Abi Prisiri na ini Yehovah èn De Nanga Prisiri
INIWAN prenspari sani di wan sma kaba nanga bun bakapisi na wan sani fu prisiri ala ten. A programa fu den studenti di ben klari a skoro nanga bun bakapisi di ben hori na tapu 13 maart 1999, na a Wachttoren-Onderwijscentrum na Patterson, New York, ben de trutru so wan okasi gi den 48 studenti fu a di fu 106 klas fu a Waktitoren Bijbelskoro fu Gilead.
Den biginwortu fu Theodore Jaracz, wan memre fu a Tiri Skin èn wan studenti di klari a di fu seibi klas fu Gilead nanga bun bakapisi èn fesiman fu a programa, ben poti prakseri na den wortu fu Psalm 32:11: „Abi prisiri na ini Yehovah èn de nanga prisiri, unu regtfardikiwan.” Di a ben fruklari fu san ede a ben fiti taki ala sma musu prisiri na a okasi disi, a ben taki: „Na fu san Yehovah e du nanga den wan di de opregti fu ati, so srefi den Gilead studenti fu wi, meki wi e prisiri na den okasi soleki a wan disi.” Ala di den studenti ben teki sreka fu kon na Gileadskoro èn ben du tranga muiti fu doro den markitiki fu a zendingwroko, toku a de Yehovah di ben meki taki ala sani ben waka bun (Odo 21:5; 27:1). Dati, na so Brada Jaracz ben poti krakti na tapu, de a reide taki wi „abi prisiri na ini Yehovah”.
Den famiri nanga den fisitiman fu den studenti di ben kon fu 12 kondre fu si a prisiri okasi disi, ben de tu na mindri den sma na ini a zaal na Patterson. Di den 5198 sma di ben drape — so srefi den memre fu a Bethelfamiri na ini Brooklyn, na Patterson, nanga Wallkill di nanga yepi fu komunikâsi yepisani ben kan yere èn si a programa — ben e wakti a programa di ben musu kon, a ben de krin taki furu sma ben abi wan prisiri firi.
Kisi Frumane fu Tan Sori Prisiri
Na a kaba foe den biginwortu fu Brada Jaracz, a ben kari a fosiwan fu den feifi takiman di ben sreka densrefi fu gi frumane fu Bijbel di e gi deki-ati, no wawan gi den studenti fu Gilead di ben klari a skoro nanga bun bakapisi, ma gi ala sma di ben drape.
A fosi sma di ben hori wan lezing ben de William Malenfant, wan studenti di ben klari a di fu 34 klas fu Gilead, èn di e dini now leki wan yepiman na a Onderwijskomte fu a Tiri Skin. Nanga a thema fu en na prakseri, ¡„Ala Sani A No fu Soso!” di ben abi en gron tapu Preikiman 1:2, a ben poti na aksi: „¿Salomo ben wani taki trutru taki ala sani, sondro fu puru wan na mindri, na fu soso?” A piki de: „Nôno. A ben taki dati den sani di libisma e du pe den no e prakseri a wani fu Gado, sani di den e feti na baka èn di no abi fu du nanga a wani fu Gado, — ala den sani dati na fu soso.” Kontrari fu dati, na anbegi di wi e anbegi a tru Gado Yehovah, no de fu soso; a no de fu soso tu te wi e studeri a Wortu fu Gado, Bijbel, èn wi e gi trawan leri fu dati. Gado no e frigiti den sortu muiti dati di den futuboi fu en e du (Hebrewsma 6:10). Fu taki en leti, srefi te rampu ben sa miti den wan di feni a bun-ati fu Gado, dan a sa „sori taki . . . [den] domru na ini a saka fu libi, nanga Yehovah” (1 Samuèl 25:29). ¡Disi de wan tumusi moi prakseri! Te wi e prakseri den penti disi, dan dati kan yepi ala den anbegiman fu Yehovah fu tan abi prisiri.
John Barr, wan memre fu a Tiri Skin ben gi a klas di ben klari a skoro nanga bun bakapisi, deki-ati nanga a lezing fu en „Prisiri Nanga a Zending Toewijzing fu Yu”. A ben sori taki zendingwroko na wan sani di ala ten ben de prenspari srefisrefi gi Yehovah Gado. „A ben de wan prenspari pisi fu a sori di Yehovah ben sori lobi gi grontapu. A ben seni en wan-enkri gebore Manpikin go na a grontapu disi. ¡Yesus ben de a moro bigi zendeling, a moro prenspari zendeling!” Ala di den studenti di ben klari a skoro nanga bun bakapisi ben kan si den kenki di Yesus ben tyari fu abi bun bakapisi na ini a toewijzing fu en na grontapu, den wini fu a zendingwroko fu Yesus de fu kisi ete gi den wan di wani teki wini fu dati. Dati de so bika, soleki fa Brada Barr ben taki, Yesus ben e prisiri fu du a wroko fu Gado èn a ben lobi den manpikin fu libisma tu (Odo 8:30, 31). Brada Barr ben gi den studenti di ben klari a skoro nanga bun bakapisi, a tranga fu tan na ini den toewijzing fu den, no wawan fu di den musu horidoro, ma fu di den e prisiri fu du dati. „Frutrow na tapu Yehovah; a no sa trowe yu”, a ben begi a klas.—Psalm 55:22.
„Waka fu Têgo na ini a Nen fu Yehovah” ben de a thema di a tra takiman, Lloyd Barry, wan tra memre fu a Tiri Skin ben teki. Brada Barry di ben dini leki wan zendeling moro leki 25 yari na ini Yapan baka di a ben kaba a di fu erfu klas fu Gilead, ben fruteri wan tu fu den ondrofenitori fu den fosi zendeling èn ben taki fu den tyalensi di den ben musu kakafutu gi. Sortu rai di den ben kan gebroiki a ben abi gi a klas di ben klari a skoro fu den nanga bun bakapisi? „A moro prenspari sani, tan hori yu yeyefasi. So srefi, leri a tongo nanga a kulturu. Tan si a switi fu tori. Èn tan na a wroko; no kon weri noso no brokosaka.” Brada Barry ben taigi den studenti di ben klari a skoro fu den nanga bun bakapisi, taki na ini den toewijzing na ini tra kondre den sa miti nanga furu sma di e waka na ini a nen fu furu gado, èn a ben memre den na den wortu fu Mika: „Bika ala pipel, fu den sei, sa waka ibriwan fu den na ini a nen fu en gado; ma wi, fu wi sei, sa waka na ini a nen fu Yehovah, wi Gado, te ten di no skotu, ija fu têgo” (Mika 4:5). Na eksempre fu den fosi zendeling de seiker wan krakti reide gi ala futuboi fu Gado fu go doro fu waka na ini a nen fu Yehovah èn fu dini en na wan getrow fasi.
A tra sma na tapu a programa ben de a leriman na Gilead, Lawrence Bowen. A thema fu a prati fu en ben abi na aksi, „San Yu Sa Sori fu De?” A ben sori taki bun bakapisi na ini a diniwroko fu Gado e anga fu bribi èn frutrow na ini Yehovah. Doronomo frutrow tapu Yehovah ben meki taki Kownu Asa ben wini krinkrin fu wan feanti legre di ben abi moro leki wan milyun man. Toku a profeiti Asarya ben memre en o prenspari a de fu tan frutrow tapu Gado: „Yehovah de nanga yu so langa yu e sori fu de nanga en” (2 Kroniki 14:9-12; 15:1, 2). Fu di a nen fu Gado, Yehovah, e sori taki a de, awansi san de fanowdu fu doro a prakseri fu en — awansi dati wani taki fu de wan Sma di e sorgu gi sani, wan Sma di e gi kibri, noso srefi wan Sma di e gi krutustrafu — meki den zendeling di e frutrow tapu Yehovah èn di e wroko akruderi a prakseri fu en, sa abi bun bakapisi na ini den toewijzing fu den (Exodus 3:14). „Noiti frigiti,” Brada Bowen ben taki na a kaba, „taki so langa yu e meki a prakseri fu Yehovah tron a prakseri fu yu, dan a sa meki yu tron awansi san yu musu tron fu du a toewijzing fu yu.”
A lasti takiman fu a pisi disi fu a programa ben de Wallace Liverance, di ben de wan zendeling fosi èn abi a frantwortu now fu na administratie fu a skoro. A lezing fu en „Meki a Wortu fu Gado Tan Libi èn Abi Krakti Tapu Yu”, ben poti prakseri na a seiker boskopu noso pramisi fu Gado di ala ten e go doro fu kon tru (Hebrewsma 4:12). A abi krakti tapu den libi fu den wan di e gi en pasi taki a du dati (1 Tesalonikasma 2:13). Fa wi kan meki a wortu tan libi èn abi krakti tapu wi libi? Nanga yepi fu fayafaya bijbelstudie. Brada Liverance ben memre den studenti di ben klari a skoro nanga bun bakapisi, na den fasi fa Gilead ben leri den fa fu studeri Bijbel, èn so srefi fa fu leisi, fruklari èn gebroiki a Wortu fu Gado. A ben teki den wortu di Albert Schroeder, wan memre fu a Tiri Skin di ben dini leki fesiman fu a komte di ben opo a Gileadskoro 50 yari pasa, taki: „Te wi e gebroiki a kontekst dan wi kan kisi a doronomo èn soifri yeye krakti di Gado e gi na ini en Wortu.” A fasi disi fu studeri Bijbel e meki taki a Wortu fu Gado e tan abi libi èn krakti.
Moi Ondrofenitori Nanga Interview
Baka den lezing, den studenti ben switi den yesi fu den arkiman nanga wan tu moi ondrofenitori. Na ondro a tiri fu Mark Noumair di ben de zendeling fosi èn di de wan leriman na Gilead now, wan grupu studenti ben fruteri èn ben demo fa den ben meki muiti fu gi kotoigi na ini difrenti situwâsi. Son wan fu den ben man bigin èn hori bijbelstudie nanga sma na ini a gebied, fu di den ben luku fa a situwâsi fu den ben de èn ben arki den sani di den ben taki èn fu di den ben sori belangstelling gi den. So bun, den studenti ben e ’poti doronomo prakseri na tapu densrefi èn na tapu a leri fu den’ èn ben abi trutru belangstelling fu yepi trawan fu kisi frulusu.—1 Timoteus 4:16.
Furu praktisch bodoi ben gi èn furu brada di abi ondrofeni èn di ben e kisi leri na a skoro fu bijkantoro komte na a Wachttoren Onderwijs Centrum, ben sori a prisiri fu a zendingwroko tu. Brada Samuel Herd nanga Robert Johnson fu a staf fu na edekantoro ben hori krakti interview nanga den sma di ben e teki presi gi a Genootschap na den bijkantoro na ini Bolifia, Simbabwe, Nikaragwa, Republiek fu Centraal Afrika, Dominikan Republiek, Papuwa Nyun Ginea, nanga Kamerun.
Baka den ondrofenitori nanga den interview, dan Gerrit Lösch, wan studenti di ben klari a di fu 41 klas fu Gilead nanga bun bakapisi èn di de now wan memre fu a Tiri Skin, ben hori a lasti lezing di ben abi a thema di e meki sma denki, nanga a nen „Yu De Wan Sma Di Yehovah Lobi Srefisrefi?” Brada Lösch ben bigin fu memre den studenti di ben klari a skoro nanga bun bakapisi taki sma no ben e si Yesus, a volmaakti Manpikin fu Gado leki wan sma di den ben lobi, ma „den ben fru-akti èn ben wai pasi gi en” (Yesaya 53:3). So bun, a no de fu fruwondru taki na furu presi na grontapu na ini a ten disi, sma e si den zendeling leki persona non grata, sma di den no wani ontfanga. Na a tra sei, na ini den furu yari fu Danièl en diniwroko na ini Babilon, a Kriaman ben kari Danièl nanga yepi fu wan engel, dri tron „wan sma di Gado lobi srefisrefi” (Danièl 9:23; 10:11, 19). San ben meki taki Danièl ben de so? Noiti a ben skeki nanga Bijbel gronprakseri te a ben e fiti ensrefi na a kulturu na ini Babilon; a ben eerlijk na ala fasi, èn noiti a ben e gebroiki en posisi fu kisi wini gi ensrefi; èn a ben de wan fayafaya studenti fu Gado Wortu (Danièl 1:8, 9; 6:4; 9:2). A ben begi so srefi doronomo na Yehovah èn ben de ala ten klariklari fu gi Gado glori gi den sani di a ben du (Danièl 2:20). Te den futuboi fu Gado e waka baka na eksempre fu Danièl, dan den kan sori fu de sma di kande grontapu no lobi, ma di Yehovah Gado lobi.
Fu tapu a programa di ben gi deki-ati na yeye fasi, a fesiman ben leisi wan tu telegram nanga boskopu di ben kon fu heri grontapu. Baka dati, ibriwan fu den 24 trowpaar ben kisi den diploma fu den, èn a kondre pe den ben o go ben meki bekènti. Te fu kaba, wan fu den studenti fu a klas ben leisi wan brifi gi a Tiri Skin nanga a Bethelfamiri fu sori a warderi di a klas ben abi gi a skoro èn a sreka di den ben kisi na ini den feifi mun di pasa.
Di a programa ben kon na wan kaba „dan wan prisiri, srefi nanga tangi” ben de fu yere na mindri na ipi sma di ben e gowe.—Nehemia 12:27.
[Faki na tapu bladzijde 27]
Statistiek fu a klas
Nomru fu kondre di den teki presi gi: 10
Nomru fu kondre pe den kisi toewijzing fu go: 19
Nomru fu studenti: 48
Nomru fu trowpaar: 24
Gemiddeld yari di den abi: 33
Gemiddeld yari di den de na ini waarheid: 16
Gemiddeld yari di den de na ini a furuten diniwroko: 13
[Prenki na tapu bladzijde 25]
A di fu 106 Klas di Klari a Waktitoren Bijbelskoro Gilead Nanga Bun Bakapisi
Na tapu a lijst na ondrosei, den rèi nomru fu fesi go na baka èn den nen skrifi fu kruktu-anusei go na reti-anusei na ibri rèi.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.