a lasti pisi fu a singi e bigin, dan den brada di e sori sma pe den musu sidon sa tyari den sma di o teki dopu go na a dopu presi ofu na den wagi di sa tyari den go drape, ala di den tra sma di de drape e singi a singi te na a kba. Fu di a dopu leki wan sînbol fu a gi di wan sma e gi en srefi abra na Yehovah de wan krosibey èn persoonlijk afersi a mindri a sma srefi nanga Yehovah, meki seti no de gi wan sokari patna-dopu pe tu ofu moro sma di o teki dopu e brasa makandra ofu e hori den anu fu makandra, te den e kisi dopu.
A KARTA FU KON SABI DEN PIONIER: Ala gewoon nanga spesrutu pionier, so srefi den opziener di e reis èn den memre fu a Bethelfamiri, musu tyari a Waktitoren ID-karta nanga toewijzing karta fu den (S-202-0) kon na a kongres. Den wan di na a ten fu na kongres de siksi mun ofu moro langa ini a pionierwroko, kan kisi kongresbon soso te den sori den Waktitoren ID-karta. Behandel fu dati-ede a karta net so bun leki moni; yu no kan kisi trawan na a kongres. Pionier sa kisi wantu buku fu soso di kon kande a doro, ofu tra lektuur nanga buku di kon a doro fu a bijdrage fu den pionier na a lektuur afdeling te den sori a Waktitoren ID-karta fu den.
FRIWANIDIENST: A yepi fu friwani wrokoman de fanowdu fu meki wan distrikt-kongres waka switi. Awasi yu no man wroko a heri kongres, toku wi sa warderi den wroko fu yu. Efu yu kan yepi, go dan te yu doro na a kongres na a afdeling Friwani wrokoman. Den pikin di moro yongu leki 16 yari kan du wan sani tu fu meki a kongres waka bun, ma den musu wroko makandra nanga a ppa ofu mma ofu wan tra frantiwortu bigisma.
LAPELKARTA: Weri grantangi te yu de na a kongres a lapelkarta di meki spesrutu èn weri en so srefi te yu e reis go èn e reis komoto fu a kongres. Furutron disi e meki wi man gi bun kotoygi te wi e reis. Yu musu kisi den lapelkarta via yu gemeente fu di den no de fu kisi tapu a kongres.
WAN WORTU FU WARSKOW: Awasi pe yu e poti yu oto, sroto en ala ten èn noyti libi wan sani didon na ini di sma ay kan si. Kibri den gudu fu yu efu a kan ini a baki na bakasey fu a wagi èn sroto en. De so srefi na ay gi fufuru-man èn sma di e fufuru moni puru a sma saka, di ala ten e kon pe bigi konmakandra e hori. Disi wani taki tu taki yu no musu libi no wan warti sani a baka tapu yu sidonpresi na a kongres sondro fu hori ay na en tapu. Grangtangi, de forsektiki.