Den ben doe a wani foe Jehovah

A soifri retifasi foe Job e kisi pai

JOB ben de wan man di ben abi sari-ati, wan man di ben e jepi den weduwe, den pikin di no abi papa nanga mama, èn den wan di e kisi kwinsi (Job 29:12-17; 31:16-21). Dan wantronso rampoe ben miti en, di a ben lasi en goedoe, den pikin foe en, nanga a gosontoe foe en. A de wan sari taki a toemoesi boen man disi di ben de wan postoe gi den wan di ben kisi kwinsi, no ben kisi jepi di a ben abi dati fanowdoe. Srefi en eigi wefi ben taigi en foe „floekoe Gado èn dede!” Èn den „mati” foe en, Elifas, Bildad, nanga Sofar no ben trowstoe en. Na presi foe dati, den ben gi en na idea taki Job ben sondoe èn taki na foe dati ede meki a ben froedini a pen foe en. — Job 2:9; 4:7, 8; 8:5, 6; 11:13-15.

Ala di Job ben pina foeroe, tokoe a ben tan getrow. Foe dati ede, te foe kaba Jehovah ben abi sari nanga Job èn ben blesi en. A tori di e froeteri fa a ben doe dati e gi ala foetoeboi foe Gado di e hori den soifri retifasi a djaranti taki baka ten densrefi sa kisi pai.

En nen e krin èn a e kon boen baka

Na a fosi presi, Jehovah ben piri-ai gi Elifas, Bildad, nanga Sofar. Di a ben taki nanga Elifas, kande a moro owroewan, a ben taki: „Na ati foe mi kon faja nanga joe èn nanga den toe kompe foe joe, bika oenoe no taki troe sani foe mi, soleki fa mi foetoeboi Job doe. Now dan, teki seibi mankaw nanga seibi manskapoe èn go na mi foetoeboi Job, èn oenoe moesoe òfer wan bron-ofrandi foe a boen foe oenoe; èn mi foetoeboi Job srefi sa begi gi oenoe” (Job 42:7, 8). Prakseri san disi ben wani taki!

Jehovah ben aksi wan bigi ofrandi foe Elifas, Bildad, nanga Sofar, kande foe meki den froestan boen o serjoesoe a sondoe foe den ben de. Ija, awansi den ben sabi san den ben doe noso no ben sabi dati, tokoe den ben pori Gado nen di den ben taki dati a ’no e bribi den foetoeboi foe en’ èn a no abi trobi srefisrefi efoe Job de getrow noso no de getrow. Elifas ben taki srefi dati na ini na ai foe Gado, Job no ben warti moro leki wan motoe! (Job 4:18, 19; 22:2, 3) A no e froewondroe taki Jehovah ben taki: „Oenoe no taki troe sani foe mi”!

Ma dati a no ala ete. Elifas, Bildad, nanga Sofar ben sondoe toe teige Job persoonlijk di den ben taigi en taki na ensrefi ben tjari den problema foe en na en tapoe. A gi di den ben gi Job fowtoe sondro wan reide èn a sori di den no ben sori sari-ati kwetikweti gi Job, ben meki Job ati-bron èn kon depressief, èn ben meki a ben bari taki: „O langa oen man sa tan tanteri mi sili èn tan masi mi nanga wortoe?” (Job 10:1; 19:2). Prakseri a sjen fesi foe den dri man disi di den ben moesoe gi Job wan ofrandi gi den sondoe foe densrefi!

Ma Job no ben moesoe prisiri foe a saka di den ben moesoe saka densrefi. Ija, Jehovah ben wani taki Job ben moesoe begi gi den man di ben kroetoe en. Job ben doe leti fa Gado ben taigi en, èn a ben kisi blesi foe dati. Na a fosi presi, Jehovah ben dresi en foe a takroe siki. Baka dati, den brada, sisa, nanga fosi kompe foe Job ben kon foe trowstoe en, „èn ibriwan foe den ben gi en wan pisi moni nanga wan gowtoe linga”.a Boiti dati, Job „ben kisi tinafo doesoen skapoe nanga siksi doesoen kameili nanga wán doesoen paar kaw nanga wán doesoen oema-boeriki”.b Èn soleki fa a ben sori, dan Job en wefi ben kon boen baka nanga en. Baka ten, Job ben blesi nanga seibi manpikin nanga dri oemapikin, èn a ben libi te a si fo geslakti foe den pikin foe en. — Job 42:10-17.

Lès gi wi

Job ben poti wan toemoesi boen eksempre gi den disiten foetoeboi foe Gado. A ben de „sondro fowtoe èn opregti”, wan man di Jehovah ben lobi foe kari „mi foetoeboi” (Job 1:8; 42:7, 8). Ma disi no wani taki dati Job ben volmaakti. Wan leisi na ini den tesi foe en, na wan fowtoe fasi a ben bribi taki Gado ben meki a rampoe foe en kon. A ben kroetoe srefi a fasi fa Gado e handri nanga libisma (Job 27:2; 30:20, 21). Èn a ben taki foe en eigi regtfardikifasi na presi foe taki foe a regtfardikifasi foe Gado (Job 32:2). Ma Job ben weigri foe drai en baka gi a Kriaman, èn nanga sakafasi a ben teki froemane foe Gado. „Mi ben taki, ma mi no ben froestan”, a ben erken. „Mi e teki mi wortoe baka, èn mi abi troetroe berow ini saka èn asisi.” — Job 42:3, 6.

Te wi de na ondro tesi, dan wisrefi kan denki taki noso doe sani di no e fiti. (Teki gersi Preikiman 7:7.) Tokoe, efoe a lobi foe wi gi Gado tranga, dan wi no sa opo wisrefi teige en, noso e atibron bika a gi pasi meki wi ondrofeni problema. Na presi foe dati, wi sa tan hori wi soifri retifasi èn foe dati ede wi sa koti bigi blesi te foe kaba. A psalm singiman ben taki foe Jehovah: „Nanga wan sma di de loyaal, joe sa handri na wan loyaalfasi.” — Psalm 18:25.

Bifo Job ben kon gosontoe baka, Jehovah ben aksi foe en taki a moesoe begi gi den wan di ben sondoe teige en. Dati na wan moi eksempre gi wi! Jehovah e aksi foe wi taki wi e gi pardon na den sma di e sondoe teige wi, bifo wi kan kisi pardon foe wi sondoe (Mateus 6:12; Efeisesma 4:32). Te wi no wani gi tra sma pardon ala di wi abi boen reide foe doe dati, dan wi kan froewakti nanga reti dan taki Jehovah sa abi sari-ati nanga wi? — Mateus 18:21-35.

Wi alamala e ondrofeni tesi wanwan leisi (2 Timoteus 3:12). Ma leki Job wi kan hori wi soifri retifasi. Te wi e doe dati, dan wi sa koti wan bigi pai. Jakobus ben skrifi: „Loekoe! Wi e froeklari den wan kolokoe di horidoro. Oenoe jere foe a hori di Job horidoro èn si a bakapisi di Jehovah ben gi, taki Jehovah abi foeroe safoe lobi firi èn a abi sari-atifasi.” — Jakobus 5:11.

[Foetoewortoe]