„Kownoekondre-gro”-districtcongres 1984

Ini en brifi gi a gemeente na ini Thessalonika (. . .) begi kompe bribiman foe begi gi en nanga en kompewrokoman „sodati na wortoe foe Jehovah es’esi ben mag tan go na fesi èn ben kan kisi grani” (2 Thess. 3:1). Neleki den fosi jarhondro-kristen, na so wi abi na faja lostoe dati den bijbel waarheid mag wroko na tapoe sma di de opregti foe ati èn mag boewégi den foe teki „na Wortoe foe Jehovah”. A sani disi e psa now. Foeroe sma lon komoto na ondro na makti foe Satan èn ben soekoe kibri na Jehovah theocratis organisaatsi. Wi e prisiri dati na ini na dienstjari di psa 161,896 foe den sortoe opregti sma disi ben teki dopoe èn 6.767.707 sma ben de na a Memrefesa na ini 1983. A no ben de wan kefarlek moi sani? Ija. Ala réde de foe bribi dati Jehovah sa blesi wi nanga moro gro bifo na bosroiti foe na seti foe sani disi kon (Jes. 60:22). Fa a de wan sani di fiti foe dat’ede na thema „Kownoekondre-gro” gi den districtcongres foe 1984.

Na naatsi Israël ben kon makandra regelmatig foe anbegi Jehovah. Na tapoe den sortoe komakandra dati den ben leri moro foe a Gado foe den. Disi e kon na krin foe den wortoe na ini Deuteronomium 31:12: „Tjari na pipel kon makandra, den man èn den oema èn den pikinwan . . . sodati den mag arki èn den mag leri, foe di den moe frede Jehovah.” Na réde foe san-ede den ben konmakandra de na srefi. Wi wani arki èn leri moro foe Jehovah. Foe dat’ede meki wi leki anbegiman foe Jehovah makandra nanga tra sma di abi belangstelling e loekoe nanga foeroe ferwakti na a kon foe den „Kownoekondre-gro”-districtcongres.

Na de na tapoe wan foe den congres (. . .) Ma san joe e kisi baka foe en o wegi srefsrefi moro (Ef. 5:15-17). Sondro degedege a de so dati foeroe sma abi moi memre na congres di psa nanga na lobi èn wánfasi di de wan marki gi den sortoe okasi disi. Fa a sa de wan blesi baka foe njan boen dorodoro foe na okasi foe „gi makandra tranga foe lobi nanga toemsi boen wroko” (Hebrewsma 10:24, 25). Foe di joe e teki wan faste bosroiti foe de drape èn e meki plan soifri, meki joe sa man de na a sani disi, makandra nanga den hipihipi sma di e gro èn di e sori now grani na wi Gado, Jehovah.

WI MOE DE ALA FO DÉ: No misi wán pisi foe na theocratis njanjan di na „Getrow nanga koni srafoe” ben poti foe bigin nanga na fosi lezing na fodewroko mamanten 9.00 joeroe te na laatste begi na sonde neti. A no de foe taki dati wantoe kenki de fanowdoe foe tjari kon na ini joe wrokoschema, ma joe kan fertrow a tapoe dati Jehovah sa blesi joe moeiti sref’srefi. Nanga foeroe bribi na ini Jehovah seti sani foe den ala fo dé.

Proberi foe de moi biten. Dati e gi joe na okasi foe njan prisiri foe na „kenki makandra foe dek’ati” di de so aparti gi wan komakandra nanga kompe kristen (Rom. 1:12). Seti sani boen èn loekoe na fesi san o kon sa jepi joe foe kon bifo na programma bigin èn na so fasi no sa poeroe na prakseri foe trawan na programma. Ma tokoe ete son sma abi na gwenti foe kon alaten lati. Disi no e sori respeki èn kan sori na tapoe wan mankeri foe joisti respeki gi jeje afersi. A no de foe taki dati sontron problema kan kon di kan tapoe wi foe de biten. Ma kristen lobi nanga prakseri sa gi wi tranga foe doe ala san wi man foe de ibridé froekoe na pasi, sodati wi no misi no wan pisi foe na programma.

Na ini na inlegvel foe wi Kownoekondredienst foe februari 1984 boen bodoi ben gi foe difrenti afersi èn drape den datum ben de ooktoe na ini. Wi ben wani foe tjari sote wan toe sani kon na oen prakseri. Leki a fosi sani disi: Wi alamala abi foeroe warderi gi brada nanga sisa di e krin a presi èn wi ben sa wani foe sori na warderi disi spesroetoe foe no gi den foeroe wroko. Fa? Te foe eksempre wi no trowe doti sani a tapoe na prasi te spesroetoe wi no trowe doti sani na den oto nanga bus nanga presi pe den tanapoe èn na strati dotisani leki plastiek kan nanga papira na tapoe na gron. Krinfasi na skin fasi de wan prenspari fasi foe wi kristen anbegi èn a de wan marki na dorosé foe na lostoe di wi abi foe krinfasi nanga orde.

FOE SAN-EDE WI WANI DE DRAPE: Ibri jari wi e loekoe nanga span foe de na a districtcongres. Ma foe san-ede na sani disi de so wan hémarki gi wi? Foe di a e gi wi na okasi foe ’arki èn teki moro leri na ini wi’ (Odo 1:5). Wi e feni en ooktoe wan prisiri foe konmakandra nanga wan bigi groepoe brada nanga sisa foe njoen owroe matifasi èn kenki ondrofeni nanga makandra. Ma meki wi no frigiti noiti dati na moro prenspari réde foe san-ede wi de drape de foe kisi leri foe Jehovah. — Ezechiël 34:14, 15.

Foe son brada nanga sisa wi kisi positief bericht foe na poti prakseri foe na a ten foe na programma. Wan foe den de so: „Ibri sma ben arki boen èn pikinmoro no wan sma e waka lontoe na a ten foe na programma.” Èn wan trawan: „San ben de aparti ben de na prakseri foe den sma di ben de drape . . . Den fosi lezing no ben misi den marki tapoe na prakseri nanga san den brada nanga sisa e arki.”

Ma disi no ben de so na ini ala geval. Soboen wi moesoe poti prakseri ete na tapoe na prenspari réde foe san-ede wi e fisiti ibri jari wan congres.

Kon wi taki dati wan sma ben kari joe foe wan njanjan èn dati joe sabi taki a ben sa de wan kefarlek switi fesanjanjan. Te joe de a pasi e waka go na oso joe e loekoe nanga foeroe ferwakti na den foeroe switi njanjan di séker sa tjari kon na tafra. Te joe doro na ini na oso joe sa waka psa sondro foe loekoe na njanjan na ai èn waka loekoe na heri oso nanga na kontren, e taki nomo nanga tra sma èn gebroiki pikinso ofoe kande srefi noti noti foe na njanjan? Fa dati ben sa de wan sori taki joe e go prakseri èn wan lawfasi. Èn tokoe dati de te joe loekoe en boen na fasi fa son sma e tjari densrefi na tapoe na ala jari jejefesa di kisi a kari foe en foe na bigi Sorgoeman foe ala boen sani, Jehovah Gado.

Kon wi taki a de so, dati a no de makriki gi son sma foe sidon tiri wan langa ten èn foe poti den prakseri a tapoe wan heri lo foe leri foe bijbel. Kande joe weri ofoe joe abi pikin di no man tan tiri. Kande joe sa jere tra babari èn sani di e poeroe joe prakseri sodati a prakseri foe joe e hari poeroe foe den sani di e taki foe na podium. Ooktoe na kefar de taki joe prakseri e go na tra sani èn na afersi. San joe kan doe nanga dati? Poti joe prakseri na wan èn arki boen de prenspari. Jezus ben gi na rai: „Poti prakseri na a fasi fa joe e arki” (Luk. 8:18). Dati e kostoe moeiti nanga a dwengi foe joesrefi. Son sma na a ten foe na programma ben go sidon taki nanga tra sma. Ma dati no ben e sori wan wisiwasi foe na sani san Jehovah seti? Di Jehovah ben leri Job, a ben taki: „Arki na mi! tan tiri” (Job 33:31, 33). Joe no ben sa kan tjari na srefi rai disi ooktoe kon na tapoe wisrefi. Aladi na congresprogramma e hori?

No meki na fowtoe foe denki taki joe no abi foe span joesrefi tranga foe arki, foe di joe e prakseri taki na stof sa kon nomo nomo na ini Na Wachttoren. Son lezing bakaten e druk wel a ini Na Wachttoren, ma disi no de so nanga ala lezing. Warti bodoi o lasi gwe gi joe efoe na a ten di a e hori joe no teki en na ini joe foe di joe e arki boen èn e meki wantoe aanteking. Wan bepaalde lezing kande no sa de njoen materiaal gi joe, ma sa abi wan bijbelprakseri di loekoe foe wan tra oekoe. A kan de ooktoe dati na stof ben meki na ferstan foe wan bepaalde tekst kon moro fini èn leki na inzicht foe wi na ini wan tori di wi sabi kon o moro bigi.

Na skrifi foe sani, efoe wi e de selectief, kan jepi wi foe hori na stof na ede. Disi de sosrefi toe te den aanteking sa de wan sani di wi no sa loekoe noiti moro. A de foe dat’ede boen foe tjari wan boekoe foe skrifi èn foe gebroiki en. Bakasé foe na congresprogramma nofo ruimte no de foe skrifi ala den bodoi disi.

Na ini wan artikel na ini na tijdschrift Human Behavior di e ferteri foe na universiteit foe New Mexico foe wan ondrosoekoe di bewijsi na waarde foe meki aantekening. Toe ondrosoekoeman ben aksi 83 studenti na wan lezing di den ben arki. Sonwan foe den ben meki aanteking na a ten di na lezing ben e hori, ma trawan ben kisi na a kaba aanteking di na takiman srefi ben meki. Wan di foe dri groepoe no ben abi aantekening srefsrefi. Baka wan overzicht foe tin minuut den ondrosoekoe den. Den studenti di ben meki aantekening densrefi, ben abi moro hé punt. Na meki foe aantekening e jepi joe foe hori joe prakseri actief èn a e poti den bodoi kon moro dipi na ini joe ati nanga ferstan. Meki aantekening e jepi joe foe sroto joesrefi babari sani.

Na ini na inleiding foe studie 5 foe na Anoeboekoe foe na theocratis diniwrokoskoro na prenspari ferklari disi de: „Efoe joe go na fesi leki wan dinari foe Jehovah e anga foe na fasi fa joe e arki”. Arki nanga a prakseri foe kisi sabi, na wan koni, na bekwaamheid di wan sma moe meki gro. Foe san-ede joe no ben sa meki a de wan gwenti foe de wan sma di e arki boen, wan sma di e arki nanga ala prakseri, sodati joe e njan someni leki a kan boen foe den fo dé foe na kownoekondre-gro-districtcongres di de heri esi na mofodoro? A sa kostoe joe ten nanga moni kande foe de drape, soboen proberi foe kisi someni winimarki foe a moni di joe e gi foe di joe e poti prakseri na a heri programma.

WAN TOEMSI MOI LIBI NANGA WAKA: Wan dé joe ben kon dipi ondro a indruk foe na waka nanga libi foe kompe kotoigi te joe teki den gersi nanga den sma ini algemeen? Kande a ben de den switifasi nanga pasensi di joe ben tanapoe na ini na rij, na konsideratie nanga trawan na ini na verkeer, na prisiri nanga bescheidenfasi foe na krosi foe den ofoe fa den e sorgoe densrefi, na opregti respeki gi papa nanga mama ofoe gi owroe wan, na lobi èn hori doro na ini na kweki foe jongoewan ofoe den switi wortoe foe warderi foe wroko di ben sori gi sma. Ija Jehovah Kotoigi e kon na fesi na wan aparti fasi foe di den de tra fasi leki grontapoe sma, èn a jari di psa foeroe boen sani ben taki foe a libi nanga waka foe wi na tapoe congres. Na so na algemeen driktoro foe wan stadion sondro foe aksi en ben gi na kommentaar disi: „Foe ala ipi sma foe ala sortoe èn bigi di e de te sani e hori na ini na stadion foe wi, a de so taki na groepoe foe joe ben de wan di ben krin moro, di ben kweki den sma foe en moro boen èn di ben wroko nanga makandra moro boen.” Trawan e taki foe na geest foe wroko makandra èn na sorgoe di wi brada nanga sisa e sori tapoe congres. A de wan switi sani foe jere den wortoe disi foe prijse foe dorosé sma a no so? Ma san de moro prenspari ete, a waka nanga libi e trowe wan boen leti na tapoe kristen opvoeding èn tjari grani gi Gado nen. — 1 Petr. 1:15, 16.

Séker wi no wani libi wan indruk di no boen foe na pipel foe Jehovah. Efoe a de now na tapoe na congresdjari ofoe na brada nanga sisa pe wi e tan alaten wi wani sori den hé markitiki.

Wi wani gebroiki ooktoe na okasi foe tjari wantoe sani kon na oenoe prakseri toe foe krosi nanga na fasi fa wi moe sorgoe wisrefi na dorosé. Wi de na wan congres nanga wan hémarki, namkoe foe anbegi Jehovah èn foe leri fa wi kan dini en moro boen. Nofotron a de troe dati wan sma sa handri èn denki soleki a weri en krosi. Efoe wi no abi trobi nanga wi krosi, soleki te na wan picknick ofoe te wi e go koiri, den a no de heri boen dati disi sa abi krakti pikinso tapoe wi waka nanga libi èn a poti di wi moe poti prakseri? Foe son congres wi ben kisi foe jere taki den krosi nanga na sorgoe foe wan sma skin na dorosé foe son sma no ben de soleki den ben sa kan ferwakti dati foe wan komakandra nanga na hémarki foe anbegi na Moro Héwan. Boen rai foe na bijbel di e go foe krinfasi, krosi nanga fasi fa wi e sorgoe wisrefi na dorosé de foe feni na ini Wi diniwroko-boekoe tapoe den bladzijde 131, 132, 136 nanga 137. Wi moe sorgoe alaten „foe doe ala sani foe Gado kisi bigi nen” (1 Korintesma 10:31). A ben sa de wan boen sani foe loekoe na inlegvel foe Wi Kownoekondre dienst foe juni 1981 ete wantron foe njoen wi memre tapoe na punt dati.

Wan tra kontren di moe abi wi prakseri ete, na a hori foe toemsi foeroe presi. Ala sortoe fasi moeiti doe foe loesoe na problema disi, ma noti kan wini en foe na fundamenti kristenfasi lobi. Lobi sa tapoe wi foe no loekoe den fanowdoe foe owroe sma, malengri sma, nanga tra sma (Lukas 6:31). A e psa toe, dati, sondro foe wi kan doe wan sani na dati na fesi, moro sma e kon na tapoe wan congres leki wi ben ferwakti, èn tangi a kan foeroe psa marki. Te wan sma na wan sékerfasi no e ke èn no e prakseri sani, dan tra sma e kisi problema ofoe a prakseri e poeroe foe na troetroe marki foe san-ede wi ben kon na makandra. Te den dienst jepiman e kisi instructie foe poeroe sani foe sma na stoeroe tapoe di sma moe sidon na tapoe dan joe ati e bron efoe joe e wraak? A fasi fa wi o doe tapoe den situwasi disi kan de wan marki foe na fasi fa wi e kweki kristen persoonlekheid. Prakseri dati foeroe sma di e go na a congres, no de kotoigi foe Jehovah. Soboen wan dwengi réde de foe ’hori wan toemsi moi waka nanga libi na mindri den naatsi’, foe sorgoe dati tra sma no naki foetoe. — 1 Petrus 2:12; Matth. 18:6.

Na congresbureau sa seti sani di fiti foe na boen foe malengri sma èn meki disi bekenti tapoe na kontren foe sidonpresi, nanga so moro fara. Osofamiriman nanga tra sma foe na gemeente kan jepi dati lobi sorgoe lontoe den brada nanga sisa disi. Natuurlek a no de wan sani di fiti foe meki gebroiki foe den sortoe disi efoe a no de troetroe fanowdoe, foe di disi sa go foe den sma di troetroe abi en fanowdoe.

VELDDIENSTSETI: Velddienst de langa ten kaba wan spesroetoe pisi foe wi congres. Tapoe na congres foe 1922 ini Cedar Point wan „Dienstdé” ben seti foe wan spesroetoe moeiti ini na veld. A jari disi toe wi wani gi ibriwan sma dek’ati foe seti sani foe abi wan prati na a diniwroko. Foe na marki disi fréda mamanten ben poti na wan sé. Joe ben sa kan abi wan prati na ini? Sani sa seti gi na velddienst komoto foe den kownoekondre komakandrapresi ini foto, lontoe a foto èn soboen oenoe kan go na a kownoekondre-komakandrapresi, frédamamanten na a presi di de krosbé foe joe. Foe a tori disi wan toe sani sa taki moro fara ini joe gemeente. Den wan di komoto foe na district èn di e tan na ini foto, kan go na a moro krosbé kownoekondre komakandrapresi di de na a presi pe den e tan. Tijdschrift nanga boekoe nanga tra fanowdoe sani den moe tjari komoto foe na gemeente.

FRI-WANIDIENST: Na réde foe san-ede wi e gi wi nen leki fri-wani-wrokoman na foe dini wi brada èn foe meki dati na congres waka boen. Sonwan sa memre dati na ini jari di psa foeroe foe na programma ben lasi gwe gi fri-wani-wroko (. . .) a ten foe na programma den ben e wroko. Ma now den difrenti afdeling orga na sowan fasi dati den sma di e pristeri den dienst foe den kan jere moro foeroe efoe a no de ala sani foe na programma.

Foe san-ede joe no ben sa poti en now ofoe joe kan gi joesrefi leki fri-waniwrokoman foe wroko wantoe joeroe tapoe wan foe den congresafdeling? Kande joe kan doe disi leki wan osofamiri ofoe nanga trawan na ini na gemeente. Neleki a ten di psa a moe de so taki fri-waniwroko moro pikinso abi 16 jari efoe a no de so dati wan foe den bigisma ofoe wan tra frantwortoe bigisma e tjari na fri-waniwrokoman.

NJANJAN: Spesroetoe sani e seti foe sorgoe gi den fanowdoe foe wi na skinfasi. Den sani di seti foe njannan nanga dringi sa de a srefi leki tapoe den districtcongres foe den jari di psa. Joe no de grantangi foe na lobi wroko foe den brada nanga sisa di e wroko tranga foe gi wi den sani di de fanowdoe?

Congresbon sa de foe kisi foe Sf 4,00 foe wan vel foe 40 bon foe tin sensi (10 sensi) ibri pisi. Oenoe ben sa wani bai na fesi, ma den sa de foe kisi ooktoe tapoe na congres. Lektuur kan bai nanga moni èn nanga bon.

Fa a de wan prisiri foe kon nanga wi brada nanga sisa nanga sma di abi belangstelling makandra foe kisi soifri sabi foe Jehovah na tapoe na „Kownoekondre-gro”-districtcongres. A jari disi joe sa de ooktoe na mindri den doesoendoesoen sma di sa de drape? Wi e howpoe dati den sani na ini na inlegvel disi sa jepi joe foe klari den plan foe joe.

Jehovah e meki na kownoekondrewroko go na fesi es’esi, èn now di na gro na a heri grontapoe e tan go doro meki a moe de na opregti winsi foe joe foe jepi den sma disi di gersi skapoe gro go doro kon lepi. Den „Kownoekondre-gro”-districtcongres sa sreka wi moro betre gi na prenspari wroko èn tranga wi ooktoe na ini a bosroiti foe wi foe dini Gado nanga wi eri ati. Meki wi begi foe dati, dati na „Wortoe foe Jehovah mag tan go es’esi na fesi èn kisi grani”, èn ala den sani leki wan prijse gi en. — 2 Thessalonikasma 3:17.

[Wantoe sani tapoe bladzijde 9]

Wantoe sani foe joe memre foe na districtcongres

VERKEER: Wi bréti toemsi na a prasi foe na kringhal èn na ruimte di wi abi drape foe kan waka. Na pasi pe na djari de wan bigi problema. Tweede Rijweg de wan toemsi druk pasi pe oto e rij psa foe west sé, foe foto go na zuid sé, spesroetoe di na njoen pasi di e go na Verlengde Coppenamestraat kon klari. Foe dat’ede wi moe loekoe boen na den sani di den brada foe na afdeling verkeer e sori wi èn doe precies so. Den brada foe na afdeling e doe ala sani san den kan èn den e feni en wan switi sani efoe oenoe kan wroko makandra nanga den. Leki fa wi sabi dan na tapoe na pasi foe Tweede Rijweg na sé foe en, presi no de gi sma foe waka. Wi howpoe taki wan loesoe sa kon gi na problema disi heri esi. A srefi wi kan taki foe na pasi na Latour pe na Sranantongo congres sa hori. Na Latourpasi na wan toemsi druk pasi toe pe foeroe oto bus alaten e rij psa èn foe dati ede den brada nanga sisa di e koti na strati abra den moesoe loekoe boen fa den e koti na strati abra, spesroetoe den moe hori prakseri tapoe den pikin foe den sodati den no lon abra na strati sondro wan bigisma ofoe den brada di e jepi na na afdeling verkeer.

DOPOE: Na lezing gi den dopoekandidaat sa hori satramamanten. Den di wani dopoe na ini watra leki wan marki taki den gi densrefi abra, moe loekoe den aksi nanga den owroeman foe na gemeente foe den bifo na congres bigin. Ibri sma, di wani dopoe, moe tjari foe na okasi dati krosi di fiti èn wan wasidoekoe.

PROGRAMMATEN: A de wan koni sani èn a e sori warderi foe sidon tapoe wi presi te na programma bigin. Na tapoe fodewroko 9 joeroe mamanten, fréda, 5.00 joeroe bakadina, satra 9.00 joeroe mamanten, èn sonde harfoe tin disi sa de. Wi e sori den srefi moi égifasi efoe wi no e opo taki wi o gwe bifo na programma kon na wan kaba. Fodewroko 20 minuut psa aiti joeroe a neti wi sa tapoe nanga singi nanga begi, èn fréda 8.00 joeroe na neti, satra 10 over acht na neti èn sonde 10 over acht.

BEWAKING: Soleki fa oen sabi dan bewaking na wan toemsi serjoesoe sani. Foeroe brada e lasi den neti sribi soso foe kibri den goedoe foe na Genootschap nanga foe den brada, nanga sisa, soleki den cafetariasani nanga den microfoonsani. Wi e warderi disi srefsrefi. Den brada wani poti den heri prakseri na tapoe disi èn foe dat’ede wi wani poti krakti a tapoe ete wantron dati na neti no wan tra sma moe de na tapoe na congresterrein leki den wan di ben poti foe hori wakti ofoe foe doe tra dienst.

PIONIERSIDENTIFICATIE: Ala gewoon nanga spesroetoe pionier, sotoe den reizende opziener nanga memre foe na Bethelfamiri moe tjari den Wachttoren-identificatie-karta (S-202-0) go na a congres, Den sma di na a ten foe na congres de siksi moen na ini na pioniersdienst, e kisi tapoe wán congres te den sori den wachttoren identificatie karta congresbon foe na waarde foe Sf 24,--. No frigiti soboen foe tjari na identificatiekarta disi kon nanga joe. Pionier sa kisi boekoe fri ofoe tége pionierprijs na na afdeling Boekoe te den sori den Wachttoren ID-karta.

LAPELKARTA: Den karta disi den e gi leki wan jepi foe ferteri foe na congres, sotoe foe kan meki wi sabi makriki brada nanga sisa di de na tapoe na congres. Weri den dat’ede grantangi na tapoe na congres èn ooktoe te joe e komoto go na a congres. Na karta no wawan de wan moi jepi foe sma sabi joe, ma a de ooktoe foeroetron wan sani foe gi kotoigi te joe e waka go na a congres. Joe moe bai den karta disi foe joe na ini na gemeente foe joe, foe di den no sa seri na tapoe na congres. Na lapelkarta e kostoe 3 sensi èn na plastiek houdertje 25 cent foe wan.

WAN WORTOE LEKI WARSKOW: Pe joe e poti joe oto ofoe bromfiets sroto en alaten èn noiti libi wan sani na ini di sma kan si. Kibri den goedoe foe joe efoe a kan na ini na kofroe foe joe oto. Loekoe ooktoe boen nanga foefoeroeman èn zakkenrollers di e de na tapoe bigi komakandra. Disi abi na ini toe taki joe no moe libi no wan sani di abi warti sondro foe sma e loekoe en gi joe na tapoe joe sidonpresi na a congres.