Grontapoe — Foe san ede a de dja?

Wan aksi de di joe moesoe go denki foe en finifini: A moi planeiti foe wi ben meki foe na anoe foe wan koni Kriaman di abi wan marki gi grontapoe èn gi den libisma na tapoe en? Te na afersi disi loesoe na wan fasi di e gi joe satisfaksi, dan dati kan jepi joe foe si san a ten di de na wi fesi sa wani taki gi wi planeiti.

FOEROE sabidensiman di stoeka na universum èn wi grontapoe finifini si boeweisi di e sori go taki wan Kriaman de, èn taki na Gado meki en. Loekoe den kommentaar foe wan foe den nomo:

Profesor Paul Davies e skrifi na ini The Mind of God (A Denki foe Gado): „A de di wan universum de di abi orde èn wánfasi, èn di abi fasti moeilijk stroktoeroe di orga, e meki taki wet nanga kondisi, di de foe wan spesroetoe sortoe, de fanowdoe.”

Baka di a taki foe wan toe „sani di kon wantronso” di sabidensiman di e stoeka stari èn tra sabidensiman taki, dan profesor Davies e taki moro fara: „Ala den sani disi makandra e gi kefalek moi boeweisi, taki libi soleki fa wi sabi en e anga srefisrefi foe a fasi fa den wet foe a natoeroe de èn foe sani di sori leki den de onfroewakti kenki ini den troetroe waarde di a natoeroe froekisi gi den difrenti finifini pisi, di de na ini sani, energie di bondroe kon na wan èn go so doro. . . . A nofo foe taki dati, efoe wi ben kan plèi a ròl foe Gado èn wantewante sondro foe denki ben kan kenki a waarde foe den nomroe foe den sani disi foe di wi e drai wan toe knop, dan wi ben o kon si taki pikinmoro ala fasi fa den knop seti ben o meki taki na universum no ben sa boen moro foe libi na ini. Na son kefal a sori leki den difrenti knop moesoe seti finifini na wan heri soifri fasi efoe na universum ben sa moesoe de na so wan fasi taki libi sa abi boen bakapisi. . . . Wan sani di de prenspari srefisrefi na a troe tori taki srefi pikinpikin kenki na a fasi fa sani de, ben sa kan meki taki wi leki libisma no ben sa man loekoe go na ini na universum moro.”

San den sani di taki na fesi djaso e tjari kon na krin gi foeroe sma, na dati wan Kriaman di abi wan marki ben meki wi grontapoe, makandra nanga a tra pisi foe na universum. Efoe dati de so, dan fosi wi moesoe kon sabi foe san ede a ben meki grontapoe. Efoe wi man, wi moesoe kon sabi seiker toe san na a marki foe En gi grontapoe. Nanga a tori disi dan wan freimde sortoe sani di de kontrari ensrefi de foe si. Ala di a leri taki Gado no de, pôpi na ala sei, tokoe foeroe sma di wi no ben froewakti e tan bribi na ini wan koni Kriaman. Moro foeroe foe den kerki foe krestenhèit e tjari a nen taki den e taki foe wan almakti Gado nanga Kriaman foe wi universum. Tokoe, wan toe foe den relisi disi nomo e taki nanga froetrow èn nanga overtoigi foe a prakseri foe Gado foe a tamara foe grontapoe.

San bijbel e taki?

A de wan natuurlijk sani, dati wi e loekoe go na wan fonten foe bodoi di sma e erken na ala sei leki a sani di komoto foe a Kriaman. A fonten dati na bijbel. Wan foe den moro makriki èn moro krin sani di a e taki foe a tamara foe wi grontapoe, wi kan feni na Preikiman 1:4. Wi e leisi: „Wan geslakti e pasa gowe, èn wan geslakti e kon; ma grontapoe e tan foe têgo” (King James Version). Bijbel e froeklari langalanga foe san ede Jehovah ben kria grontapoe. A e froeteri toe taki a ben poti grontapoe na ini a joisti posisi na ini na universum èn na ini a joisti posisi nanga a son foe wi, so taki libi na tapoe en ben kan tan go doro. Na Almakti Gado ben gebroiki en santa jeje foe meki a profeiti Jesaja foe owroeten skrifi: „Disi na san Jehovah taki, a Kriaman foe hemel, En a troe Gado, a Sma di seti grontapoe èn a Mekiman foe en, a Sma, di poti en steifi, di no kria en foe soso, di ben seti en foe sma libi na tapoe: ’Mi na Jehovah, èn no wan trawan de.’ ” — Jesaja 45:18.

Ma fa a de nanga den sani di libisma e meki foe pori ala libi na grontapoe? Nanga a koni foe en di no wan sma kan doro, Gado e froeklari taki a sa opo doe wan sani bifo libisma kan pori ala a libi na tapoe a planeiti foe wi. Poti prakseri tapoe a pramisi di e gi wi seikerfasi na ini a lasti boekoe foe bijbel, Openbaring: „Den nâsi ben kon atibron, èn joe eigi atibron ben kon, èn a fasti ten foe kroetoe den dedewan, èn foe gi den pai na den srafoe foe joe, den profeiti, èn na den santawan èn na den wan di abi frede gi joe nen, den pikinwan nanga den bigiwan, èn foe pori den wan di e pori grontapoe.” — Openbaring 11:18.

Jehovah e tjari kon na krin san ben de en fosi prakseri di a ben kria grontapoe, a warti sani disi ini a kontren foe na universum, soleki fa wan astronaut di ben rèis lontoe grontapoe ben kari en. Gado prakseri ben de foe meki a tron wan paradijs na heri grontapoe, foeroe nanga libisma di e tan switi na tapoe — man nanga oema — di alamala e libi na ini vrede nanga wánfasi nanga makandra. A ben seti sani foe foeroe a planeiti safrisafri nanga libisma foe di A ben gi a fosi libisma paar pasi foe meki pikin. Gi a prisiri foe a fosi libisma paar, Jehovah ben meki wan pikin pisi foe grontapoe kon tron wan paradijs. Te a libisma famiri ben sa go doro foe meki pikin ini den jari nanga den jarihondro baka dati, dan a djari foe Eden ben o kon bigi safrisafri te leki Genesis 1:28 ben o kon troe: „Gado ben taigi den: ’Oen meki pikin èn kon foeroe èn foeroe grontapoe èn poti en na oen ondro.’ ”

Te wi e loekoe now a sari kondisi di grontapoe nanga den sani di de na en tapoe de na ini, dan dati wani taki dati a fosi prakseri di Gado ben abi nanga grontapoe no go doro? Noso, foe taki en so, A kenki en prakseri èn teki a bosroiti foe gi pasi taki a planeiti pori krinkrin èn bigin agen foe di libisma trangajesi? Nôno, wi kan de seiker taki no wan foe den toe situwâsi disi de troe. A bijbel e froeteri wi taki awansi san Jehovah abi na prakseri foe doe, moesoe pasa te foe kaba, èn taki awansi sortoe sani a e bosroiti foe doe, no wan sma noso srefi noti di sa pasa onfroewakti, kan gens en. A e gi wi a djaranti: „Na so mi wortoe di e komoto na mi mofo, sa sori foe de. A no sa drai kon baka na mi sondro bakapisi, ma seiker a sa doe a sani dati di mi abi prisiri na ini, èn foe troe, a sa abi boen bakapisi na ini san mi ben seni en go.” — Jesaja 55:11.

A prakseri foe Gado tapoe gi wan pisi ten, ma a no kenki

Di Adam nanga Eva no ben de getrow èn a poeroe di den ben poeroe den foe a djari foe Eden, dan a de krin taki Gado prakseri gi wan paradijs grontapoe ben o go doro sondro den. Tokoe, Jehovah ben sori drape èn na a momenti dati taki wan toe foe den bakapikin foe den ben sa meki a fosi komando foe en kon troe. Foe troe, disi ben o teki ten, kande foeroe jarihondro srefi, ma no wan sani e sori omeni ten ben o de fanowdoe foe meki a fosi komando disi kon troe, srefi efoe Adam nanga Eva, den ala toe, ben tan libi go doro ini volmaaktifasi. A troe tori de taki na a kaba foe a Doesoen Jari Tiri foe Krestes Jesus — pikinso moro leki doesoen jari moro fara foe now — den paradijs situwâsi foe Eden sa panja go na heri grontapoe lontoe èn planeiti Grontapoe sa kon foeroe nanga libisma di abi vrede èn di de kolokoe bakapikin foe a fosi libisma paar. Foe troe, a de di Jehovah de wan sma di man meki en prakseri kon troe sondro misi, sa sori krinkrin baka foe têgo.

Dan den span profeititori di Gado ben meki sma skrifi nanga jepi foe en santa jeje langa ten bifo, sa kon troe. Den sortoe bijbeltekst leki Jesaja 11:6-9 sa kon troe na wan glori fasi: „A wolfoe sa tan troetroe wan pisi ten na sei a pikin manskapoe, èn a panter srefi sa go didon na sei a pikin bokoboko, èn a pikin kaw nanga a jongoe lew di abi neki-wiwiri, nanga a meti di kisi boen njanjan, alamala makandra; èn wan pikin boi ete sa de fesiman foe den. Èn a kaw nanga a beer sa njan grasi; den pikin foe den sa didon makandra. Èn srefi a lew sa njan drei grasi neleki a mankaw. Èn a pikin na bobi sa prei foe troe na a olo foe a kobrasneki; èn wan pikin di den poeroe na bobi, troetroe sa poti en eigi anoe na tapoe na olo foe wan takroe sneki. Sma no sa doe no wan sortoe ogri èn no sa pori no wan sani na tapoe heri mi santa bergi; bika grontapoe seiker sa kon foeroe nanga a sabi foe Jehovah, soleki fa watra e tapoe se.”

Swaki gosontoe foe sma èn siki di e tjari dede kon, sa de sani di de foe a ten di pasa, so srefi dede toe. Wan sani de di ben sa kan de moro makriki leki den eenvoudig wortoe disi di de foe feni na ini a lasti boekoe foe bijbel? „A tenti foe Gado de na libisma, èn en sa tan nanga den, èn den sa de en pipel. Èn Gado srefi sa de nanga den. Èn a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa gowe.” — Openbaring 21:3, 4.

Ija, wi kan teki deki-ati — wi moi planeiti Grontapoe de dja foe tan. Meki a de joe grani foe libi pasa a kaba foe na ogri seti foe sani disi, nanga ala den sani di a seti disi e doe foe pori grontapoe. A krin njoen grontapoe di Gado sa meki de krosibei foe kon. Èn foeroe lobiwan sa wiki komoto foe dede nanga a wondroe foe na opobaka (Johannes 5:28, 29). Foe troe, a grontapoe foe wi de dja foe tan, èn wi kan tan nanga en èn njan boen foe en.