Yu kisi wan kari gi na „Gi yu srefi na ini a dini fu Gado”-distrikt kongres 1989!
1 Baka ete wan tu mun nomo dan na heri grontapu, wan yeye programa di e bow sma sa bigin, èn yu kisi wan kari gi disi! Ini Sranan den „Gi yu srefi ini na dini fu Gado”-distrikt kongres sa bigin tapu 25 augustus. Makandra nanga Ingrisi nanga Sranantongo-kongres ala nanga ala wi sa abi fo kongres. Yehovah srefi e seti den sani disi nanga yepi fu en organisâsi èn wi kan de drape so bun nanga hey fruwakti di no sa tyari syène gi wi. — Ps. 61:4; Yes. 54:13.
2 A yari disi den kongres sa poti krakti tapu a fanowdu fu gi yu srefi ini a dini fu Gado èn sa buweygi wi ati fu tyari kenki kon na ini na ufen fu a eygifasi disi. Disi de spesrutu prenspari te yu e luku na godelowsu grontapu di lontu wi.
3 Nanga yepi fu wan progressief opleiding nanga tranga leri Yehovah meki wi kon tron wan aparti pipli, di de wan makandra ini wan spesrutu organisâsi a mindri fu a geslakti disi di no abi respeki. A gi fu wi srefi ini a dini fu Gado de tru tru èn fri fu hoygri fasi, di Paulus ben skrifi fu en, di a ben taki taki ini den lâsti dey sma ben sa abi wan fasi fu gi den srefi na ini a dini fu Gado, ma den ben sa sori taki den no abi a krakti fu en (2 Tim. 3:1, 5). Meki a de so taki wi yeye fu wroko makandra sa sori ala ten a gi fu wi srefi ini a dini fu Gado èn meki a de so taki wi sori taki ala ten wi abi na tru tru krakti fu en. — 1 Kor. 14:40.
4 DE DRAPE FRUKU: Yehovah Kotoygi de bekènti fu den kotrow fasi èn a du fu sani na wan reti ten (Luk. 16:10). Disi de prenspari te wi e fisiti wan kongres. Ala dey wi musu de fruku drape èn sdon na wi presi bifo a programa e bigin. Disi e aksi taki nofo ten e puru fu sorgu gi sani di wi musu poti prakseri na den tapu, so leki na parkeer fu wi oto, na feni fu presi di fiti gi wi osofamiri, èn a kisi fu kongresbon fu nnyan.
5 Na kongresten e gi wi wan tumusi bun okasi fu nyan bun fu prisiri demakandra. Ma na fisiti fu mati te lati a neti kan tapu pasi gi a muyti fu wi, fu de biten na tra dey. Bigin lati èn fu hâsti wi srefi mmanten fruku kan abi leki bakapisi furu broko-ede nanga wan firi taki en fruwakti no kon tru (frustratie). Fu way pasi gi disi son osofamiri e feni en wan bun sani fu poti wan reydelek ten fu go sribi. Fu di den e hori den srefi fini fini na wan schema a de moro seyker taki den abi wan bun neti rostu èn taki den de klari na tra dey fu bigin fruku. Nanga dati a no de fanowdu fu kon ini sey ala di na programa e hori, san e puru sma prakseri èn kan de fruferi gi den sma di e sdon kba na den presi. Na de klari fu wi fu dini trawan na ini a tori disi kan de wan sori fu na grani di wi e gi Yehovah nanga a respeki di wi abi gi En èn a de wan sori fu na tru tru gi yu srefi ini a dini fu Gado.
6 WAN DRI DEY KONGRES: Na: „Gi yu srefi ini a dini fu Gado”-distrikt kongres sa hori dri dey. Na ibri konmakandra den sa pristeri bodoy di piki nanga furu sorgu èn de fu bigi belang gi wi yeye gusontu. Wan difrenti fu tori di abi fu du nanga a gi yu srefi na ini a dini fu Gado sa tyari kon na krin na ini lezing, demonstratie nanga wan disi ten drama.
7 Abi na fasti bosroyti fu no misi no wan konmakandra. Disi e aksi kande ofrandi fu yu srefi nanga fiti sani ini yu schema. Son sma e feni en fanowdu fu seti spesrutu sani nanga den wrokobasi. Furu sma e ofru srefi wini na moni sey fu kan de na tapu ala konmakandra. Yehovah seyker sa blèsi den sma di e meki na afersi tron wan tori fu opregti begi èn di e meki opregti muyti fu de drape. — Luk. 13:24.
8 ARKI BUN: No meki sani di de fu si ofu fu yere, ma di no abi fu du nanga na materiaal di den e taki fu en komoto fu na podium, puru yu prakseri te na kongresprograma e hori. Fa wi de Yehovah grantangi di gi unu na koni fu poti unu frustan „bun” tapu prakseri di wi e frukisi. Na gi fu wi srefi na ini a dini fu Gado musu buweygi wi fu teki wan sey di e akruderi nanga na aksi fu Yehovah ini Yesaya 5:2: „Arki bun na mi.”
9 Ala di a de tru taki a lezing fu sonde bakadina e meki bekènti gi ala sma, toku moro furu fu na materiaal di den e pristeri na tapu a kongres disi sreka spesrutu gi den wan di e gi den srefi kba ini na dini fu Yehovah. A kongres sa fruteri wi fu den disi ten fanowdu èn sa yepi wi fu hori skin skin nanga Yehovah organisâsi. Te wi no e luku bun a sa abi leki bakapisi taki wi sa tan na baka. Wi musu go krin krin na ini na programa fu te fu kba feni doro doro wini fu na furu yeye nnyan. — 1 Petr. 2:2.
10 Ini ala den yari furu sma di go na den kongres kweki na bun gwenti fu meki notitsi te na programa e hori. Te wi e fisiti wan kongres, dan notitsi materiaal di fiti, net leki beybri nanga singi buku, musu de na ini den sani di moro furu yu e tyari nanga yu. Wantu sma e luku kande na a meki fu notitsi nanga dege dege, fu di den e prakseri taki a no e tyari tru tru bun. Efu yu prakseri dati tu, fu san-ede yu no ben sa pruberi dan fu meki notitsi na a ten fu na „Gi yu srefi ini a dini fu Gado”-kongres? Net leki furu trawan yu sa kon si kande taki a de wan bun fasi fu yu prakseri no puru fu san den e taki èn taki a e kibri yu fu no sdon dren, ofu fu meki yu prakseri komoto fu san den e taki.
11 A no de fanowdu fu skrifi furu sani ofu fu skrifi den fini fini. Leki fa a gwenti de dan wan ofu tu prakserilin sari gi wan edepunt. Owruman e feni taki a abi wini te den abi notitsi di orga moy fu kan lèy wan overzicht di wani taki wan sani fu na kongres programa tapu na dinstkonmakandra. Srefi tu baka dati den kan teki furu fu den punt di ben kon na fesi tapu na kongres, leki fanowdu sani ini a gi leri fu den èn ini den hèrderwroko.
12 Wi alamala musu poti prakseri tapu a fasi fa wi e arki, fu di a wani taki wi koloku nanga wi libi. Ala di wi de na tapu na „Gi yu srefi na ini a dini fu Gado”-distrikt kongres, wi musu hori a frumane fu Yehovah ini Odo 8:33-35 ini prakseri: „Gi yesi na tranga leri èn kon koni èn no sori kweti kweti taki yu no abi bisi. Koloku na sma de di e gi yesi na mi fu di dey na dey a e hori wakti na mi doro, fu di a e hori wakti na den postu fu mi mofo doro. Bikasi suma e feni mi, seyker sa feni a libi èn e kisi bun wani fu Yehovah.”
13 SINGI NANGA BEGI: Wan fu den moro moy sori fu na gi fu wi ini a dini fu Gado de a singi fu prèyse gi Yehovah Gado. A singi fu singi ben de leki fa a sori wan normaal marki fu na tru krestendom ini na fosi yarihondro (1 Kor. 14:15). A e prisiri Yehovah tu te en pipli e kon na en na ini opregti begi. Distrikt kongres e gi wi wan spesrutu aparti okasi fu moksi wi srefi nanga dusun dusun brada nanga sisa ini na prèyse fu Yehovah nanga yepi fu singi èn so srefi tu begi. Ma son sma ben sori wan mankeri fu respeki gi den prenspari pisi disi fu wi anbegi. Fa so? Fu doro na a ten fu a bigin singi nanga begi ofu baka dati sondro fu a de fanowdu. Na a kba fu na programa son sma e libi den sdonpresi te a singi e singi èn bifo a begi. Fu san-ede? Na aparti okasi wan bun reyde kan de fu disi. Ma wantu sma e libi na grani fu singi nanga a de wan makandra na ini begi, soso fu kan de pikinso moro esi na den oto. Trawan libi den presi fu de a mindri den fosi wan di tanapu na ini na rèy fu buku di gi fri ofu gi nnyan. Wi musu luku bun te wi e feti na en baka fu wi srefi abi en makriki fu sani no tapu wi yeye go na fesi nanga yepi fu na grontapu „mi fosi” fasi ofu godelowsu fasi so leki gridi fasi nanga suku wini gi yu srefi. Leki wan pipli di e gi den srefi na ini a dini fu Gado wi e feti a baka a sori fu respeki di fiti gi den sortu hey sani fu wi anbegi disi, fu taki en reti wi begi nanga singi gi Yehovah.
14 WI KRESTEN MANIRI: Ini ala den yari wi kresten maniri èn wi doro sey luku na tapu den kongres gi wi wan bun nen leki Yehovah Kotoygi. Disi de so fu di wi e si wi kongres nanga reti leki wan yeye fesa, no leki wan prisiri waka. Ini akruderi nanga dati wi e pruberi fu sori wan yeye fasi èn fu tyari wi srefi leki bedinari.
15 Luku pikinso na a moy ondrofeni tori disi, di wan osofamiri fu kotoygi ben ondrofeni ala di den ben sdon e nyan ini wan restaurant ini wan kongres foto. A brada e skrifi: „Wan man nanga en wefi ben sdon na wan tafra na sey di fu wi. Di den ben kba nyan na man ben kon na wi tafra, ben aksi pardon èn ben taki taki nanga prisiri a ben wani prèyse wi fu wi tumsi moy èn krin luku na doro sey. Mi wefi ben fruteri na man taki na weekend disi wi ben de na tapu na Wachttoren kongres. A ben taki taki a ben prakseri dati kba. A ben si furu fu wi brada nanga sisa lontu a hotel ala di en nanga en wefi ben tan drape, èn alamala ben de eksenpre na ini krosi di den ben weri èn ben tyari den srefi so fasi tu. A ben taki taki ini a kerki di en ben fisiti den yonguwan no ben weri krosi èn no ben tyari den srefi so leki den yonguwan fu wi. Disi e meki mi frustan krin o prenspari a de fu leri mi pikin fu den yongu yari kba fu de ala ten wan bun kresten eksenpre. Fu disi wi musu gi grani na a krakti ray nanga tiri fu Yehovah organisasi fu gi wan tumusi bun eksenpre.”
16 A de wan sari sani taki wantu sma di e kon na den kongres, tron tumusi onborsu ini den fasi fu du, den krosi, den taki nanga fasi fu tyari den srefi. Efu so wan sani e kon na krin, efu a de now ini unu gemeente ofu na a ten fu wan kongres, dan den wan di abi yeye eygi fasi na wan lobifasi musu gi ray so taki kenki kan tyari kon (Gal. 6:1; Ef. 4:11, 12). A gi fu wi srefi ini a dini fu Gado musu buweygi wi ala ten fu de faya faya ini na hori hey fu wi bun nen èn a kibri fu den hey markitiki gi na fasi fu tyari wi srefi.
17 Wi sa wani de sondromemre fu te fu kba no gi no wan enkri reyde fu naki futu. Meki fu dat-ede wi alamala feti fu tyari wi srefi na a ten fu den distrikt kongres di e kon na so wan fasi taki wi ’mag moy na leri fu wi Frulusuman, Gado, ini ala sani’. — Tit. 2:10.
18 GI PPA NANGA MMA: Yongu pikin nanga tini kisi wan spesrutu kari fu de na tapu na „Gi yu srefi na ini na dini fu Gado”-distrikt kongres. Furu fu den bodoy di den e pristeri sa de wan deki-ati spesrutu gi den. Fa a de wan tumusi bun sani fu si na gi di yonguwan, di leri fu poti fini fini prakseri na tapu ala den kresten konmakandra èn di abi tranga belangstelling gi na kongres programa, e gi den srefi na ini a dini fu Gado! (Ps. 148:12, 13). Ma furu e anga fu na eksenpre nanga a luku di den ppa nanga mma e luku den. Furu yonguwan kisi wan bun opleiding fu meki notitsi. Efu leki ppa nanga mma unu no leri yu pikin ete fa fu meki aantekening, fu san-ede dan yu no ben sa kobroyki na ten di tan abra te na a kongres, fu du dati? Srefi heri yongu pikin, sma kan gi deki-ati fu skrifi beybri tekst di den e kari èn den sroto wortu di den e yere den takiman e taki èn di abi fu du nanga dati. Son ppa nanga mma e regel so taki den e luku den moro prenspari penti fu na programa fu wan dey baka te den doro na tapu na adres pe den e tan ofu ala di den e rèys ge na oso
19 A no de fu taki taki more furu ppa nanga mma e frustan taki a de a natuurlek lostu fu pikin fu prey nanga ala prisiri. Den e mankeri ondrofeni ini a libi èn no lepi ete. Fu dati-ede den musu kisi leri oten den musu poti prakseri èn fa den musu tyari den srefi na tapu den konmakandra. Disi e aksi fu den ppa nanga mma fu luku den bun. Wan tu ppa nanga mma ben de slap ini a tori disi. Ala di ppa nanga mma e sori yoysti respeki gi Yehovah te den e begi, den pikin fu den sontron e prey èn e puru na prakseri fu trawan di wani poti den prakseri na tapu dati. Ppa nanga mma musu sabi san den pikin fu den e du na a ten fu na begi. San den e du te den e libi den sdonpresi fu den te a programa e hori? Den e libi den pikin na a ten fu ofu baka na kongres progama sondro taki sma e luku den? Werdri fasi nanga fasi fu tyari den srefi di no fiti gi kresten yonguwan de furu tron na bakapisi fu a gi pasi nanga a mankeri fu tranga leri na oso. Tru tru gi yu srefi na ini a dini fu Gado musu buweygi ppa nanga mma fu luku den pikin fu den ala ten fini fini, ala di den „e tyari den kon bigi ini na tranga leri èn na seryusu frumane fu Yehovah”. — Ef. 6:4.
20 FANOWDU NNYAN SANI: A tapu bladzijde 32 ini a Yaribuku 1980 ben tanapu: „Wi wani taki en leki wan pikin sani, taki na ini son kondre na eenvoudig fasi fu sorgu gi nnyan yepi heri ipi brada nanga sisa fu nyan bun fu na kongres programa.” Na meki kon moro eenvoudig disi ini wan tu kondre ben abi leki bakapisi krin krin yeye wini na tapu den kongres fu den, so taki a Genootschap rikomanderi na fasi fu wroko disi gi ala kondre.
21 Gi wi disi ben psa via na inlegvel ini Wi Kownukondredienst fu maart 1987, pe leki fu eksenpre den ben taki: „Fu di den meki den maaltijd èn a fasi fa den ben gi den na sma kon moro eenvoudig, a no sa de fanowdu taki furu brada nanga sisa musu gi furu yuru na a bay fu difrenti nnyan sani, na sreka fu nnyan bifo a programa èn a krin fu sani baka dati. Moro furu fu den brada nanga sisa disi du grontapu wroko a wiki dati kba. A no ben sa de moro betre gi den efu den ben kan kobroyki na ten disi tapu a weekend fu poti den prakseri na tapu yeye sani fu di den e sdon na ini zaal èn e arki na programa?”
22 Baka dati den ben tyari kon na krin na ini na inlegvel disi den beybri bakagron fu na seti disi. Den ben poti na prakseri a tapu taki, di den yeye konmakandra fu Israèl ben hori na owruten ’soso san ibri sili abi fanowdu fu nyan’ ben mag fu gi (Ex. 12:16). Srefi tu den ben taki fu en taki na marki fu wan bigi konmakandra fu owruten ben de a srefi leki den konmakandra ini wi ten, dati na poti wi prakseri tapu Yehovah Gado èn kon bow na yeye fasi ala di so pikinso leki a kan wi prakseri e puru fu dati. Te fu kba den ben sori na a ray fu Yeyses na ini a tori fu sani di seti na skinfasi, di ben taki taki „pikinso sani nomo ben de fanowdu”; kontrari dati Maria ben teki na yoysti sey fu di a arki na a leri fu Yeyses bun. — Luk. 10:38-42.
23 A tapu den distrikt kongres fu 1989 wi sa meki kobroyki fu na fasi fu meki sani kon eenvoudig srefi srefi. So leki den e kobroyki en kba nanga bun bakapisi èn ala tefrèyde fasi ini furu kondre ini akruderi nanga na sani di na Tiri Skin abi, na prakseri. Disi wani taki taki den no sa pristeri waran nnyan a yari disi. A difrenti ini nnyan sa hori so eenvoudig leki a kan. Na a fasi disi wi sa sorgu taki a moro prenspari prakseri sa gi na „den moro prenspari sani” di abi wan yeye fasi, ala de toku den sa sorgu gi den skin fanowdu. — Fil. 1:10.
24 Na maatregel di ben teki a fesi, fu meki sani di seti gi nnyan tapu den kongres kon moro eenvoudig, den ben bepaal ibri yuru taki den kren nanga den spesrutu dey konmakandra ben sa waka baka na patron fu den kongres, fu bigin nanga den baka yari serie di ben sa kon na baka. Srefi tu now fu bigin fu na baka yari di e kon den sa fiti den seti na tapu den konmakandra disi so bun agen na na eksenpre fu den distrikt kongres, fu taki fu a nnyan paket so bun leki a fasi fu prati den.
25 Net leki , na tapu den kongres ini na ten di psa wi sa meki kobroyki a yari disi tu fu kongresbon.
26 Meki kobroyki fu seti gi nnyan na tapu den kongres de wan fasi fu yepi fu tapu wan pisi fu den kostu, Ma wi abi na overtoygi taki, efu sma e meki now wèl ofu no e meki kobroyki fu na seti gi nnyan na tapu a kongres, taki ibri fisitiman sa abi na winsi fu du en prati ini a yepi fu tapu den kostu fu a hori fu den konmakandra disi di e gi prisiri na yeyefasi.
27 GI FU YU SEY DORO DORO WI E WARDERI: Wan heri ipi planning nanga wroko du fu sorgu taki nofo sdonpresi, buku, nnyan nanga tra seti de fu kisi gi ibri sma di e fisiti na kongres. Fu de seyker fu na tumusi bun fasi fu na seti disi ibri gemeente kisi wan toewijzing fu fisiti wan bepaalde kongres. Gi yepi fu unu sey doro doro de fu bigi belang fu a no psa taki tumusi furu sma de. A no de fu taki taki omstandigheden sa de di sa meki en fanowdu gi son sma fu fisiti wan kongres ini wan tra kontren. Ma moro furu sma musu kan fisiti na kongres pe den seni den go. — 1 Kor. 13:5, Fil. 2:4.
28 Gi yepi fu unu sey doro doro den e aksi fu unu tangi tangi ini a tori fu a hori fu sdonpresi. Grantangi hori na ini prakseri taki den SDONPRESI MAG HORI WWAN GI MEMRE FU YU EYGI OSOFAMIRI NANGA SMA DI DI E REYS NANGA YU INI NA SREFI OTO. Grantangi no hori sdonpresi gi trawan. Sontron somaar, den e hori ekstra sdonpresi sondro taki den de spesrutu gi wan sma. Disi a no wan sori fu lobi èn e kori den dienstverleners nanga trawan di e suku presi di opo. Ini akruderi nanga na beybri ray wi musu poti brada lobi na a gi di wi e gi wi srefi na ini a dini fu Gado èn a gi yepi fu wi sey doro doro na a seti fu a hori fu sdonpresi di den feni bun. — 2 Petr. 1:5-8.
29 Den e gi na ray fu sori taki yu e krutu sani bun te yu e tyari sani fu yu srefi nanga yu na a kongresdyari. [Efu son sma wani tyari pikinso nnyan komoto fu oso nanga den, dan a no de fu taki taki a kan, ma a e taki fu en srefi taki disi sma sa nyan soso ini den pauze net leki a nnyan di kisi na a kongres e nyan soso ini den ten fu bro skin èn no te a programa e hori.] Ini a ten di psa son sma tyari bigi kulboksu ofu tra heri bigi sani nanga den di no ben kan poti na ondro a sdonpresi fu den. Den ben poti disi na ini den futu pasi ofu tapu den sturu. Disi ben abi leki bakapisi taki den ben puru wan sdonpresi fu wan trawan èn sontron a ben de kontrari den wèti fu brandweer nanga di fu tan bun. Wi musu sori taki wi de klari klari fu du wan sani ini den sortu afersi disi.
30 Den gi pasi fu kobroyki video kamera nanga audio-opname apparatuur a tapu na kongres dyari. Ma den sma di e kobroyki den sortu apparatuur dati musu sorgu fu no hendri trawan ofu puru den prakseri. Den sortu apparatuur dati no musu poti na ini den futu pasi ofu pe yu e komoto go na doro èn no mag sroyti tapu na geluid sistema ofu den stopkontakti ini na hal. Pasi no e gi fu kobroyki foto lanpu. Den sma di e meki trawan den prakseri komoto tapu na programa ofu na wan fasi e afrontu den richtlijn di skrifi a tapusey musu seti na afersi bun baka sondro dray dray te den e tyari disi kon na ondro den prakseri. Den dienstverlener nanga tra brada di abi frantiwortu musu de na ay fu tyari wan kenki kon ini ibri psa fu den richtlijn disi èn den musu kisi yepi doro doro fu den wan di e kobroyki den sortu apparatuur dati.
31 A GI FU WI SREFI INI A DINI FU GADO sa ondrofeni seryusu tesi ini na krosibey ten di e kon. „Fu taki leti, ala sma di winsi fu libi nanga a gi wi srefi ini a dini fu Gado ini wan fasi nanga Krestes Yeyses sa kisi frufolgu tu” (2 Tim. 3:12). Fa wi de Yehovah grantangi gi den yeye seti leki den „Gi yu srefi ini a dini fu Gado”-distrikt kongres, pe a sa gi wi opleiding nanga leri „taki wi no musu trowe godelowsu fasi nanga grontapu lostu ma musu libi nanga gosontu frustan nanga regtvaardiki fasi nanga a gi wi srefi ini a dini fu Gado a mindri fu na disiten seti fu sani disi”. — Titus 2:12.
[Faki]
Yepi fu memre sani gi a distrikt kongres
PIKIN-NENGRE WAGI NANGA PIKIN WAGI FU KOYRI: Ppa nanga mma di abi pikin-nengre wagi nanga pikin wagi fu koyri na den, den e aksi den na wan switi fasi fu gi yesi na den bodoy di den dienstverlener e gi ini a tori fu den presi di den e hori fri gi dati. Ma na presi fu dati den kan meki kobroyki tu fu pikin-nengre sturu ofu olo sturu di kan tay fasi na tapu na sturu na sey den ppa nanga mma. Ori grantangi na ini prakseri taki te yu e luku den wèti fu na brandweer taki pasi no e gi fu teki nanga yu beybi boksu, pikin kampeer bedi ofu den sortu sani dati ini a kongreshal. Den sortu bedi dati di bigi nofo èn no man fu puru poti makriki na wan tra presi, de tumusi kefarlek sani, no wwan gi sma di kan naki den futu na en fadon ma nanga dati gi na beybi srefi tu. Spesrutu te wan sani ben sa psa, dan den sani disi kan tyari tumusi bigi problema. A wroko makandra fu unu ini ala den sani disi den sa warderi bisondru.
DOPU: Den dopukandidaat musu pruberi fu sdon na tapu den sdonpresi ini na sturu faki di seti fu dati, bifo a programa bigin tapu satra mmanten. Ibri sma di abi na prakseri fu teki dopu musu tyari nanga en wan bescheiden swenkrosi nanga wan wasiduku. Baka na dopulezing èn na begi fu na takiman, dan na fesiman fu na konmakandra sa gi syatu instruktie na den dopukandidaat èn meki wan singi bekènti baka dati. Te na lasti couplet e bigin den dienstverlener sa tyari den dopukandidaat na a dopu okasi ofu na den oto noso bus di sa tyari den go drape, ala di den tra sma di de drape e singi na singi te na a kba. Fu di a dopu leki wan simbool fu na gi di wan sma gi en srefi abra de wan krosibey èn afersi fu en srefi a mindri a sma srefi nanga Yehovah, dan sani no seti gi wan so kari patna dopu te tu ofu moro dopu kandidaat e brasa makandra ofu e hori makandra den anu ala di den e teki dopu.
PIONIERIDENTIFICATIE: Ala gewoon nanga speciaal pionier, sosrefi tu opziener di e rèys nanga memre fu na Bèthelfamiri, musu teki nanga den go na a kongres, den Wachttoren Identifikatie- nanga Toewijzingkarta (S-202-0). Den wan di na a ten fu na distrikt kongres de siksi mun ofu moro langa ini a pionierwroko, kan kisi kongresbon na tapu na kongres dati wwan te den e sori na Wachttoren ID-karta. Sorgu na karta fu dati-ede net so bunbun leki moni; yu no kan kisi trawan na tapu na kongres. Pionier sa man kisi, efu den de, gratis buku ofu tra lektuur teyge pionier bijdrage na a afdeling fu Buku te den e sori den Wachttoren ID-karta.
FRIWANIWROKO: Na yepi fu friwani wrokoman de fanowdu fu meki wan distrikt kongres waka grati. A winsi yu kan wroko soso na wan pisi fu na kongres, den sa warderi den wroko fu yu. Efu yu kan yepi, go na a afdeling Friwani-wrokoman te yu doro na a kongres. Pikin-nengre di moro yongu leki 16 yari kan yepi tu fu na kongres waka bun, ma den musu wroko makandra nanga den ppa, mma ofu tra frantiwortu bigiwan.
LAPELKARTA: Weri den lapelkarta di meki spesrutu grantangi na tapu na kongres èn srefi tu te yu e rèys go èn kon fu na kongres. Disi e gi wi furu tron na okasi fu gi wan tumusi moy kotoygi te wi e rèys. Lapelkarta musu teki na a gemeente fu di den no sa de fu kisi na tapu den kongres.
WAN WORTU FU WARSKOW: A winsi pe yu e parkeer tu, sroto ala ten yu wagi èn noyti no libi wan san i ddon di sma ay kan si. Kibri den sani di yu abi efu a kan ini na kofru presi èn sroto disi. Luku bun gi ffuruman nanga langa fingaman di bigi konmakandra e hari kon. Disi abi na ini tu taki wi no musu libi no wan warti sani sondro fu sma luku en tapu na sdonpresi tapu na kongres. Grantangi de luku bun.
Ini wantu hotel a de kande makriki fu luku telefisi film di abi immoreel sani na ini ofu srefi soso skin sma. Disi e poti krakti na tapu na fanowdu fu no libi pikin-nengre fu luku telefisi na den okasi disi sondro taki sma e luku den