Studenti foe a wortoe foe Gado di klari a skoro nanga boen bakapisi
FOE DI den e waka na baka na eksempre foe den fosi jarihondro kresten, meki sma sabi Jehovah Kotoigi na heri grontapoe foe na oso-foe-oso preikiwroko foe den. Krakti ben poti na tapoe a wroko disi na ini den bigin wortoe na a programa foe a klari di den studenti foe a di foe 102 klas foe a Waktitoren Bijbelskoro Gilead ben klari a skoro nanga boen bakapisi.
Na tapoe 1 maart 1997, Albert Schroeder, wan memre foe a Tiri Skin foe Jehovah Kotoigi, ben poti prakseri na tapoe wan artikel na ini a Fransi tijdschrift Le Point foe no so langa pasa. A tijdschrift ben taki dati a Lomsoe kerki e meki plan foe bigin nanga na oso-foe-oso preikiwroko na ini Italia. „So taki [den zendeling foe a Vaticaan] no e kon nanga leigi anoe te den e strei na ini a kontren foe den Jehovah Kotoigi,” na so na artikel ben taki, „meki a Vaticaan go so fara srefi, taki a druk wán miljoen eksemplaar foe na Evangelie foe Santa Markus, te den boskopoeman foe den e miti nanga sabiman [den Kotoigi] te den e ’libi’ a boen wortoe ’na baka’ oso-foe-oso.”
Den 48 studenti di ben klari a skoro nanga boen bakapisi, de na mindri den wan di waka na baka a konifasi fa Jesus ben preiki te a ben e prati a Wortoe foe Gado. Den ben kon foe aiti kondre go na a Waktitoren Leri Centrum na Patterson, New York. Na ini den feifi moen di den ben kisi leri, den ben studeri a heri bijbel. Den lès foe den ben abi foe doe so srefi nanga a historia foe Gado organisâsi, praktis afersi foe a libi foe zendeling, èn den froktoe foe a jeje foe Gado. Ala den sani disi ben gi nanga wán marki na prakseri — foe sreka den gi den dorosei zendingwroko na ini den 17 kondre pe den ben seni den go. Na a ten di den ben kisi den diploma, wan internationaal poebliki foe 5015 sma ben de nanga den èn den ben abi a prisiri toe foe na okasi disi. Sortoe lasti praktis rai den Gilead studenti dati ben kisi?
Deki-ati na a joisti ten, gi den njoen zendeling
Na baka den bigin wortoe foe a fesiman, dan Ralph Walls, wan jepiman foe a Personeel Komte foe a Tiri Skin, ben gi a fosi sjatoe lezing makandra nanga praktis rai gi den njoen zendeling. En thema ben de „Hori na prakseri foe sori lobi”. A ben sori taki bijbel, na ini 2 Timoteus kapitel 3, ben taki na fesi taki grontapoe ben sa de sondro lobi moro nanga moro. A ben gi a froemane disi na den njoen zendeling na a joisti ten, akroederi a fasi fa den e taki foe lobi, di de foe feni na ini 1 Korentesma 13:1-7: „Leki zendeling oenoe kan pasa den joeroe di oenoe moesoe wroko. Oenoe kan abi kefalek foeroe sabi di oenoe kisi foe oen Gilead skoro. Noso fajafaja wi kan wroko ekstra joeroe na ini den toewijzing foe wi na wi bijkantoro. Ma ala den moeiti foe wi èn den òfer di wi tjari e tron noti te wi frigiti foe sori lobi.”
A tra sma na tapoe a programa ben de Carey Barber foe a Tiri Skin, di ben poti prakseri tapoe a tori „Jehovah e tjari wi foe go wini”. Foe sensi a pikin bigin foe den na baka a Fosi Grontapoefeti, Jehovah Gado tjari den getrow foetoeboi foe en foe go wini nanga a meki di den e meki a boen njoensoe foe en Kownoekondre bekènti, ala di froefolgoe ben de. Na ini 1931 den Bijbel Ondrosoekoeman, soleki fa den ben kari den na a ten dati, ben teki a nen Jehovah Kotoigi, èn dati ben tanteri den kerki tiriman foe krestenhèit. „A di foe 102 klas foe den zendeling di kisi skoro na Gilead, abi a bigi grani now foe abi wan bigi prati na ini a kefalek moi wroko foe gi so foeroe sma leki a kan na okasi foe leri a santa nen dati”, na so brada Barber ben taki. Den kon na tapoe a langa lijst foe 7131 zendeling di kisi leri kaba na a Gileadskoro èn di jepi foe meki a preiki foe Gado Wortoe na ini 54 kondre na ini 1943, gro kon doro 233 kondre pe den e preiki na ini a ten disi.
A tra takiman, Lloyd Barry, so srefi wan memre foe a Tiri Skin, ben de wan sma di ben klari a di foe erfoe klas foe Gilead nanga boen bakapisi èn di ben dini leki wan zendeling na ini Japan moro leki 25 jari langa. A ben gi deki-ati nanga en thema, „Hori den sani disi”. „Foeroe foe a prisiri foe joe, joe sa feni te joe e horidoro”, a ben taigi den studenti. Sortoe pai e kon te wi e horidoro na ini a zendingwroko noso na ini iniwan theokrasia wroko? „A moro prenspariwan na taki a horidoro foe wi e meki na ati foe Jehovah prisiri . . . Bigi satisfaksi de foe feni te wi e hori wi soifri retifasi na ondro tesi . . . Meki a zendingwroko de a wroko foe joe heri libi langa . . . Joe pai sa de wan switi ’joe doe heri boen’” (Mateus 25:21; Odo 27:11). Na a kaba foe en lezing, nanga switifasi brada Barry ben rikomanderi taki den njoen zendeling e „hori den sani disi” nanga a fasti bosroiti foe meki a zendingveld e tron a troetroe libi foe den. — 1 Timoteus 4:16.
„San joe sa si?” ben de na aksi foe brada Karl Adams, di abi wan prati foe leri foeroe Gilead klas. A ben sori taki den sani di den njoen zendeling ben sa si na ini den toewijzing foe den, e anga no soso foe den sani di den e si nanga den troetroe ai, ma so srefi nanga den ai foe na ati foe den (Efeisesma 1:18). Wan eksempre foe disi ben gi na den sani di den Israèlsma di ben de spion ben si, di den ben go ondrosoekoe a Pramisi Kondre. Ala den twarfoe spion ben si den srefi sani nanga den ai, ma soso toe foe den ben si a Pramisi Kondre soleki fa Gado ben si en. Zendeling kan si sani na difrenti fasi toe. Na ini son kondre pe den sa dini, den sa si pôti sma kande, sma di e pina, èn di e lasi-ati. Ma den no moesoe handri na wan negatief fasi èn gowe libi a kondre. Brada Adams ben taki foe wán zendeling foe wan klas foe no so langa pasa ete, di ben taki: „Den sani disi di mi ben ondrofeni meki mi froestan taki mi abi foe tan djaso. Den sma disi abi wan howpoe fanowdoe gi a tamara. Mi wani meki a libi foe den go moro boen.” Brada Adams ben bosroiti foe di a ben gi den njoen zendeling a deki-ati foe si den kondre pe den kisi toewijzing foe go, leki kontren di Jehovah wani meki tron wan pisi foe En Paradijs na heri grontapoe èn foe si den sma drape leki sma di kan tron memre foe a njoen grontapoe libimakandra.
A lasti lezing na ini a pisi disi foe a programa ben de foe Wallace Liverance, di ben dini foeroe jari na ini a zendingveld bifo a ben kon tron wan leriman na Gilead. „Handri nanga inzicht na ini den toemoesi moi wroko foe Gado”, ben de a thema foe en. Foe handri nanga inzicht wani taki dati wan sma moesoe handri nanga koni, fersektiki, èn nanga boen froestan. Dati ben de wan sani di kownoe Saul foe Israèl no ben doe. — 1 Samuèl 13:9-13; 15:1-22.
Wán fasi foe handri nanga inzicht na foe teki den tjalensi foe kenki go na wan njoen fasi foe libi, so srefi foe leri wan njoen tongo èn foe kon leri sabi den sma. Den ondrofeni di zendeling abi foe kakafoetoe gi tjalensi èn foe wini den problema, kan tranga den na jejefasi, na a fasi fa Josua nanga Kaleb ben kisi tranga di den ben wini a kondre di Gado ben gi den.
Interview
A tra pisi foe a programa ben abi wan toe interview. Harold Jackson ben interview Ulysses Glass, edeman foe na administratie èn wan langaten leriman foe a Gileadskoro, èn a abi 85 jari now. Foeroe zendeling di de na ini a veld ete e memre heri boen den jari di a ben gi leri na wan getrow fasi. Baka dati, Mark Noumair ben kon, wan leriman na Gilead, di ben dini foeroe jari leki wan zendeling na ini Afrika, bifo a ben tron wan memre foe a staf foe a Gileadskoro. A ben interview studenti foe a diniwroko foe den na ini den feifi moen di den ben kisi leri. Den ondrofenitori foe den e sori krinkrin taki sma de di abi belangstelling gi a Wortoe foe Gado na ini a gebied drape.
Robert Ciranko nanga Charles Molohan ben taki baka dati nanga man di abi ondrofeni èn di ben de na wan tra skoro na ini den gebow, wan skoro gi bijkantoro sma. A rai di den ben gi den sma di ben klari a skoro nanga boen bakapisi, ben de so srefi taki den moesoe abi sakafasi èn moesoe jepi foe meki a wánfasi de na ini a gemeente. Den ben gi a rai taki den sma di ben klari a skoro nanga boen bakapisi no moesoe prakseri na fesi kaba san sa pasa na ini a zendingwroko, ma, na presi foe dati, den moesoe abi a wani nomo foe teki awansi sortoe sani den e miti na tapoe den pasi. Te den njoen zendeling e gebroiki a rai disi, dan seiker dati sa jepi den foe doe den wroko foe den leki leriman foe a Wortoe foe Gado.
Te foe kaba, Theodore Jaracz, wan memre foe a Tiri Skin, ben taki nanga a poebliki foe a tori „San abi krakti na tapoe soema?” A ben froeklari taki te wi leki kresten e sori den froktoe foe a jeje, wi kan abi wan boen krakti na tapoe tra sma. „Den zendeling di Jehovah organisâsi seni go, meki wan moi raport taki den ben abi krakti na tapoe sma na wan boen fasi, na jejefasi”, a ben taki. Baka dati a ben kari wan toe sani di sma ben taki di den kisi jepi foe dini Gado, leki wan bakapisi foe den boen eksempre di zendeling ben gi. „Meki a de so, taki joe tan hori a nen di a pipel foe Jehovah kisi èn tan naki na den doro dati na ini joe toewijzing na dorosei kondre, foe soekoe den sma di e froedini dati . . . So srefi, nanga na opregti fasi fa joe e tjari joesrefi na wan krin fasi, kakafoetoe gi a jeje foe a grontapoe disi èn abi wan boen krakti na tapoe sma, foe prèise Jehovah èn gi en grani”, a ben taki na a kaba.
Na a bosroiti foe a programa, a fesiman ben kari odi di den ben kisi foe krosibei èn foe farawe, èn dan a ben gi den studenti den diploma èn ben kari den toewijzing foe den zendeling. Baka dati, wán foe den brada di ben klari a skoro nanga boen bakapisi, ben leisi wan froeklari foe taki tangi gi a leri di ben gi. A de krin taki a programa foe a klari di a di foe 102 klas ben klari a skoro nanga boen bakapisi, ben meki ala sma di ben de drape abi a moro tranga bosroiti foe go na fesi foe meki a Wortoe foe Gado bekènti.
[Faki na tapoe bladzijde 31]
A di foe 102 klas di klari a Waktitoren Bijbelskoro Gilead nanga boen bakapisi
Na ini a lijst na ondrosei, den rei nomroe foe fesi go na baka, èn den nen skrifi foe kroektoe-anoesei go na retisei na ini ibri rei.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.