Te foe kaba — Retidoe gi ala sma

„Wi sa doe moeiti foe arki na njoen fasi . . . foe arki na den sten di ondrofeni kroektoedoe, den sten di e broko den ede, den sten di lasi howpoe taki trawan e jere den. . . . San tan abra na foe doe san skrifi na ini a wet: foe sorgoe taki te foe kaba neleki fa ibri sma e gebore nanga a srefi wartifasi bifo Gado, na so ala sma e gebore nanga a srefi wartifasi bifo tra libisma.” — A fosi taki foe Richard Milhous Nixon, presidenti foe Amerkankondre, 20 januari 1969.

TE KOWNOE, presidenti, nanga fosi minister e bigin nanga a wroko foe den, dan den abi a gwenti foe taki foe retidoe. Richard Nixon, di ben de presidenti foe Amerkankondre fosi, no ben handri na wan tra fasi. Ma den krakti èn moi wortoe foe en ben lasi den waarde te wi e loekoe den sondro foe teki partèi, soleki fa a historia e sori dati. Ala di a presidenti ben pramisi taki ’a ben sa doe san skrifi na ini a wet’, tokoe baka ten den ben kroetoe taki Nixon ben fowtoe na ini a tori foe a pasa di a ben pasa a wet èn Nixon ben moesoe saka leki presidenti. So wan dritenti jari moro fara, ’den sten di ondrofeni kroektoedoe, den sten di e broko den ede, den sten di lasi howpoe taki trawan e jere den’, e tan bari foe sma jere den.

Foe jere den sortoe sten disi èn foe gi piki na den sari foe den, a no wan makriki sani, soleki fa foeroe tiriman di ben wani doe boen sani troetroe kon si. A moeilek srefisrefi foe doro a marki foe doe ’retidoe gi ala sma’. Ma tokoe, foeroe jarihondro pasa, wan pramisi ben gi di e froedini en taki wi poti prakseri na tapoe en — wan aparti pramisi na ini a tori foe retidoe.

Nanga jepi foe en profeiti Jesaja, Gado ben gi en pipel a djaranti taki a ben sa seni wan „foetoeboi” go gi den, di Ensrefi ben sa froekisi. „Mi poti mi jeje na ini en”, Jehovah ben taigi den. „Retidoe a sa tjari gi den nâsi.” (Jesaja 42:1-3) No wan libisma tiriman ben sa abi a deki-ati foe meki so wan bigi sani bekènti, wan sani di ben sa tjari retidoe kon foe ala ten èn gi ibri nâsi. Wi kan froetrow a pramisi disi? A kan, taki so wan bigi seti kan kon troe oiti?

Wan pramisi di wi kan froetrow

Wan pramisi de foe froetrow, soso efoe a sma di e gi a pramisi de foe froetrow toe. Ini a kefal disi, a de no wan tra sma leki na Almakti Gado di e meki bekènti taki en „foetoeboi” sa seti retidoe na ala presi foe grontapoe. Heri tra fasi leki politiek man, Jehovah no e meki somaar pramisi. Bijbel e gi wi a djaranti taki ’Gado no kan lei kwetikweti’ (Hebrewsma 6:18). „San mi bosroiti foe doe na dati sa pasa toe”, Gado e meki bekènti na wan krakti fasi. — Jesaja 14:24, Today’s English Version.

Na overtoigi di wi abi na ini a pramisi dati, e kon tranga so srefi nanga jepi foe a tori foe Gado en „foetoeboi” di a ben froekisi, Jesus Krestes. A sma di ben sa wani seti retidoe moesoe lobi retidoe èn moesoe libi akroederi retidoe. Jesus ben libi wan boen nen na baka leki wan man di ’ben lobi regtfardikifasi èn di no ben wani si kroektoedoe na ai’ (Hebrewsma 1:9). San a ben taki, fa a ben libi, èn srefi fa a ben dede, ala den sani disi ben sori taki a ben de troetroe wan regtfardiki man. Na a ten foe a dede foe Jesus, wan legre ofsiri foe Rome, di soleki fa a e sori, ben de kotoigi foe a kroetoe nanga a dede foe Jesus, ben taki: „Foe troe a man disi ben de regtfardiki.” — Lukas 23:47.

Boiti taki Jesus ben libi wan regtfardiki libi, a ben kakafoetoe toe gi a kroektoedoe di ben de so foeroe na ini a ten foe en. A ben doe disi, no nanga jepi foe wan coup noso revo, ma nanga jepi foe a leri di a ben e leri sma di ben wani arki san na troe retidoe. A Bergitaki foe Jesus na wan kefalek moi froeklari foe fa retidoe nanga regtfardikifasi moesoe doe. — Mateus, kapitel 5-7.

Den sani di Jesus ben e preiki na dati a ben e doe toe. A no ben wisiwasi den sma di no ben man jepi taki den ben de gwasiman, den „sma di trawan no mag fasi” ini a djoe libimakandra. Na presi foe dati, Jesus ben taki nanga den, èn ben dresi den srefi (Markus 1:40-42). Ala den sma di a ben miti, so srefi den pôtisma èn den sma di e kisi kwinsi, ben de prenspari sma gi en (Mateus 9:36). „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati”, na so a ben taigi den. — Mateus 11:28.

San de moro prenspari, Jesus ben weigri foe meki a kroektoedoe di ben pasa lontoe en, ben meki taki en kon kroeka toe noso ben kon kisi bita-ati. Noiti a ben pai ogri nanga ogri baka (1 Petrus 2:22, 23). Srefi di a ben abi hebi pen, a ben begi en hemel Tata gi den srefi sroedati di ben spikri en na wan pina-oedoe. „Tata, gi den pardon,” a ben aksi tranga, „bika den no sabi san den e doe.” (Lukas 23:34) A de krin taki, Jesus ’ben tjari kon na krin gi den nâsi san na retidoe’ (Mateus 12:18). Sortoe moro bigi boeweisi wi abi taki Gado wani seti wan regtfardiki grontapoe dan a libilibi eksempre foe en eigi Manpikin?

Sma kan wini kroektoedoe

Wan libilibi boeweisi taki wan sma kan wini kroektoedoe de so srefi na a grontapoe foe a ten disi. Leki aparti sma, èn so srefi leki wan organisâsi, Jehovah Kotoigi e doe moeiti foe wini a kroetoe di sma e kroetoe trawan na fesi sondro reide, a desko di sma e desko sma foe wan tra ras, nanga a doe di ogri e doe nanga tranga. Poti prakseri na tapoe na eksempre di e kon now.

Pedroa ben bribi taki foe opo ensrefi teige tirimakti ben de a wan-enkri fasi foe tjari retidoe na a Baskis kondre, a kontren na Spanjorokondre pe a ben libi. Foe doro a marki disi, a ben tron wan memre foe a terrorist organisâsi di ben gi en sroedati leri na Fransikondre. Baka di a ben kaba nanga a leri dati, a ben kisi ordroe foe seti wan terrorist groepoe èn foe soetoe den oso pe skowtoe ben e libi na ini, panja. A groepoe foe en ben e sreka den fetisani foe soetoe den oso pe skowtoe ben e libi na ini, panja, di skowtoe ben kon hori en. A ben tan 18 moen na ini doengroe-oso, ma srefi di a ben de drape, a ben go doro nanga den politiek aktiviteit foe en foe di a ben e teki prati na ini a tapoe di a ben tapoe foe njan, èn a koti di a ben koti den polsoe foe en wan leisi.

Pedro ben bribi taki a ben e feti gi retidoe. Baka dati a ben kon leri sabi Jehovah nanga den prakseri foe En. Na a srefi ten di Pedro ben de na ini doengroe-oso, a wefi foe en ben bigin studeri bijbel nanga Jehovah Kotoigi, èn di Pedro ben komoto foe doengroe-oso, en wefi ben gi en a kari foe fisiti wan foe den konmakandra foe den. A ben lobi a tori srefisrefi, taki a ben aksi wan bijbelstudie, wan studie di ben meki taki a tjari bigi kenki kon na ini a fasi fa a ben e denki èn a fasi fa a ben e libi. Te foe kaba, na ini 1989, ala toe sma, Pedro nanga en wefi ben teki dopoe.

„Mi e taki Jehovah tangi, dati noiti mi no ben kiri wan sma na ini ala den jari di mi ben de wan terrorist”, na so Pedro e taki. „Now mi e gebroiki a feti-owroe foe Gado en jeje, bijbel, foe gi sma wan boskopoe foe troe vrede nanga retidoe — a boen njoensoe foe Gado Kownoekondre.” No so langa pasa Pedro di e dini leki wan owroeman foe Jehovah Kotoigi now, ben fisiti den srefi oso di a ben wani soetoe panja. A leisi disi, a ben go foe preiki wan boskopoe foe vrede gi den osofamiri di e tan drape.

Jehovah Kotoigi e kenki den libi foe di den wani wan regtfardiki grontapoe srefisrefi (2 Petrus 3:13). Ala di den e froetrow soso a pramisi foe Gado foe tjari a sani disi kon, tokoe den e froestan taki den abi a plekti toe foe libi akroederi retidoe. Bijbel e sori wi krinkrin taki Gado e froewakti foe wi taki wi e doe san wi moesoe doe foe wi sei.

Sai siri foe regtfardikifasi

A troe, taki te wi kisi foe doe nanga kroektoedoe, dan wi kan wani bari son leisi: „Pe a Gado foe retidoe de?” Dati na san den djoe ben bari na ini den dei foe Maleaki (Maleaki 2:17). Gado ben teki a kragi foe den leki wan serjoesoe sani? Kontrari foe dati, a ben „weri” foe dati, foe di, na mindri tra sani, densrefi ben handri feradelek nanga a wefi foe den di ben kon owroe kaba, èn ben e brokotrow nanga den foe den moro pikin sani ede. Jehovah ben broko en ede nanga ’a wefi foe den jongoe jari, nanga soema den ben handri feradelek, ala di den wefi ben de den patna èn den wefi foe a froebontoe foe den’. — Maleaki 2:14.

Wi kan kragi nanga reti foe kroektoedoe te wisrefi e handri na wan onregtfardiki fasi? Na a tra sei, wi e sori taki troetroe wi lobi retidoe, te wi e proeberi foe waka na baka Jesus foe di wi e poeroe foe wi ati a kroetoe di sma e kroetoe trawan na fesi sondro reide èn a desko di sma e desko wan tra ras, foe di wi no e teki sma partèi èn lobi ala sma, èn foe di wi no e pai ogri nanga ogri.

Efoe wi ben sa wani koti retidoe, dan bijbel e gi wi tranga foe ’sai siri ini regtfardikifasi’ (Hosea 10:12). A no abi trobi o pikin a kan gersi, ibri pikin wini di wan sma e wini kroektoedoe, de prenspari. Soleki fa Martin Luther King, Jr., ben skrifi ini en Letter From Birmingham Jail, (Brifi foe a strafoe-oso na Birmingham) „kroektoedoe na iniwan presi na wan kefar gi retidoe na ala presi”. Den wan di e „soekoe regtfardikifasi” na den sma di Gado e teki poeroe foe kisi a regtfardiki njoen grontapoe foe En di e kon heri-esi. — Sefanja 2:3.

Wi no kan bow wi howpoe gi retidoe tapoe a fondamenti di e sekiseki èn di gron tapoe pramisi foe libisma, ma wi kan froetrow a wortoe foe wi lobi-ati Kriaman. Dati meki Jesus ben taigi den bakaman foe en, foe tan begi meki a Kownoekondre kon (Mateus 6:9, 10). Jesus, a salfoe Kownoe foe a Kownoekondre dati, „sa froeloesoe a pôtiwan di e bari foe kisi jepi, So srefi a sma di e kisi kwinsi èn ibri sma di no abi jepiman. A sa firi sari gi den mofinawan èn gi a pôtiwan, Èn a sa froeloesoe den sili foe den pôtiwan”. — Psalm 72:12, 13.

A de krin taki kroektoedoe no sa tan foe ala ten. A tirimakti foe Krestes abra heri grontapoe sa wini foe kroektoedoe foe têgo, soleki fa Gado e gi wi a djaranti nanga jepi foe en profeiti Jeremia: „A ten e kon pe mi sa meki a pramisi di mi meki, kon troe . . . Na a ten dati mi sa froekisi leki kownoe wan regtfardiki bakapikin foe David. A kownoe dati sa doe san reti èn reti a sa doe na a heri kondre.” — Jeremia 33:14, 15, TEV.

[Foetoewortoe]