Gilead E Seni Zendeling Go „te na a Moro Farawe Pisi fu Grontapu”
MORO leki wan afu yarihondro kaba, a Waktitoren Bijbelskoro Gilead seni zendeling go na tra kondre. Na tapu 11 september 1999, a di fu 107 klas fu Gilead ben kaba a skoro nanga bun bakapisi. A ben abi 48 studenti fu 11 kondre, èn den disi ben seni go fu dini na ini 24 difrenti kondre. Den sa kon na ini a grupu fu dusundusun tra zendeling, di plei wan prenspari rol fu meki den lasti wortu fu Yesus kon tru di a ben taki bifo a ben opo go na hemel. A ben taki na fesi taki den disipel fu en ben o „de kotoigi fu [en] . . . te na a moro farawe pisi fu grontapu”.—Tori fu den Apostel 1:8.
A programa fu a klari di den studenti klari a skoro, di ben hori na a Waktitoren Skoro Centrum na ini Patterson, New York, ben kon de wan heri moi programa na ini wan moi birti. Den studenti di ben klari a skoro ben prisiri srefisrefi fu abi famiri, krosibei mati, nanga fisitiman drape. Den sma di ben fisiti ben de ala nanga ala 4992 sma, so srefi den wan di ben arki èn ben si a programa na ini den gebow na Brooklyn èn na Wallkill.
Dini Yehovah èn Tra Sma na wan Loyaal Fasi
„Suma De na Yehovah Sei?” Dati ben de a thema fu a fosi lezing fu Carey Barber, wan memre fu a Tiri Skin èn fesiman fu a programa. A ben fruklari taki disi ben de na aksi di den Israèlsma na ini den dei fu Moses ben musu piki. Den ben memre den studenti di ben klari a skoro èn den sma di ben fisiti a programa, taki furu fu den Israèlsma ben lasi den libi na ini a gran sabana bika den no ben tan loyaal na a sei fu Yehovah. Baka di den ben anbegi kruktu gado, den „ben go sidon nyan èn dringi. Moro fara den ben opo fu abi wan bun ten” (Exodus 32:1-29). Yesus ben warskow den Kresten gi a srefi kefar: „Poti prakseri na tapu unsrefi taki noiti un ati musu kon hebi nanga nyan pasa marki èn dringi pasa marki èn den broko-ede fu a libi, èn a dei dati e kon na un tapu wantronso, na ini wán momenti.”—Lukas 21:34-36.
A tra takiman, Gene Smalley, fu a Skrifiman Afdeling, ben aksi den studenti di ben kaba a skoro: „¿Yu Sa De wan Paregoric?” A ben fruklari taki a Griki wortu pa·re·go·riʹa ben teki na ini Ingrisitongo leki a nen fu wan dresi di e lekti pen. Ma na apostel Paulus ben gebroiki a Griki wortu disi na Kolosesma 4:11 di a ben taki fu den kompe-wrokoman fu en. Na ini a Nieuwe-Wereldvertaling, a wortu disi vertaal leki „wan yepi di e gi tranga”.
Na ini den toewijzing fu den, den zendeling di ben kaba a skoro ben kan de disiten paregoric na wan trutru fasi, efu nanga sakafasi den e tron wan yepi di e tranga den brada nanga sisa drape èn te den e sori taki den lobi fu wroko makandra nanga den tra zendeling.
Daniel Sydlik, wan memre fu a Tiri Skin, ben taki baka dati fu a tori „Libi Akruderi a Gowtu Lin”. A ben fruklari taki a hei gronprakseri di Yesus ben kari na Mateus 7:12, „ala sani . . . di unu wani fu sma du gi unu, unu musu du gi den so srefi”, wani taki dati wi musu du positief sani gi tra sma, èn a no wani taki nomo taki wi no musu du sma ogri.
Fu kan du disi nanga bun bakapisi, dan dri sani de fanowdu: wan ai di e si, wan ati di e firi nanga sma, èn wan anu di e yepi sma. Fu taki en syatu, a ben taki: „Efu wi e firi na angri fu yepi sma, dan wi musu yepi wantewante. Wi musu du moro muiti fu du gi tra sma san wi ben sa wani meki den du gi wi.” Disi ben sa musu de so spesrutu nanga den zendeling di e go na tra kondre fu yepi sma fu libi akruderi a tru Kresten bribi.
Den Leriman E Gi Switi Frumane
A Gilead leriman Karl Adams ben gi den studenti di klari a skoro deki-ati fu „Tan Gro”. ¿Na sortu fasi? Fosi, na ini sabi èn na ini a fasi fa den man gebroiki a sabi dati bun. Na Gilead, den studenti ben leri fa fu ondrosuku sani fu kon sabi a background nanga a situwâsi fu den Bijbel tori. Den ben kisi deki-ati fu ondrosuku fa ibri tori musu abi krakti na tapu den libi. Den ben kisi deki-ati fu tan du disi.
„A di fu tu, tan gro na ini lobi. Lobi na wan sani di te yu e kweki en, a e gro. Te yu no e poti prakseri na en tapu, dan a kan dede”, Brada Adams ben taki (Filipisma 1:9). Now, leki zendeling, den sa musu gro na ini lobi na ini tra situwâsi. Èn a di fu dri: „Tan gro na ini a no-frudini bun-ati nanga sabi fu wi Masra èn Frulusuman Yesus Krestes” (2 Petrus 3:18). „Disi na a kefalek moi bun-ati di Yehovah sori nanga yepi fu en Manpikin”, a takiman ben taki. „Te a warderi fu wi gi a no-frudini bun-ati dati e gro, dan a prisiri fu wi sa gro fu du san Gado wani èn fu du san a taigi wi fu du.”
Wan tra Gilead leriman, Mark Noumair ben taki fu a thema „Teki En Nanga Lobi, èn Yu Kan Tyari En”. A ben gi a frumane: „Leri fu teki den tyalensi di zendeling e miti na ini den libi nanga lobi, èn yu sa man tyari en. Yehovah e gi tranga-leri soso na den wan di a lobi. Srefi efu yu e denki taki wan rai no e gi na wan koni fasi, noso taki a sma di e gi a rai e suku pikinpikin fowtu, noso taki a rai no eerlijk, dan lobi gi Yehovah èn a matifasi di yu abi nanga en sa yepi yu fu kan tyari en.”
Brada Noumair ben sori taki a zendeling diniwroko abi furu wroko. „Ma te yu e wroko sondro lobi, dan dati no sa meki yu abi satisfaksi. Sondro lobi, dan den osowroko fu yu — soleki bori, go na wenkri, krin den froktu, èn bori watra — kan tron wan soi sani. Yu musu aksi yusrefi, ’Fu san ede mi e du den wroko disi?’ We, efu yu e taigi yusrefi, ’Den muiti di mi e du de bun gi a gosontu èn gi a koloku fu den tra zendeling’, dan a no sa muilek fu tyari a wroko.” Fu taki en syatu, a ben frumane: „Awansi yu musu teki tranga-leri, noso yu musu du den zendeling wroko fu yu, noso te yu e kisi fu du nanga kesekese, dan te yu teki en nanga lobi dan a sa yepi yu fu horidoro na ini yu toewijzing. ’Lobi no e misi noiti’”.—1 Korentesma 13:8.
Baka dati a Gilead leriman, Wallace Liverance, ben de a fesiman fu wan tu ondrofenitori di den ben prei baka, den ondrofenitori di den studenti ben abi di den ben wroko nanga den gemeente na ini a birti. Boiti taki den ben go oso fu oso, den ben gebroiki den sani di den ben leri leki zendeling fu suku sma na den presi pe den truck e stop, na den presi pe sma e go fu wasi krosi, na tren stasyon, èn na tra presi.
Zendeling Di Abi Ondrofeni E Gi den Frutrow
¿Te nyun zendeling e go na wan dorosei kondre, dan den musu broko den ede tumusi? ¿Den man kakafutu gi den tyalensi di den e miti ini wan toewijzing na ini wan dorosei kondre? San den bijkantoro e du fu yepi den nyun sma disi di doro, fu abi bun bakapisi? Fu piki den aksi disi nanga tra aksi, Steven Lett fu a Dienst Afdeling, nanga David Splane fu a Skrifiman Afdeling, ben interview den brada di ben fisiti a bijkantoro skoro na a Waktitoren Skoro Centrum. Den brada di den ben interview e dini na ini den bijkantoro komte na ini Spanyorokondre, Hong Kong, Liberia, Benin, Madagaskar, Brasyonkondre, nanga Yapan.
Den futuboi disi fu Yehovah di abi ondrofeni, èn di furu fu den dini leki zendeling someni tenti yari kaba, ben tranga a bribi fu den studenti di ben klari a skoro èn so srefi a bribi fu den papa nanga mama fu den èn den famiri fu den di ben de na a programa. Tapu gron fu den eigi persoonlijk ondrofeni èn di fu tra zendeling, den ben sori taki wi kan handri na wan bun fasi nanga den problema èn den broko-ede. A problema di den e miti kan bigi, „ma den kan lusu en, èn a Genootschap e yepi wi”, na so Raimo Kuokkanen, wan zendeling na ini Madagaskar ben taki. „A no wi ben frukisi a toewijzing, ma wi ben kisi en”, na so Östen Gustavsson ben taki, di e dini now na ini Brasyonkondre. „Fu dati ede wi teki a bosroiti fu du ala muiti fu tan na ini a toewijzing.” James Linton di e dini na ini Yapan, ben taki dati a sani di ben yepi en ben de „a de di tra brada ben de drape di ben dini kaba na ini wan toewijzing leki zendeling.” A zendeling diniwroko na wan prisiri èn a e gi satisfaksi fu dini Yehovah èn fu sorgu gi den skapu fu en.
Luku Bun Nanga a Pestsiki Di E Kiri Yeye Fasi
Theodore Jaracz, wan memre fu a Tiri Skin, èn di ben klari a di fu seibi klas fu Gilead na ini 1946, ben gi a lasti lezing di abi a thema „A Tyalensi fu Tan na Libi na Yeye Fasi”. Baka di a ben erken den kefalek ogri-ati sani di e feni presi na difrenti pisi fu grontapu, a ben sori taki a de trutru so, taki moro ogri rampu e miti a libisma famiri.
Di Brada Jaracz ben taki fu Psalm 91, a ben sori san na a „pestsiki” nanga a „pori” di ben siki èn di ben kiri milyunmilyun sma na yeye fasi. Didibri nanga a godelowsu sistema fu en ben gebroiki propaganda di de leki pestsiki, di abi en gron tapu a stuka di sma e stuka doronomo fu kon moro koni èn a feti di sma e feti na baka materia gudu, fu swaki èn kiri a yeye fasi fu sma, ma Yehovah e gi wi a dyaranti taki a pestsiki disi no sa kon krosibei fu „iniwan sma di e tan na a kibripresi fu a Moro Heiwan”.—Psalm 91:1-7.
Brada Jaracz ben taki dati „a tyalensi na fu tan gosontu ini a bribi, èn fu tan na ini a presi disi di e gi kibri. Wi no kan de leki den spotuman ’di no abi yeye fasi’. Now, disi na wan problema na ini a ten disi. A de wan problema di e miti wi alamala na ini na organisâsi. A kan miti yu tu na ini yu toewijzing leki zendeling (Yudas 18, 19). Ma a ben taigi den zendeling di ben kaba a skoro, taki den kan tan hori den yeye fasi na ini den toewijzing fu den. Fu eksempre, den ben kisi deki-ati fu luku fa wi brada e horidoro na ini Rosiakondre, na ini Asia, èn na ini den kondre fu Afrika — ala di tiriman ben tapu a wroko fu den, sma ben gens den hebi, sma ben spotu den, èn den kisi fu du nanga propaganda fu Atheïst, èn sma ben krutu den na wan falsi fasi. Èn na ini furu situwâsi problema de na skin fasi tu, di e kon fu etnisch feti èn a mankeri di sani di de fanowdu e mankeri.
Te a yeye fasi e kon swaki, „dan a de fanowdu fu suku a reide fu a problema èn fu wroko na tapu a problema, ala di wi e gebroiki a rai na ini Gado Wortu”. A ben gi eksempre na ini Bijbel. Yosua ben kisi deki-ati fu leisi en eksemplaar fu a Wet ibri dei nanga wan safri sten (Yosua 1:8). Di den ben feni a buku fu a Wet na ini den dei fu Yosia, dan Yehovah ben blesi a gebroiki di den ben gebroiki a wet na wan getrow fasi (2 Kownu 23:2, 3). Timoteus ben sabi den santa buku fu sensi pikin-nengreten (2 Timoteus 3:14, 15). Den Bereasma no ben de soso bun arkiman; den ben „bun na yeye fasi”, bika den ben ondrosuku den Buku fu Bijbel ala dei (Tori fu den Apostel 17:10, 11). Èn Yesus Krestes na a moro bun eksempre leki wan sma di ben sabi èn ben gebroiki Gado Wortu.—Mateus 4:1-11.
Na a kaba, na wan switi fasi Brada Jaracz ben frumane den nyun zendeling: „Now unu sreka fu du un toewijzing leki zendeling. Èn unu o go na dorosei kondre, na wan trutru fasi, na difrenti pisi fu grontapu. Efu wi e teki a tyalensi fu tan na libi na yeye fasi, dan wi no sa meki no wan sani puru wi prakseri fu du san wi bosroiti fu du. Unu o go preiki nanga faya, èn gi tra sma deki-ati fu waka na baka a bribi fu unu, èn wi sa begi nanga unu taki den wan di unu e gi leri, Yehovah sa meki den kon na libi leki fa a du dati nanga wi. Èn na so fasi furu tra sma ete no sa ondrofeni a rampu na yeye fasi di e rigeri now na heri grontapu. Moro nanga moro fu den sa moksi densrefi nanga wi fu du a wani fu Yehovah. Èn meki Yehovah blesi unu fu dati ede.”
Baka di a fesiman ben leisi den odi fu difrenti kondre na heri grontapu, dan a ten ben kon fu gi den studenti di klari a skoro den diploma fu den. Baka dati den ben leisi wan moi brifi fu warderi di den studenti srefi ben skrifi. ¡Den ben de Yehovah nanga en organisâsi tangi srefisrefi gi a spesrutu leri di den ben kisi èn gi den toewijzing di ibriwan fu den ben kisi leki zendeling fu go „te na a moro farawe pisi fu grontapu”!—Tori fu den Apostel 1:8.
[Faki na tapu bladzijde 29]
Statistiek fu a Klas
Nomru fu kondre pe den komoto: 11
Nomru fu kondre pe den kisi toewijzing fu go: 24
Nomru fu studenti: 48
Nomru fu trowpaar: 24
Gemiddeld yari di den abi: 34
Gemiddeld yari di den de na ini waarheid: 17
Gemiddeld yari di den de na ini a furuten diniwroko: 12
[Prenki na tapu bladzijde 26]
A Di fu 107 Klas Di Klari a Waktitoren Bijbelskoro Gilead Nanga Bun Bakapisi
Na tapu a lijst na ondrosei, den rèi nomru fu fesi go na baka èn den nen skrifi fu kruktu-anusei go na reti-anusei na ibri rèi.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.