Soema meki ala den sani disi?

DI Henri Mouhot, wan Fransi ondrosoekoeman foe a di foe 19 jarihondro, ben e kapoe en pasi foe pasa na ini a boesi na ini Kambodja, a ben doro wan bradi kanari di ben lontoe wan tempel. Pikinmoro wán kilometer foe pe a ben tanapoe, den feifi toren foe a tempel ben hei moro leki 60 meter go na loktoe. A ben de Angkor Wat, a moro bigi relisi monument na grontapoe. A ben kakafoetoe seibi jarihondro kaba teige a weer, bifo Mouhot ben feni en.

Mouhot ben kan taki wantewante di a ben iti en ai go na den skin foe a gebow di ben tapoe nanga mos, taki a ben de a wroko foe na anoe foe libisma. „Na wan bowman foe owroeten ben bow en di ben abi a koni foe Michelangelo, èn a bigi moro leki iniwan sani di Grikikondre noso Rome ben libi gi wi”, a ben skrifi. Ala di sma ben gowe libi den gebow foeroe jarihondro kaba, tokoe a ben de seiker taki wan sma di e denki fa foe seti sani ben de baka den kefalek moi gebow disi.

Na wan moi sani, taki wan boekoe di abi koni èn di ben skrifi foeroe jarihondro pasa kaba, ben gebroiki a srefi sortoe prakseri disi foe froeklari foe san ede a grontapoe di de lontoe wi moesoe de wan sani di wan Sma meki. A moesoe de wan sani di kria. Na apostel Paulus ben skrifi: „A no de foe taki dati ibri oso abi wan sma di meki en, ma a sma di meki ala sani, na Gado” (Hebrewsma 3:4). Kande son sma no sa agri nanga na agersi disi, foe di den e taki: ’A fasi fa a natoeroe e wroko e difrenti nanga den sani di libisma meki.’ Ma a no ala sabidensiman e agri nanga a prakseri dati. Baka di Michael Behe, wan profesor foe biochemie di de na a Lehigh Universiteit, ben agri taki „biochemisch sistema a no sani di no abi libi”, dan a e aksi: „Sma kan denki na wan koni fasi fa foe seti biochemisch sistema di e libi?” A e sori moro fara taki nownow sabidensiman e denki fa foe seti den moro prenspari sani di e kenki na ini libi sani, nanga jepi foe a wroko di den e wroko na tapoe genen. A de krin, taki sma kan seti èn wroko na tapoe sani di no abi libi èn so srefi na tapoe sani di abi libi! Di Behe ben e ondrosoekoe na ondro microscoop, dan a ben e taki foe den kefalek dangra sistema di meki foe pisipisi èn di abi makandra fanowdoe foe man wroko. San a ben bosroiti? „A bakapisi foe den moeiti di e meki moro nanga moro foe ondrosoekoe a cel — foe ondrosoekoe a libi te a de wan molecule — na wan tranga èn krinkrin froeklari taki a cel de wan bakapisi foe „a denki di sma e denki fa foe seti sani!’

Cosmoloog nanga natuurkundeman ben ondrosoekoe grontapoe nanga na universum finifini toe èn feni wan toe froewondroe troetori. Foe eksempre, den sabi now taki efoe wan kefalek pikin kenki ben sa de now na ini den berekening foe iniwan foe den faste nomroe foe na universum, dan libi no ben sa de na ini na universum.a Cosmoloog Brandon Carter ben taki dati den troetori disi na kefalek froewondroe sani di feni presi somarso. Ma efoe joe ben miti wan lo sani di feni presi somarso èn di dangra èn di abi foe doe nanga makandra, dan joe no ben sa aksi joesrefi awansi fa a no fa efoe wan sma ben meki den?

Ija, wan Sma de di denki fa foe seti sani meki gi ala den dangra sistema disi èn den „sani di feni presi somarso èn di seti so soifri”. Soema? „Foe man sabi soema na a sma nanga jepi foe sabidensi ben sa kan de kefalek moeilek.” na so profesor Behe e erken, èn a e libi na aksi gi a „filosofia nanga a theologia” foe proeberi foe gi a piki. Kande joe persoonlijk e denki taki na aksi abi noti foe doe nanga joe. Ma efoe joe ben kisi wan moi paket di lai nanga den joisti sani di joe ben abi fanowdoe, dan joe no ben sa wani sabi soema ben seni a paket gi joe?

Na wan agersifasi wi kisi so wan paket — wan paket di foeroe nanga moi presenti di e meki taki wi man libi èn njanboen foe en. A paket dati na grontapoe, nanga ala den kefalek aparti sistema foe en di e meki sani e tan libi. Wi no ben sa moesoe wani sabi soema ben gi wi den presenti disi?

Kolokoe taki a Sma di seni a paket ben fasi wan boskopoe na ini toe. A „boskopoe” na a owroeten boekoe di abi koni na ini èn di wi ben kari kaba — bijbel. Na ini den bigin wortoe foe en, bijbel e piki na wan kefalek makriki èn krinfasi na tapoe na aksi soema ben gi wi a paket: „Na ini a bigin Gado ben kria hemel nanga grontapoe.” — Genesis 1:1.

Na ini en „boskopoe” a Kriaman e kari ensrefi na en nen: „Disi na san a troe Gado, Jehovah, taki, a Kriaman foe den hemel . . . , a Sma di ben bradi grontapoe nanga a njanjan di grontapoe e meki gro kon, a Sma di e gi bro na den sma di de na en tapoe” (Jesaja 42:5). Ija, Jehovah na a nen foe a Gado di denki fa foe seti na universum èn di ben meki man nanga oema na grontapoe. Ma soema na Jehovah? Sortoe Gado a de? Èn foe san ede ala sma na grontapoe moesoe arki en?

[Foetoewortoe]

[Prenki na tapoe bladzijde 3]

Libisma ben bow Angkor Wat

[Prenki na tapoe bladzijde 4]

Te joe kisi wan presenti, joe no wani sabi dan soema ben seni en?