A tru taki sani kon de sondro taki wan sma meki den?
PIKINMORO 150 yari pasa sensi Charles Darwin ben kon nanga na evolutie-leri fu en. A leri disi e sori taki ala den difrenti libisani na grontapu kon de sondro taki wan sma meki den. Ma no so langa pasa, sma bigin krutu na evolutie-leri èn sosrefi den tra denki di abi fu du nanga a leri disi. Sma feni taki den libisani na grontapu meki na so wan wondru fasi, taki a musu de so taki den meki nanga wan marki. Srefi wan tu lespeki sabiman no e agri taki den someni difrenti libisani na grontapu kon de nanga yepi fu evolutie.
Son sabiman feni taki ala den sani disi meki nanga wan marki, èn biologie nanga wiskunde, e sori wi taki a sani disi tru. Srefi wi krinkrin frustan e taigi wi dati. Den sabiman e kari a leri dati ID (intelligent ontwerp). Den wani taki den skoro musu bigin leri yonguwan a sani disi tu. Na ini Amerkankondre, furu sma no e agri nanga na evolutie-leri, èn na so a de tu nanga sma na ini Ingrisikondre, Bakrakondre, Pakistan, Serfia, nanga Torkukondre.
Wan prenspari sani di sma e frigiti
Nofo tron, te sabiman e taki dati den libisani na grontapu meki nanga wan marki, dan den no e taki fu wan prenspari sani. Iya, den no e taki dati na wan sma meki den sani disi. Yu e bribi taki wan sani kan kon de sondro taki wan sma meki a sani dati? Den sma di e bribi taki ala sani meki nanga wan marki, „no e taki krin suma, noso san meki ala den sani disi”, na so wan tijdschrift e taki (The New York Times Magazine). Claudia Wallis, wan skrifiman e taki dati den sma di e bribi a denki disi, „no e taki fu Gado srefisrefi”. Èn wan tijdschrift ben skrifi taki „sma di e bribi na ini I.D. (intelligent ontwerp) no e taki fu wan mekiman”.
Ma yu kan frustan taki wi no kan du neleki nowan sma no meki den libisani na grontapu. Efu wi e weigri fu bribi taki wan sma de di meki den libisani na grontapu, dan fa wi ben o man fruklari fa den sani dati, èn fa a libi srefi du kon?
Fu taki en leti, fu man sabi efu na wan sma meki ala den libisani na grontapu, dan wi musu poti prakseri na den aksi disi: A de so taki sma no ben o abi fu ondrosuku sani moro te den e bribi taki na wan sma di koni moro libisma meki den sani dati? Yu e bribi na ini wan koni mekiman, soso te yu no sabi fu fruklari fa den libisani du kon? Wi musu si den libisani na grontapu leki buweisi taki na wan sma meki den? A tra artikel sa poti prakseri na den aksi disi èn na tra aksi di abi fu du nanga a tori.
[Prenki na tapu bladzijde 3]
Charles Darwin ben e bribi taki den difrenti libisani na grontapu kon de nanga yepi fu evolutie
[Sma di abi a reti fu a prenki]
Darwin: From a Photograph by Mrs. J. M. Cameron/U.S. National Archives photo