Boen studenti di kon tron boen zendeling
„MI NO kan bribi ete taki wi ben kisi a grani disi!”, na so Will ben taki nanga tranga sten, di a ben taki foe a skoro di en nanga en wefi, Patsy, ben klari no so langa ete leki studenti foe a di foe 103 klas foe a Waktitoren Bijbelskoro Gilead. Zahid nanga Jeni ben agri. „Wi e si en leki wan grani foe de djaso”, den ben taki. Ala den studenti ben studeri fajafaja na a skoro. Now den ben de fajafaja foe bigin nanga a libiwroko foe den leki zendeling. Ma fosi dati, na a programa tapoe 6 september 1997 foe a klari di den ben klari a skoro nanga boen bakapisi, den ben kisi lobi-ati rai di ben sa jepi den foe abi boen bakapisi na ini den zendingtoewijzing foe den.
A fesiman foe a programa ben de Theodore Jaracz, wan memre foe a Tiri Skin. A ben tjari kon na krin taki — makandra nanga a Bethelfamiri nanga sma di e teki presi gi 48 bijkantoro foe a Waktitoren Genootschap — mati nanga famiri foe Kanada, Europa, Porto Riko nanga Amerkankondre ben de drape foe gi den studenti a djaranti taki den e horibaka gi den èn taki den lobi den. Brada Jaracz ben taki dati zendeling di den kerki foe krestenhèit ben seni go, foeroetron meki sani poeroe a prakseri foe den foe den zendingwroko èn bigin doe moeiti na sabidensi sei noso kon abi foe doe srefi nanga politik. Na a tra sei, den sma di ben klari Gilead nanga boen bakapisi e doe san den leri foe doe. Den e leri sma bijbel.
Baka dati, Robert Butler foe a kantoro foe a Genootschap na Brooklyn ben taki foe a thema „Meki sani waka boen gi joe”. A ben tjari kon na krin taki ala di sma e marki boen bakapisi di sma abi nanga wini na moni sei noso tra wini di wan sma kisi gi ensrefi, tokoe san prenspari troetroe na fa Gado e marki boen bakapisi di sma abi. Jesus ben abi boen bakapisi na ini en diniwroko, no foe di a ben meki foeroe sma drai den libi, ma foe di a ben de getrow na ini en toewijzing. Jesus ben gi Jehovah glori, èn a ben tan sondro flaka foe grontapoe (Johanes 16:33; 17:4). Den sani dati na sani di ala kresten kan doe.
„De srafoe foe ala sma”, na so Robert Pevy, di ben de wan zendeling fosi na Owstoesei, ben gi leki rai. Na apostel Paulus ben de wan zendeling di ben abi boen bakapisi. San ben de a sroto gi a boen bakapisi di a ben abi? A ben meki ensrefi tron srafoe foe ala sma (1 Korentesma 9:19-23). A takiman ben tjari kon na krin: „Wan sma di klari Gilead nanga boen bakapisi èn di abi a fasi dati foe denki, no sa si a zendingwroko leki wan sortoe promotie na wan libiwroko, wan sani di e jepi en foe kisi moro prenspari posisi na ini na organisâsi. Wan zendeling e go na en toewijzing nanga soso wán reide — foe dini, bika dati na san srafoe e doe.”
Gerrit Lösch foe a Tiri Skin ben froemane den studenti foe „Sori a glori foe Jehovah leki spikri” èn a rai di a ben gi ben abi en gron spesroetoe na tapoe 2 Korentesma kapitel 3 nanga 4. A ben memre den taki a sabi foe Gado de leki wan leti di e skèin tapoe wan kresten te a e opo en ati foe kisi a leti. Wi e skèin a leti dati baka foe di wi e preiki a boen njoensoe èn foe di wi tan tjari wisrefi na wan boen fasi. „Wanwan leisi kande joe e firi taki joe no de bekwaam nofo”, a ben erken. „Te den sortoe firi dati e kon, froetrow na tapoe Jehovah, so ’taki a krakti di e pasa san de normaal, ben sa de foe Gado’” (2 Korentesma 4:7). Di a ben taki den wortoe foe Paulus baka, di skrifi na ini 2 Korentesma 4:1, brada Lösch ben aksi den studenti: „No tapoe nanga joe zendingtoewijzing. Tan hori a spikri foe joe krin!”
Karl Adams, wan memre foe a staf foe a Gileadskoro, ben taki foe a moi thema „Pe Jehovah de?” Na aksi no e sori go na a presi pe Gado de ini na universum, ma a e sori go na a fanowdoe di de foe loekoe a fasi fa Jehovah e si sani èn foe loekoe na den sani di e sori taki a e gi tiri. „Te wan sma de ondro stress”, a ben taki, „awansi a dini Jehovah langa ten kaba, a kan frigiti a fasi fa Jehovah e si sani” (Job 35:10). Fa a de na ini a ten foe wi? Na ini 1942, a pipel foe Gado ben abi tiri fanowdoe. A preikiwroko ben e kon na wan kaba, noso moro wroko ben de foe doe? San ben de a wani foe Jehovah gi en pipel? Di den ben studeri a Wortoe foe Gado, a piki ben kon krin foe si. „Bifo december 1942 ben kaba,” na so brada Adams ben froeklari, „plan ben meki gi a Waktitoren Bijbelskoro Gilead.” Jehovah seiker blesi a wroko foe den zendeling di a skoro dati ben seni go.
Mark Noumair ben de a di foe toe leriman di ben hori wan lezing. Na ini en lezing, di nen „Fa joe o gebroiki joe talenti?”, a ben gi den studenti deki-ati foe gebroiki a leri di den ben kisi na Gilead so esi leki den doro na den njoen toewijzing foe den. „Span joesrefi foe abi belangstelling gi trawan”, a ben taki. „Abi belangstelling gi den sma nanga a koeltoeroe foe den. De fajafaja foe leri den gwenti, a historia, den sani di sma e si leki lafoetori foe a kondre. O moro esi joe e leri a tongo, o moro makriki joe sa fiti joesrefi na joe toewijzing.”
Fajafaja studenti e kisi prisiri na ini a diniwroko
Boiti taki den studenti ben moesoe poti prakseri na tapoe a studie foe den ala di den ben de na Gilead, den ben kisi a toewijzing foe go na 11 gemeente na ini a birti. Na a kaba foe den wiki, den ben teki prati fajafaja na ini a preikiwroko. Wallace Liverance foe a staf foe a Gileadskoro ben kari difrenti foe den foe froeteri den arkiman wan toe foe den ondrofenitori foe den. A prisiri foe den ben de foe si di den ben froeteri den sani di den ben ondrofeni na a ten di den ben gi kotoigi na bigi gebow nanga difrenti sortoe wenkri na ini, na parkeer presi, na bisnis kontren, na strati, èn na oso foe oso. Son wan foe den ben soekoe fasi foe doro na den sma di e taki wan tra tongo èn di ben libi èn ben wroko na ini a gebied foe a gemeente foe den. Den memre foe a di foe 103 klas ben opo èn ben hori seiker tin oso-bijbelstudie, na ini den feifi moen di den ben kisi skoro.
Sma di de zendeling langa ten kaba e froeteri den sroto foe abi boen bakapisi
Baka a prisiri pisi disi foe a programa, Patrick Lafranca nanga William Van de Wall ben kari seibi memre foe bijkantorokomte foe froeteri den sani di den ben leri na ini a libiwroko foe den leki zendeling èn di a klas ben kan teki wini foe dati. Den ben froemane den sma di ben klari a Gileadskoro foe si a zendingtoewijzing foe den leki wan sani di komoto na Jehovah èn foe abi a fasti bosroiti foe tan na ini a toewijzing. Den ben taki foe den boen bakapisi di den zendeling di ben kisi skoro na Gilead, abi na ini a wroko na tra kondre.
San ben jepi den memre disi foe den bijkantorokomte foe dini someni tenti jari leki zendeling di de kolokoe èn di abi boen bakapisi? Den ben wroko krosibei nanga den brada na ini a kondre èn ben leri sani foe den. Den ben gi densrefi foe leri a tongo so esi leki den ben doro na den toewijzing foe den. Den ben leri foe de klariklari foe fiti densrefi na ondro son situwâsi èn foe fiti densrefi na den gwenti foe a kondre. Charles Eisenhower, wan sma di ben klari a fosi klas foe Gilead èn di de wan zendeling 54 jari langa kaba, ben froeteri foe feifi „sroto” di zendeling di abi boen bakapisi, leri: (1) Studeri bijbel doronomo, (2) leri a tongo, (3) de fajafaja na ini a diniwroko, (4) wroko gi a vrede na ini a zending-oso, èn (5) begi Jehovah doronomo. A no den praktis rai wawan di den studenti ben kisi, ben naki na ati foe den, ma so srefi a prisiri di den bekwaam zendeling disi abi na ini a wroko foe Jehovah èn di ben de foe si. Soleki fa Armando nanga Lupe ben taki en, dan „den memre foe den bijkantoro komte de kolokoe te den e taki foe a libi foe den”.
Baka di den interview sma, wán lezing ben tan abra. Albert Schroeder, wan memre foe a Tiri Skin, ben teki leki en thema „A wroko leki getrow granfoetoeboi e tjari diriston foe waarheid kon na krin di warti foeroe”. Foe di bijbel na a prenspari boekoe di den gebroiki na Gileadskoro, meki den studenti ben wani sabi san a ben abi foe taki. Brada Schroeder ben sori taki di den ben bigin wroko na a Nieuwe-Wereldvertaling van de Heilige Schrift 50 jari pasa kaba, den salfoe memre foe a Vertaalcomité van de Nieuwe-Wereldbijbel no ben soekoe foe kisi a boen-ati foe libisma, ma ben froetrow na tapoe a tiri foe a santa jeje (Jeremia 17:5-8). Ma no so langa pasa, son sabiman erken a hei markitiki di a Nieuwe-Wereldvertaling poti. Na ini wan brifi di wan sabiman foe bijbel ben skrifi gi a Genootschap, a ben skrifi: „Mi sabi wan poeblikâsi nanga hei markitiki te mi si wán, èn a ’Vertaalcomité van de Nieuwe-Wereldbijbel’ foe oenoe doe en wroko kefalek boen.”
Baka a lezing disi, den studenti ben kisi den diploma foe den, èn den ben meki den toewijzing foe den bekènti gi den arkiman. A ben de wan momenti di ben naki na ati foe den memre foe a klas. Di wan brada di ben teki presi gi a klas ben leisi wan brifi foe sori warderi, dan foeroe foe den ben abi a firi foe krei èn den ai ben lon watra. Son wan foe den studenti ben sreka densrefi gi a zendingwroko foeroe jari langa kaba. Foe di den ben sabi taki a Gileadskoro ben sa hori na ini Ingrisitongo, meki wan toe foe den ben froisi go na gemeente pe den e taki Ingrisitongo, foe kon moro boen ini a gebroiki foe na Ingrisitongo. Trawan ben froisi go na presi pe moro pionier ben de fanowdoe, awansi na ini den eigi kondre noso na tra kondre. Trawan baka ben sreka densrefi foe di den ben leisi ondrofenitori, ben e ondrosoekoe sani, noso ben e loekoe a video foe a Genootschap Tot de einden der aarde ibri tron baka.
A persoonlijke belangstelling di den ben sori gi den studenti, ben foeroe pasamarki gi Will nanga Patsy, di wi ben kari na ini a bigin. „Sma di no ben sabi wi srefi ben e brasa wi èn ben e meki fowtow foe wi. Wan memre foe a Tiri Skin ben seki wi anoe èn ben taki: ’Wi e prisiri nanga oenoe!’” A no de foe tweifri taki den lobi den studenti foe a di foe 103 klas srefisrefi. Den kisi boen skoro. A skoro di den kisi na Gilead, sa meki taki den man tjari a kenki kon foe boen studenti di kon tron boen zendeling.
[Faki na tapoe bladzijde 22]
Statistiek foe a klas
Nomroe foe kondre di den teki presi gi: 9
Nomroe foe kondre pe den kisi toewijzing foe go: 18
Nomroe foe studenti: 48
Nomroe foe trowpaar: 24
Gemiddelde jari di den abi: 33
Gemiddelde jari di den de na ini waarheid: 16
Gemiddelde jari di den de na ini a foeroeten diniwroko: 12
[Prenki na tapoe bladzijde 23]
A di foe 103 klas di klari a Waktitoren Bijbelskoro Gilead nanga boen bakapisi
Na ini a lijst na ondrosei, den rèi nomroe foe fesi go na baka, èn den nen skrifi foe kroektoe-anoesei go na reti-anoesei na ini ibri rèi.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Prenki na tapoe bladzijde 24]
Pe wi e go?