Si a grani foe santa diniwroko leki wan sani di abi foeroe waarde

TOEWIJZING gi santa diniwroko no de sani di sma moesoe si leki sani di abi pikinso waarde. Di priester na Juda foe owroeten ben sori wan mi-no-ke fasi gi den grani foe den na Jehovah en tempel, A ben gi den tranga piri-ai (Maleaki 1:6-14). Èn di wan toe Israèlsma ben gi den Nasireisma a tranga foe si a frantiwortoe foe den, di den ben teki foe doe santa diniwroko, leki wan lekti sani, dan Jehovah ben piri-ai gi den sondoe Israèlsma dati (Amos 2:11-16). Troe kresten e doe santa diniwroko toe, èn den e teki en leki wan serjoesoe wroko (Romesma 12:1). A santa diniwroko disi abi foeroe sani, ala den sani disi de prenspari.

Di Jesus ben de na grontapoe ete nanga den bakaman foe en, a ben leri den foe tron preikiman foe Gado Kownoekondre. Baka wan pisi ten, a boskopoe foe den ben sa doro te na den kaba pisi foe grontapoe (Mateus 28:19, 20; Tori foe den Apostel 1:8). A preikiwroko disi kon de moro tranga fanowdoe srefi, na ini den lasti dei foe a seti foe sani foe now.

Ala Jehovah Kotoigi abi wan prati na ini a wroko disi. Hondrohondro doesoendoesoen foe den Kotoigi abi prisiri foe di den man doe a wroko disi leki pionier. Foe kan sorgoe gi prenspari fanowdoe ini a wroko di e doe na heri grontapoe, dan doesoendoesoen sma gi densrefi foe doe spesroetoe foeroeten diniwroko na Bethel, na ini a wroko foe e rèis leki kringopziener nanga distriktopziener, noso na ini a zendingwroko. San den wan disi kan doe efoe den wani go doro nanga so wan sortoe spesroetoe diniwroko?

Te a famiri abi tranga jepi fanowdoe

Bifo wan sma e teki a spesroetoe foeroeten diniwroko, dan foeroetron a moesoe tjari wan toe kenki kon ini den situwâsi foe en. A no ala sma kan doe disi. A plekti di bijbel e gi sma, kan meki taki den no kan doe a wroko disi srefisrefi. Ma san e pasa te den wan di de ini a spesroetoe diniwroko kaba, e kisi foe doe nanga tranga jepi di de fanowdoe gi a famiri pe kande owroe papa noso mama de ini a tori? Bijbel gronprakseri nanga rai soleki den wan di e kon now e sori wan sma san a kan doe.

Wi heri libi moesoe drai lontoe wi matifasi nanga Jehovah (Preikiman 12:13; Markus 12:28-30). Wi moesoe si santa sani di trawan froetrow na ini wi anoe leki sani di abi foeroe waarde (Lukas 1:74, 75; Hebrews 12:16). Na wan okasi, wan man di ben moesoe kenki den sani di e kon na a fosi presi ini en libi, ben kisi foe jere foe Jesus taki a ben moesoe meki a Kownoekondre foe Gado bekènti dorodoro. Soleki fa a sori, dan a man ben wani skoifi a wroko disi te baka di en papa dede (Lukas 9:59, 60). Na a tra sei, Jesus ben poeroe a fowtoe denki kon na doro foe ibriwan sma di e taki dati a gi ala sani abra na Gado èn dan a no ben „doe noti moro gi en papa noso en mama” (Markus 7:9-13). Na apostel Paulus toe ben sori a serjoesoe frantiwortoe foe sorgoe „gi den sma foe en”, so srefi papa nanga mama èn granpapa nanga granmama. —1 Timoteus 5:3-8.

Disi wani taki dati te famiri abi tranga jepi fanowdoe, dan den wan di e doe spesroetoe diniwroko moesoe libi a toewijzing foe den so taki den kan go sorgoe gi den famiri? Foeroe sani de di e prei wan ròl foe piki na aksi. A bosroiti di wan sma e teki na wan bosroiti di ensrefi teki (Galasiasma 6:5). Foeroe foe den ben teki a bosroiti taki, ala di den e si a toewijzing foe den leki wan bigi goedoe, tokoe a ben sa koni gi den foe de nanga a papa nanga a mama foe den so taki den kan jepi den. Foe san ede den ben doe so? Foe di a jepi foe den kande ben de tranga fanowdoe, kande foe di tra memre foe a famiri no de di kan jepi, noso a gemeente foe a papa nanga a mama no kan doe den sani di de fanowdoe foe jepi. Wan toe sma ben man pionier ala di den ben e jepi den papa nanga mama foe den. Trawan ben man bigin agen nanga a spesroetoe foeroeten diniwroko baka di den ben sorgoe gi a famiri foe den. Ma ini foeroe kefal, den ben kan doe tra fasi nanga a situwâsi.

Den e teki a frantiwortoe foe den

Te tranga jepi de fanowdoe, dan wan toe sma di de ini spesroetoe foeroeten diniwroko ben man poti prakseri na den fanowdoe dati sondro foe den gowe libi a toewijzing foe den. Loekoe soso wan toe foe den foeroe eksempre di de.

Wan trowpaar di e dini na a edekantoro foe Jehovah Kotoigi, ben bigin nanga Bethel diniwroko na ini 1978, baka di den ben abi wan prati kaba na ini a distriktwroko èn nanga a kringwroko. A toewijzing foe a brada abi foe doe nanga hebi frantiwortoe ini a theokrasia organisâsi. Ma en papa nanga mama ben abi jepi fanowdoe toe. A trowpaar disi foe Bethel e tjari dri noso fo fisiti ibri jari — so wan 3500 kilometer go-kon — foe sorgoe gi a papa nanga mama. Densrefi ben bow wan oso foe sorgoe gi san a papa nanga mama abi fanowdoe. Den ben go toe foe sorgoe gi jepi di ben de fanowdoe srefisrefi foe datra sei. Den gebroiki pikinmoro ala a fakansi ten foe den foe so wan 20 jari, foe sorgoe gi a frantiwortoe disi. Den lobi a papa nanga mama èn den e gi den grani, ma den e si a grani foe den foe doe santa diniwroko, leki wan warti sani toe.

Wan tra brada ben de wan opziener di e rèis so wan 36 jari kaba di a ben kisi foe doe nanga wan foe den moro tjalensi situwâsi ini en libi, soleki fa ensrefi e kari en. En wefi mama di abi 85 jari, wan getrow foetoeboi foe Jehovah, ben moesoe libi nanga wan sma di ben kan jepi en. Na a ten dati, foeroe foe den pikin foe en ben firi taki a no ben o fiti foe a mama kon libi na den. Wan foe den famiriman ben taigi na opziener di e rèis taki en nanga en wefi moesoe libi a diniwroko dati èn, foe a boen foe a famiri, den ben moesoe sorgoe gi a mama. Ma a trowpaar no ben tapoe nanga a diri diniwroko foe den, ma so srefi den no ben si den sani di a mama ben abi fanowdoe leki sani di no de prenspari. Den neigi jari di ben kon baka dati, a mama ben de moro foeroe nanga den. Na a bigin den ben libi ini wan oso di kan go foe a wan presi na a tra presi, baka dati den ben libi na difrenti oso di a kring ben gi den. Efoe a ben teki langa ten, dan a brada di ben de wan distriktopziener na a ten dati, ben tan rèis go foe doe a toewijzing foe en, ala di en wefi ben rèis nanga a mama foe sorgoe gi en na wan lobi-atifasi. Ibri wiki baka den konmakandra, sonde, a masra ben moesoe teki langa waka go baka foe jepi den. Foeroe sma di ben kon sabi foe a situwâsi, ben sori foeroe warderi gi den sani di a trowpaar disi ben e doe. Baka wan pisi ten, sani ben boeweigi tra memre foe a famiri toe foe doe wan toe sani foe jepi a mama. Doesoendoesoen sma foe a pipel foe Jehovah tan njanboen foe a diniwroko foe a trowpaar disi di ofer densrefi, foe di a trowpaar disi ben tan hori a grani foe den foe spesroetoe foeroeten diniwroko.

Nanga jepi foe a famiri

Te tra famiriman e froestan a waarde foe a spesroetoe foeroeten diniwroko, dan den kan wroko makandra so taki tokoe wan toe foe den kan teki prati na a wroko disi.

So wan jeje pe a famiri e wroko makandra, ben de wan jepi gi wan trowpaar foe Kanada di e dini leki zendeling na West-Afrika. Den no ben wakti te leki wan nowtoe ben opo ede kon, e howpoe nomo taki noti ben o pasa. Bifo den ben go na a Waktitoren Bijbelskoro Gilead, di ben o sreka den gi diniwroko na wan doroseikondre, a masra ben taki nanga a moro jongoe brada foe en foe sorgoe a mama foe den efoe a ben o siki noso no ben sa man doe noti moro. A moro jongoe brada ben sori lobi gi a mama foe den èn a ben froestan a waarde foe a zendingwroko, di a ben taki: „Mi abi wan osofamiri nanga pikin now. Mi no kan gowe toemoesi fara èn doe den sani di joe kan doe. So boen efoe wan sani pasa nanga mama, mi sa sorgoe gi en.”

Wan trowpaar di e dini leki zendeling na Zuid-Amerika, ben kisi foeroe jepi foe a famiri foe a wefi foe sorgoe gi en mama di e kon owroe. Wan foe den sisa foe a wefi nanga a masra foe a sisa, ben sorgoe gi a mama te leki a sisa dati ben kisi wan takroe siki. San den ben o doe now? Foe poeroe ala broko-ede na pasi, a masra foe a sisa ben skrifi: „So langa mi nanga den pikin de na libi, joe no sa abi foe libi a zendingwroko foe joe noiti.” Moro jepi foe famiri ben kon di wan tra sisa nanga a masra foe en ben libi na oso foe den èn ben froisi go na a presi pe a mama ben e libi so taki den ben kan sorgoe gi en, èn den ben doe disi te leki a mama kon dede. Fa dati na wan moi jeje foe wroko makandra! Den alamala ben e jepi foe horibaka gi a zendingwroko.

Papa nanga mama di e gi Jehovah na wan fri fasi

Foeroetron papa nanga mama e sori heri moi fa den e warderi santa diniwroko. Na mindri den moro warti sani di den abi èn di den kan gi Jehovah grani nanga dati, na den eigi pikin (Odo 3:9). Foeroe kresten papa nanga mama e gi den pikin foe den deki-ati foe go na ini a foeroeten diniwroko. Èn son wan foe den e firi leki Hana, di ben gi en manpikin Samuèl na Jehovah foe doe a diniwroko foe En „gi ten di no skotoe”, dati wani taki gi „ala den dei di a de na libi”. — 1 Samuèl 1:22, 28.

Na so, wan mama ben skrifi na oemapikin foe en na Afrika: „Wi e taigi Jehovah danki gi a kefalek moi grani di joe abi. Wi no ben kan howpoe wan moro boen sani.” Èn na wan tra okasi a mama ben taki: „A troe taki wi moesoe tjari na òfer foe libi aparti foe makandra, ma fa a de wan prisiri foe si fa Jehovah e sorgoe gi joe!”

Baka di wan zendeling na Ekwador ben loekoe den difrenti situwâsi di ben opo ede kon foe di a ben seti a sorgoe di a owroe papa nanga mama foe en ben abi fanowdoe, a ben skrifi: „Mi denki taki a moro bigi jepi di mi nanga mi wefi ben kisi, ben de den begi foe mi papa. Baka a dede foe en, mi mama ben taigi wi: ’Noiti wan dei ben pasa sondro foe joe papa ben begi Jehovah, taki oenoe toe ben kan tan doe a toewijzing foe oenoe.’ ”

Wan owroe trowpaar na California, Amerkankondre, ben breiti foe abi wan foe den boi foe den ini a foeroeten diniwroko. A boi dati nanga a wefi foe en, ben de na Spanjorokondre di a mama dede. Tra memre foe a famiri ben firi taki sani ben moesoe seti foe sorgoe gi a papa. Foe di den ben abi foeroe foe doe nanga grontapoe wroko nanga a kweki di den ben e kweki den pikin foe den, meki den ben firi taki den no ben kan teki a frantiwortoe disi. Na presi foe dati, den ben gi a trowpaar di ben doe spesroetoe foeroeten diniwroko, tranga foe kon baka na oso èn sorgoe gi a papa. Ma ala di a papa abi 79 jari, tokoe a gosontoe foe en ben boen ete èn a ben si jeje afersi krin toe. Di a famiri ben kon makandra wan leisi, baka di foeroe sma ben taki fa den e denki foe a tori, dan a papa ben opo tanapoe èn a ben taki na wan krakti fasi: „Mi wani den go baka na Spanjorokondre èn go doro nanga a wroko drape.” Den ben doe dati, ma den ben jepi en toe na materia sei. A toewijzing di den abi now de ini a kringwroko na Spanjorokondre. Sensi a ten foe a konmakandra dati di a famiri ben abi, tra memre foe a famiri sori warderi gi a diniwroko di a trowpaar e doe na doroseikondre. Baka wan toe jari, wan foe den tra manpikin ben teki a papa na ini en oso te leki a dei di a papa dede.

Na Pennsylvania, Amerkankondre, wan salfoe brada di ben pionier so wan 40 jari kaba, ben pasa 90 jari di a wefi foe en kon siki serjoesoe èn kon lasi en libi. A ben abi wan boi nanga dri oemapikin, boiti den foeroe jeje pikin foe en. Wan foe den oemapikin foe en ben de ini a foeroeten diniwroko moro leki 40 jari, a ben e dini nanga en masra leki zendeling, na ini a wroko gi opziener di e rèis, èn na Bethel. Na oemapikin ben seti sani so taki a papa ben sa man kisi jepi di fiti. Den brada drape ben jepi toe foe tjari en go na den konmakandra na a Kownoekondre zaal. Baka ten, di en wefi ben kon dede, na oemapikin ben aksi en papa efoe a ben wani taki a gowe libi Bethel foe sorgoe gi en. A papa ben si santa sani leki sani di abi foeroe waarde, èn a ben firi taki tra fasi ben de fa den ben kan sorgoe gi en. So boen a ben taki: „Dati ben o de a moro ogri sani di joe ben kan doe, èn a ben o moro ogri srefi efoe mi meki joe doe dati.”

Gemeente di e jepi

Son wan foe den gemeente jepi foeroe foe sorgoe gi den papa nanga mama di e kon owroe èn di abi pikin ini a spesroetoe foeroeten diniwroko. Den gemeente disi e warderi spesroetoe den wan di gi so foeroe jari na so wan sortoe diniwroko. Ala di den gemeente disi no kan fri den sma dati foe a frantiwortoe di bijbel e gi den, tokoe den gemeente disi e doe foeroe foe meki a lai kon lekti nofo so taki a no abi foe de fanowdoe taki den pikin moesoe libi a spesroetoe toewijzing foe den.

Wan trowpaar na Doisrikondre ben de ini a toewijzing foe den na doroseikondre so wan 17 jari kaba, foeroe foe a ten dati ini a wroko foe opziener di e rèis; ne a brada en mama di e kon owroe ben abi jepi fanowdoe wantewante. Ibri jari den ben gebroiki a fakansi foe den foe jepi a mama. Kotoigi di ben tan ini a birti ben gi jepi na wan lobi-ati fasi toe. Baka dati di a trowpaar di ben de ini foeroeten diniwroko ben de nanga a mama ini wan toemoesi moeilek ten, den owroeman foe a gemeente drape ben seti sani foe miti nanga a trowpaar. Den ben sabi heri boen san a trowpaar ben doe doronomo gi a mama. Den ben abi warderi toe gi a spesroetoe diniwroko di a trowpaar ben doe. So boen den owroeman ben seti wan programa foe sorgoe gi a mama èn baka dati den ben taki: „Joe no kan sorgoe gi en moro leki san joe e doe now; wi sa jepi joe so taki joe kan tan doe a toewijzing foe joe na Spanjorokondre.” Na ini den seibi jari di pasa, den owroeman disi ben go doro nanga a jepi disi.

Na a srefi fasi, wan brada di ben e dini na Senegal sensi 1967, ben kisi foeroe lobi-ati jepi foe a gemeente pe en papa ben de. Di wan moeilek ten ben doro, dan a masra, foe di en lobi wefi ben de klariklari foe wroko makandra nanga en, ben go en wawan na Amerkankondre foe jepi en papa nanga mama. A ben feni taki a ben de fanowdoe foe a tan drape wan toe moen. A situwâsi ben moeilek, ma di a ben doe san a kan doe, dan a gemeente ben kon na ini a tori èn ben jepi en so taki a ben kan go doro nanga a zendingwroko foe en. Moro leki wan pisi ten foe so wan 18 jari, a gemeente ben gi jepi na wan lobi-ati fasi na foeroe fasi di wi no man teri, fosi gi a papa (ala di foeroe foe den now, a no ben man sabi moro soema na den) èn baka dati gi a mama. Disi ben meki taki a manpikin no ben abi frantiwortoe moro? Nôno; foeroe leisi a ben e komoto foe Senegal èn a ben e gebroiki ala en fakansi foe gi ala jepi di a ben kan gi. Ma foeroe sma ini a gemeente dati ben pisiri foe sabi taki den ben abi wan prati foe meki wan trowpaar di e wroko tranga, tan ini a spesroetoe foeroeten diniwroko foe den na Senegal.

Jesus ben taki dati den sma di ben libi ala sani gi a boen njoensoe ede, ben sa kisi brada, sisa, mama, nanga pikin hondrohondro tron baka (Markus 10:29, 30). Dati de so seiker na mindri den foetoeboi foe Jehovah. Wan trowpaar di e dini now na Benin na West-Afrika, ben ondrofeni disi na wan spesroetoe fasi di toe kotoigi ini a gemeente foe a papa nanga mama foe den, ben taigi den taki den no abi foe broko den ede nanga a papa nanga mama. Den toe kotoigi ben taki moro fara: „Joe papa nanga mama, na wi papa nanga mama toe.”

Ija, foeroe fasi de fa wi kan sori taki wi abi foeroe lespeki gi santa diniwroko. Wan toe fasi de fa joe ben kan doe dati moro boen srefi?

[Prenki na tapoe bladzijde 26]

Den gi densrefi foe doe a spesroetoe foeroeten diniwroko