„A Profeiti Wortu fu Gado” Distrikt Kongres 1999
1 Di den Israèlsma ben o go na ini a Pramisi Kondre, Moses ben aksi den tranga fu warderi a leri fu Gado. A ben taigi den: „A no de wan wortu di no warti gi yu, ma a wani taki a libi fu yu” (Deut. 32:45-47). ¿Wi no de nanga tangi na Yehovah, taki a libi fu wi de so warti gi en dati a e go doro fu gi wi tiri nanga yepi fu en Wortu di warti trutru? Fu dati ede, wi e wakti fayafaya den dri dei fu „A Profeiti Wortu fu Gado” Distrikt Kongres èn san Yehovah abi gi wi.
2 A yari disi, na ini Sranan sani seti fu hori tu distrikt kongres na ini Bakratongo. A fosi wan sa hori 27 te nanga 29 augustus 1999, èn a di fu tu sa hori 3 te nanga 5 september 1999. Moro fara wi sa hori tu distrikt kongres na ini Sranantongo. A fosiwan sa hori na Gakaba, 20 te nanga 22 augustus 1999, èn a di fu tu sa hori na Paramaribo, 10 te nanga 12 september 1999. Wi sa hori wan distrikt kongres na ini Ingrisitongo tu na Paramaribo, 17 te nanga 19 september.
3 A no de fu taki, dati yu seti sani kaba fu de na ala den dei fu a kongres, fu di yu e bribi taki Yehovah e fruwakti fu yu taki yu sa de drape. Yu kan de seiker taki a e si san ibriwan sma e du èn sortu òfer den futuboi fu en e tyari fu de drape, èn nanga warderi a e memre den sortu sani disi (Hebr. 6:10). Efu ibri dei wi de na a kongres fu a singi na a bigin te na a lasti begi, dan wi e sori Yehovah, taki wi e warderi den wortu fu en gi wi (Deut. 4:10). Wi e sori tu taki wi e warderi a tranga wroko di den furu brada fu wi e du fu sreka sani gi a kongres.
4 Fu seti sani gi dusundusun sma fu a pipel fu Gado so taki den kan kon makandra na ibri presi pe a kongres sa hori, wani taki dati sani musu sreka na fesi èn taki den musu orga bun. A sabi di wi sabi taki sani di seti gi a kongres du na wan lobi fasi, musu buweigi wi fu wroko makandra, so taki „ala sani feni presi na wan fasi di fiti èn leki fa sani seti” (1 Kor. 14:40). Den bodoi di e kon now nanga sani fu memre wi, e gi so taki yu kan doro srekasreka na yu kongres fu man nyan bun fu a nyanyan na yeye fasi èn a Kresten bradafasi.
Bifo a Kongres
5 ¿Den wan di yu e studeri Bijbel nanga den èn tra sma di abi belangstelling abi yepi fanowdu fu seti sani so taki den kan kon na a kongres? Den sani di den e si èn den sani di den e yere te den de drape, kan buweigi den fu tron anbegiman fu Yehovah (1 Kor. 14:25). Owruman musu de na ai fu si efu iniwan sma abi yepi nanga tanpresi noso transport fanowdu, spesrutu den moro owru memre fu a gemeente, èn na wan lobi fasi den musu sorgu taki den kisi den sani di den abi fanowdu.—Gal. 6:10.
6 ¿Yu kaba nanga den sani di yu musu seti gi tanpresi? Na a ten disi, dan a gemeente sekretarsi ben musu seni iniwan Kameraanvraagformulier voor bijzondere omstandigheden di a Gemeente Dienstkomte feni bun, na a kongres presi kaba. Efu yu kisi wan tanpresi nanga yepi fu a spesrutu fanowdu seti èn yu no man tan drape moro, dan grantangi taigi na Afdeling Huisvesting wantenwanten, so taki den kan gi a tanpresi na wan tra sma.
7 Fu di na Afdeling EHBO de nomo fu yepi te sani de trutru seryusu, meki wi e gi yu a rai fu tyari yu eigi asperine, verband, neussprays, dresi te yu abi problema nanga a bere, èn tra srefi sortu sani na a kongres efu yu e denki taki yu sa abi den fanowdu. Efu yu noso wan sma di yu lobi abi wan seryusu siki di e go nanga langa, soleki wan problema nanga na ati, sukrusiki, noso aanval fu siki di e kon wantronso, grantangi tyari den dresi di yu abi fanowdu na a kongres fu sorgu gi den siki disi, neleki te yu ben sa de na oso noso te yu ben sa de nanga fakansi. A ben sa de wan koni sani efu wan memre fu na osofamiri di sabi fa a situwâsi de, e tan nanga a sma disi, fu di a sa ben kan yepi a sma moro bun.
8 Te yu e reis go-kon fu a kongres, dan okasi sa de pe yu kan gi informeel kotoigi. ¿Yu ben sa de srekasreka fu prati a waarheid nanga trawan? Wi alamala, so srefi yongu pikin, kan abi wan prati fu pristeri traktaat na den sma di e wroko na wan servicestation èn tra sma di wi e miti ala di wi e reis. Wi sa abi nofo okasi fu prati tijdschrift, brochure, noso tra publikâsi gi sma di e sori belangstelling. De srekasreka fu gi informeel kotoigi na sma di kande noiti wi ben sa miti den te wi e du a preikiwroko na a fasi fa wi gwenti.
Te a Kongres E Hori
9 Den portu fu a kongres presi sa opo 8:00 v.m. ibri dei. Yu mag hori sidonpresi gi den sma di de fu yu osofamiri wawan noso di de na ini a srefi oto nanga yu. Den sturu di de moro makriki fu sidon na tapu sa hori gi den owru brada nanga owru sisa èn spesrutu pisi sa hori gi den malengriwan èn den wan di de na ini rolsturu. A no sa man fu gi sma di abi allergie siki wan spesrutu kamra na a kongres presi. Ibri dei te yu e gowe fu yu sidonpresi, dan grantangi luku taki yu abi ala yu sani na yu.
10 Fu kan kon makandra na ini bigi grupu na wi distrikt kongres, dan a de fanowdu fu hori wisrefi na wet fu a kondre, brandweer wet, nanga tra sani gi a veiligheid di wi musu hori na prakseri. Fu dati ede yu musu waka na baka a rai di a kongres kantoro e gi di abi fu du nanga den sortu sturu noso sani di yu no musu tyari go na a kongres.
11 ¿Yu o teki dopu na a distrikt kongres? Gi a satra mamanten programa, wan presi sa de pe den sma di sa teki dopu kan sidon, èn den dienstverlener sa sori yu pe disi de. Efu a kan, dan grantangi sidon drape bifo a programa e bigin. Tyari yu Bijbel, yu singibuku, wan wasiduku nanga wan bescheiden swenkrosi. Jeans pe yu koti wan pisi fu en puru, T-shirt pe wan sani skrifi na tapu, èn tra srefi sortu sani no e fiti gi so wan warti okasi. Owruman di e luku den aksi fu a Georganiseerd-buku nanga den wan di sa teki dopu, musu sorgu taki ibriwan fu den sma e frustan den penti disi. Fu di a teki di wan sma e teki dopu na wan simbôl fu a gi di a sma gi ensrefi abra na Yehovah, meki a no e fiti te dopu kandidaat e hori anu ala di den e teki dopu.
12 Na a kongres, yu mag gebroiki fowtow toestel, video camera noso cassette recorder. Ma a fasi fa wi e gebroiki den noso a presi pe wi e poti den, no musu de na tapu den gang, den no musu hendri sma fu man si bun, noso puru a prakseri fu sma. Yu no musu poti den na den elektrisch sistema noso a geluid sistema fu a hal.
13 Now di moro furu sma e gebroiki cellulair telefon èn piepers, dan luku bun taki den apparaat disi no e puru a prakseri fu yu noso fu den sma di e sidon na yu lontu. Yu no musu meki den apparaat disi bari na so wan fasi taki sma kan yere en, ala di yu e sidon na mindri den arkiman. Efu a de fanowdu taki yu musu gebroiki wan cellulair telefon ala di a programa e hori, dan grantangi du disi dorosei fu a hal.
14 A Genootschap aksi wi fu tyari wi eigi nyanyan na a kongres ibri dei, fu di a de moro makriki èn wi no e lasi so furu ten. Furu brada du disi èn den kon si taki, na a brekten den kan sidon nanga den osofamiri fu den èn nyan den sani di den tyari gi a dei. Furu fu den taki dati na okasi fu rostu na brekten èn fu abi demakandra nanga den brada nanga sisa, de wan prisiri sani. Disi wani taki dati yu musu bai sani fu nyan èn dringi na fesi èn poti den na ini wan pikin boksu noso tas di yu kan poti na ondro yu sturu. Wi e aksi ala sma di de drape fu waka na baka a rai disi. Sma di abi belangstelling èn di e go nanga yu na a kongres musu tyari den eigi nyanyan tu. Yu no mag tyari grasi batra èn dringi di abi sopi na ini, kon na a kongres.
15 ¿Yu kan yepi fu krin a kongrespresi baka a programa ibri dei? Noso yu kan wroko na wan fu den tra afdeling fu a kongres? Efu yu kan gi yepi, dan grantangi go na a Afdeling Friwani Wrokoman na a kongres. Pikin-nengre di moro yongu leki 16 yari kan wroko makandra nanga wan papa noso wan mama, noso wan tra bigisma di abi frantiwortu. A no de fu taki, dati ibriwan sma kan yepi fu krin a presi fu di den e teki ala doti èn nyanyan sani di tan abra èn trowe dati na ini a yoisti presi gi dati.
16 Wi kisi bun tirilin di e sori wi san na den yoisti krosi di wi musu weri na a kongres èn san na a yoisti fasi fa wi musu sorgu wisrefi. Fu eksempre: Wi abi tirilin fu a tori disi na ini den inlegvel fu Wi Kownukondre Dienst, wi abi prenki na ini den publikâsi fu wi, èn a moro prenspari sani fu alamala, wi abi san Yehovah e taki na ini Bijbel (Rom. 12:2; 1 Tim. 2:9, 10). Sma sabi suma na wi èn fu san ede wi kon makandra na a presi pe a kongres e hori. So bun, den krosi fu wi èn a fasi fa wi e sorgu wisrefi e gi wan krakti kotoigi. A moro bigi pisi fu a pipel fu Yehovah e gi wan bun eksempre ini a tori disi. Ma wawan leisi wi e si fa a yeye fu grontapu e sori na ini den krosi di son sma e weri di e fisiti den kongres fu wi, èn na ini a fasi fa den e sorgu densrefi. Iniwan sortu krosi di e sori tumusi furu fu wi skin o meki sma tweifri na a taki di wan sma e taki dati en na wan kotoigi. Wan bescheiden èn krin fasi fu weri krosi o plisi sma moro. Fu dati ede, edeman fu osofamiri musu luku bun san den memre fu na osofamiri fu den o weri. Disi e fiti tu te wi no de na a kongres presi. Efu wi e weri den lapel karta fu wi bifo èn baka a programa, dan disi e meki sma kon sabi wi leki sma di de wán nanga Yehovah èn nanga a krin pipel fu en.—Teki gersi Markus 8:38.
17 Nanga yepi fu santa yeye, a koni Kownu Salomo ben man si taki „lawfasi tai na a ati fu wan boi” èn „wan boi di libi na ensrefi sa tyari syen gi en mama” (Odo 22:15; 29:15). Te a programa ben e hori, dan yongu Kotogi di no wan sma ben luku den, ben hendri brada nanga sisa di ben wani nyan bun fu a programa. Na a kongres di hori a yari di pasa, dan den ben si son yonguwan na a parkeerpresi noso na den toilet e du sani di no abi noti fu du nanga a programa di den brada ben pristeri. A de krin taki den yonguwan disi no ben nyan bun fu a programa na yeye fasi di ben sreka spesrutu gi den. Fu di papa nanga mama abi a frantiwortu fu a fasi fa den pikin fu den e tyari densrefi, dan den kan de seiker taki den pikin e tyari densrefi bun èn den e arki a leri fu Yehovah, soso te den pikin e sidon makandra nanga den. Den dienst-yepiman sa go na iniwan sma di e puru tra sma prakseri, èn den sa aksi den fu stop nanga dati, ala di den sa memre den na wan lobi fasi fu poti prakseri na a programa.
18 Fu di ala sma kan kon na den kongres fu wi, dan a de wan koni sani fu seti sani fu kibri den pikin fu wi èn den persoonlijk sani fu wi. Den pikin fu wi na wan warti gudu fu Yehovah. Ma wi sabi taki grontapu abi den eigifasi fu Satan fu fufuru èn mesbroiki sani. Fu dati ede, sorgu taki yu sabi ala ten pe den pikin fu yu de. So srefi yu musu abi yu fowtow toestel, yu tas, nanga tra warti sani na yu ala ten, èn no libi den na yu sidonpresi. De seiker taki yu sroto yu wagi, èn poti yu persoonlijk sani na ini a baki fu a wagi noso teki den nanga yu. Disi sa meki taki wan sma no ben sa wani fufuru sani na ini yu wagi.
19 A e gi deki-ati fu si taki brada nanga sisa e meki notisi te a kongres programa e hori. Syatu notisi sa yepi yu fu no lasi prakseri èn den sa yepi yu fu memre den moro prenspari penti baka. Efu baka ten yu e luku den notisi ete wan leisi nanga famiri noso mati, dan dati sa meki yu prakseri dipi fu den heimarki fu a kongres so taki yu no e frigiti den.
20 Ala ten a pipel fu Yehovah lobi fu gi bijdrage gi theokrasia afersi (Ex. 36:5-7; 2 Kron. 31:10; Rom. 15:26, 27). Den friwani bijdrage fu yu gi a wroko na heri grontapu e gebroiki fu pai den kostu di e kon fu di wi musu yuru den bigi presi pe den kongres e hori.
21 Soleki fa Amos 3:7 e taki, dan Yehovah taki dati a „no sa du noti, sondro fu tyari en frutrow afersi kon na krin gi den futuboi fu en, den profeiti”. Leki a „Sma di e tyari kibritori kon na krin”, dan Yehovah meki sma skrifi hondrohondro profeititori na ini Bijbel di kon tru dorodoro èn na wan soifri fasi (Dan. 2:28, 47). Ma bigi pramisi musu kon tru ete. „A Profeiti Wortu fu Gado” Distrikt Kongres 1999 sa tranga yu bribi na ini den pramisi fu Gado. Arki a wortu fu Yehovah gi yu heri bun. Gebroiki san yu sa si èn yere—na ini a diniwroko, na ini a gemeente, èn na ini yu persoonlijk libi. ¡Wi e begi Yehovah taki a e blesi ala den sani di yu seti fu de drape ala den dei fu a bigi fesa disi na yeye fasi!
[Prenspari pisi na tapu bladzijde 3]
¡Seti sani fu de drape freida, satra, nanga sonde, heri dei!
[Faki na tapu bladzijde 5]
Distrikt Kongres 1999
20–22 augustus
GAKABA Sranantongo
27-29 augustus
PARAMARIBO Bakratongo A
03-05 september
PARAMARIBO Bakratongo B
10-12 september
PARAMARIBO Sranantongo
17-19 september
PARAMARIBO Ingrisitongo
[Faki na tapu bladzijde 6]
Schema gi den Bakratongo Kongres
GRUPU A:
Centrum
Combé
Garnizoenspad
Geyersvlijt
Kwatta
Tourtonne
Tweede Rijweg
Saramacca
Uitvlucht
GRUPU B:
Coronie
Flora
Highway
Klein Henar
Lelydorp
Mariënburg
Meerzorg
Nieuw-Nickerie
Onverdacht
Paradise
Saron
Wageningen
West