Kownoekondre preikiman e froeteri

Gado e meki sani gro na ini Alaska

NA ONDRO snew nanga ijs di e tapoe en, wan pikin siri e wakti na okasi foe gro kon lepi. Na ini den dri sjatoe moen te zomer de na ini Alaska, wan koro siri di bigi 3 milimeter kan gro kon de pikinmoro 40 kilo! Ija, a kondre disi foe san foeroe sma ben denki taki a de wan toemoesi kowroe gron di no man meki njanjan, kan meki bogobogo froktoe.

Disi de spesroetoe so nanga a veld na jejefasi na ini Alaska. Drape, na ini a kondre foe den langa winter, Jehovah Kotoigi e tan sai Kownoekondre siri. Soleki fa a de na tra pisi foe grontapoe, Gado e meki a siri gro na ini den ati di man meki froktoe. — 1 Korentesma 3:6, 7.

● Di Vanessa, wan jongoe Kotoigi, ben de na ini wan skorobus, a ben si wan kompe studenti, Ann, di ala ten ben e sidon en wawan. A ben gersi taki Ann ben sari, èn foe dati ede Vanessa ben aksi en foe sidon na en sei. Na dati meki Ann ben sari so! En mama ben dede foe wan ati-aanval, èn wan sjatoe ten na baka, en papa ben dede foe kanker. Na foe dati ede Ann ben e tan nanga famiri na ini Alaska.

Vanessa ben stòp na a oso foe en njoen mati di a ben de na ini a velddienst na tapoe wan satra èn ben gi en a brochure Bekommert God zich werkelijk om ons? (Troetroe Gado e broko en ede nanga wi?) A tra moende na skoro, Ann ben soekoe a jongoe Kotoigi. Ann ben abi foeroe aksi foe bijbel, di Vanessa ben man gi piki na tapoe. „Pe oenoe e kon makandra foe anbegi?” a ben aksi. A neti dati, Ann ben fisiti en fosi konmakandra na a Kownoekondre zaal.

A no ben teki langa bifo a pikin disi di abi 17 jari èn di no ben abi papa nanga mama ben feni ’papa’ nanga ’mama’ soleki fa Jesus ben pramisi (Mateus 19:29). Èn a ben de wan prisiri sani foe si Ann kolokoe èn e lafoe di a ben teki dopoe na ini watra leki simbôl foe a gi di a gi en libi abra na Jehovah, na tapoe a „Boskopoeman foe a vrede foe Gado”-distriktkongres!

● Na ini den fara kontren foe a bigi kefalek kontren foe Noord-Alaska — pe foeroe hondro kilometer bigi sabana e didon na mindri den dorpoe — na opolani foe a Waktitoren Genootschap di abi toe masjin ben gebroiki foe sai Kownoekondre siri na ini moro leki 150 birti. Ma gro na jejefasi nanga jepi foe wan doronomo studie foe bijbel e anga foe komunikâsi. Foe di a de wan moeilek sani gi foeroe sma foe skrifi brifi, meki wan sma di e leri trawan foe bijbel moesoe man kon nanga idea so taki a kan tan meki a studenti abi belangstelling. Fa disi ben sa kan doe?

Kathy ben hori wan bijbelstudie nanga Edna di ben go na fesi, ala di den ben libi moro leki 600 kilometer fara foe makandra! Na presi foe kopi nomo den aksi foe a boekoe di a e gebroiki foe studeri, Kathy ben meki wan papira nanga den aksi na tapoe èn ben libi presi pe Edna kan skrifi den piki foe den aksi. Baka te Edna ben skrifi den piki, Kathy ben gi piki na tapoe èn ben skrifi sani di de fanowdoe foe tjari wan penti kon na krin. Kathy e taki: „Mi ben poti dridewroko neti na wan sei gi a ’studie’ foe wi, èn mi ben proeberi foe hori misrefi na a schema disi soleki fa mi ben sa doe nanga iniwan tra mofo di mi ben sa kan abi nanga wan bijbelstudie. Mi ben seni so srefi wan ekstra envelope nanga mi adres èn wan seigel na tapoe gi Edna. Foe di a ben teki toe wiki foe kisi a brifi, meki a studie nanga jepi foe brifi ben gersi leki a no ben e go so esi.”

Prakseri foe a prisiri di ben de di Kathy nanga Edna ben miti makandra na tapoe a distriktkongres na ini Anchorage, baka di den studeri tin moen nanga jepi foe a brifi! Den Kotoigi ben prisiri toe foe abi bijbelstudenti nanga tra sma di ben abi belangstelling foe difrenti farawe dorpoe na ini Alaska.

Ala di a gersi sontron taki a gro no ben go esi, tokoe wan toe „pikin pransoen” ben sproiti heri esi te den ben kisi a leti foe a waarheid. Gemiddeld pikinmoro moro leki wán hondro njoen prèiseman foe Jehovah e teki dopoe ibri jari na ini Alaska! Wi e taki: „Grantangi Jehovah”, foe meki sani gro!