Mi kisi foeroe blesi foe santa diniwroko di mi ben doe

Soleki fa Harry Bloor ben froeteri

Wan sani foe wán hondro jari pasa kaba, mi granpapa ben de wan getrow memre foe a Methodist Kerki. A ben de so srefi wan lespeki domri di ben de wan gewoon memre foe kerki, di ben gi foeroe foe horibaka gi foeroe kapèl na Stoke-on-Trent, wan foto na Ingrisikondre pe moro foeroe den e meki keramik sani. Baka dati a ben ondrofeni tranga ten na moni sei. Foe jepi granpapa, dan mi papa ben seti sani gi en foe drai wan pikin wenkri ini a dorpoe. A wenkri ben abi vergunning foe seri biri, èn di den Methodistsma ben kon sabi dati, dan wantewante den ben poeroe granpapa komoto foe a kerki.

PAPA ben atibron srefisrefi èn ben sweri taki noiti a no ben sa abi wan sani foe doe moro nanga relisi — èn a ben hori ensrefi na en wortoe. A ben de wan skowtoe, ma baka ten a ben tron na eiginari foe wan bar. So boen, mi ben kweki na mindri den smeri nanga smoko foe a presi dati. Relisi no ben prei wan ròl na ini mi libi, ma mi ben leri foe prei moro foeroe foe den prei tapoe bord boen! Ma foe di granpapa ben abi krakti tapoe mi kaba di mi ben jongoe ete, meki mi ben tan abi foeroe lespeki gi bijbel, ala di mi ben sabi pikinso nomo foe bijbel.

Mi ben kon leri sabi bijbel waarheid

Na ini 1923, di mi ben abi 24 jari, mi ben froisi go na owstoesei na Nottingham èn ben bigin meki mofo foe trow nanga Marie, di ben libi so wan 40 kilometer moro fara na ini a dorpoe Whetstone, zuidwest foe Leicester. En papa, Arthur Rest, ben de a sma di ben prei na orgel na a kapèl foe a dorpoe, ma na a ten dati a ben de wan fajafaja Bijbel Ondrosoekoeman, soleki fa sma ben sabi Jehovah Kotoigi na a ten dati. Ala ten Arthur ben e taki nanga mi foe en bribi di a ben feni no so langa ete — ma mi no ben abi foeroe belangstelling. Ma a belangstelling foe mi ben wiki di mi ben go makandra nanga en na a Baptist kapèl foe a presi, sonde bakadina, 13 juli 1924, foe arki wan lezing foe wan memre foe a parlement di ben de wan prenspari Baptistsma. A tori foe en, „Den leri foe pastoor Russell èn san ondrosoekoe foe bijbel e sori”, ben wiki mi belangstelling. Mi abi den sani ete di mi ben skrifi na a okasi dati.

Den Baptistsma ben weigri di den Bijbel Ondrosoekoeman ben aksi foe piki tapoe a kroetoe di den ben kroetoe den sani di den ben bribi na ini. A sani dati ben meki mi kisi atibron èn ben teki a bosroiti foe feni wan tra presi foe hori so wan konmakandra. Wan maksin di ben de krosibei ben sori foe de boen gi dati. Wi ben sibi en krin, ben poeroe den anansi titei, ben poesoe a pelmolen go na wan sei, èn baka dati wi alamala ben sreka. Wi ben tjari 70 stoeroe kon makandra, èn wi ben druk strooibiljet.

Di Frank Freer ben doro foe Leicester foe hori a lezing, sma ben sidon na tapoe ala den stoeroe di ben poti, èn 70 trawan ben e tanapoe! A krin fasi fa Frank ben taki-go-taki-kon nanga jepi foe den Boekoe foe bijbel ben wiki mi belangstelling, soleki fa a ben wiki a belangstelling toe foe foeroe trawan di ben de drape. Sensi a ten dati, a pikin gemeente foe Bijbel Ondrosoekoeman na ini Blaby, di ben de krosibei foe Leicester, ben gro kefalek esi. Wan prenspari kenki ben kon na ini mi libi toe — so srefi na ini a libi foe Marie. Na ini 1925, wi ala toe ben gi wisrefi abra na Jehovah, ben teki dopoe èn ben trow.

Wi kisi blesi na jeje sei

A jari na baka, mi ben poti na wroko leki dienst fesiman foe gemeente Blaby. Mi wefi nanga mi ben wani waka baka den foetoestap foe den kolporteur èn tron foeroeten evangelie preikiman, ma heri esi wi ben kon si taki a gosontoe foe Marie no ben sa meki taki a man hori ensrefi na so wan strak schema. Ala di a no ben abi wan boen gosontoe te leki en dede na ini a jari 1987, tokoe a ben de wan boen kompe èn wan kefalek boen bedinari di ben abi a koni foe gi okasi preiki èn foe bigin oso-bijbelstudie. Wi ben gebroiki moro foeroe foe den neti foe wi foe go na den konmakandra noso foe go prati bijbel waarheid nanga den birtisma foe wi.

Mi ben de wan man di ben e meki masjin èn ben wroko nanga wan firma di ben meki onderdeel foe masjin gi fabriki di e sa oedoe. A wroko foe mi ben wani taki toe foe rèis foeroe na heri Ingrisikondre, so srefi na ini Fransikondre, èn Marie ben gwenti foe go nanga mi. Den rèis disi ben gi wi okasi foe gi foeroe kotoigi.

Wi poti den fondamenti foe moro gro

Na ini 1925, wi ben opo wan moi gebow gi den konmakandra foe wi na ini Blaby, èn foe drape wi ben orga wan boen programa foe gi kotoigi. Ibri sonde mamanten, wi ben joeroe wan bus di ben tjari wi go na den dorpoe di ben fara foe makandra èn na den moro pikin foto. Na pasi wi ben saka wan toe preikiman foe go preiki, èn baka ten a bus ben teki den te a ben drai baka. Na ini den waran zomer moen, wi ben abi wan bijbelstudie na latilati sonde bakadina èn wi ben gebroiki wan moro njoen eksemplaar foe A Waktitoren. Baka dati, na aiti joeroe, dan wi ben miti makandra na a presi pe a wowojo foe Leicester de, gi wan poeblikitaki di ben hori na dorosei. Wán neti, 200 sma ben arki. Na aktiviteit disi ben poti den fondamenti foe den foeroe gemeente di de nownow na ini èn lontoe Leicester.

Na ini 1926, wan toemoesi prenspari kongres ben hori makandra na Alexandra Palace nanga Royal Albert Hall na Londen. Na a okasi dati, Joseph F. Rutherford, di ben de a presidenti foe a Waktitoren Genootschap na a ten dati, ben tjari a boekoe Deliverance (Meki kon fri) kon na doro. A heri resolutie „Wan froeklari gi den tiriman foe grontapoe” nanga a krakti poeblikitaki foe Brada Rutherford „Foe san ede den grontapoe tirimakti e swaki — A loesoe”, ben druk na ini wan prenspari koranti a dei baka di den pristeri a resolutie nanga a lezing. Moro leki 10.000 sma ben jere a poeblikitaki, èn 50.000.000 eksemplaar foe a resolutie ben prati na heri grontapoe baka dati. A kongres dati ben de foe meki a preikiwroko na ini Ingrisikondre go moro esi.

Wan bigi kongres ben hori na ini a ten foe feti

A di foe toe grontapoefeti ben broko na ini september 1939, èn na ini a jari 1941 a feti ben hebi srefisrefi. Den Doisri opolani di ben trowe bom ben kon dei nanga neti, èn a heri kondre ben moesoe de na ini doengroe leki wan fasi foe kisi kibri teige den bom. Njanjan no ben de foeroe, èn san ben de foe kisi ben prati soifri leki lansoen. A ben moeilek srefisrefi foe feni vervoer, srefi nanga loko a ben moeilek. Ala di den problema disi ben de di ben gersi leki sma no ben man wini den, tokoe wi ben hori wan kongres foe feifi dei ini a kondre foe 3-7 september 1941.

Wi ben teki De Montfort Hall foe Leicester leki a presi foe hori a kongres, bika Leicester de na mindri foe Ingrisikondre. Foe di mi ben wroko ini wan oedoe-fabrik, dan mi ben man jepi foe meki sani di ben e meki a kongres bekènti. Mi ben seti sani toe gi vervoer foe den sma di ben kon na a kongres. Foe di wi ben bai den loko karta na fesi èn ben pai moro hei leki a normaal prijs, dan wi ben man meki den loko foe Leicester rèi sonde srefi.

Foe di sma ben skotoe foe rèis, dan wi ben howpoe taki kande 3000 Kotoigi ben kan kon. Prakseri fa wi ben prisiri srefisrefi, di moro leki 10.000 sma foe tra kondre ben taki dati den ben sa de drape na a kongres! Ma pe den ben o tan? Na wan switi fasi den sma di ben libi na ini Leicester ben gi foeroe sma wan kari foe tan na den oso foe den. Boiti dati, wan sani foe wán doesoen sma ben tan na ini tenti di den ben opo na wan veld, dri kilometer foe a presi pe a kongres ben o hori. A kampoe foe Gideon, soleki fa wi ben kari en, ben meki foeroe sekiseki kon na ini a libimakandra.

Wi ben joeroe bigi weti tenti foe gebroiki den gi kongres afdeling èn foe gi presi na den ipi-ipi sma di ben foeroe srefisrefi. Di wi ben kon si taki, te a moenkenki ben krin, den opolani foe den Nazi di e trowe bom, ben sa kan gebroiki den tenti disi leki marki foe trowe den bom, dan esi-esi wi ben tapoe den nanga sani. A feti, èn spesroetoe a teki di den Kotoigi no ben teki prati na ini, ben de wan afersi di ben abi krakti na tapoe a poebliki. Na a ten dati, hondrohondro Kotoigi ben de na ini strafoe-oso foe di den ben teki wan neutraal posisi tapoe a gron foe bijbel. — Jesaja 2:4; Johanes 17:16.

The Leicester Mercury, foe 7 september 1941, ben skrifi: „A de wan froewondroe sani foe feni 10.000 sma, moro foeroe jongoesma, di e gebroiki wan wiki langa foe taki foe relisi, sondro foe taki wan sani foe a feti, èn efoe den doe dati, dan den e taki sjatoe foe en nomo.

„Mi ben aksi efoe den Kotoigi ben abi iniwan memre na Doisrikondre. Den ben taigi mi taki na so a de, èn pikinmoro alamala foe den, so wan 6000, ben de na ini strafoeman kampoe.”

A njoensoeman ben taki moro fara: „O, ija, a troe taki den Nazi na a feanti, ma den Kotoigi e doe pikinso nomo foe feti nanga a feanti, boiti foe seri traktaat èn arki na lezing nomo di hori.”

Moro foeroe foe den sani di koranti ben taki foe wi, ben de negatief, èn gensman ben gebroiki srefi ogri nanga tranga foe proeberi foe broeja a kongres foe wi, ma sondro boen bakapisi. Tokoe a Daily Mail foe Londen ben erken, ala di den no ben doe nanga den heri ati: „A fasi fa sani ben orga ben de sondro problema, sondro pranpran èn ben abi boen bakapisi.”

Den ben kragi taki a ben de a fowtoe foe wi taki a foto no ben abi nofo sikaret. Ma The Daily Mail ben froeklari: „Leicester noso na edeman foe na afdeling foe tabaka no kan kragi taki den Kotoigi e leigi a voorraad sikaret foe Leicester. Den no e smoko.” So srefi a kragi di sma ben kragi taki den Kotoigi ben teki a njanjan foe den sma di ben libi drape, ben poeroe na pasi di den Kotoigi ben tjari kon na krin taki den ben tjari moro foeroe foe den njanjan foe den nanga den. Foe taki en leti, na a kaba foe a kongres, den ben gi 150 brede foe 1,8 kilo na a Royal ati-oso foe Leicester — wan bigi bijdrage na ini a ten dati di njanjan ben mankeri.

A kongres ben sorgoe taki den so wan 11.000 Kotoigi na ini Ingrisikondre ben kon moro boen na jejefasi. A ben naki den ati srefisrefi taki so wan 12.000 sma ben de na a kongres! Sma foe tra kondre di ben kon na a kongres ben teki prati nanga prisiri na a gi di den ben gi kotoigi na strati na Leicester, wan sani di noiti na fesi ben pasa so foeroe, èn den ben go na den dorpoe di ben de fara, nanga den pristeri di de tapoe grammafoon.

Den prenspari lezing foe a kongres ben de lezing di ben poti tapoe cassette-lolo a moen na fesi, foe a feifi dei kongres foe Jehovah Kotoigi na St. Louis, Missouri, Amerkankondre. A lezing foe brada Rutherford „Pikin foe a Kownoe” di ben poti tapoe cassette-lolo, ben de wan heimarki foe a kongres. Foe di wi no ben man tjari eksemplaar foe a boekoe Children (Pikin-nengre) di ben tjari kon na doro na St. Louis, kon na wi kondre, dan baka ten den ben meki wan spesroetoe boekoe nanga safoe kafti foe a boekoe Children na ini Ingrisikondre. Den ben seni wan kopi foe a boekoe go na ala den pikin-nengre di ben go na a kongres.

A toemoesi aparti alajari konmakandra na Leicester

Baka a feti, a gro di a nomroe foe Kownoekondre preikiman na ini Ingrisikondre ben gro, ben moi srefisrefi! Na ini a jari 1980 èn sjatoe baka dati, a nomroe foe gemeente na ini Leicester ben gro kon miti tin. Ne den ben taigi wi taki a Tiri Skin foe Jehovah Kotoigi ben teki a bosroiti foe hori na alajari konmakandra foe a Watch Tower Bible and Tract Society, na ini Leicester na ini a jari 1983. Foe di mi ben de na opziener foe a foto Leicester, dan no langa baka dati mi ben moesoe sreka sani, so srefi foe go joeroe De Montfort Hall baka.

Tinadri memre foe a Tiri Skin ben kon foe na edekantoro foe a Genootschap na Brooklyn gi na okasi. Ala nanga ala, 3671 sma foe tra kondre — a leisi disi foe heri grontapoe, èn moro foeroe na sma di de Kotoigi foeroe jari langa kaba — ben foeroe a zaal. Ete 1500 sma moro ben jere a programa na wan kongreshal di ben de krosibei.

Albert D. Schroeder, di ben loekoe a wroko foe a bijkantoro foe a Waktitoren Genootschap na Londen, na a ten di a kongres na Leicester ben hori na ini a ten di a feti ben de, ben teki fesi na a alajari konmakandra disi. Di brada Schroeder ben e prakseri baka foe a kongres foe 1941, a ben aksi: „Omeni foe oenoe di de djaso nanga wi tide, ben de drape na a ten dati?” Moro leki afoe foe den arkiman ben opo den anoe. „Sân! A de troetroe wan moi sani gi oen alamala di de getrow èn loyaal, foe kon na wán baka!”, a ben bari taki. A sani di den ben ondrofeni ben de troetroe wan sani di den no sa frigiti.

Now di mi abi 98 jari, mi e dini leki sekretarsi ete na ini wi gemeente èn mi e tan hori poeblikitaki, ala di now mi e sidon te mi e hori wan lezing. Baka di Marie dede na ini a jari 1987, mi ben trow nanga Bettina, wan weduwe di Marie nanga mi ben sabi foeroe jari langa kaba. Mi de nanga tangi taki den sorgoe so boen gi mi, na skin sei èn so srefi na jeje sei. Ala di mi ben skotoe foe a gosontoe foe Marie ede èn now foe mi eigi owroedei ede, tokoe mi kon si taki foe di mi ben abi foeroe foe doe na ini a santa diniwroko, dan ala ten dati tjari foeroe blesi kon. — 1 Korentesma 15:58.

[Prenki na tapoe bladzijde 26]

Wi ben de srekasreka foe teki prati na ini a diniwroko na ini den jari na mindri 1920 nanga 1930

[Prenki na tapoe bladzijde 26]

Prenki foe a kongres na Leicester