Soekoe artikel foe hari a prakseri foe sma di abi belangstelling gi spesroetoe tori
1 Leki sma di e loekoe boen fa den e gebroiki den peiri nanga bo foe den foe kan doro wan marki, na so foeroe gemeente preikiman nanga pionier e kisi boen bakapisi foe di den e soekoe spesroetoe artikel foe A Waktitoren nanga Ontwaakt!, foe kan hari a prakseri foe sma na ini den gebied foe den di abi belangstelling gi spesroetoe tori. Den e bepaal soema kande ben sa wani leisi spesroetoe artikel foe den tijdschrift. Fa den e doe disi?
2 Fosi, foe ibri uitgave den e leisi a heri tijdschrift. Baka dati, den e aksi densrefi: ’Na artikel disi sa hari a belangstelling foe sortoe sma? Dan den e meki moeiti foe fisiti ibri sma aparti di kande ben sa abi belangstelling foe leisi na artikel dati. Te den kan si na fesi taki sma na ini a gebied foe den ben sa wani wan spesroetoe uitgave, dan den e bestel moro foe a tijdschrift dati.
3 Sma e lespeki den tijdschrift foe wi srefisrefi: Wan foe den sma di abi wan abonnement na tapoe den tijdschrift èn di e wroko gi na internationaal tijdschrift foe Nigeria di moro foeroe sma e leisi, ben taki foe Ontwaakt!: „Mi moesoe fristeri oenoe nanga a moro boen tijdschrift na grontapoe gi na algemeen poebliki.” Wan fajafaja leisiman foe den tijdschrift foe wi ben taki: „Den de troetroe moi diriston nanga warti koni na ini! Iniwan tori di mi abi belangstelling gi, mi kan feni na tapoe den bladzijde foe wan foe den tijdschrift.”
4 Den tijdschrift e taki foe foeroe difrenti tori, so leki bijbel, sani di e pasa na grontapoe, broko-ede foe na osofamiri libi, sociaal problema, historia, sabidensi, a libi foe meti nanga prani, èn disi na soso wan toe sani. Wan sma seiker sa firi moro foe leisi wan sani te a sani dati de akroederi san a abi fanowdoe, a situwâsi foe en, èn a wroko di a e doe. Foe di wi e taki nanga foeroe sma di ibriwan foe den abi en eigi spesroetoe sani di a lobi èn en eigi problema, meki a abi heri boen bakapisi te wi e soekoe spesroetoe artikel di sa hari a belangstelling foe den sma di wi e miti.
5 Loekoe san ben pasa di toe Kotoigi pristeri na Ontwaakt! foe 8 september 1996 na wan sma di e skrifi artikel gi wan koranti. A ben skrifi: „Bifo mi ben kisi na okasi foe taki dati mi no abi belangstelling, wan foe den ben taki: ’Mi abi wan artikel dja di e taki foe den Amerkan Ingi. Wi sabi taki joe skrifi foeroe foe a tori.’” A ben teki a tijdschrift èn ala di a ben e njan, a ben leisi na artikel di ben taki foe den Ingi, èn baka ten a ben erken taki na artikel „ben de heri boen” èn „eerlijk srefisrefi”.
6 San e hari a prakseri foe sma na ini joe gebied? San joe si na ini den tijdschrift ini den moen di pasa no sa langa ete, di sa hari a prakseri foe wenkriman nanga sma di ben kisi skoroleri foe doe spesroetoe wroko èn di e libi na ini joe gebied, noso joe birtisma, kompe wrokoman, nanga skoromati? San ben sa abi a spesroetoe belangstelling foe afkati, sma di e gi skoroleri, sma di e gi rai na osofamiri nanga sma di e gi rai na studenti na ini skoro afersi, sma di e gi rai na jongoesma, sma di e gi jepi na sociaal sei, nanga den datra? Te joe e ondrosoekoe ibri tijdschrift èn e hori sma nanga difrenti background na prakseri, dan dati sa gi joe toemoesi boen fasi foe prati a wortoe foe waarheid.
7 Te joe e feni wan sma di e sori spesroetoe belangstelling gi wan spesroetoe Waktitoren noso Ontwaakt! artikel èn di e teki a tijdschrift, joe ben sa kan taki: „Efoe wan artikel de na ini wan foe den uitgave di e kon èn mi denki taki joe ben sa abi belangstelling gi dati, dan mi sa prisiri foe tjari wan eksemplaar kon gi joe.” Kande joe ben man poti a sma disi tapoe joe tijdschrift route, èn ibri leisi te njoen tijdschrift e kon, joe kan tjari den kon gi en. Na a srefi sani joe e doe te joe e tjari gobaka na sma di kande abi spesroetoe belangstelling gi spesroetoe artikel di de foe feni na ini den tijdschrift foe wi.
8 Abi wan marki na jejefasi: Wan toe jari pasa, wan man di ben poti foeroe prakseri tapoe en wroko, ben kisi wan Ontwaakt! tijdschrift foe wan tori di ben abi en belangstelling. Ma a fromsoe man disi ben leisi so srefi a kompe tijdschrift A Waktitoren, di ben abi wan artikel na ini di ben poesoe en foe go ondrosoekoe finifini a bribi di a ben bribi na ini a Dri-wánfasi, en heri libi langa. Siksi moen na baka dati a ben teki dopoe! So boen, no draidrai foe meki den leisiman foe den tijdschrift foe wi taki foe jeje afersi nanga wi. Joe ben kan sori den a brochure San Gado e aksi foe wi? èn aksi den efoe joe kan teki wan toe miniti nomo foe taki makandra nanga den foe wán les ibri leisi te joe e kon baka nanga den njoen tijdschrift.
9 Prakseri boen soema foe den gobaka foe joe èn den bisnis sma di joe abi kontakti nanga den, kande ben sa wani kisi den njoen uitgave foe A Waktitoren nanga Ontwaakt! Baka dati, doe opregti moeiti foe doro den sma disi. Soekoe foe miti someni sma leki joe kan nanga den warti tijdschrift disi. Èn no frigiti noiti taki, ala di joe e meki moeiti foe jepi moro sma foe leisi den tijdschrift foe wi, na seni joe e ’seni joe brede go na tapoe den watra’. Baka ten, joe sa abi boen bakapisi kande foe feni sma di kan tron kompe disipel. — Odo 11:1, 6.