Joe abi warderi gi Jehovah en organisâsi?
„Disi na san Jehovah taki: ’Hemel na mi kownoestoeroe, èn grontapoe na mi foetoebangi.’” — JESAJA 66:1.
1, 2. (a) Na sortoe boeweisi di joe kan si nanga joe ai foe Jehovah en organisâsi joe kan sori go? (b) Pe Jehovah e tan?
JOE e bribi taki Jehovah abi wan organisâsi? Efoe dati de so, foe san ede joe e bribi dati? Kande joe ben sa piki: ’We, wi abi wan Kownoekondre zaal. Wi abi wan gemeente di orga heri boen nanga wan skin foe owroeman. Wi abi wan kringopziener di den poti na wroko na wan fasi di fiti èn di e fisiti wi doronomo. Wi fisiti bigi konmakandra nanga kongres di orga. Wi abi wan bijkantoro foe a Waktitoren Genootschap na ini wi kondre. Foe troe, ala den sani disi nanga foeroe sani moro e boeweisi taki Jehovah abi wan organisâsi di e wroko.’
2 Den sani disi ala nanga ala e gi wi boeweisi taki wan organisâsi de. Ma efoe wi e erken nomo san wi e si djaso na grontapoe, dan wi no e froestan ala sani foe Jehovah en organisâsi dorodoro. Jehovah ben taigi Jesaja dati grontapoe na soso en foetoebangi, ma hemel na En kownoestoeroe (Jesaja 66:1). Na sortoe „hemel” Jehovah ben sori go? Na a loktoe lontoe wi? Na a kontren pe den stari de? Noso na wan tra kontren foe libi? Jesaja e taki foe Jehovah en ’hei tanpresi foe santafasi nanga moifasi’, èn a psalm singiman e taki foe den hemel disi leki „den fasti presi pe a e libi”. So boen, den „hemel” na Jesaja 66:1 e sori go na a jeje kontren di libisma ai no man si pe Jehovah abi en hei, noso gran posisi. — Jesaja 63:15; Psalm 33:13, 14.
3. Fa wi kan basi tweifri?
3 Foe dati ede, efoe troetroe wi wani erken èn warderi Jehovah en organisâsi, wi moesoe loekoe go na hemel. Èn na ini a spesroetoe sani dati a problema didon gi son sma. Foe di Jehovah en organisâsi foe hemel no de foe si nanga ai, dan fa wi kan sabi taki a de troetroe? Kande son wan e pasa wan ten foe tweifri na dati èn e aksi densrefi: ’Fa wi kan de seiker?’ We, fa bribi kan meki sma wini tweifri? Toe prenspari fasi fa wi kan doe dati na te wi e doe serjoesoe persoonlijk studie foe Gado Wortoe èn te wi e fisiti den kresten konmakandra doronomo èn teki prati na den. Dan wi kan poeroe den tweifri foe wi nanga jepi foe a leti foe a waarheid. Tra foetoeboi foe Gado de di abi tweifri. Meki wi go loekoe na afersi foe na foetoeboi foe Elisa di a kownoe foe Siria ben opo kon foe feti nanga Israèl. — Teki gersi Johanes 20:24-29; Jakobus 1:5-8.
Wan sma di ben si den hemel legre
4, 5. (a) Sortoe problema a foetoeboi foe Elisa ben abi? (b) Fa Jehovah ben piki a begi foe Elisa?
4 A kownoe foe Siria ben seni na neti wan troetroe bigi sroedati makti go na Dotan foe graboe Elisa. Di a foetoeboi foe Elisa ben wiki froekoefroekoe mamanten èn ben go na dorosei, kande foe hari pikinso krin loktoe na tapoe a plata daki foe a Mindri Owstoesei tanpresi foe den, ija, a skreki wan skreki! Wan heri legre foe Siriasma nanga asi èn nanga fetiwagi ben lontoe a foto, e wakti foe graboe a profeiti foe Gado. A foetoeboi ben bari gi Elisa: „Ke, mi masra! San wi sa doe?” Soleki fa a sori, na wan bedari fasi èn nanga overtoigi, Elisa ben piki: „No frede, bika moro de di de nanga wi leki den wan di de nanga den.” A foetoeboi ben moesoe aksi ensrefi: ’Pe den de? Mi no man si den!’ Kande sontron dati ben sa kan de wi problema toe — a man di wi no man foe si nanga na ai foe wi froestan, noso foe si den hemel legre. — 2 Kownoe 6:8-16; Efeisesma 1:18.
5 Elisa ben begi foe den ai foe a foetoeboi foe en ben kan kon opo. San ben pasa baka dati? „Wantewante Jehovah ben opo den ai foe a foetoeboi, so taki a ben si; èn loekoe! a bergi kontren ben foeroe nanga asi èn nanga fetiwagi foe faja di ben de lontoe Elisa” (2 Kownoe 6:17). Ija, a ben si den hemel legre, den legre foe engel e wakti foe kibri a foetoeboi foe Jehovah. Now a ben kan froestan a froetrow di Elisa ben abi.
6. Fa wi kan kisi inzicht na ini Jehovah en hemel organisâsi?
6 Wi abi sontron a srefi problema foe man froestan sani, leki a foetoeboi foe Elisa ben abi? Wi abi a firi foe si sani na skinfasi nomo pe situwâsi de di de wan kefar gi wi, noso gi a kresten wroko na ini son kondre? Efoe dati de so, wi kan froewakti foe kisi wan spesroetoe fisjoen di e gi wi jeje leti? Nôno, bika wi abi wan sani di a foetoeboi foe Elisa no ben abi — wan heri boekoe di lai nanga fisjoen, bijbel, di kan gi wi inzicht na ini na hemel organisâsi. A Wortoe dati di skrifi nanga jepi foe Gado en santa jeje e gi markitiki toe di e tiri wi, so taki a kan poti a fasi fa wi e denki èn a fasi fa wi e libi, kon reti. Tokoe, wi moesoe doe moeiti foe soekoe a koni foe man si sani krin èn foe kweki warderi gi a seti foe Jehovah. Èn dati wi kan doe nanga jepi foe persoonlijk studie, makandra nanga begi èn a prakseri di wi e prakseri dipi foe sani. — Romesma 12:12; Filipisma 4:6; 2 Timoteus 3:15-17.
Studeri foe man froestan sani
7. (a) Sortoe problema son sma kan abi nanga persoonlijk bijbelstudie? (b) Foe san ede persoonlijk studie warti a moeiti?
7 Persoonlijk studie no abi foe de ala ten wan prisiri sani gi foeroe sma, te den e prakseri taki den moesoe studeri, soleki den wan di noiti no ben lobi foe studeri na skoro noso noiti no ben abi na okasi foe doe dati. Ma efoe wi wani si èn abi warderi gi Jehovah en organisâsi nanga na ai foe wi froestan, dan wi moesoe kweki wan angri foe studeri. Joe kan njanboen foe wan switi njanjan sondro foe wan sma sreka en? Soleki fa iniwan ede-boriman noso boriman sa taigi joe, wan lo wroko de foe doe foe sreka èn bori wan switi njanjan. Tokoe, na ini wan afoe joeroe noso moro mendri, sma e kaba njan en. Na a tra sei, den winimarki foe persoonlijk studie kan tan wan heri libi langa. Persoonlijk studie kan kon tron wan sani di wi e kon lobi safrisafri te wi e si fa wi kan go na fesi. Nanga reti na apostel Paulus ben taki dati wi moesoe poti prakseri doronomo na tapoe wisrefi èn na tapoe den sani di wi e leri sma èn go doro nanga a poti di wi e poti wisrefi na tapoe a leisi na poebliki. Wi moesoe tan doe moeiti, ma den winimarki kan de foe têgo. — 1 Timoteus 4:13-16.
8. Sortoe fasi foe denki èn si sani Odo e rikomanderi?
8 Wan koni man foe owroeten ben taki: „Mi manpikin, efoe joe e teki mi wortoe èn e kibri den gebod foe mi leki wan goedoe na joe, foe joe poti prakseri nanga joe jesi na koni, so taki joe kan beni joe ati go na a koni foe man si sani krin; efoe, boiti dati, joe e bari kari a froestan srefi èn e opo joe sten srefi go na a koni foe si sani krin, efoe joe e tan soekoe en leki solfroe, èn joe e tan soekoe en leki goedoe di kibri, dan ini a tori disi joe sa froestan a frede foe Jehovah, èn joe sa feni a sabi foe Gado srefi.” — Odo 2:1-5.
9. (a) Fa a warti foe gowtoe e teki gersi nanga „a sabi foe Gado srefi”? (b) Sortoe wrokosani wi abi fanowdoe foe kan kisi soifri sabi?
9 Joe e si soema abi a frantiwortoe foe doe dati? Den e gebroiki den wortoe ’Efoe joe’ ibri tron baka. Èn poti prakseri tapoe den wortoe, ’Efoe joe e tan soekoe en leki goedoe di kibri’. Prakseri foe den sma di e diki ondro gron, di foeroe hondrohondro jari ben e diki solfroe nanga gowtoe na Bolifia, Meksikow, Zuid-Afrika nanga tra kondre. Den ben wroko tranga, ala di den ben e gebroiki pikaksi nanga skopoe, foe diki a ston so taki den kan poeroe den diri metaal. Den e si gowtoe leki so wan warti sani dati na ini wan mijn na California, Amerkankondre, den diki ondrogron tunnel di langa 591 kilometer, di e go so wan wán nanga afoe kilometer na ondro a gron — soso foe kan feni gowtoe. Ma joe kan njan gowtoe? Joe kan dringi gowtoe? A kan hori joe na libi te joe de na ini wan drei sabana pe joe e dede foe angri nanga dreiwatra? Nôno, a warti foe en de na ekonomia sei èn sma no e bepaal en akroederi wan fasti sani di seti, ma a e kenki dei na dei soleki fa den internationale markt e sori en. Ma tokoe, sma lasi den libi foe en ede. We dan, omeni moeiti wi moesoe doe dan foe kan kisi gowtoe na jejefasi, „a sabi foe Gado srefi”? Go denki foe disi, a sabi foe a Soeverein Masra foe na universum srefi, en organisâsi nanga den prakseri foe en! Ini a tori disi, wi kan gebroiki pikaksi nanga skopoe na jejefasi. Dati na den poeblikâsi di gron tapoe bijbel, di e jepi wi foe diki go na ini a wortoe foe Jehovah èn froestan san a wani taki. — Job 28:12-19.
Diki foe kisi inzicht
10. San Danièl ben si ini wan fisjoen?
10 Meki wi doe wan toe dikiwroko na jejefasi so taki wi kan bigin kisi a sabi foe Jehovah hemel organisâsi srefi. Foe wan prenspari inzicht, meki wi go na a fisjoen foe Danièl foe a Graniwan na tapoe en kownoestoeroe. Danièl e skrifi: „Mi ben tan si te leki den ben poti kownoestoeroe èn a Graniwan ben go sidon. Den krosi foe en ben weti leki snew, èn a wiwiri foe en ede ben de leki soifri wòl. A kownoestoeroe foe en ben de foe fajatongo; den wiel foe disi ben de wan tranga faja. Wan liba foe faja ben e lon èn ben e komoto na en. Èn doesoen tron doesoen ben de di ben tan dini en, èn tindoesoen tron tindoesoen ben tan tanapoe leti na en fesi. A Kroetoe ben go sidon, èn boekoe ben de di den ben opo” (Danièl 7:9, 10). Soema ben de den doesoen tron doesoen disi di ben e dini Jehovah? Den verwijstekst foe a Nieuwe-Wereldvertaling di den gebroiki leki „pikaksi” nanga „skopoe”, e tjari wi go na Psalm 68:17 nanga Hebrewsma 1:14. Ija, den wan di ben e doe diniwroko ben de den engel na hemel!
11. Fa a fisjoen foe Danièl e jepi wi foe froestan den wortoe foe Elisa?
11 A verslag foe Danièl no e taki dati a ben si ala den getrow engel di Gado ben abi na ondro en komando. A kan, taki miljoenmiljoen moro de. Ma now wi kan froestan foe troe, foe san ede Elisa ben kan taki: „No frede, bika moro de di de nanga wi leki den wan di de nanga den.” Ala di a legre foe a kownoe foe Siria ben abi den engel di no ben gi jesi, den ogri jeje foe horibaka gi en, tokoe den hemel legre foe Jehovah ben de krinkrin moro ini nomroe leki den! — Psalm 34:7; 91:11.
12. Fa joe kan kon sabi moro foe engel?
12 Kande joe ben sa wani kon sabi moro foe den engel disi, soleki a ròl di den e plèi na ini a dini di den e dini Jehovah. Foe a Griki wortoe gi engel, wi kan si taki den de boskopoeman bika a wani taki „boskopoeman” toe. Ma den plekti foe den de moro foeroe leki dati. Ma foe kan kon sabi san na dati, dan joe moesoe diki. Efoe joe abi Inzicht in de Schrift, joe kan studeri na artikel „Engel,” noso joe kan loekoe den artikel di wi ben kisi na ini A Waktitoren di e taki foe engel. Joe sa froewondroe omeni joe kan leri foe den hemel foetoeboi foe Gado disi èn joe kan kon warderi a horibaka di den e horibaka gi wi (Openbaring 14:6, 7). Ma ini a hemel organisâsi foe Gado, son jeje kriatoeroe e dini spesroetoe marki.
San Jesaja ben si
13, 14. San Jesaja ben si ini fisjoen, èn fa disi ben abi krakti na en tapoe?
13 Meki wi go doe pikinso dikiwroko ini a fisjoen foe Jesaja. Te joe e leisi kapitel 6, vers 1 te nanga 7, sani moesoe naki joe ati. Jesaja e taki dati a ’ben kisi foe si Jehovah, ala di a ben e sidon na tapoe wan kownoestoeroe’, èn „seraf ben tanapoe na tapoesei foe en”. Den ben meki a glori foe Jehovah bekènti, e hei a santafasi foe en. Soso a leisi di joe o leisi a tori disi sa abi krakti na joe tapoe. San ben de a fasi fa Jesaja ben handri na tapoe dati? „Mi ben go moro fara foe taki: ’Heloe foe mi! Bika pikinmoro den meki mi kon de leki wan sma di en mofo kon tapoe [na ini Sjeool], foe di mi na wan man di mi mofoboeba no krin, èn na mindri wan pipel di den mofoboeba no krin, mi e tan; bika den ai foe mi si a Kownoe srefi, Jehovah foe den legre!’ ” A fisjoen dati ben naki en ati srefisrefi! A naki joe ati toe?
14 So boen, fa Jesaja ben man foe teki a glori sani disi di a ben si? A e froeklari taki wan seraf ben kon jepi en èn a ben taki: „A fowtoe foe joe komoto èn joe sondoe srefi kon verzoen” (Jesaja 6:7). Jesaja ben kan froetrow tapoe a sari-ati foe Gado èn ben poti prakseri na tapoe den wortoe foe Jehovah. We, joe no ben sa wani sabi moro foe den jeje kriatoeroe disi di abi wan hei posisi? We, san joe moesoe doe dan? Diki foe kisi moro bodoi. Wan jepisani di joe ben kan gebroiki na a Index van Wachttoren-publikaties, ala di joe e go loekoe na ini ala den poeblikâsi pe a e seni joe go foe feni bodoi di e tjari sani kon na krin.
San Esekièl ben si?
15. San e sori taki a fisjoen foe Esekièl de foe wi kan froetrow na en tapoe?
15 Meki wi go loekoe wan tra sortoe jeje kriatoeroe. Esekièl ben abi a grani foe si wan fisjoen di ben naki en ati, ala di a ben de wan katiboman ete na Babilon. Opo joe bijbel na Esekièl kapitel 1, den dri fosi vers. Fa a verslag e bigin? A e taki, ’Wan ten, na ini wan farawe kondre . . .’? Nôno, disi a no wan anansitori na ini wan ten soleki fa a mytologie e sori en. Vers 1 e taki: „Now a ben pasa na ini a di foe dritenti jari, na ini a di foe fo moen, na tapoe a di foe feifi dei foe a moen, di mi ben de na mindri den katiboman na a liba Kebar, taki hemel ben opo èn mi ben bigin si fisjoen foe Gado.” San joe e si foe na vers disi? A e gi wan soifri datum èn wan soifri presi. Den finifini pisi disi e sori go na a di foe feifi jari foe na katibo foe Kownoe Jojakim, a jari 613 b.G.T.
16. San Esekièl ben si?
16 Na anoe foe Jehovah ben kon de tapoe Esekièl, èn a ben bigin si wan fisjoen, di ben meki a kisi dipi lespeki, foe Jehovah na tapoe en kownoestoeroe ini wan bigi hemel wagi di ben abi hei wiel nanga ai di ben de lontoelontoe den wiel. A finifini pisi foe a tori di abi wi prakseri na disi taki fo kriatoeroe ben de, èn na ibri wiel wan ben tanapoe. „Èn disi na fa den ben tan: den ben gersi sma foe grontapoe. Èn ibriwan ben abi fo fesi, èn ibriwan foe den fo frei . . . Èn foe a fasi fa den fesi foe den ben gersi, den fo ben abi wan fesi foe wan libisma nanga wan fesi foe wan lew na a retisei, èn den fo ben abi wan fesi foe wan mankaw na a kroektoesei; èn den fo ben abi a fesi foe wan aka toe.” — Esekièl 1:5, 6, 10.
17. San den fo fesi foe den keroebim e prenki?
17 San ben de den fo libi kriatoeroe disi? Esekièl ensrefi e froeteri wi taki den ben de keroebim (Esekièl 10:1-3, 14). Foe san ede den ben abi fo fesi? Na foe prenki a Soeverein Masra Jehovah en fo moro prenspari eigifasi. A fesi foe na aka ben prenki koni di e meki a si sani te na ini a tamara (Job 39:27-29). San a fesi foe a mankaw ben prenki? Nanga a kefalek bigi krakti foe en neki nanga skowroe, wan mankaw di e feti, sma sabi taki a kan opo wan asi nanga en tjariman trowe go na loktoe. Foe troe, a mankaw na wan prenki foe a krakti foe Jehovah di de sondro skotoe. A lew e gebroiki foe prenki deki-ati retidoe. Te foe kaba, a fesi foe wan libisma nanga reti e prenki a lobi foe Gado, foe di libisma na a wan-enkri kriatoeroe na grontapoe di kan sori na eigifasi disi nanga en froestan. — Mateus 22:37, 39; 1 Johanes 4:8.
18. Fa na apostel Johanes e jepi wi foe kan froestan sani foe a hemel organisâsi moro boen?
18 Tra fisjoen de di kan jepi wi foe froestan a prenki krinkrin. Disi abi na ini toe den fisjoen foe Johanes di abi foe doe nanga a bijbelboekoe Openbaring. Neleki Esekièl, Johanes e si Jehovah na tapoe wan glori kownoestoeroe makandra nanga keroebim. San den keroebim e doe? Den e bari taki baka san den seraf ben meki bekènti na ini Jesaja kapitel 6, e taki: „Santa, santa, santa Jehovah Gado de, na Almaktiwan, di ben de èn di de èn di e kon” (Openbaring 4:6-8). Johanes e si wan pikin skapoe toe na a kownoestoeroe. Soema a wan dati ben sa prenki? A Pikin Skapoe foe Gado srefi, Jesus Krestes. — Openbaring 5:13, 14.
19. San joe kon si foe na organisâsi foe Jehovah, nanga jepi foe a studie disi?
19 So boen, san wi kon si nanga jepi foe den fisjoen disi? Taki Jehovah Gado na tapoe en kownoestoeroe de na a ede foe a hemel organisâsi, makandra nanga a Pikin Skapoe, Jesus Krestes, di de a Wortoe, noso Logos. Baka dati, wi si wan hemel legre foe engel, pe seraf nanga keroebim ben de na ini toe. Den na wan pisi foe wan bigi organisâsi di de na ini wánfasi èn di e dini den prakseri foe Jehovah. Èn wán foe den prakseri dati na a preiki foe a boen njoensoe na heri grontapoe na ini a ten disi foe a kaba. — Markus 13:10; Johanes 1:1-3; Openbaring 14:6, 7.
20. Sortoe aksi sa kisi piki ini na artikel di e kon now?
20 Te foe kaba, wi abi Kotoigi foe Jehovah na grontapoe di e kon makandra ini den Kownoekondre zaal foe kan leri fa foe doe a wani foe a Soeverein Masra. Foe troe, now wi kan froestan taki moro de nanga wi, leki den wan di de nanga Satan èn den feanti foe waarheid. We, na aksi de ete: San a hemel organisâsi abi foe doe nanga a preiki foe a Kownoekondre boen njoensoe? Na artikel di e kon sa ondrosoekoe dati, nanga tra afersi.
Aksi foe loekoe sani sjatoe baka
◻ San wi moesoe froestan foe kan abi warderi gi Jehovah en organisâsi?
◻ Sortoe ondrofeni a foetoeboi foe Elisa ben abi, èn fa a profeiti ben gi en deki-ati?
◻ Fa wi moesoe prakseri foe persoonlijk studie?
◻ Fa Danièl, Jesaja, nanga Esekièl e gi finifini bodoi foe a hemel organisâsi?
[Prenki na tapoe bladzijde 13]
Den winimarki foe persoonlijk studie e pasa den di foe wan njanjan di sreka boen
[Prenki na tapoe bladzijde 15]
Wan fisjoen foe hemel legre ben de a piki foe Jehovah tapoe Elisa en begi