Teki A Tiri fu Yehovah Nanga Prisiri

SOLEKI FA ULYSSES V. GLASS BEN FRUTERI

A ben de wan kefalek aparti okasi. Soso 127 studenti ben de na ini a klas di ben klari a skoro nanga bun bakapisi, ma 126.387 sma ben de na ini a publiki di ben e prisiri, èn di ben kon fu furu kondre. A ben de a di fu 21 klas fu a Waktitoren Bijbel Skoro Gilead di ben klari a skoro nanga bun bakapisi èn den kisi den diploma na ini a Yankee Stadium na ini New York City na tapu 19 yuli 1953. Fu san ede disi ben de wan prenspari sani na ini mi libi? Meki mi fruteri pikinso fu a background.

MI GEBORE na ini Vincennes, Indiana, Amerkankondre, na tapu 17 februari 1912, tu yari bifo a geborte fu a Mesias Kownukondre, soleki fa Openbaring 12:1-5 e taki fu en. A yari na fesi, mi papa nanga mama ben bigin studeri Bijbel makandra nanga den buku fu Studies in the Scriptures. Ibri sonde mamanten Papa ben leisi wan fu den buku disi gi na osofamiri, èn dan wi ben taki fu dati.

Mama ben gebroiki den sani di a ben leri fu vorm a denki fu den pikin fu en. A ben de wan kefalek bun sma — a ben abi furu switifasi, èn ben de klariklari fu gi yepi. Wi ben de nanga fo pikin, ma Mama ben lobi tra pikin fu a birti tu. A ben teki ten fu de nanga wi. A ben lobi fruteri wi Bijbel tori èn singi nanga wi.

A ben kari so srefi den wan di ben dini na ini a furuten diniwroko, kon na ini wi oso. Den ben e tan wán noso tu dei nomo, èn nofotron den ben e hori konmakandra èn ben e gi lezing na ini wi oso. Wi ben lobi spesrutu den wan di ben gebroiki agersitori èn di ben fruteri wi tori. Wan leisi na ini a yari 1919, pikinmoro wan yari na baka a kaba fu a fosi grontapu feti, a brada di ben fisiti wi ben taki spesrutu nanga wi leki pikin-nengre. A ben taki fu a wijding — di wi e kari moro soifri now leki a gi di wan sma e gi ensrefi abra na Gado — èn a ben yepi wi fu frustan fa a abi krakti na tapu wi libi. Baka ten, a neti dati di mi ben go sribi, mi ben begi mi hemel Tata èn ben taigi en taki mi wani dini en fu ala ten.

Ma baka a yari 1922, tra sorgu fu a libi ben pusu a bosroiti dati go na tapu a di fu tu presi. Wi ben froisi fu a wan presi go na wan trawan èn wi no ben abi demakandra nanga wan gemeente fu Yehovah en pipel. Papa no ben de na oso bika a ben wroko na trenpasi. Wi no ben studeri Bijbel doronomo moro. Mi ben teki skoro les fu tron wan reklametekenaar èn mi ben meki plan fu go na wan kefalek bun universiteit.

Kenki Mi Marki na ini a Libi

Na a mindri fu den yari 1930 te go miti 1940, grontapu ben e go miti wan grontapu orloku baka. Wi ben e libi na ini Cleveland, Ohio, di wan Kotoigi fu Yehovah ben kon na wi oso. Wi ben bigin prakseri moro seryusu fu den sani di wi ben leri leki pikin-nengre. Mi moro owru brada, Russell, ben de moro seryusu, èn a ben de a fosiwan di ben dopu. Mi ben de wan heri tra sma di no ben de so seryusu leki en, ma na tapu 3 februari 1936 misrefi ben dopu. Mi ben e frustan moro nanga moro san a wani taki fu gi misrefi abra na Yehovah, èn mi ben e leri fu teki a tiri fu Yehovah. A srefi yari dati den tu sisa fu mi, Kathryn nanga Gertrude ben dopu tu. Wi alamala ben bigin na ini a furuten diniwroko leki pionier.

Ma dati no ben wani taki dati noiti wi ben prakseri tra sani. Mi yesi ben tanapu leti opo di a wefi fu mi brada ben fruteri mi fu wan heri moi meisje di nen Ann èn di ben „fayafaya” sensi di a ben yere waarheid, èn di ben o kon na den konmakandra na a oso fu wi. Na a ten dati Ann ben e wroko leki wan sekretarsi na ini wan kantoro di abi fu du nanga wet tori, èn na ini wán yari a ben dopu. Mi no ben abi plan fu trow, ma a ben de krin taki Ann ben horibaka 100 procent gi a waarheid. A ben wani du furu na ini a diniwroko fu Yehovah. Noiti a ben de wan sma di e taki ¿„Mi man du en?” Na presi fu dati, a ben o aksi: „San na a moro bun fasi fa mi kan du en?” A ben abi a fasti bosroiti fu go doro nanga wan sani te na a kaba. A positief denki disi ben hari mi. Boiti dati, a ben moi kefalek, èn a moi ete. A ben tron mi wefi, èn heri esi a ben tron mi patna na ini a pionierwroko.

Prenspari Leri Leki Pionier

Leki pionier wi ben leri a kibritori fa fu de tevrede te wi ben abi pikinso sani nomo èn so srefi te wi ben abi furu sani (Filipisma 4:11-13). Wan dei a ben e kon dungru kaba èn wi no ben abi noti fu nyan. Wi ben abi feifi sensi nomo. Wi ben go na ini wan meti wenkri, èn mi ben aksi: ¿„Yu kan gi wi feifi sensi worst?” A ben luku wi èn dan a ben koti fo pisi gi wi. Mi de seiker taki den ben diri moro feifi sensi, èn a ben gi wi wan sani fu nyan.

A no ben de wan freimde sani fu miti seryusu gens te wi ben e du wi diniwroko. Na ini wan foto krosibei fu Syracuse, na ini New York, wi ben de na strati e prati strooibiljet èn wi ben e weri poster na tapu wi skin fu poti prakseri na wan spesrutu publiki konmakandra. Tu bun bigi man ben grabu mi èn ben handri pikinso grofu nanga mi. Wan fu den ben de wan skowtu, ma a no ben weri en skowtupaki, èn a no ben wani meki mi si en pas di mi ben aksi en. Ma na a momenti dati, Grant Suiter fu Brooklyn Bethel ben waka pasa èn ben taki dati wi ben o lusu na afersi na a skowtu-oso. Dan a ben bel a kantoro fu a Genootschap na ini Brooklyn, èn den tu fu wi ben kisi fu yere taki wi ben musu go baka a srefi dei dati nanga den poster èn nanga strooibiljet so taki den kan gebroiki dati leki wan proefproces. Soleki fa wi ben fruwakti, dan den ben aresteri wi. Ma di wi ben taigi den skowtu taki wi ben o tyari den go na krutu bika den ben aresteri wi sondro taki den abi a reti, dan den ben lusu wi.

A dei na baka, wan grupu tini di lobi meki opruru èn di wan priester ben sutu faya gi, ben broko kon na ini a presi pe wi ben hori wi konmakandra, èn den skowtu no ben de na no wan presi fu si. Den ogri sma disi ben naki den baseball tiki na tapu na udu gron, èn ben trowe wan tu sma fu a publiki fadon fu den sidon presi, èn den ben go na tapu a podium pe den ben hori wan Amerkan fraga na loktu èn ben bari: „¡Gi a fraga odi! ¡Gi a fraga odi!” Dan den ben bigin singi a „Beer Barrel Polka” singi, wan pôpi singi na Amerkankondre. Den ben tapu a konmakandra krinkrin. Wi ben ondrofeni san Yesus ben wani taki di a ben taki: „Fu di unu no de wan pisi fu grontapu, ma mi frukisi unu puru na grontapu, meki grontapu no wani si unu na ai.”—Yohanes 15:19.

A publikitaki ben de trutru wan kopi fu wan lezing di J. F. Rutherford ben hori, di ben de presidenti fu a Waktitoren Genootschap na a ten dati. Ann nanga mi ben tan wan tu dei na ini a foto dati èn wi ben go na den oso fu sma fu aksi den efu den wani yere a lezing na ini den oso. Wan tu fu den ben wani dati.

Gi Wisrefi fu Dini na Tra Kondre

Baka ten nyun fasi fu diniwroko ben opo. Mi brada Russell, nanga en wefi Dorothy, ben kisi wan kari leki trowpaar fu go na a fosi klas fu Gilead Skoro, na ini 1943, èn den ben seni go leki zendeling na Cuba. Mi sisa Kathryn ben de na ini a di fu fo klas. Den ben seni en go tu na Cuba. Baka ten den ben seni en go na Dominikan Republiek èn baka dati na Porto Riko. San pasa nanga Ann nanga mi?

Di wi ben yere fu Gilead Skoro èn taki a Genootschap ben wani seni zendeling go na tra kondre, dan wi ben wani gi wisrefi fu dini na tra kondre. Na ini a bigin wi ben prakseri fu go wisrefi, kande na Meksikow. Ma dan wi ben bosroiti taki kande a ben moro bun fu wakti èn meki a Genootschap gi wi wan toewijzing, baka te wi ben go na Gilead Skoro. Wi ben frustan taki disi ben de wan seti di Yehovah ben e gebroiki.

Wi ben kisi wan kari fu fisiti a di fu fo klas fu Gilead Skoro. Ma syatu bifo a klas ben o bigin, N. H. Knorr, di ben de presidenti fu a Waktitoren Genootschap na a ten dati, ben kon frustan moro bun san na den problema di Ann ben abi, bika fu a polio-siki di a ben abi di a ben de wan pikin. A ben taki nanga mi fu a tori èn ben bosroiti taki a no ben o de wan koni sani fu seni wi fu go dini na ini wan tra kondre.

Pikinmoro tu yari na baka, di mi ben du wroko fu sreka sani gi a kongres, dan Brada Knorr ben si mi baka èn ben aksi mi efu wi ben abi belangstelling ete fu go na Gilead. A ben taigi mi taki wi no ben o go na wan tra kondre; a ben abi wan tra sani gi wi na prakseri. So bun, di a di fu neigi klas ben skrifi den nen trutru na tapu 26 februari 1947, dan wi ben de na ini a grupu studenti tu.

Den dei dati na Gilead ben de dei di wi no ben o frigiti noiti. Den les ben abi furu sani na yeye fasi. Wi ben meki mati di ben o tan wi heri libi langa. Ma mi ben abi moro furu fu du nanga a skoro leki dati wawan.

Na Washington, èn na Gilead

Te yu e teki en gersi tra skoro, dan Gilead Skoro ben nyun ete. A tirimakti fu Amerkankondre no ben sabi nofo san ben de den marki fu a skoro, èn fu dati ede furu aksi ben opo ede kon. A Genootschap ben wani abi wan sma di e teki presi gi en na ini Washington, D.C. Na drape den ben seni wi go wan tu mun na baka di wi ben klari Gilead nanga bun bakapisi. Mi ben musu yepi fu kisi visum gi den sma fu tra kondre di ben kisi a kari fu kon na Gilead, èn fu kisi lanti papira gi den so taki den sma di ben klari a skoro ben kan seni go na dorosei kondre gi a zendelingwroko. Wan tu fu den lantiman ben eerlijk èn den ben yepi trutru. Trawan ben de teige Kotoigi srefisrefi. Wan tu fu den di ben abi seryusu politiek denki ben fruklari taki wi ben abi banti nanga grupu di den no ben wani srefisrefi.

Wan man di mi ben go na en kantoro ben krutu wi seryusu bika wi no e gi a fraga odi noso no e go feti na ini orloku. Baka di a ben rigeri fu dati wan pisi ten, dan mi ben taki te fu kaba: „Mi wani meki yu sabi, èn yu sabi trutru, taki Kotoigi fu Yehovah no e feti na ini orloku nanga no wan sma na ini grontapu. Wi no e bumui nanga den afersi fu grontapu. Wi no e bumui na ini den orloku, èn den politiek fu den. Wi de neutraal dorodoro. Wi wini den problema kaba di yu e miti now; wi abi wánfasi na ini wi organisâsi. . . . We, san yu wani taki wi musu du? ¿Yu wani taki wi musu du sani fa yu e du sani, èn gowe libi a di fu wi?” A no ben taki noti baka dati.

Tu heri dei na ini wan wiki ben poti na wan sei gi a wroko nanga den lanti kantoro. Na tapu fu dati, wi ben e dini leki spesrutu pionier. Na a ten dati, a ben wani taki dati wi ben musu wroko 175 yuru na ini a velddienst ibri mun (baka ten a ben tron 140 yuru), èn fu dati ede furutron wi ben de bun lati neti ete na ini a diniwroko. Wi ben abi wan switi ten. Wi ben hori furu moi bijbelstudie nanga heri osofamiri èn den ben go na fesi heri bun. Ann nanga mi ben bosroiti fu no abi pikin, ma na yeye fasi, wi no ben abi pikin wawan, ma so srefi granpikin nanga gran-granpikin. ¡Den na wan prisiri gi wi trutru!

Na a kaba fu 1948, mi ben kisi ete wan toewijzing. Brada Knorr ben fruklari taki Brada Schroeder, na administrateur èn wan fu den man di e gi leri na Gilead Skoro ben o abi furu fu du nanga tra prenspari wroko, èn fu dati ede den ben aksi mi fu gi leri na den Gilead klas te a ben de fanowdu. Nanga furu frede mi nanga Ann ben doro baka na Gilead na ini South Lansing, New York, na tapu 18 december. Na ini a bigin wi ben de wan tu wiki nomo na Gilead, èn baka dati wi ben go baka na Washington. Ma te fu kaba mi ben tan moro langa na Gilead leki na ini Washington.

A ben de na ini a pisi ten disi, soleki fa mi ben taki kaba, taki a di fu 21 klas fu Gilead ben klari a skoro nanga bun bakapisi na Yankee Stadium na ini New York. So bun, leki wan fu den man di ben gi leri, mi ben abi a grani fu abi wan prati na a programa na a kaba fu a skoro.

Dini na den Edekantoro fu Heri Grontapu

Na tapu 12 februari 1955 wan tra toewijzing fu dini ben bigin gi wi. Wi ben tron memre fu a Bethelfamiri na a edekantoro fu Yehovah en organisâsi di wi man si nanga ai, fu heri grontapu. Ma san dati ben o wani taki? Moro furu dati ben o wani taki dati wi ben musu wani du awansi san wi ben kisi fu du, èn du sani di ben o wani taki dati wi musu wroko makandra nanga tra sma. A no de fu taki dati wi ben du dati kaba, ma now wi ben o de wan pisi fu wan moro bigi grupu — a Bethelfamiri na a edekantoro. Wi ben teki a nyun toewijzing disi nanga prisiri èn ben si en leki wan buweisi fu a tiri di Yehovah e gi.

Wan bigi pisi fu mi wroko ben abi fu du nanga nyunsu afersi. Bika a media ben lobi span tori èn bika den ben teki bodoi fu sma di e krutu wi somarso, meki den nyunsuman ben skrifi wan tu takru sani fu Yehovah Kotoigi. Wi ben du muiti fu tyari wan kenki kon na ini a situwâsi dati.

Brada Knorr ben wani de seiker taki wi alamala ben abi furu fu du, èn fu dati ede wi ben abi tra toewijzing tu. Wan tu fu den toewijzing ben meki taki den bekwaamfasi di mi ben abi leki wan reklametekenaar ben kon de fanowdu. Trawan ben abi fu du nanga a radiostation fu a Genootschap, WBBR. Wroko ben de fu du di ben abi fu du nanga den film di a Genootschap ben meki. A no de fu taki dati a theokrasia historia ben de wan pisi fu den Gilead les, ma now difrenti programa ben du fu meki moro sma fu a pipel fu Yehovah kon sabi den finitori fu a historia fu a disiten theokrasia organisâsi èn fu meki a publiki kan sabi disi tu. Wan tra pisi fu a leri fu Gilead ben abi fu du nanga a taki di wi ben musu leri fu taki na publiki, èn wroko ben musu du fu meki moro fu den prenspari leri fa fu gi publikitaki ben musu gi na den brada ini den gemeente. So bun, kefalek furu sani ben de fu du.

Tan na Gilead Doronomo

Fu di a leri fu den opziener di e reis èn den brada fu a bijkantoro ben musu bigin na ini 1961, meki a Gilead Skoro ben froisi go na Brooklyn, pe a Waktitoren Genootschap abi den edekantoro fu en. Agen mi ben de na ini wan klas — a leisi disi no leki wan di fu tu leriman, ma leki wan fasti memre fu den brada di ben e gi leri. ¡Dati ben de wan bigi grani! Mi e bribi trutru taki a Gilead Skoro de wan presenti fu Yehovah, wan presenti di ben abi wini gi a heri organisâsi fu en di de fu si nanga ai.

Den Gilead klas na ini Brooklyn ben abi okasi di den studenti fu den fosi klas no ben abi. Moro fisiti takiman ben de èn wan moro krosibei demakandra nanga a Tiri Skin ben de, èn moro matifasi nanga a Bethelfamiri na a edekantoro. Den studenti ben kan kisi leri tu fu du kantoro wroko, fu a fasi fa sani e wroko na ini na Bethel-oso, èn na ini den difrenti wroko na ini a drukkerij.

Na ini den furu yari di pasa, a nomru studenti ben difrenti, èn so srefi a nomru fu leriman. A presi pe a skoro ben hori ben kenki difrenti leisi tu. Now a de na ini a moi kontren na ini Patterson, New York.

Wroko Nanga den Studenti

¡A ben de wan bigi prisiri fu leri den klas disi! Den na yongu sma di no wani du sani na ini na owru sistema. Den libi den famiri, den mati, den oso, èn sma di e taki a tongo fu den. A weer, a nyanyan — ala sani o de tra fasi. Den no sabi srefi na sortu kondre den sa go, ma a marki fu den na fu de zendeling. Yu no abi fu buweigi na ati fu den sortu sma dati.

Di mi ben e go na ini a klas, a ben de mi prakseri ala ten fu meki den studenti firi bun. No wan sma man leri bun te a de spanspan èn e broko en ede nanga sani. A tru, mi ben de a leriman, ma mi ben sabi fa a de fu de wan studenti. Wan leisi misrefi ben sidon na ini den sturu dati. A no de fu taki, den ben studeri tranga èn ben leri furu na Gilead, ma mi ben wani meki den abi wan switi ten tu.

Mi ben sabi taki te den ben go na den toewijzing fu den, dan wan tu sani ben de di den ben abi fanowdu fu abi bun bakapisi. Den ben abi wan tranga bribi fanowdu. Den ben musu abi sakafasi — furu sakafasi. Den ben musu leri fa fu feni en nanga tra sma, fu libi nanga den situwâsi, fu gi sma pardon na wan fri fasi. Den ben musu tan kweki den froktu fu a yeye. Den ben musu lobi sma tu èn lobi a wroko di den ben kisi fu du. Dati na den sani di doronomo mi ben pruberi fu poti krakti na tapu gi den studenti, ala di den ben de na Gilead.

Mi no sabi trutru omeni studenti mi ben gi leri. Ma mi sabi san mi e firi gi den. Baka te mi ben de feifi mun nanga den na ini a klas, dan mi no ben man tra fasi leki fu lobi den. Èn te mi ben e si den e waka na tapu a podium èn kisi a diploma fu den na tapu a dei dati, dan mi sabi taki den ben klari a skoro bun èn taki heri esi den ben o gowe. A ben de leki wan pisi fu mi famiri ben e gowe. Fa yu man hori yusrefi fu no lobi sma di de klariklari fu gi densrefi èn fu du a wroko di den yongu sma disi ben o du?

Furu yari na baka, te den e kon baka fu tyari wan fisiti, dan mi e yere den e fruteri fu a prisiri fu den na ini a diniwroko, èn mi sabi taki den de na ini den toewijzing fu den ete, èn e du san den ben leri fu du. Fa dati e meki mi firi? Mi e taigi yu, a de wan switi firi.

Luku na a Ten Di E Kon

Mi no man si bun moro now, èn mi e ondrofeni den problema di disi e tyari. Mi no man gi leri moro na ini a Gilead klas. Na ini a bigin disi ben de wan muilek kenki, ma na ini mi heri libi mi ben leri fu teki ibri situwâsi èn fu libi nanga den. Nofotron mi e denki fu na apostel Paulus nanga en „maka na ini a skin”. Dri tron Paulus ben begi fu kisi frulekti fu a pina dati, ma Masra ben taigi en: „A no-frudini bun-ati fu mi nofo gi yu, bika a krakti fu mi e kon volmaakti na ini swakifasi” (2 Korentesma 12:7-10). Paulus ben tan libi nanga en. Efu a ben man du en, dan mi musu pruberi fu du dati tu. Ala di mi no e gi den klas leri moro, mi de tangi taki mi abi mi kantoro pe mi e si den studenti e go-kon. Sontron mi man taki nanga den, èn a e gi mi ati prisiri te mi e prakseri a moi yeyefasi di den e sori.

A moi fu prakseri fu den sani di o pasa na ini a ten di e kon. A fondamenti gi dati e poti nownow. Gilead ben abi wan prenspari pisi na ini en. Na baka a bigi banawtu, te den buku-lolo di kari na ini Openbaring 20:12 opo, dan ete dusun yari sa de fu gi moro fayafaya leri na ini den pasi fu Yehovah (Yesaya 11:9). Ma dati a no a kaba ete. Dati na soso a bigin. Fu têgo, moro sa de fu leri fu Yehovah èn moro sa de fu du te wi e si den prakseri fu en e kon tru safrisafri. Mi abi a frutrow taki Yehovah sa meki ala den kefalek moi pramisi fu en kon tru, èn mi wani de drape fu teki den tiri fu Yehovah gi wi na ini a ten dati.

[Prenki na tapu bladzijde 26]

A klari di den studenti ben klari a Gilead Skoro na ini a Yankee Stadium na ini New York, na ini a yari 1953

[Prenki na tapu bladzijde 26]

Gertrude, mi, Kathryn, nanga Russell

[Prenki na tapu bladzijde 26]

Mi e wroko nanga N. H. Knorr (te na a kruktu-anusei) nanga M. G. Henschel fu orga kongres

[Prenki na tapu bladzijde 26]

Na ini a WBBR studio

[Prenki na tapu bladzijde 29]

Na ini a Gilead klas

[Prenki na tapu bladzijde 31]

Nanga Ann, no so langa pasa