„Na vréde foe Gado”-districtskongres 1986
1 Nanga foeroe ferwakti Jehovah Kotoigi e loekoe foe den „Vréde foe Gado”-districts-kongres foe 1986 di ben seti gi na jari disi, kon. Ala sma sa wani seti sani foe de drape.
2 Sensi granwe kaba den dienstknegti foe Jehovah ben kon makandra tapoe bigi komakandra nanga kongres. Aladi den Israëlsma ben de na ini Egypte, dan Mozes nanga Aäron ben tjari foe eksempre den owroeman kon makandra foe gi den spesroetoe richtlijn (Ex. 4:27-31). Baka dati den Israëlsma ben kon makandra tapoe a komando foe Gado na a foetoe foe na bergi Sinaï. Na a okasi dati den ben de kotoigi foe na bigi sori foe Jehovah makti di e gi frede èn den ben kisi en komando (Ex. 19:10-19). Bakaten, di na tempel ben e bow, Salomo ben tjari na pipel kon makandra ini a tori foe na gi abra foe na oso na ini Jeruzalem na Jehovah. Na komakandra ben hori foeroe dé èn di den sma ben drai go baka na oso, den ben „breti èn prisiri ini ati foe na boen di Jehovah ben doe gi David nanga gi Salomo èn gi en pipel foe Israël” (2 Kron. 5:1-7:10). A pipel ben kon ala ten baka foe njan den ala jari fesa èn den kisi foeroe blesi foe dati.
3 Den fosi kristen ben kan waka a baka na patron disi. Na foeroe okasi den ben kon makandra na ini bigi ipi foe jere Jezus e taki. Go prakseri pikinso sortoe blesi den sma ben kisi di ben abi na grani foe de drape di Jezus ben taki den wortoe foe na Bergipréki! (Matt. 5:1-7:29). Baka a dede foe Jezus den bakaman foe en ben tan kon makandra, soleki na tapoe na pinksterdé foe 33 G.T., di santa jeje ben kanti tapoe den (Tori. 2:1-4). Na apostel Paulus ben gi na fermane: „Meki wi poti ai tapoe makandra foe gi makandra dek’ati foe sori lobi nanga toemsi boen wroko, no libi den komakandra foe wi, soleki son sma abi na gwenti, ma foe gi makandra dek’ati èn dati moro so te oen e si a dé e kon krosbé.” — Hebr. 10:24, 25.
4 Ooktoe na ini den ten disi di no psa so langa kongres e teki wan spesroetoe presi ini wi theokratis seti. Den no de soso prisiri demakandra, ma den abi na prakseri foe leri Jehovah dienstknegti èn foe tjari den kon na wan. Ala sma di de drape e kisi na a srefi ten na srefi leri. Nanga disi na vréde nanga wanfasi e go a fesi. Den e lési na wortoe foe Gado èn e taki foe en èn krin richtlijn e gi. Den sortoe komakandra disi e tjari foeroe jeje blesi kon èn den de toemsi prisiri okasi.
NO MISI NO WAN PISI FOE NA PROGRAMMA
5 Tapoe den kongres di seti foe na jari disi na thema „Na Vréde foe Gado” sa tanapoe na fesi. Jehovah de na Gado foe vréde èn ooktoe a ben blesi en pipel nanga vréde (Ps. 29:11). Ibridé wan tra pisi foe na thema disi sa tjari kon na krin.
6 Doe ala san joe man foe de ala fo dé drape. Na fosi lezing sa bigin tapoe fodewroko mamanten 9.00 joeroe. Na moro bigi pisi foe den brada nanga sisa sa abi nanga disi nofo ten foe waka go fodewroko mamanten na a presi pe a kongres e hori.
SANI DI SETI FOE A DOPOE
7 Na dopoe de alaten wan foe den hémarki foe wan kongres. Na dopoelezing moro foeroe sa hori tapoe satra mamanten. Den sma di abi na prakseri foe meki den dopoe den, moe loekoe nanga den owroeman foe a gemeente den aksi ini akroederi nanga den sani di taki tapoe bladzijde 173-175 ini Wi diniwroko-boekoe. Ala sma di wani teki dopoe, moe tjari krosi kon nanga en di fiti foe dopoe èn nanga wasdoekoe.
8 A boen foe poti prakseri dati a Genootschap den sa si nanga ala prisiri dati ala dopoe sma tan sidon na ini den rij di den poti gi den na a ten foe a singi foe den fosi dri couplet foe a singi di e tjari na dopoelezing kon na wan kaba. Den dienstjepiman di den gi a wroko sa tjari na a singi foe a di foe fo couplet den dopoe sma go a doro. Den arkiman moe tan a den presi te leki na heri singi kaba singi sodati na waka gwe foe den dopoe sma kan waka makriki. Wi e warderi a wroko makandra foe joe na ini a teki foe den disi.
DE WAN BOEN ARKIMAN
9 Wi alamala ben sa wani arki boen. Israël foe owroeten ben kisi a komando: „Tjari a pipel kon makandra den man nanga oema èn den pikinwan . . . sodati den mag foe arki èn sodati den mag foe leri” (Deut. 31:12). Wi e kon makandra foe Jehovah gi wi leri. Odo 1:5 e taki: „Wan koniwan sa arki èn teki moro leri na ini en”.
10 Na ini Na Wachttoren foe 1 februari 1986 toemsi moi rai ben gi na tapoe bladzijde 30 foe a fanowdoe foe arki boen tapoe na kongres. Den ben taki foe eksempre: „Gi foeroe foe wi a ben kostoe boen foeroe ten èn moni foe kon. Meki wi sorgoe soboen dati wi de punctueel èn ini wan boen skinkondisi. Disi wani taki wi no sa go njan èn dringi psa marki èn no sa tan na ai lati a neti. Meki foe dat’ede wi loekoe boen dati wi njan èn dringi nanga marki èn go biten na bedi, sodati wi de nanga ai èn ooktoe boen foe teki na ini wi ala jeje njanjan di e gi. Meki wi tan sidon na a ten foe na programma tapoe wi presi èn no waka lontoe ofoe hori takmakandra. . . . Na ten foe taki nanga wi mati, de bifo èn baka na programma. Ija, meki wi kon nanga a faste prakseri foe njan èn dringi troetroe na jejefasi.” Wi sa doe moeiti foe poti na toemsi moi rai disi na ini wi libi.
11 Wi e feni en wan switi sani dati a moro bigi pisi foe den brada nanga sisa tapoe a kongres e span densrefi troetroe nanga a faste bosroiti foe arki a programma. Sma di dati osofamiriman e sidon na makandra e skrifi punt di wani taki wan sani èn den tekst den e lési na ini den égi bijbel. Wan koranti-skrifiman di ben de na tapoe wan foe den kongres foe wi na ini Nairobi (Kenia), ben taki disi: „Den alamala ben gersi taki den abi wan bigi respeki gi Jehovah. Ala sma, èn ooktoe den pikin ben arki nanga pasensi na den takiman di ben kon baka makandra. Den ben tan sidon tapoe den presi foe harfoe wan te tien over 5.” Den brada nanga sisa na ini Afrika e gi wi wan toemsi moi eksempre foe waka na den baka. Wan koranti na ini Argentinië ben taki dati na distriktskongres di ben hori no solanga psa kaba na ini Buenos Aires ben abi leki marki „orde, frifasi èn wan toemsi aparti kibrifasi” a mindri den sma di ben de drape. Wi brada nanga sisa na ini a kondre dati abi toemsi foeroe warderi gi na grani foe komakandra tapoe bigi kongres foe di a wroko foe wi foeroe jari ben tapoe foe a sé foe wet foe lanti.
12 Soleki wi ben taki kaba, dan wi no wani poeroe a prakseri foe trawan na a ten foe a programma, foe di wi e taki, e waka go kon ofoe foe soso e go na toilet. Wan owroeman na ini den Verenigde Staten foe Amerkankondre di ben doro na wan bigi kongres a jari di psa, ben taki dati en nanga en oema alaten moeilek ben kan ferstan na fosi pisi foe na programma foe na woenjoewoenjoe foe den sma di ben waka lontoe èn taki èn foe den sma di ben kon lati e soekoe presi. A ben ferklari dati srefi na a tra pisi foe na programma na ini den presi di e seri sani èn den pasi foe waka, alaten nomo waka-go waka-kon èn taktaki ben de.
13 Papa nanga mama sa wani foe doe den frantwortoe foe loekoe boen na den osofamiri foe den èn foe loekoe dati den pikin foe den arki èn teki leri. Wi e gi osofamiri-edeman na rai foe loekoe makandra nanga den osofamiri den rai di gi na ini na ini na inlegvel disi bifo den fisiti na kongres. Bakadati dan den alamala densrefi ben sa wani poti den rai disi ini den libi. Nanga dati trawan sa kisi wan boen eksempre, èn spesroetoe osofamiri di kande pas tai densrefi nanga Jehovah Kotoigi. Tapoe wán kongres wan groepoe jongoe sisa di ben de tini ete ben sidon na makandra no na den papa nanga mama foe den. Den no ben arki na a programma èn den no ben singi toe ofoe begi. Na presi foe dati den ben taki nanga makandra èn ben sidon na a ten foe na heri programma foe njan switsani, èn den ben abi pikinso belangstelling gi san ben tjari kon a fesi foe a podium. A waka nanga libi foe den ben poeroe a prakseri srefsrefi foe den wan di ben sidon na ini a birti foe den. Nanga disi wi wani tjari kon a fesi sortoe problema kan sori ensrefi efoe papa nanga mama e libi sani so èn no e sidon na den pikin foe den èn no e loekoe den.
NA HORI FOE SDONPRESI GI TRA SMA
14 Na ini Wi Kownoekondredienst foe juli 1985 wantoe kenki ben gi ini a tori foe na hori foe sdonpresi gi tra sma. Tapoe bladzijde 5 na inlegvel ben taki dati „SDONPRESI MAG HORI NOMO GI SMA FOE WI ÉGI OSOFAMIRI ÈN SMA DI E REIS NANGA WI NA INI ASREFI OTO”. No poti noiti sani na tapoe sdonpresi na sé joe. Nanga disi den sma di e waka soekoe wan sdonpresi kan si makriki pe presi de ete. Wi warderi en srefsrefi dati foeroe sma ben doe den moeiti foe poti den rai disi ini den libi. Ooktoe a jari disi wi no ben sa wani broko wi ede nomo gi wi égi persoonlek fanowdoe ma ooktoe gi den fanowdoe foe trawan. — Gal. 6:10; 1 Kor. 13:5.
15 Ai speiti wi dati te now ete wi e kisi wantoe negatief tori foe a veld. Tapoe wan kongres leki fa den taki sma ben kon tapoe wan sonde mamanten na wan ten foe arfoe féfi nanga sribikrosi na ini wan zaal èn den ben poti wasdoekoe sribikrosi nanga verlengsnoer tapoe hondrohondro stoeroe èn disi den ben doe aladi moro leki nofo sdonpresi ben de gi ala sma di ben sa kon. Tapoe ete wan tra kongres — ini wan stadion — wan brada e ferteri wi dati son fisitiman ben teki a reti foe tapoe heri blok foe sdonpresi. Foeroe foe den sdonpresi disi den no ben gebroiki. Sonwan foe den sdonpresi ben abi na a ten foe na heri programma tapoe den njanjanmanki nanga ijsboksoe. Na asrefi ten foeroe owroe sma ben waka soekoe sdonpresi èn no ben kan feni wan presi.
16 Den sortoe tori disi no e meki wi sari srefsrefi?
KROSI NANGA FA WI E DRES WISREFI A DOROSÉ
17 Foe sortoe presi wi e meki gebroiki foe en na a ten foe na kongres, den e tron wi kownoekondrezaal èn foe dat’ede wi moe tjari wisrefi èn weri wi krosi akroederi nanga disi. Den brada nanga sisa foe wi heri boen ben man doe disi èn foe dat’ede wan toemsi moi kotoigi ben kan gi. Loekoe pikinso na a positief ondrofenitori disi foe Canada di e kon now: Wan sisa ben tanapoe na a kongres e wakti tapoe wan famiriman di ben moe kon ete. A ben si fa wan oema no fara foe en ben loekoe boen na den sma di ben go na a kongres na a stadion. Baka wan pisten a oema disi wai go na a sisa èn ben taki: „A de aparti foe si fa den sma disi e weri den krosi foe go na wan kongres. Den de leki foe joe kan tringi den psa ini wan linga, so moi èn netjes den de. San e ferwondroe mi so, de fa den jongoesma a mindri den tan. Nowan sma a mindri den e weri wan spikribroekoe! Dati na wan toemsi ferwondroe sani foe si na jongoesma!” Na oema disi ben teki wantewante na kari foe fisiti na kongres. San a ben si ben meki dipi indruk tapoe en.
18 Na krosi foe wi no wawan moe de bescheiden èn moi foe si, ma ooktoe praktis gi na okasi disi. Alenkrosi nanga prasoro de boen na ini na geval foe alen. Wi sa wani prakseri na dati.
19 Ma san de foe taki foe na fasi fa wi e dres wisrefi a dorosé te wi de na a presi pe wi e sribi ofoe e reis go na a foto pe na kongres e hori? Wan opziener di e waka lontoe loekoe gemeente ben taki dati son brada nanga sisa te den ben kon baka na a oso pe den ben e sribi, esesi den e weri tra krosi sodati a ben gersi leki den ben e kampeer ofoe e picknick. Sonwan ben weri srefi onbescheiden èn aparti krosi sodati moeilek joe ben kan sabi den leki Jehovah Kotoigi. Wi sa wani de bescheiden, sodati wi no gi nowan enkri réde foe sma naki foetoe fadon. — 2 Kor. 6:3.
SANI DI SETI GI NA VELDDIENST
20 Den sma na ini den kongresfoto moro foeroetron e kisi foe jere foe den kongres foe wi nanga jepi foe koranti, radio nanga tv. Den sani disi nofotron e wiki den belangstelling èn den abi foeroe aksi. Nanga disi nofotron wi man no wawan foe gi den kotoigi nanga wi toemsi moi waka nanga libi ma ooktoe foe taki nanga den sma srefi. Loekoe na okasi foe gi okasipréki na a ten te joe e wenkri ofoe efoe joe e reis go ofoe gwe na a kongresterrein.
21 Tapoe disi e kon ete dati ooktoe now baka tapoe ibri kongres sani seti gi velddienst tapoe fréda. Loekoe ooktoe na a ede prakseri „Programmaten” na ini na fokanti „Sani di wi moe hori na prakseri gi . . .”. Nanga disi wi alamala sa de na ini na okasi foe teki prati wan ofoe toe joeroe na a velddienst. Tjari grantangi nofo tijdschrift nanga joe foe gebroiki den na ini na velddienst. A ben sa boen ooktoe foe teki gebied someni leki a kan a fesi èn foe bepaal fa èn nanga soema joe sa go na a gebied. Nanga disi joe warderi gi na kongres sa gro.
FRIWANI WROKOMANDIENST
22 A e aksi boen foeroe wroko foe meki wan kongres waka soepel èn foe sorgoe gi den fanowdoe foe den sma di drape. Foeroe fri-wani-wrokoman de fanowdoe. Na kongrescoördinator na ini oenoe gemeente sa kisi bodoi foe afdeling di abi fri-wani-wrokoman ete fanowdoe èn a sa meki dati bekenti na ini na gemeente. Efoe joe wani doe fri-wani wrokoman wroko, a kan jepi joe na ini disi. Pikin di de moro jongoe leki 16 jari alaten moe wroko makandra nanga wan papa ofoe mama ofoe wan tra bigisma. Wi e gi dek’ati na papa nanga mama nanga den pikin foe den efoe dati kan foe wroko makandra ini na fri-wani-wrokomandienst.
23 A kande dati na a ten foe a kongres fanowdoe de foe ekstra fri-wani-wrokoman. Efoe joe wani jepi, go dan te joe doro na a kongres na na afdeling fri-wani-wrokoman. A de klari di joe de klari foe doe dienst wi e warderi srefsrefi èn a sa meki dati na kongres waka boen. — Ps. 110:3.
NJANJAN SANI
24 Sani e seti spesroetoe baka foe sorgoe gi den skinfanowdoe foe wi. Den sani di seti gi njanjan nanga dringi sa de densrefi leki den distriktskongres foe den jari di psa. Wi no de nanga tangi gi na tranga wroko foe den brada nanga sisa foe na afdeling njanjan di e sorgoe foe nofo njanjan foe wan redelek prijs?
25 Kongresbon foe bai njanjan nanga dringi sa de ini karta foe toe goloe (f 2,00) foe 20 bon. Wi wani gi joe dek’ati foe bai nofo bon na ini a gemeente foe kan sorgoe ini den fanowdoe foe joe osofamiri ini den fosi toe ofoe dri dé. Joe kan bai dan tapoe a kongres moro bon.
BOSROITI
26 Meki a de so dati wi nanga wi osofamiri teki a faste bosroiti foe fisiti ala programma-pisi foe na „Vréde foe Gado”-distriktskongres èn foe poti wisrefi na tapoe na leri di sa gi. Wi fesi no sa fadon. Boiti foe dati poti prakseri na tapoe den fanowdoe foe wi brada nanga sisa èn meki wi doe san wi kan foe sori belangstelling èn kristen lobi (Galacia 6:10). Fa wi abi wan bigi grani foe anbegi na Gado foe vréde èn foe libi na ini vrede nanga joe brada nanga sisa makandra na ini wan grontapoe pe trobi nanga tranga de. Meki wi go doro „foe kibri na wanfasi foe na jeje na ini na banti foe vréde di e tjari sani kon a wan”. — Ef. 4:3.
Sani di wi moe hori na prakseri gi na distriktskongres
PROGRAMMATEN: A e sori dati wi koni èn abi warderi efoe wi e tan sidon tapoe wi presi te a programma e bigin. Disi sa de na tapoe fodewroko na a ten foe 9.00 joeroe mamanten, tapoe fréda na a ten foe 5.00 joeroe bakadina, tapoe satra na a ten foe 9.00 joeroe mamanten èn na tapoe sonde na a ten foe 9.30 mamanten. Wi e sori densrefi toemsi moi égifasi efoe wi no e doe esesi foe gwe bifo na programma kon na wan kaba. Tapoe fodewroko a sa kaba na wan ten foe 8.20 joeroe na neti nanga singi èn begi. Fréda mamanten velddienst de na wan ten foe 9.00. Tapoe satra nanga sonde dan laatste singi nanga begi de 8.10 joeroe a neti.
PIONIERIDENTIFIKATIE: Ala gewone èn speciale pionier, èn ooktoe den opziener die waka lontoe loekoe gemeente èn sma foe na Bethelfamiri, moe tjari go nanga den na Wachttoren Identifikatie- nanga toewijzingskarta (S-202-0) foe den. Den sma di na a ten foe na distriktskongres de siksi moen ofoe moro langa na ini na pionierwroko, kan kisi kongresbon tapoe a kongres foe na waarde foe f 25,00 te den sori den ID-karta. Behandel na karta disi net so boen leki moni; joe no kan kisi wan trawan tapoe na kongres. Pionier nanga memre foe na Bethelfamiri sa kisi gratis boekoe ofoe tra boekoe tége pionierprijs na a afdeling lektuur te den sori den Wachttoren ID-karta.
LAPELKARTA: Den karta disi e gi leki wan wrokosani foe barwroko gi na kongres, èn ooktoe foe kan sabi den brada nanga sisa foe wi moro makriki di de drape. Weri a lapelkarta foe dat’ede na tapoe a kongres èn ooktoe te joe e reis. Joe moe teki a karta disi na ini joe gemeente foe di den no sa de foe kisi na tapoe a kongres. Den lapelkarta e kostoe 3 sensi foe wan. (Na Genootschap seni lapelkarta go kaba na ibri gemeente, ma den plastiekhouder den gemeente moe bestel ete.)
WAN WARSKOW WORTOE: Pe joe e poti joe oto ooktoe, sroto joe oto alaten èn no libi noiti wan sani di sma kan si. Kibri den sani di joe abi efoe a kan ini na kofroe foe joe oto èn sroto dati. Loekoe boen ooktoe nanga foefoeroeman èn zakkenroller, di bigi komakandra e hari den kon. Disi wani taki ooktoe dati joe no libi no wan warti sani na tapoe joe sdonpresi a baka na tapoe na kongres sondro foe wan sma de drape foe loekoe en.