„Fertrow tapoe Jehovah”-districtcongres 1987
1 O moi na nen foe na congres 1987 e tjari den firi foe Jehovah Kotoigi kon na fesi! „Fertrow tapoe Jehovah” wani taki moro gi wi leki soso wan thema; a e tjari den moro dipi overtoigi gi wi kon na fesi, Foeroe sma ini a grontapoe e fertrow tapoe libisma koni nanga prestatie; ini na lawfasi foe den den e poti fertrow tapoe densrefi èn tapoe den bekwaamheid foe den foe tan na libi (Psalm 49:6, 7, 10; Odo 18:11). Wi na a tra sé abi fertrow dati Jehovah, na Moro Héwan foe na universum, sa meki den pramisi foe en kon troe gi na libisma-famiri di e gi jesi. Wi abi na overtoigi taki a sa sorgoe gi ala den fanowdoe foe wi èn sa kibri wi gi pina di e tan langa te Satan seti seti sa kon na wan kaba. Joe no e feni dati „Fertrow tapoe Jehovah” de wan toemsi moi thema di fiti a districtcongres foe wi na ini 1987? Wi kan sori dati wi e warderi na jeje seti disi foe a boen foe wi te wi e de na ala den dri dé foe na congres.
2 Na a ten disi den plan foe joe ini a tori foe vervoer nanga tanpresi moe de pikinmoro klari. Soleki ini Na Wachttoren foe 1 februari 1987 ben tjari kon a fesi, dan négi congres sa hori ini Nederland, foe san wan sa de Ingrisi Tongo èn wan Italiaan Tongo. Foedi na congres ini 1987 sa hori dri dé na presi foe fo, soleki ini den jari di psa, meki ibridé sa abi wan foeroe schema. Na programma abi lezing, demonstratie nanga drama. Sani no sa seti na a congres a jari disi gi velddienst.
3 Foedi a congres e hori dri dé langa meki dati a kan de seker dati ala sma moro makriki kan de drape. Efoe a de fanowdoe, dan joe ben go kaba na a basi foe joe foe aksi fri so dati joe kan de ala den dri dé tapoe na congres? Na heri programma, foe bigin nanga a fosi singi tapoe fréda 9.10 joeroe mamanten te na a lasti begi tapoe sonde 8.00 joeroe na neti, sa abi psa marki praktis, leri na jejefasi di e tranga joe bribi èn ooktoe dek’ati di joe no kan tan sondro den.
4 NA PROGRAMMA: Ibridé sa abi en égi bijbel thema di abi foe doe nanga na algehele thema foe na congres — „Fertrow tapoe Jehovah”. Bodoi sa gi foe pionierwroko, fa foe kan panja na ibri okasi na boen njoensoe, pikin nanga jongoewan, èn saka joe srefi na Jehovah na wan loyaal fasi. Tapoe satra krakti sa poti a tapoe o prenspari a de foe studeri fajafaja èn foe span wisrefi tranga ini a velddienst. Boiti foe dati, owroeman sa kisi jepi nanga rai di de foe a ten foe now.
5 DOPOE: Tapoe a moro bigi pisi foe den congres na dopoelezing sa hori tapoe satra mamanten 11.30 joeroe. A sa gi dek’ati foe arki na dopoelezing èn foe si den kandidaat di e doe wan publiki bekenti dati den ooktoe now e fertrow krinkrin tapoe Jehovah. Awinsi a lezing moro spesroetoe de gi den sma di leki wan symbool foe a gi di den gi densrefi abra e teki dopoe, tokoe a de so dati wi alamala kan njan boen foe en te wi e arki boen èn e go prakseri foe wi egi matifasi nanga Jehovah, awinsi o langa wi de kaba ini waarheid.
6 Den sma di abi plan foe meki den dopoe den tapoe wan foe den districtcongres, moe sorgoe dati a fesiman opziener boen langa bifo a congres sabi disi, so dati nofo ten sa de foe loekoe den aksi ini na Diniwroko-boekoe. Na Wachttoren foe 1 juni 1985 ben gi tapoe bladzijde 30 na rai di e kon foe krosi di fiti gi dopoeman: „Na a krosi di wan sma e weri, bescheidenfasi de seker wan sani di den e aksi. Ini a ten disi, now di den sma e meki mode wani foe poti moro prakseri na tapoe seksualiteit èn e feti a baka foe sori wan moro bigi sososkinfasi di de, dan disi de wan prenspari sani. Wan tra sani san wi moe hori na prakseri, de dati son badpak di te a dré e sori taki a de bescheiden, no de disi te a nati. No wan sma di e teki dopoe, sa wani de na oorzaak dati tra sma prakseri poeroe ofoe naki-foetoe na sowan serjoesoe sani di e psa” (Fil. 1:10). Disi de gi de brada èn gi den sisa so.
7 Dopoe kandidaat sa proeberi bifo na programma bigin tapoe satra mamanten foe de tapoe den presi di den poti gi den na fesi sé. Baka na dopoelezing den sa aksi joe foe tan tanapoe te den e singi a lasti singi. Baka te na di foe dri couplet singi dan den dienst-jepiman sa tjari den dopoe kandidaat go na dopoe okasi ofoe na den oto di sa tjari den go drape.
8 KISI LERI FOE JEHOVAH: Den ben taki a fesi: „Èn ala joe manpikin sa de sma di kisi leri foe Jehovah èn a vrede foe joe manpikin sa de psa marki” (Jesaja 54:13). Den ben taki den wortoe disi gi na agersi oema foe Jehovah, en hemel organisatie. Den „manpikin” foe en e kisi leri foe fertrow tapoe Jehovah. Na districtcongres de wan foe den wrokosani di Jehovah e gebroiki foe gi wi leri ini a ten disi. Joe e si dati ooktoe so? Kande esesi joe boo de foe taki: „Ija.” Ma joe e doe tapoe a congres ala san joe man foe teki na heri programma ini joe? A de krin dati disi no de so alaten nanga son sma. San wi kan doe persoonlek èn leki osofamiri foe loekoe a tapoe dati wi njan boen someni leki a kan foe na congresprogramma?
9 Kande a e kostoe wi boen foeroe moeiti nanga moni foe fisiti na congres. Boiti foe dati na Genootschap nanga den brada nanga sisa ini den congresfoto ben wroko foeroe joeroe foe gi wi wan tanpe so boen leki a kan. Poti a tapoe dati den doesoendoesoen joeroe di a Genootschap èn den takiman ben gi na a sreka foe na programma èn a de krin dati wi abi foeroe foe de grantangi. A warderi foe joe sa poesoe joe foe njan boen someni leki a kan foe na heri congres?
10 A de prenspari foe teki ibri neti nofo rostoe. Wi wani de nanga ai èn kon na a congres nanga foeroe ferwakti foe njan boen foe na programma ibri minuut. Efoe joe kon werweri, dan a no sa makriki foe tan nanga ai èn foe froestan sani boen èn na krakti foe joe foe njan boen foe na programma dorodoro sa kon moro mendri. Te wi rostoe boen ibridé soboen èn kon na a congres, dan disi sa meki dati wi sa njan switi foe na jejefesa.
11 Wi sa kisi jepi foe poti wi prakseri a wan te wi go denki foe san-ede wi e go na a congres — foe ’arki èn teki moro leri ini wi’ (Odo 1:5). Soleki skrifi na ini Jesaja 55:1 dan Jehovah ben kari en ferbontoe-pipel foe gebroiki den seti di e gi libi èn di ai pristeri sondro foe oen pai wan sani foe en. Ma foe njan boen foe dati, den ben moe ’arki boen’. Boiti foe dati a ben gi den dek’ati nanga den wortoe: „Beni joe jesi èn kon na mi. Arki èn joe sili sa tan a libi” (Jesaja 55:2, 3). Wi ben sa man foe teki na jeje njanjan di e hori wi libi èn di ben gi wi sondro gridifasi na ini na disiten jeje paradijs efoe wi ben sa de sribisribi foe teki den wortoe foe den takiman na ini wi? A no de foe taki dati wi wani sori warderi foe doe ala sani wi kan foe de srekasreka na jejefasi èn na skinfasi, so dati wi no sa misi noti foe na programma.
12 Wán switi punt foe districtcongres di wi e feni wan diri sani de na demakandra nanga wi brada nanga sisa. Wi e loekoe nanga angri foe njoen owroe matifasi, foe kon sabi njoen sma èn foe kenki ondrofenitori nanga makandra. Son sma e seti sani gewoonlek foe go fisiti baka a programma foe na dé den famir’man ofoe boen mati foe den. Den reünies disi kan de switi srefsrefi èn gi dek’ati na jejefasi. Ma sorgoe grantangi dati den sortoe fisiti disi no de so lati na ini den neti joeroe dati joe no kisi a fanowdoe rostoe.
13 A ben sa de wan boen sani efoe pikinso prakseri ben poti a den sani di wi e teki go na a congreshal. Son brada nanga sisa ben teki go nanga den bigi ijsbox nanga tra bigi sani di no e fiti na ondro stoeroe foe den. Den ben poti den sani disi na ini den pasi foe waka ofoe tapoe légi stoeroe. Wi moe hori tra sma ini prakseri ini den sortoe afersi disi, foedi nanga disi tra sma no kan feni sidon presi èn e psa sontron den wet foe na brandweer.
14 MEKI NOTITIE: No frigiti foe teki nanga joe boiti joe bijbel nanga singi-boekoe ooktoe wan schrift nanga pen ofoe potlood. Kande oen no abi a gwenti foe skrifi sani na a ten foe den ala wiki gemeente komakandra foedi a moro bigi pisi foe den lezing nanga demonstratie komoto foe materiaal di wi alamala abi ini na gemeente. Ma a teki foe bodoi na ini wi tapoe oen districtcongres de pikinso tra fasi. Aladi son lezing bakaten sa kon ini den boekoe, dan nanga trawan a no sa de so. Srefi awinsi ala lezing te foe kaba ben sa kon ini druk, dan ete a abi boen winimarki foe meki sjatoe aantekening di wani taki wan sani.
15 A meki foe aantekening de wan jepi foe kan poti wi prakseri nawan. Hori joe pen nanga joe schrift na joe klariklari èn soekoe foe poti den edepunt nanga prenspari tekst aparti di a takiman e kari ofoe wan njoen prakseri di a tjari kande kon na fesi. Meki moro fara sjatoe notitie foe na stof. Gewoonlek a sa de nofo foe skrifi wan edeprakseri ini wan ofoe toe punt. Te joe waka baka na rai disi, dan sondro degedege joe sa kan poti joe prakseri moro betre na wan. Moro mendri kans sa de dati sani hari joe prakseri poeroe ofoe joe prakseri tjari gwe nanga wan sani san e psa ini na congreshal. Joe sa de ooktoe srekasreka foe teki prati na a overzicht foe den edepunt foe na congres di sa hori na ini a gemeente a wiki baka a congres.
16 Joe sa abi tini ofoe jongoe pikin na joe? Foe san-ede joe no ben sa seti sani dan dati den ooktoe ben sa meki aantekening, aladi joe e hori a bekwaamheid nanga libimarki foe den a prakseri? Meki a osofamiri sabi dati joe abi na prakseri foe loekoe wantoe foe den edepunt di den takiman tjari kon a prakseri te joe drai gobaka na a oso pe joe e tan ofoe te joe de a pasi e go na oso. Moro jongoe pikin kan kisi dek’ati foe skrifi ala tekst di lési, ofoe foe skrifi o foeroetron den e jere wan takiman e kari sroto-wortoe ofoe a thema foe en lezing. Tapoe a fasi disi den sa poeroe moro ini na lezing. A boen dati pikinnengre leri fu arki boen tapoe kristen komakandra. Joe sa jepi den foe poti wan boen fondamenti ini a ten di e kon. — 1 Tim. 6:19.
17 WAN SONDRO FOWTOE WAKA NANGA LIBI: Ibri jari wi wi e kisi na a kaba foe wi districtcongres boen kommentaar foe na ordelekfasi èn a boen waka nanga libi di ben de krin foe si. Sma di e loekoe wi nofotron e taki foe a boen krosi èn a fasi fa wi e sorgoe wisrefi a dorosé foe den bigisma èn den pikinnengre no foe taki ete srefi foe na vrede nanga wanfasi foe den brada nanga sisa tapoe a congres srefi. A jari 1986 no ben de tapoe disi wan uitzondering. Ma foe san-ede wi o taki disi? Foedi a e gi dek’ati foe sabi dati te wi e gi wan toemsi moi eksempre, tra sma e si disi èn e warderi disi (1 Kor. 4:9). Ma moro prenspari a de dati Gado e kisi prijse nanga disi. Wi wani gi grani na Jehovah ini wortoe nanga doe foedi libisma e kroetoe na organisatie èn srefi na Gado di wi e anbegi kande tapoe na gron foe wi waka nanga libi meki wi wani doe sani nanga wi heri konsensi ini a fasi tapoe wi e handri.
18 Na man di e abi a loekoe tapoe wan motel ben skrifi: „Ala den sma foe joe di ben go na a congres ben sori switifasi srefsrefi èn sori boen maniri èn wi ben njan boen foe a de foe den djaso.” Wan lantiman di ben libi na wan stadion di Jehovah ben gebroiki gi a congres foe den, ben taki: „Leki buurman mi kan taki dati mi ben bribi ini a wroko makandra foe oenoe, na a fasi tapoe fa oenoe e krin na stadion . . . mi e bribi na a disiplin foe oenoe.” Wan skowtoe ben taki: „Oen de troetroe ini wanfasi èn kolokoe. Te oenoe di dja wi no abi nowan problema nanga vrede èn orde. Ala sma e tan rostoe èn correct. Oenoe e poti oen oto ordelek èn efoe wan problema kon a makriki foe go taki nanga oenoe.” Wan bankdriktoro ben taki: „Ibri sma ben tjari densrefi na wan boen fasi. Te joe de a mindri den [Jehovah Kotoigi], dan noti de foe joe broko joe ede. Den de troetroe sma foe Gado di e meki vrede kon. Sowan jejefasi de fara foe soekoe na tra groepoe.”
19 Ma wantoe kontren de na san wi moe poti prakseri te now ete foe kan ’skijn leki lampoe’, spesroetoe te wi no de moro tapoe a congres ma foe eksempre na ini restaurants nanga hotel (Fil. 2:15). Na ini a fosi presi wi kan aksi wisrefi: „San wi e doe ini na hori sidonpresi foe soso?”
20 Sma ben taki dati ini a sani disi wi ben go a fesi èn foe disi wi e prijse oenoe. Ma hori na ini prakseri dati joe kan hori sidonpresi wawan gi sma foe joe egi osofamiri èn sma di e rij nanga joe ini na srefi oto. A de wan logis sani dati joe sidon na sé den sma nanga soema joe ben kon èn wi e ferwakti dati osofamirman e sidon makandra. Ma no hori presi grantangi gi trawan. Nofotron mati e soekoe wan sidonpresi srefi èn den no e gebroiki den ekstra sidonpresi di joe ben hori gi den. Fertrow tapoe Jehovah èn te joe e waka baka den richtlijn disi, sa kon na krin dati wi abi warderi gi na congres.
21 Alaten wi moe tjari wisrefi tapoe wan fasi pe wi de wan eksempre. A ben psa dati son brada nanga sisa te den drai kon baka tapoe na presi foe den pe den o sribi e weri esesi tra krosi so dati ai gersi leki den ben go kampeer ofoe picknick. Wantoe foe den ben weri srefi onbescheiden nanga aparti sortoe krosi so-dati moeilek joe ben kan herken den leki Jehovah Kotoigi. Efoe wi de now na ini na congresfoto ofoe na particulier adres ofoe na ini hotel, na presi foe de ini wan switi fesastemming, wi moe sori jejefasi èn tjari wisrefi leki bedinari. Wi sa wani de bescheiden foe no gi nowan enkri rede foe sma naki foetoe fadon. Te wi e hori srefi ini pikin sani getrow na den markitiki foe Jehovah, dan wan boen kotoigi sa gi. — 1 Petr. 2:12; 2 Kor. 6:3; Luk. 6:10.
22 Baka na kaba foe na congresprogramma foeroe sma e feni en wan moi sani foe konmakandra foe njan èn abi switi demakandra. Efoe a ten e gebroiki na tapoe wan froestanfasi dan disi kan gi tranga foe di wi o kenki nanga makandra èn taki foe den edeprakseri foe a congres. Disi no sa de nowan rede foe kragi, foedi wi e tjari wisrefi „tapoe wan fasi di warti a boen njoensoe”. — Fil. 1:27.
23 Leki wan lasti sani ete foe memre oenoe foe no fisiti makandra na a ten foe na congres ofoe foe taki nanga makandra. Ofoe a programma bigin kaba èn joe sidon tapoe joe presi, ma joe e si dan wan brada e waka psa di boen langa joe no ben si en moro, dan san joe o doe dan? Joe sa opo, wai anoe èn kari a brada ofoe joe sa sidon rustig èn proeberi foe go soekoe en bakaten? San joe ben sa prakseri foe wan brada ofoe sisa di baka na bigin foe na komakandra e kari wan sma di net kon ini na Kownoekondrezaal ofoe di ini a ten foe na komakandra ben sa go taki nanga wan sma bakasé foe na zaal? Efoe joe gwe libi joe sdonpresi foe go na toilet ofoe joe tjari joe pikin go drape, dan a ben sa de wan lobi sani foe drai kon baka so esi leki a kan na joe sdonpresi sondro foe go hori takmakandra ini den pasi foe waka. Wi ben kisi foe jere dati nowan enkri difrenti de na ini ofoe wi de now tapoe wan congres ofoe na ini wi Kownoekondrezaal.
24 FANOWDOE FOE NJANJAN: Soleki fa na fesi kaba na ini na inlegvel foe Wi Kownoekondredienst foe maart 1987, dan wan toe kenki o tjari kon na ini na seti foe njanjandienst. Nanga disi moro brada nanga sisa di na fesi ben e wroko foe sreka njanjan kan njan boen foe na jeje njanjan di e gi. Tokoe wi sa warderi dienst foe den sma di de fanowdoe leki friwaniwrokoman.
25 Ala sma di e fisiti a congres, sa si dati a njanjan di de sa gi satisfaksi èn de boen gi a skin èn abi nofo afwisseling gi den dri dé. Boen sorgoe gi foe bai njan foe boen kwaliteit. Te wi hori baka krinkrin gi na seti foe na njanjandienst, dan wi sa jepi tapoe foe wan pisi den kostoe foe a congres.
26 FRIWANIWROKOMANDIENST: Na krakti di poti na tapoe doe sani moro eenvoudig wi e si spesroetoe ini a tori foe den man-joeroe di de fanowdoe foe orga wan districtcongres èn foe meki a drai. Den sma di de jari kaba ini a waarheid kan memre ete dati bifo èn ini a ten foe bigi congres doesoendoesoen friwaniwrokoman ben de fanowdoe di ben wroko foeroe joeroe foe a ten foe den ini difrenti congresafdeling. Wi ben warderi srefsrefi na lobiwroko dati, ma nofotron a ben abi leki bakapisi dati foeroe friwaniwrokoman ben misi boen foeroe foe a programma.
27 Aladi now moro mindri friwaniwrokoman èn moro mindri joeroe do fanowdoe foe doe a wroko, tokoe friwaniwrokoman de ete fanowdoe foe meki wan districtcongres kan waka soepel. Joe kan abi wan prati na ini? Nowan sma moe denki dati a doe foe friwaniwrokomandienst wan taki dati wan sma e misi wan bigi pisi foe a programa soleki son sma ben ondrofeni dati na ini a ten di psa.
28 Go na a afdeling friwaniwrokoman wantewante te joe doro tapoe a congres. Awinsi joe kan wroko soso wan pisi foe na congres tokoe wi e warderi joe dienst. Pikinnengre di de moro jongoe leki tina-siksi jari moe wroko alaten nanga wan papa foe ofoe wan tra bigisma makandra.
29 BOSROITI: A congres de a mofodoro. Wi howpoe foe si oen alamala drape. Na Bethelfamiri nanga ferwakti di span e loekoe na fesi foe nanga oenoe tapoe den difrenti congres ini Sranan, Jehovah ben orga en nenpipel tapoe wan theokratisfasi èn a sabi san wi abi fanowdoe ini den lasti dé disi. Net soleki Jehovah ben tjari en pipel komakandra ini na owroe Israël foe kisi jeje leri, na so a e doe nanga en getrow pipel na ini a ten disi. Nanga jepi foe disi a e gi wi tranga foe horidoro getrow te na a kaba. Baka dati wi sa kisi blesi nanga libi ini en njoen seti (Jes 40:29; 41:10; 1 Joh. 5:14). Wi kan abi na overtoigi foe disi solanga wi ’tan fertrow tapoe Jehovah’.
[Faki na tapu bladzijde 10]
Jepi foe hori sani foe na di district congres na prakseri
TANPRESI: Congrescoördinator ini na gemeente sa sorgoe dati den aanvraag formulier foe sribipe seni go wantewante na a congresbureau. Efoe joe e feni en fanowdoe foe taki dati joe no wani sribipe di joe ben seti nanga jepi foe na congresbureau, no ferteri na ososma ofoe na hotel foe disi wawan ma ooktoe na afdeling sribipe foe na congres, so dati na kamra kan gi na wan tra sma. Efoe joe wani ferteri wan hotel dati joe no o teki wan kamra moro di joesrefi ben teki dan joe moe taki joesrefi nanga a hotel.
Na afdeling sribipresi foe na congres kan gi bodoi te joe aksi foe dati foe kampeer mogelekheden ini a birti foe na congres. Poti grantangi na ini na aksi foe joe wan envelop pe joe adres de a tapoe en di abi wan postzegel.
BABYBOX: Hori grantangi na ini prakseri dati akroederi den wet foe a brandweer dati a o mag dati babybox, kampeerbedi nanga tra sani teki tjari go ini na congreshal. Den sortoe bedi disi, di de bigi èn di no de makriki foe poeroe poti a wan tra presi de kefarlek sani no wawan gi den baby srefi na ooktoe gi den sma di kan naki foetoe na den fadon. Spesroetoe te wan sani ben sa psa, dan den sortoe sani disi di de a pasi kan meki problema kon. Papa nanga mama di abi pikinnengrewagi nanga koiriwagi na den, wi e aksi nanga switifasi foe poti prakseri tapoe den sani di den dienstjepiman sa sori den foe doe ini a tori foe den presi di oen poti spesroetoe foe disi. Wi e warderi a wroko makandra foe oenoe srefsrefi na ini disi.
PROGRAMMATEN: A e kotoigi foe koni èn warderi efoe oen sidon na tapoe oen presi te na programma e bigin. Disi sa de tapoe fréda 9.10 joeroe mamanten èn tapoe den tra dé asrefi. No fet’feti foe gowe bifo a programma tapoe. Tapoe fréda na lasti singi nanga begi sa de 8.00 joeroe na neti èn tapoe satra nanga sonde asrefi.
PIONIERKOMAKANDRA: Tapoe fréda wan konmakandra sa hori gi sma di abi na pionierwroko. Tapoe a congres oen sa jere o lati na konmakandra disi sa hori.
PIONIERIDENTIFICATIE: Ala gewone nanga speciale pionier èn ooktoe den kring nanga districtopziener nanga den memre foe na Bethelfamiri moe teki den Wachttoren identificatie nanga toewijzingkarta (S-202-O) go nanga den na a congres. Den sma di na a ten foe a congres de siksi moen ofoe moro langa ini na pionierdienst, kan kisi foe waarde foe Sf 25,- congresbon te den sori na Wachttoren ID — karta foe den. Behandel na karta disi foe joe net soleki moni. Na tapoe a congres joe no man kisi wan trawan. Pionier nanga memre foe na Bethelfamiri sa kisi njoen boekoe fri ofoe tra lectuur fri na a afdeling lectuur pe den sori den Wachttoren ID — karta.
LAPELKARTA: Den karta disi e gi leki wan jepi foe barwroko gi a congres, èn ooktoe foe kan kon sabi den brada nanga sisa di de drape moro makriki. Weri na lapelkarta foe dat’ede grantangi tapoe a congres èn ooktoe te joe e komoto ofoe e go na a congres. A karta no de wawan wan sani foe sma kon sabi joe ma a de ooktoe nofotron wan rede foe gi kotoigi na a ten di joe e reis. Joe moe teki den karta disi ini joe gemeente, foedi den no de foe kisi tapoe a congres. Den lapelkarta e kostoe 5 sensi èn den plastic howder 25 cent. Aladi den lapelkarta sa seni go nanga den lectuur, dan den gemeente moe bestel den plastic lapelkartahowder.
WAN WARSKOW WORTOE: Pe joe e, parkeer toe, sroto alaten joe oto èn no libi noiti wan sani didon di sma kan si. Kibri den sani foe joe efoe a kan na ini a kofroe èn sroto dati. Loekoe boen ooktoe, foe foefoerman èn zakkenrollers di bigi konmakandra foe sma e hari den kon. Disi wani taki ooktoe dati joe no moe libi noti di abi waarde na tapoe joe sidonpresi sondro foe wan sma e loekoe en tapoe a congres. Boiti foe dati bericht kon na wi dati sisa di e weri hé hak abi moro kans foe fadon na tapoe den trapoe. De voorzichtig grantangi.