Soema na Jehovah?
JEHOVAH ben taigi wan foe den getrow anbegiman foe en: „No wan libisma kan si mi èn tokoe tan na libi” (Exodus 33:20). „Gado na wan Jeje”, èn libisma no man si en nanga den libisma ai foe den (Johanes 4:24). Neleki fa a ben sa takroe gi wi ai foe loekoe langalanga na a son na mindridei, na so a ben sa takroe gi wi foe si a kefalek bigi Fonten foe krakti di no ben meki wawan a kefalek brenki son foe wi, ma so srefi den kefalek foeroe tra son na ini na universum.
Kolokoe taki wi no abi foe si Gado foe kon sabi en. Bijbel e taigi wi soema na a Sma di ben sreka a moi paket dati, a grontapoe, gi wi èn e meki wi kon sabi den eigifasi foe en toe. So boen, a warti foe loekoe na ini bijbel foe kon sabi a Tata di ben gi wi libi èn ben gi wi wan switi oso pe wi kan njan boen foe a libi dati.
San en nen wani taki
Ala nen wani taki wan sani, srefi ala di kande foeroe sma no sabi san den nen wani taki na ini a ten disi. Foe eksempre, a gewoon Ingrisi nen David e kon foe wan wortoe na ini Hebrewtongo di wani taki „Lobiwan”. A nen foe a Kriaman, Jehovah, wani taki wan sani toe. San na en? Na ini a fosi tongo foe bijbel, Hebrewtongo, a nen foe Gado skrifi na ini fo letter, YHWH, èn de pikinmoro 7000 tron na ini a pisi foe bijbel di skrifi na ini Hebrewtongo. Wi e froestan taki a nen foe Gado wani taki „A e meki kon de”. A wani taki dati na wan koni fasi Jehovah e meki ensrefi tron awansi san a moesoe tron, so taki a kan doe den sani di a abi na prakseri. En na Kriaman, Kroetoeman, Froeloesoeman, a Sma di e meki a libi tan, èn foe dati ede a kan meki den pramisi foe en kon troe. Boiti dati, na ini Hebrewtongo a nen Jehovah de na ini wan fasi di e sori tapoe wan sani di e doe ete. Ija, Jehovah e meki ensrefi tron a sma ete di e meki den pramisi foe en kon troe. En na wan libi Gado!
Den kefalek boen eigifasi foe Jehovah
Bijbel e taki foe a Kriaman leki „wan Gado di abi sari-ati nanga boenfasi, di no e kisi atibron esi-esi èn di abi lobi boen-atifasi nanga waarheid pasa marki, di e kibri lobi boen-atifasi gi doesoendoesoen sma, di e gi pardon foe fowtoe en foe a pasa foe wet en foe sondoe” (Exodus 34:6, 7). Den wortoe „lobi boen-atifasi” e vertaal wan wortoe na ini Hebrewtongo di wani taki foeroe. A e sori go na wan boen-atifasi di e plak ensrefi na wan sani na wan lobifasi, teleki a marki di a abi nanga a sani dati kon troe kaba. A kan vertaal toe nanga „loyaal lobi”. A boen-atifasi foe Jehovah e plak ensrefi na wan lobifasi na den kriatoeroe foe en èn e doe den moi prakseri foe en. Joe no ben sa warderi a sortoe lobi disi foe a Sma di gi joe libi?
Jehovah no e atibron esi-esi èn a de esi-esi foe gi wi pardon foe den fowtoe foe wi. A switi foe de krosibei foe so wan sma. Tokoe dati no wani taki dati a e feni ogridoe boen. A ben froeklari: „Mi, Jehovah, lobi geregtighèit, mi no wani si na ai a foefoeroe di sma e foefoeroe trawan nanga tranga makandra nanga onregtfardikifasi” (Jesaja 61:8). Leki a Gado foe geregtighèit, a no sa gi pasi foe têgo so taki tranga-ede sondari tan go doro na ini na ogridoe foe den. So boen, wi kan de seiker taki na en reti ten, Jehovah sa poti a de di geregtighèit no de na grontapoe kon boen baka. A no sa drai en baka gi den sma di e kisi kwinsi.
A no makriki foe abi wan volmaakti balansi na mindri lobi nanga geregtighèit. Efoe joe na wan papa noso wan mama, joe feni dan taki a moeilek foe bosroiti o ten, fa, èn o foeroe joe sa strafoe joe pikin te den no e tjari densrefi boen? Foeroe koni de fanowdoe foe man abi balansi na mindri geregtighèit nanga lobi sari-atifasi. Jehovah e sori na eigifasi dati bogobogo te a e handri nanga libisma (Romesma 11:33-36). Ija, wi kan si a koni foe a Kriaman na ala presi, foe eksempre, na ini den wondroe foe a kriatoeroe di de lontoe wi. — Psalm 104:24; Odo 3:19.
Ma, foe abi koni nomo no sari. Foe man doe a wani foe en, dan a Kriaman moesoe abi makti toe, èn bijbel e tjari kon na krin taki a abi makti srefisrefi: „Opo oen ai go na loktoe èn loekoe. Soema kria den sani disi? Na a Sma di e tjari na ipi foe a legre foe den go na doro, di e kari den alamala srefi na den nen. Foe di a abi dinamik krakti pasa marki, èn foe di a tranga na ini makti toe, meki no wan foe den no e misi” (Jesaja 40:26). Nanga „dinamik krakti pasa marki” Jehovah e doe den sani foe en. So wan eigifasi no ben sa meki joe lobi en?
Gado foe ala nâsi
’Ma Jehovah a no a Gado foe na „Owroe Testamenti”, a Gado foe owroeten Israèl?’, joe e aksi joesrefi kande. A troe taki Jehovah meki den Israèlsma kon sabi en. Tokoe, foe di a kria a fosi libisma paar, meki Jehovah na a Gado „foe soema ibri famiri . . . na grontapoe kisi en nen” (Efeisesma 3:15). Efoe joe e bribi taki a joisti foe lespeki den fositen tata foe joe, dan a no ben sa fiti foe boigi gi a Sma di ben gi libi na a fosi man, a fositen tata foe wi alamala, di de a roetoe foe ala den lo di de na grontapoe na ini a ten disi?
A froestan foe a Kriaman foe libisma no sjatoe. A troe taki wan ten ben de pe a ben abi wan spesroetoe banti nanga a nâsi Israèl. Ma srefi di dati ben de so, a ben teki ala sma di ben kari en nen. Wan koni kownoe foe Israèl ben taigi Jehovah na ini begi: „A trakondresma, di no de wan pisi foe joe pipel Israèl èn di foe troe e kon foe wan farawe kondre foe joe nen ede . . . , meki a de so, taki joesrefi e arki komoto na hemel, . . . èn joe moesoe doe akroederi ala sani gi san a trakondresma e kari joe; so taki ala den sma na grontapoe kan kon sabi joe nen” (1 Kownoe 8:41-43). Te na a dei foe tide, sma foe ala nâsi kan kon sabi Jehovah èn abi wan tranga banti nanga en. Ma fa dati abi foe doe nanga joe?
Den wini te wi kon sabi Jehovah
Kon wi go baka na a agersitori na ini a fosi artikel. Efoe joe ben kisi wan paket di meki moi, dan seiker joe ben sa wani sabi foe san ede joe kisi a presenti. Fa a moesoe gebroiki èn fa joe moesoe sorgoe gi en? Na a srefi fasi, wi wani sabi san Gado ben abi na prakseri di a ben sreka grontapoe gi wi. Bijbel e taki dati a „no kria en foe soso”, ma a „ben seti en foe sma libi na tapoe”, dati wani taki dati libisma moesoe libi na tapoe. — Jesaja 45:18.
Ma moro foeroe libisma no sorgoe gi a presenti foe a Kriaman. Den e pori a grontapoe, èn dati no e plisi Jehovah srefisrefi. Tokoe, akroederi san en nen wani taki, Jehovah abi a fasti bosroiti foe meki en fosi prakseri gi libisma nanga grontapoe kon troe (Psalm 115:16; Openbaring 11:18). A sa meki grontapoe kon boen baka èn sa gi en leki wan erfenis na den sma di wani libi leki pikin foe en di e gi jesi. — Mateus 5:5.
A lasti boekoe foe bijbel e sori fa sani sa de te dati e feni presi: „Loekoe! A tenti foe Gado de na libisma, èn en sa tan nanga den, èn den sa de en pipel. . . . Èn a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba” (Openbaring 21:3, 4). No wan sma sa krei foe sari noso sa row bika den lasi wan lobiwan na ini dede. No wan sma sa bari foe kisi jepi foe di den lasi howpoe, noso foe di den abi pen foe wan kefalek takroe siki. Srefi „dede moesoe tjari kon na wan kaba” (1 Korentesma 15:26; Jesaja 25:8; 33:24). Disi e sori a sortoe libi di Jehovah ben wani ini a bigin gi wi foe njanboen foe dati, di a ben kria den fositen tata foe wi.
Ija, joe kan tesi kaba foe so wan paradijs situwâsi now na mindri den anbegiman foe Jehovah. A e taigi den: „Mi, Jehovah, na joe Gado, a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka” (Jesaja 48:17). Jehovah na wan boen-ati Papa di e leri wi, den pikin foe en, a moro boen fasi foe libi. Den tiri foe en gi libisma no e tapoe wi na wan fasi di no fiti, ma e kibri wi na wan lobi fasi. Te wi e waka na baka den tiri, dan dati sa abi fri nanga kolokoe leki bakapisi, soleki fa a skrifi: „Jehovah now na a Jeje, èn pe a jeje foe Jehovah de, na drape fri de” (2 Korentesma 3:17). Te sma e waka na baka den tiri di poti na ini bijbel, dan den wan di e erken en tirimakti e ondrofeni vrede now, di sa foeroe a heri libisma grontapoe wan dei. — Filipisma 4:7.
Jehovah na wan boen Papa srefisrefi! Joe wani foe leri moro foe a Sma di meki ala den wondroe foe a kriatoeroe? Gi den sma di wani, den winimarki bigi kefalek, srefi now. Èn na ini a ten di e kon, dan den blesi sa de foe têgo.
[Prenki na tapoe bladzijde 5]
A nen foe Gado di skrifi na ini fo letter na ini Hebrewtongo de foe si na den skotoe foe foeroe owroe kerki